MATEU 13:1-53 MARKO 4:1-34 LUKA 8:4-18

  • YESU ULEJEN YISHIMU PIUR PA WANT

Chimeken pamwing ap anch Yesu wading mu Kapernaum chisu chayipupay Afaris. Kupwa kwa machuku makemp, ndiy wadiokala ku chikumbu chadingay ni waya piswimp ni Karung wa Galalia, kwadinga yisak ya antu. Yesu wandama mu waat, kupwa wachirika kwinyim pakemp chakwel asambisha kuyifundish antu piur pa Want wa mwiur. Pafundishay wasadina yishimu ap yilakej yivud. Antu ading amuteshina ading ij nawamp yom yasadinangay mu yishimu yiney chawiy chayiswapela kutesh nawamp kurumburik kwa Want.

Chishimu cha kusambish chasadinay Yesu chading cha mwin kukus mbut. Mbut jimwing jawila kuns kwa njil ni atujil ajidia. Mbut jikwau jawila pa mayal makweta divu dikemp. Mbut jinej jaminya pakwez mij yandamap mu divu nakash mulong wa mayal, chawiy pabudika muten mutond winou wakwanyata ni wauma. Pakwez, mbut jikwau jawila mu yifukis ya miy, chad yifukis yiney ya miy yakasa mbut jinej pijaminya. Kupwa, mbut jikwau jawila pa divu difukina. Mbut jiney jasonga mabuj, “jimwing jasonga mabuj chitot, jikwau jasonga mabuj makum musamban, chad jikwau jasonga mabuj makum masatu.”—Mateu 13:8.

Mu chishimu cha kaad, Yesu wafanikesha Want ni mwin kukus mbut. Mu chishimu chinech, padingay palelay muntu kupwa palankay, mbut jinej jading japamang kal. Pakwez, “ndiy kijap mutapu ujikata kukul.” (Marko 4:27) Mbut jinej jipamina jabudisha mabuj kupwa mwin kukus mbut waya kwangul.

Yesu wisambina kand chishimu cha kasatu piur pa mwin kukus mbut. Muntu umwing wakusa mbut jiwamp pakwez “padingau antu alel,” mukankuny weza uchuku, wakus yinfananfan mu chir cha tidiku. Atushalapol a mwin kukus mbut amwipula chakwel abwita yinfananfan yiney. Chawiy ndiy wayakula anch: “Bwat, mulong piukubwitanya yinfananfan ap wez wakabwitilanyiku tidiku. Likany  tidiku ni yinfananfan yikudila kwau pamwing djat ni pa chirung cha kwangul. Chawiy nikez kuyilej in kwangul anch: Yang ubwitany bil yinfananfan, uyikasany yit yit, uyoshany. Chad lel ukumangejany tidiku, umutekany mwi nkil yam.”—Mateu 13:24-30.

Chawiy antu avud ading amuteshina Yesu ading ij nawamp mudimu wa kudim. Ndiy wajimbula kand rubut ra mutard rading rijau nawamp. Rubut riner rapama rikal mutond ujim nakash ni atujil asambisha kushakam mu mitiy ya mutond winou. Chawiy ndiy walonda piur pa rubut riner anch: “Want wa Mwiur ufanaken mudi rubut rikemp ra mutond, upidilau anch mutard, rakunay muntu mu chir chend.” (Mateu 13:31) Pakwez, Yesu kadingap ni kufundish malejan piur pa kudim. Chawiy, ndiy wading ufanikeshin kukul kwinoku kushimokishena kwa rubut rikemp rikala mutond ujim nakash.

Kupwa, Yesu walejena kand yom yikwau yading yijau nawamp kudi in kumutesh end avud. Ndiy wafanikesha kand Want wa mwiur ni “chivish cha mabot chanonay mband umwing, wasamp nich [yilik ya wung yisatu].” (Mateu 13:33) Ap anch chivish chinech chimekeningap mutapu chiyila kututuk, pakwez chikat kupalangan mu wung wawonsu wa kusamp ni kuututwish. Chivish chinech chikat kututuk mu mutapu umwing ushimokishena pakwez chimekeningap mutapu chitutukininga.

Papwishay kwisambin pa yishimu yiney, Yesu wayiladika antu kupwa wachirika ku chikumbu kwadingay. Pakad kulab, in kwilejend amulondula chakwel ayileja kurumburik kwa yishimu yiney.

KUTANINAMU MU YISHIMU YA YESU

In kwilej a Yesu amuteshang Yesu ukat kusadin yishimu, pakwez kading kapamp ka kusambish kusadin yishimu yiney. Amwipula anch: “Ov, mulong wak ukata kuyilejin antu mu yishimu?”—Mateu 13:10.

Diyingish dimwing diasadinay yishimu diading mulong wa kuwanyish uprofet wa Bibil. Mateu walonda anch: “Kayilejap chom wakad kuyitil chishimu. Ndiy wasala mwamu chakwel mawanyina mazu malonday [muprofet] anch: ‘Nikez kuyilejin mu yishimu, nikez kuyilej yom yakad kwijikan kudiokal ku disambishil dia mangand.’”—Mateu 13:34, 35; Kuseng 78:2.

Pakwez, kudi yom yivud yasala anch Yesu asadina yishimu. Yishimu yiney yakwasha kumekesh mikadil yadingau nich antu. Antu avud amukata Yesu mulong wading ni ukaliweny wa kufundish ni usu wa kusal yilay. Kamumanap mudi muntu uwanyidina kuziyin udia Nsalejetu ap muntu ufanyidinau kulondul nich muchim uwamp. (Luka 6:46, 47) Pakwez, antu inay kakatap kuswimp mashakamin mau ni yisal yau. Chawiy uruu wayilejau wikalap nich chibachikin mu mwom wau.

Mulong wa kwakul ku chipul cha in kwilejend, Yesu walonda anch: “Nikat kuyilejin mu yishimu mulong awiy akat kutal wakad kushinshik nawamp, akat kutesh wakad kwov kurumburik. Mwamu awiy akat kuwanyish mazu malonday [muprofet] Isay, anch: ‘. . .Mulong michim ya antu inay yichinchikin.’”—Mateu 13:13-15; Isay 6:9, 10.

Mazu minam kamalondap mulong wa antu awonsu amutesha. Yesu walonda anch: “Pakwez en wayukany kwen! Mes men makat kuman, ni matu men makat kutesh. Nakulejany chakin, [aprofet] a Nzamb, ni antu avud a Nzamb asota nakash kuman yom yiumenanya en, pakwez kayimanap. Asota kand kutesh yom yiuteshilanya en, pakwez kayiteshap bwat.”—Mateu 13:16, 17.

Chakin kamu, atwimbuy 12 ni in kwilej akwau ashinshamena ading ni muchim wa kutesh malejan minam. Chawiy chalonday Yesu anch: “En akwinkishanya kal ronganyin ra [kutesh] ujindj wa yom ya Want wa mwiur, pakwez kudi awiy, bwat.” (Mateu 13:11) Mulong in kwilej ading ni muchim wa kutesh, chawiy Yesu wayileja in kwilejend kurumburik kwa yishimu ya mwin kukus mbut.

 Yesu walonda anch: “mbut diawiy dizu dia Nzamb.” (Luka 8:11) Divu wawiy muchim. Wawiy mutapu wakwasha kutesh kurumburik kwa chishimu chend.

Piur pa mbut jawila kuns kwa njil, Yesu walonda anch: “Sakudimban ukat kwez kudiosh dizu mu michim yau mulong alika kwitiyij kupand.” (Luka 8:12) Palonday piur pa mbut jawila pa mayal padinga divu dikemp, Yesu wading wisambidin piur pa michim ya antu akata kwitiyij dizu nich musangar pakwez mij ya dizu dined yikwandamangap kamu mu michim yau. Antu inay akat kuwa swa pakata: “mar ni kuzengol anch yez mulong wa dizu dia Nzamb.” Chakin kamu anch “chisu cha mar chashik,” pamwing ap rupompat ra antu a mu dijuku ap ra antu akwau, antu inay akat kuwa swa.—Mateu 13:21; Luka 8:13.

Chidi nchik piur pa mbut jawila mu yifukis ya miy? Yesu wayileja in kwilejend anch mbut jinej jirumburikin antu akata kutesh dizu. Pakwez, “yakamish ya mwom wa mangand ni rukat ra mapit,” yikat kuyikas antu inay. (Mateu 13:22) Antu inay akwet dizu mu michim yau, pakwez dizu dined adikasin kal ni dikutwishap kusong mabuj.

Chishimu chisambinay Yesu cha nsudien chading cha divu difukina. Divu dined dirumburikin antu atesha dizu ni aditiyija mu michim yau, ashikena ku kutesh kurumburik kwa yom yiney. Yaleta yibudikin ik? Akat “kusong mabuj.” Kukwatijan ni mashakamin mau, mudi chimbu cha mivu ap ukash wa mujimbu, awonsu kakutwishap kusal mudimu wa chilik chimwing; muntu umwing ukutwish kusong mabuj 100 ni kusut, mukwau ukutwish kusong mabuj 60 ni kusut ni mukwau kand ukutwish kusong mabuj 30 ni kusut. Chakin kamu, “antu akata kutesh dizu dia Nzamb, chad adilam mu muchim uwamp wa kuziyil, akat kudandamen djat ni pakusongilau mabuj,” antu inay awiy akata kutambul yiyukish ya kumusadin Nzamb.—Luka 8:15.

Mazu minam mafanyina kuyishimokish pakampwil in kwilejend ading ni mutapu wa kutesh  mafundish minam marumburilay Yesu! Katat, atesh kal nawamp kurumburik kwa yishimu yiney. Yesu wakata anch in kwilejend atesha nawamp kurumburik kwa yishimu yiney chakwel niyawiy atwisha kuyirumburil antu akwau. Chawiy, Yesu wayipula anch: ‘Lamp kamubwikiningap mwi mbekech ap mwinshin mwa ulal, ov, kimwawiyap? Ov, kamutekiningap piur chakwel atokisha nawamp?’ Chawiy chalonday anch: ‘Anch muntu ukwet matu ma kutesh, atesha.’—Marko 4:21-23.

AYUKISHINAU NICH MAFUNDISH MA PIUR

Kupwa kwa kutesh kurumburik kwa yishimu yalonday Yesu piur pa mwin kukus mbut, in kwilej akata kwijik yom yikwau yivud. Amwela anch: “Turumburila chishimu cha yinfananfan yadinga mu chir.”—Mateu 13:36.

Pipulau mwamu, in kwilejend amekesha kapamp kamwing anch ading ni mwikadil ushalijadina ni wa antu akwau ading ku chikum cha karung. Chimeken pamwing ap anch, antu inay atesha pakwez kadingap ni kuswir kwa kutesh kurumburik kwa yishimu yiney ni mutapu wafanyinau kuyisadin. Awiy asangera kwau kutesh yom ya piur-piur yajimbulay Yesu mu yishimu. Yesu wamekesha patok kushalijan kujim kwading pakach pa antu amutesha ading ku chikum cha karung ni in kwilejend amulondula chakwel ayileja kurumburik kwa yom yivud palonday anch:

“Babalany ku yom yiukata kuteshany! Chilik chiukuyilikinanya nich akwen yom, chawiy chikez kukwilikinanyau nich yom yikez kukwinkishanyau. Chakin, akez kukuwejinanyaku kand yikwau!” (Marko 4:24) In kwilejend ashinshikina nakash yom yateshangau kudi Yesu. In kwilej amwilikina Yesu chilik pamekeshau kusanger kwau ni pashinshikinau nawamp kupwa ayiyukisha nich mafundish mavud ni atambula chitokish cha mafundish mend. Chawiy, payakulay in kwilejend akimba kwijik kurumburik kwa chishimu cha yinfananfan ni tidiku, Yesu walonda anch:

“Mwin kukus mbut jiwamp, udi Mwan a muntu. [Chir] mawiy mangand. Mbut jiwamp, awiy an a mu Want; yinfananfan, awiy an a muntu muyimp. Mukankuny wakusa yinfananfan ndiy [Djabul]. Chirung cha kwangul diawiy disudiel dia mangand, chad in kwangul adi angel.”—Mateu 13:37-39, TMK.

Kupwa kwa kurumburil chom ni chom cha mu chishimu, Yesu walonda yom yikushikena kwinsudien. Ndiy walonda anch kwinsudien kwa ditenchik dia yom yiney, in kwangul ap angel akez kwauril in Kristu a makasu adia mudi yinfananfan chakwel alika kubombakan nau “an a mu Want” akin. “In kutentam” akez kuyikumangej ni akez kumunyik pakemp-pakemp chitokish cha “mu Want wa Tatukwau.” Chikwikal nchik piur pa “an a muntu muyimp”? Disudien diau dikwikal kusheshik, chawiy chikezau “kudil ni kwidia ku mazeu.”—Mateu 13:41-43.

Kupwa Yesu wayiyukisha in kwilejend payilejay yishimu yikwau yisatu. Chakusambish walonda anch: “Want wa Mwiur ufaniken mudi dipit diajindjikau mu chir. Muntu mukwau wadibudikina niyend  wadijindjika kand. Waya nich musangar nakash, walandisha yom yend yawonsu [yikwetay] chakwel achirik mulong wa kuland chir chinicha.”—Mateu 13:44.

Walonda kand anch: “Want wa mwiur udi mudi muntu mwin kwisak ukata kukimb mayal ma usey ukash; watan diyal dimwing dia usey ukash ndiy waya walandish yawonsu [yikwetay mulong] wa kudiland.”—Mateu 13:45, 46.

Mu yishimu yiney yaad, Yesu walonda patok piur pa muntu wipanina kwa kwikatin mulong wa yom ya usey. Mwin kwisak walandisha “yawonsu yikwetay” mulong wa kwikal nich diyal dimwing dia usey ukash. In kwilej a Yesu atesha kurumburik kwa chilakej chinech chitadina diyal dia usey. Pakwez, muntu watana dipit diajindjikau mu chir “walandisha yom yend yawonsu” yikwetay. Mu yilakej yiney yawonsu yaad, chom cha usey chafanyinau kwikal nich mu chipau achitana. Chom chinech akutwish kuchifanikesh nich usu usadinay muntu mulong wa kuwanyish maswir mend ma muspiritu. (Mateu 5:3) Antu amwing atesha yishimu yalonday Yesu ading ipanin kal kwa kwikatin mulong asala usu wa kuwanyish maswir mau ma muspiritu ni ikala in kumulondul end akin.—Mateu 4:19, 20; 19:27.

Kupwa Yesu wafanikesha Want wa mwiur nich wand wadjibulau mulong wa kukwat ansh a mitapu yawonsu. (Mateu 13:47) Pasambishau kutond ansh, ansh awamp ayiteka mwi nsapu pakwez ayimp ayidjibula. Yesu walonda anch chikwikal chilik chimwing ni disudien dia ditenchik dia yom yiney—angel akez kwauril antu ayimp nau antu atentamina.

Yesu winou amwinend ndiy wasala mudimu winou wa kuta ansh a muspiritu chisu chayitazukay in kwilejend a kusambish chakwel ikala “ayibind au antu” (Marko 1:17, TMK) Pakwez, ndiy walonda anch chishimu chinech piur pa wand chilondin piur pa machuku ma kurutu, mulong wa ‘disudien dia ditenchik dia yom.’ (Mateu 13:49) Chawiy, atwimbuy nau in kwilej akwau atesha kurumburik kwa yishimu yiney ajingunina anch kudi yom yikwau yivud yisangareshina yikusadika.

Antu atesha yishimu yiney yalonday Yesu padingay mu waat ataninamu nakash. Yesu wamekesha muchim wend wa kwipan ‘payirumburilay in kwilejend yom yawonsu ku ujindj.’ (Marko 4:34) Udi mudi “mwin chikumbu ukata kudiosh yom yikur ni yom yisu mu chipau chend cha mapit.” (Mateu 13:52) Pasadinay Yesu yishimu yiney chadingap mulong wa kumekesh ukaliweny wend wadingay nich wa kufundish bwat. Pakwez, wayileja in kwilejend uyakin udia mudi chipau cha usey nakash. Wading chakin kamu ‘mwin kufundish’ wasadina nawamp yishimu.