MATEU 8:19-22 LUKA 9:51-62 YOHAN 7:2-10

  • MUTAPU WAMUMANAU YESU KUDI ANAMAKWEND

  • MUDIMU WA WANT UKWET USEY IK?

Yisu yimwing Yesu wasalang nakash mudimu wend wa kulejan mu Galalia mulong kwinikwa kwading antu amuteshang nawamp kusutamu mu Yudeya. Chikwau kand, chisu chadingay mu Yerusalem ni pamwokay muntu pa dichuku dia Sabat, “in Yuda asota kumujip.”—Yohan 5:18; 7:1, TMK.

Chading chisu cha ruval cha muvu wa 32 C.C., chawiy Musambu wa Minkand (ap Ankunku) wading piswimp. Musambu winou ausalanga mu machuku sambwad, kupwa kwasadikang kand chitentam cha machuku chinan. Musambu winou wamekeshang anch chirung cha kwangul chapwa kal ni chading chisu cha musangar ujim ni cha kupanijan yipan.

Anamakwend a Yesu—Jakobu, Simon, Josef ni Yudas—amuleja Yesu anch: “Diokal mwi ngand yiney, yang mwi ngand ya Yudeya.” Yerusalem wading musumb ujim ni mwawiy mwadinga mufulandal wa relijon. Mu mivu yisatu yasalangau musambu winou, mu musumb winou mwizulang antu avud. Anamakwend a Yesu atonga anch: “Kwikil muntu ukata kujindjik yisalijok yend anch ndiy ukatil antu kumwijik patok. Anch ey ukat kusal yom yiney, chifanyidin antu awonsu a pa mangand akwijik ey!”—Yohan 7:3, 4.

Chakin kamu anamakwend inay anying “kamwitiyijap” mudi Mesia. Chikwau kand, awiy akimba anch antu awonsu adinga ku musambu amana mutapu ukusalay Yesu yilay yimwing. Pijikay Yesu ubaj ukushikena, ndiy wayileja anch: “Antu a pa mangand kakwetap kwau mulong wakukukisinany en, pakwez akat kwinkis am, mulong nikat kuyilejang anch, yisalijok yau yidi yiyimp. En yangany ku musambu. Am kinikuyap ku musambu winou mulong chisu cham kand kal chiwanyin.”—Yohan 7:5-8.

Kupwa kwa machuku makemp payau anamakwend a Yesu pamwing ni chisak cha antu mu weny, Yesu nau in kwilejend aya ku ujindj pakad kuyiman kudi antu. Yesu nau in kwilejend ayila njil ya ku Samaria pa ndond pakuyil mwi njil ya antu awonsu yadinga piswimp ni Wit wa Yordan. Yesu nau in kwilejend afanyina kwiman mu Samaria, chawiy watuma aruu chakwel atenchika yom kanang. Pakwez, antu kitiyap kuyak mutapu wayakangau angendj mulong Yesu wading uyil ku Yerusalem mulong wa kusal musambu wa in Yuda. Jakobu ni Yohan ipula nich ujim anch: “Ov, Nsalejetu, ey usotil etu kutazuk kasu ka mwiur chakwel kayishesh?” (Luka 9:54) Yesu wayipupa mulong wa chitongijok chinech ni adandamena ni weny wau.

Padingau mwi njil, mulej wa yijil wamwela Yesu anch: “Mulej, am nikukulondul ey kwawonsu kuuyila.” Yesu wamwakula anch: “Amiyeu akwet jindond jau ja kulal, niyau atujil akwet yinswal yau, pakwez Mwan a Muntu kakwetap pa kulal ap pa kwiswedishin.” (Mateu 8:19, 20) Ndiy wamuleja mulej wa yijil winou mar makutwishay kuman anch wakimb kwikal mwin kumulondul Yesu. Chimeken anch mulej wa yijil wading mwin kwitutul mulong wa kwitiy mashakamin ma mutapu winou. Chawiy muntu ni  muntu pakach petu ufanyidin kwiyipul anch: ‘Mutapu ik nikutwisha kumulondul Yesu kwa kwikatin?’

Yesu wamuleja muntu mukwau anch: “Nlondula am.” Muntu winou wakula anch: “Mwant, nlika bil nisambel kuya nikamujika tatukwam.” Pijikay mashakamin ma muntu winou, Yesu walonda anch: “Yisha afu ayijika afu au, pakwez ey yang ukalejan Want wa Nzamb.” (Luka 9:59, 60, TMK) Pakwez, tatukwend wading kandikal afa. Chimeken pamwing ap anch mwan winou waya kwinikwa mulong wa kutesh yom yafundishay Yesu. Mwan winou kirijekap kutek Want wa Nzamb pa ndond ya kusambish mu mwom wend.

Pading payilau kand mu Yerusalem, muntu mukwau ni ndiy wamuleja Yesu anch: “Mwant, nikukulondul ey. Pakwez chakusambish nlika bil niya nikakanijan nau anamakwam.” Yesu wamwakula anch: “Muntu mwawonsu anch wakwat rukasu ra [kudimish nich angomb] mu chikas, wasambish kudim, chad ndiy ukat kutal kwinyim, mwinou kawanyidinap kwikal mu Want wa Nzamb.”—Luka 9:61, 62.

Antu awonsu akimbina kwikal in kwilej akin a Yesu afanyidin kushinshikin pa mudimu wa Want. Anch mwin kudim ukat kusadin rukasu ra kudimish nich angomb, chad kashinshikidinap kurutu, matumbu mend makupengam. Padiminay anch watal yom yisadikina kwinyim kwend, mudimu wend ukuyap kurutu. Chilik chimwing kand, muntu mwawonsu ukutala kwinyim mulong wa kushinshikin ditenchik dia yom yiney yiyimp, ukutwish kwipwakal mwi njil yitwadina ku mwom wa chikupu.