MATEU 12:15-21 MARKO 3:7-12

  • YISAK YA ANTU YIBACHIKIJADIN MULONG WA KUYA KUDI YESU

  • WAWANYISH KAL UPROFET WA ISAY

Pateshay anch Afaris nau antu a chisak cha Herod akwatin mpung ya kumujip, Yesu nau in kwilejend achinina ku Karung wa Galalia. Yisak ya antu adiokala ku jindond kushalijan—adiokala ku misumb ya ku Tir ni Sidon yadinga ku chikumu cha karung wa Galalia, misumb yading kwingangel kwa Wit wa Yordan, ku Yerusalem ni ku Idumeya wa kwindum amulondula Yesu. Yesu woka antu avud. Mudi chibudikin antu awonsu ading ayedina nakash asambisha kubachikijan. Ayej inay kachingelap anch Yesu ayipukuna pakwez, awiy aya mulong amupukuna.—Marko 3:9, 10.

Yisak ya antu yading yipandiken kuvul chawiy Yesu wayileja in kwilejend abachikaku waat pakemp mukach mwa wit chakwel yisak yiney yilika kumubachok. Chikwau kand, chamuswapela kuyifundish padingay mu waat ap kuya ushad ukwau wa wit mulong wa kuyikwash antu akwau avud.

Mwin kwilej Mateu wafunda anch midimu ya Yesu yawanyisha ‘yom yalonday muprofet Isay.’ (Mateu 12:17) Uprofet ik umwing wawanyishay Yesu?

“Winou ndiy kashalapol wam unatonda, ndiy unikatila am, nikat kusangar mulong wendendiy. Nikez kumushirishin [spiritu] wam. Ndiy ukez kulejan dirumburish diam ku michid yawonsu. Ndiy kakez kutadikijanap ni muntu, ap kakez kubarokap, ap [kutesh dizu diend] mu mikombil. Ndiy kakez kuyizengolap antu aziyila ku mujimbu, kakez kuyisuminap antu akad usu. Ndiy ukez kusal mwamu djat ni pakez kuziyilau antu ku yijil ya Nzamb. Antu a michid yawonsu, awonsu akez kumuchingej ching kusu ndiy.”—Mateu 12:18-21; Isay 42:1-4.

Chakin kamu, Yesu udi kashalapol witiyinay Nzamb. Yesu wamekesha patok kurumburik kwa kutentam kwakin, kwajindjikau kudi marelijon ma makasu ma yinshankur. Mulong asadina nayimp Chijil cha Nzamb, Afaris alikang kuyok ayej pa dichuku dia Sabat! Pamekeshay mutapu udia kutentam kwa Nzamb ni pamekeshay kand anch spiritu wa Nzamb udi padi ndiy, Yesu wayongoja antu atwikau yisend ya yinshankur. Diawiy diyingishin diasala anch antakel a chirelijon akimba kumujip. Chading cha ushon mud ik!

Mazu malondina anch “Ndiy kakez kutadikijanap ni muntu, ap kakez kubarokap, ap [kutesh dizu diend] mu mikombil” marumburikin ik? Padingay ni kwokan, Yesu wayijidika antu—ap ayilembil—chakwel “kangal amwijikesh.” (Marko 3:12)  Kakatap anch antu amwijika kusutil ku jinsangu jateshau mu mikombil ap kusutil jinsangu ja makasu jalejijanangau antu.

Chikwau kand, Yesu walejana uruu wongojina kudi antu adinga mudi mushiy usotinau kukatul chakwel audjibula. Ading kand mudi moj wa lamp ubudishina mish udia piswimp ni kujim. Chawiy, Yesu kakatulap mushiy ap kajimishap mish ya ku moj wa lamp. Pakwez, wayisadina antu itudishina nich ranaken ni rukat. Chakin kamu, Yesu udi muntu ufanyidina kuchingejin kudi antu a michid yawonsu!