MATEU 8:18, 23-27 MARKO 4:35-41 LUKA 8:22-25

  • YESU UNINETISHIN RINKIND MUKASH UTUTINA PA KARUNG WA GALALIA

Yesu wasutisha dichuku dia kabuj mu mudimu ni waziya nakash. Chikwazweka urel, ndiy wayileja in kwilejend anch: “Tufanyidin kwauk ushad,” wading ushad wa Kapernaum.—Marko 4:35.

Ku chikumu cha Karung wa Galalia chading kwingangel, kwading ngand ya Gerasen. Ngand yiney ayitazukin kand anch Dekapol. Mu misumb yading mu Dekapol mwawiy mwading yishankur yawonsu ya in Grek, pakwez in Yuda avud ashakama niyawiy mwinimwa.

Payay Yesu mu Kapernaum antu awonsu ijika. Kwading maat makwau mading maukina karung. (Marko 4:36) Weny wa kwauk karung wadingap ulemp nakash. Karung wa Galalia udi mudi dijiy dijim nakash dikweta makilometre 21 mu kulep ni makilometre 12 mu kujimb. Chawiy chadingap chikasikena kumwauk.

Ap anch Yesu wading muntu uwanyidina, chisu chimwing waziyang kupwa kwa kusal mudimu wend wa kulejan. Chawiy, padingau ni kwauk karung, Yesu walala ku dizur dia kwinyim dia waat ni wazuka mutu wend pa musau.

Atwimbuy avud ading ni ronganyin ra kwawish waat, pakwez weny winou wadingap uswapel. Karung wa Galalia ading amunyingumukin kudi mikandu ni yisu yivud kwading chirungul nakash pa karung. Chawiy, yisu yimwing chipepil cha mashik chadiokalang ku mikandu, chading ni kusankanijan ni marungul mading pa karung, yom yiney yawiy yaletishanga kapamp kamwing rinkind mukash watutanga pa karung. Yawiy yom yasadika. Pakad kulab mambek mibula nich usu wawonsu ku waat. Waat “wizula nich mem ni ela kujiy.” (Luka 8:23, TMK) Pakwez, Yesu wading mu tul!

In kwawish waat asala usu wau wawonsu chakwel waat ulika kujiy pakwez katwishap mulong mambek mading mibudin nich usu wawonsu. Chawiy, aziya ni kamanap kand ya kusal. Povau wom wa kufa, amulangwisha Yesu mu tul ni amwela anch: “Nsalejetu, tupandisha! Tudi piswimp ni kufa!” (Mateu 8:25) In kwilej ova wom nakash mulong ading akimbin kujiy!

Palankay Yesu, ndiy wayileja atwimbuy end anch: “Ov, mulong wak wovilany wom mwamu? En ukwetany karitiy kakemp!” (Mateu 8:26) Chawiy Yesu wamubarikina rinkind, wamwel anch: “Ikuchika kamu kwey zong!” (Marko 4:39) Rinkind wading ututina waduta ni karung wikuchika kamu zong. (Marko ni Luka isambidin piur pa yom yiney yishimokishina, chading chilay cha kusambish chishimokishina chasalay Yesu mulong wa kudutish rinkind mukash, kupwa kand alonda mutapu in kwilej waburenau ritiy.)

Tongin mutapu mwiyovau in kwilej pa chom chinech! Awiy ayinau imenap mutapu waduta kapamp kamwing rinkind mukash wading ututina pa karung. Ova wom nakash. Anunganijana anch: “Ov, winou nany, uziyidilau kudi rinkind ni mambek?” Ashika awonsu ku chikum, kwikil muntu ap umwing wajiya. (Marko 4:41–5:1) Pamwing ap maat makwau mading pa karung machirika kapamp kamwing ku chikum, maukap.

Chidi chom chikasikena mud ik pa kwijik anch Mwan a Nzamb wading ni usu wa kuninetish yishiken yikash! Chisu chikuyikelay pa divu dietu mu Want wend, antu awonsu akez kwikal mu diking, chawiy kukez kikalap kwov wom wa mar ma chitangil!