MARKO 1:14, 15 LUKA 4:14, 15 YOHAN 4:43-54

  • YESU ULEJEN ANCH “WANT WA NZAMB UDI PISWIMP”

  • UMWOKIN MWAN IKUNDJ PALEMP

Kupwa kwa kusal machuku maad mu Samaria, Yesu waya kwol kwau. Wading ni kampany wa kulejan mu Yudeya pakwez, wading kandikal achirika mu Galalia mulong wa kupim. Chawiy, wasambisha kusal mudimu ujim wa kulejan mwi ngand yend ya chivadik. Kamwakap nawamp kwinikwa, mulong Yesu walonda anch: ‘Muprofet kakumukwatangap nich usey mwi ngand yend ya chivadik.’ (Yohan 4:44) Pa ndond pa kushakam pamwing ni Yesu, in kwilejend achirika ku yikumbu yau ni asambisha kusal midimu yau ya ku mujimbu.

Uruu ik wasambishay kufundish Yesu? Wading uruu ulondina anch: “Want wa Nzamb udi piswimp. Karumukany, itiyijany rusangu ruwamp.” (Marko 1:15, TMK) Kwading chibudikin ik? Chakin kamu, in Galalia avud amwaka Yesu nawamp ni amukwata nich usey. Kasalap mwamu kusu mulong wa uruu wend. Pakwez, antu amwing adiokala mu Galalia kurutu kwa chisu aya ku Yerusalem mulong wa kusal musambu wa Pasak amana yilay yasalay Yesu.—Yohan 2:23.

Ndond ik yimwing yasambishinay Yesu kusal mudimu wend ujim wa kulejan mu Galalia? Chimeken patok anch wasambishina mu Kana, kwi ndond kwakarumunay mem kwikal maar ma nviny ku musambu wa uruw. Padingay kand mwinimwa kapamp ka kaad, Yesu amuleja anch mwan ikundj umwing uyedin nakash ni wading piswimp ni kufa. Mwan winou wading wa mwant mujim Herod Antipas, mwant wapana mbil mu machuku ma kurutu ya kukatul mutu wa Yohan Mubatish. Mwant winou watesha anch Yesu wadiokalang kal mu Yudeya udi mu Kana. Chawiy, ndiy wadiokala kwol kwend ku Kapernaum mulong wa kuya kumutal Yesu mu Kana. Mwant winou wading ni ushon nakash wamwilembila Yesu anch: “Mwant, ez, amboku, tuyany pamwing ni yamam pakadiay kal mwanam kufa.”—Yohan 4:49.

Mutapu wamwakulay Yesu muntu winou anch: ‘Yang kwey, mwaney udi kwend mwom.’ kwamushimokisha. (Yohan 4:50) Mwant Herod wamwitiyija Yesu ni wachirika kwol kwend. Padingay mwi njil wasankanijana nau atushalapol end, ezin mau mulong wa kumulej rusangu ruwamp. Amuleja anch, mwaney wayerikang kal! Wayipula anch: ‘Ov, chisu ik chayerikangay?’ ni asambisha kutek mafund pamwing.

Amwakula anch: ‘Nangalosh kupwa kwa midi, pawiy pamupwilang mashik ku mujimbu.’—Yohan 4:52.

Mwant winou wavurika anch chawiy kamu chisu chalonday Yesu anch: ‘Mwaney udi kwend mwom.’ Kupwa, mwant winou wadinga mpich ni wadinga ni atushalapol avud pamwing ni dijuku diend diawonsu ikala in kwilej a Kristu.

Mu Kana mwawiy mwasadinay Yesu yilay yaad, chilay cha kukarumun mem kwikal maar ma nviny ni chilay cha kumwok nsand wadinga palemp mu akilometre 26. Pakwez, yiney kiyidiap yilay yawonsu yasalay Yesu. Pakwez, chilay chinech cha kwokan chading chijingidij cha kuchirik kwend mu Galalia. Ov, Yesu wamekana patok anch wading muprofet witiyau kudi Nzamb, ap anch ‘kamukwatap nich usey mwi ngand yend ya chivadik’?

Chinech chawiy chading katat chisu cha Yesu cha kuchirik kwol kwau ku Nazaret. Yom ik yafanyina kumushiken kwinikwa?