MATEU 14:1-12 MARKO 6:14-29 LUKA 9:7-9

  • HEROD WAKATWISH KAL MUTU WA YOHAN MUBATISH

Padandamenau atwimbuy a Yesu kusal mudimu wau wa kulejan mu Galalia, muntu umwing wasambela kurijek kwez kwa Yesu wading uchid mu rukan. Yohan Mubatish wading uchid mu rukan piswimp mivu yaad.

Yohan walonda patok anch chading chiyimp kudi Mwant Herod Antipas kumwat Herodias, mband wading wa mwanchend Filip. Herod wamulika mukajend wa kusambish mulong wa kumwat Herodias. Kukwatijan ni Chijil cha Moses, chisal chasalay Herod cha kumwat Herodias chading chisal cha makaj ni chakad kukwatijan ni chijil. Pamufishau nich Herod kudi Yohan mulong wa chisal chinech, chawiy Herod wamuteka Yohan mu rukan, pamwing ap chading mulong wa kumushindin Herodias chakwel itiya kumwat.

Herod kamanap yom ya kumusal Yohan, mulong antu ading ‘amumen mudi muprofet.’ (Mateu 14:5) Chawiy, Herodias waziya nakash mulong kamujipap Yohan. Ndiy “wamujimena Yohan nakash,” ni wakimba mutapu wa kumujip. (Marko 6:19) Kupwa, kwamekana mutapu wa kusal mwamu.

Piswimp ni kusal musambu wa Pasak wa muvu wa 32 C.C., Herod warijeka kusal musambu ujim wa kuvadik kwend. Ku musambu winou Herod wayitazuka antu awonsu ading ni mwaz wa piur, amakurump au amasalay ni an angand a mu Galalia. Pading pasadinau musambu, Salome mwan mband wenday Herodias wavalay ni nfumwend Filip wandama ukat kuja maj kurutu kwa angendj. Mutapu wend wa kuja wayisangaresha amakundj awonsu ading kwinikwa.

Herod wasangera nakash mutapu wajay changadim winou chawiy, wamuleja anch: “Ngita chom chawonsu chiusotila, am nikez kukwinkish kwey. Ndiy wachipa kand anch: “Nikukwinkish chom chawonsu chiukwingita, ap anch wangitap nchik chibar cha want wam.” Kurutu akula, Salome waya bil kumwipul makwend anch: “Ov, chom ik chinikwita?”—Marko 6:22-24.

Chisu chading chikimbinay Herodias chawanyin kal! Ndiy wamwakula kapamp kamwing anch: “Mutu wa Yohan Mubatish.” Pakad kulab, Salome wachirika kudiay Herod ni wamuleja anch: “Nletilany kwam katat mutu wa Yohan Mubatish pa dilong.”—Marko 6:24, 25.

Yom yiney yamwakamisha Herod nakash, pakwez angendj atesha mutapu wachipay kudi Salome. Yom yiney yamukasikena kulik kuyiwanyish ap anch chinech chading chitin kumujip muntu wakad mulong. Chawiy, Herod watuma kalam kuya mu rukan chakwel amukatula Yohan mutu kapamp kamwing. Pakad kulab, kalam winou weza ni mutu wa Yohan pa dilong. Kalam wamwinkisha Salome mutu winou kupwa Salome wamwinkishau makwend.

Pateshau in kwilej a Yohan rusangu riner, eza asend mujimb mulong wa kuujik. Kupwa amulejamu Yesu rusangu riner.

Chawiy, pateshay Herod anch Yesu wokin antu ni wopatin ayilembil, ndiy wova wom nakash. Ndiy watonga anch—Yesu muntu usadina yom yiney—ndiy kamu Yohan Mubatish “wavumbuka kal.” (Luka 9:7) Chawiy, Herod Antipas wakata amuman kamu Yesu. Kakimbap kumuman Yesu mulong wa kutesh yom yifundishinay. Pakwez, Herod wakimba kumuman Yesu mulong wa kwikal ni kashinsh piur pa wom wading wovilay.