YOHAN 11:17-37

  • YESU WASHIK KAL KUPWA KWA RUFU RA LAZAR

  • “YAM DIVUMBUK NI MWOM”

Padiokalay mu Pere, Yesu washika piswimp ni musumb wa Betaniy wading mu akilometre 3 mulong wa kushik ku Yerusalem. Mariy ni Mart, ampanyend a Lazar, ading ni ushon wa chidil. Antu avud eza mulong wa kuyongoj.

Kupwa, muntu umwing wamuleja Mart anch Yesu udi piswimp ni kushik chawiy Mart waya mau mulong amusankana. Mart wamuleja Yesu yom yadingau ni kutong pamwing ni mwanamakwend Mariy mu machuku manying masuta kal anch: “Nsalejam, anch ey wadi kunoku, ing mwanamakwam kafilap.” Pakwez, chinech chimekeshinap anch Mart waburena ruchingej bwat. Chawiy Mart walonda anch: “Nij anch, chom chawonsu ukumwita Nzamb, ukukwinkish kwend.” (Yohan 11:21, 22) Ndiy wading wij anch Yesu ukutwish kumuvumbul mwanamakwend.

Yesu wakula anch: “Mwanamakwey ukuvumbuk.” Mart watonga anch Yesu wading wisambidin piur pa divumbuk dia mu machuku ma kurutu dikwikala pa divu mulong rawiy ruchingej radingay nich Aburaham ni antu akwau. Chawiy, ndiy wamekesha ritiy rend palonday anch: “Am nij anch, ndiy ukez kuvumbuk pakuvumbukau antu awonsu kwikal kand aom pa dichuku dia kwisudiel kwa mangand.”—Yohan 11:23, 24.

Ov, Yesu wafanyina kusal chom kanang pa chisu chinech mulong wa kuyongoj? Yesu wamuvurisha Mart anch Nzamb wamwinkisha Yesu usu piur pa afu pamulejay anch: “Muntu mwawonsu ukwingitiyija am [kakezap kufa].”—Yohan 11:25, 26.

Yesu kakimbap kulond anch in kwilejend kakezap kufa bwat. Ap ni ndiy wafanyina kufa mudi mwayilejay atwimbuy end. (Mateu 16:21; 17:22, 23) Pakwez, Yesu wakimba kulond anch muntu mwawonsu ukuteka ritiy rend mudiay ndiy ukez kutambul mwom wa chikupu. Antu avud akez kutambul mwom winou pa chisu cha divumbuk. Pakwez, antu ashinshamena akwikala aom pa dichuku dia nsudien kakezap kand kufa. Chikwau kand, muntu mwawonsu utekina ritiy rend mudiay ndiy ufanyidin kwikal nich kashinsh anch ukez kuvumbuk.

Pakwez, palonday Yesu anch: ‘Yam divumbuk ni mwom’ ov, Yesu wela kumuvumbul Lazar pa dichuku dinidia? Yesu wamwipula Mart anch: “Ov, witiyin mazu minam?” Mart wamwakula anch: “Mwawiy, Nsalejam! Am nitiyijin anch, ey yey Kristu, yey kamu Mwan a Nzamb utwachingelanga kwez mu mangand.” Mulong Mart wading utekin ritiy rend rawonsu mudiay Yesu anch ukutwish kusal chom kanang pa chisu chinicha, chawiy ndiy waya mau wamulej Mariy ku ujindj anch: “Mulej wez kal, ukutazukin.” (Yohan 11:25-28) Pa chisu chinicha, Mariy wadiokala ku chikumbu, chawiy antu akwau amulondula mulong atonga anch uyil kwi nzay yamujikau Lazar.

Pakwez, Mariy waya kudi Yesu, wasa manungun mend kurutu kwa Yesu ni wasambisha kudil ni wachirikina kand mazu malonday Mart anch: “Nsalejam, anch ey wading kunoku, ing, mwanamakwam kafilap.” Pamumanay Mariy pamwing ni yisak ya antu yikat kudil, Yesu wova ushon nakash wasambish ni ndiy kudil. Yom yiney yayishimokisha antu. Chawiy antu amwing ipula anch: ‘Anch wamwoka mputames, ov, mulong wak kakangeshangap Lazar kufa?’—Yohan 11:32, 37.