LUKA 15:11-32

  • CHISHIMU CHA MWAN WASHADIKA

Chisu chadingay Yesu mu Pere kwingangel kwa Wit wa Yordan, ndiy walejana chishimu cha mukoku washadika ni cha rufalang ra utad wa argent rashadika. Uruu wisambinay mu yishimu yiney yaad umekeshin musangar ujim udingaku anch mukayitil wakarumuk ni wamuchirikin kand Nzamb. Afaris nau alej a yijil amulonda Yesu nayimp mulong wading ni kuyak akayitil. Ov, Afaris nau alej a yijil inay ileja chom kanang mu yishimu yiney yaad yalonday Yesu? Ov, atesha kurumburik pa mutapu ukatay kwov Tatukwetu wa mwiur anch mukayitil wakarumuk? Chawiy, Yesu wisambina chishimu cha usey nakash chakasikeshina mulong winou.

Chishimu chinech chading cha tatuku umwing wadinga ni an end aad amakundj, pakwez Yesu wisambina nakash piur pa mwanikanch. Afaris nau alej a yijil pamwing nau antu akwau ading ateshina chishimu chinech, afanyina kutesh nawamp yom yading yilondinay Yesu piur pa mwanikanch winou. Pakwez, tufanyidinap kudiul yom yalonday Yesu piur pa tatuku winou ni mwanend mukurump ni mwikadil wamekeshay tatuku ni mwan winou mulong tukutwish kutaninamu niyetu. Chawiy, chifanyidin kutongin piur pa antu inay isambinay Yesu mu chishimu chinech.

Yesu walonda anch: “Kwading muntu umwing wading ni an amakundj aad. Mwanikanch wamwela tatukwend anch: ‘Tatuku, nginkisha yom ya uswan wam katat.’ Chawiy muntu winou wayangena anend amakundj aad yom ya uswan wau.” (Luka 15:11, 12) Chidiap anch mwanikanch winou wakimba uswan wend mulong tatukwend wading wafang kal. Tatukwend wading uchid mwom. Pakwez, mwan winou wakimba amwinkisha kamu uswan mulong ikala mwant ipend ni asadina uswan winou mudi mukatinay amwinend. Yom ik yashikena?

Yesu warumburila anch: “Chipasuta machuku makemp, mwanikanch walandisha yom ya uswan wend, wasend nfalang jend, waya kwend. Ndiy waya kwi ngand ya kulemp, kushik kwinikwa washesha nfalang jend ku yom yiyimp.” (Luka 15:13) Pa ndond pa kushakam kwol kwau mu diking dia tatukwend wading uyilamina nawamp ni kuwanyish maswir mau, mwan winou waya kwi ngand ya kulemp nakash. Kwinikwa washesha nfalang jend ku yom yiyimp mulong wa kusangaresh maku mend ma mujimbu. Kupwa mwan winou wikala ni  mashakamin mayimp nakash, chawiy Yesu walonda anch:

“Ndiy wapwisha nfalang jawonsu bwi. Chad kamungun weza mwi ngand yiniya, pakwez ndiy wading washala kal wamwamu. Chawiy ndiy waya, [wasala] mudimu kudi muntu umwing wa ngand yiniya. Muntu winou wamutuma ku chingand chend mulong wa kulam ayibond. Mwan winou wakata kudia yom yadiangau ayibond, pakwez kwikil muntu wamwinkisha chom.”—Luka 15:14-16.

Kukwatijan ni Chijil cha Nzamb, ayibond ading annam ijondila, pakwez mwan winou wading uyilamin ayibond. Mwan winou wafa chipupu cha nzal, chawiy chasambishay kudia yom yadiangau ayibond ading alaminay. Pamanay mwan winou mar nakash mulong wa yom yamushikena, ndiy ‘wachirisha manangu mend.’ Chom ik chasalay? Walonda amwinend anch: “Antu a mudimu awonsu a tatukwam akwet yakudia yivud kupandakan, pakwez am kunoku nikat kufang nzal! Nikutumbuk, niya kudi tatukwam nikamwel anch: ‘Tatuku, nasadil kal chitil kudi Nzamb ni kudi ey. Am kiniwanyidinap kand kwintazuk anch, nidi mwaney. Nteka kwam mudi muntwey a mudimu.’” Kupwa waya kudi tatukwend.—Luka 15:17-20.

Mutapu ik mwasalay tatukwend? Ov, tatuku winou wamwopata mwanend ap walonda nayimp mulong wa usup wend wasalay wa kudiokal ku chikumbu? Ov, tatuku winou wamujimena mwanend pachirikay? Anch mulong winou wakushikena ey, chom ik wela kusal? Mutapu ik wela kusal anch mwan winou wading mwaney ikundj ap mband?

 MWAN IKUNDJ WASHADIKA WAMEKAN KAL

Yesu walejana mutapu wovay ni wasalay tatuku winou palonday anch: “Pachadingay [mwan ikundj] kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” (Luka 15:20) Ap anch tatukwend wova jinsangu piur pa mashakamin mayimp madingay nich mwan winou, pakwez ndiy wamwaka pachirikay. Ov, antakel in Yuda ading ni kulond anch amwij ni akat kumwifukwil Yehova ajingunina mutapu ukatay kwiyov Tatukwetu wa mwiur anch akayitil akarumuk? Ov, ajingunina kand anch Yesu wading ni yovil ya chilik chimwing?

Chawiy, tatuku winou mwin manangu wajingunin ushon wovay mwanend wamekesha anch wakarumuk kal. Chikwau kand, rukat ramekeshay tatuku winou pamwakay mwanend rawiy ramubachika mwan winou alejana patok uyimp wend wasalay. Yesu walonda anch: “Mwanend wamwela anch: ‘Tatuku, am nasadil kal chitil kudi Nzamb ni kudi ey kand. Am kiniwanyidinap kand kwintazuk anch, nidi mwaney.’”—Luka 15:21.

Tatuku winou wayileja atushalapol end anch: “Swakalany, yangany, uletany nkandj upandakena kuwap, umudjikany. Mudjikany kaziy ku muny wend, mudjikany kand yisapat. Yangany kand, ukwatany musamb a ngomb upandakena kuwap, mujipany, chakwel tusala musambu, tusangarany! Mulong mwanam winou wading wafil kal, pakwez katat udi mwom. Wading washadikin kal, pakwez katat wamekan kal. Chad asambisha kusal musambu.”—Luka 15:22-24.

Pa chisu chinicha, yayend wa mwan winou wading ku chir wachirika. Yesu wisambina piur pa mwan mukurump anch: “Pezay pol waseja piswimp ni ku chikumbu, watesha miminy ni maj. Chawiy wamutazuka kashalapol umwing, wamwipula anch: ‘Ov, yom ik yisadikina?’ Kashalapol wamwakula anch: ‘Mwanchey wachirikang kal. Tatukwey wajipang kal musamb a ngomb upandakena kuwap, mulong wachirikang kal mwom.’ Yayend wajimana nakash, walik kwandam mu chikumbu. Chawiy tatukwend wabudika, wamulembijek chakwel andam. Chad ndiy wamwakula tatukwend anch: ‘Tal, am nakusadidil kal mudimu mivu yiney yawonsu  mudi muswik, naziyila kand mazu mey mawonsu wanlejanga. Pakwez ey kand kal winginkishap ap kusu mwan a mpemb chakwel nikutwish kusal musambu nau arund nam! Chawiy mwaney winou washeshina dipit diey diawonsu kudi amband a kusochik, pachirikangay kunoku ey wamujipinang musamb a ngomb upandakena kuwap!’”—Luka 15:25-30.

Anany adinga mudi mwan mukurump walonda nayimp piur pa riy ni yom yiwamp yayisadinay Yesu antu ni akayitil? Ading Afaris nau alej a yijil. Mazu mau mayimp mamulondau Yesu anch wading uyakin akayitil mawiy misambinau mu chishimu chinech. Chakin kamu, muntu mwawonsu ukulonda nayimp mulong wa riy rimekeshinay Nzamb ufanyidin kushinshikin nakash pa dilejan dined.

Yesu wapwisha kulond chishimu chinech parumburilay piur pa mazu malonday tatuku winou kudi mwanend mukurump anch: “Mwanam, ey uding kal ni yamam machuku mawonsu. Yom yawonsu yamam yidi yeyey. Pakwez chifanyidin etu kusal musambu ni kusangar, mulong mwanamakwey winou wadi wafil kal, pakwez katat udi mwom, wadi washadikin kal, pakwez katat wamekan kal.”—Luka 15:31, 32.

Yesu kamekeshap yom yasalay mwan ikundj mukurump. Pakwez, kupwa kwa rufu ra Yesu ni pavumbukay, “in kupesh avud ading ni kuziyil ku ritiy.” (Midimu 6:7, TMK) Pakach pa antu inay pading antu amwing atesha yom yarumburilay Yesu mu chishimu chinech cha usey nakash piur pa mwan washadika. Mwaning chading chiyiswapedin kuchirish manangu mau, kukarumuk chakwel amuchirikina Nzamb.

Kusambish pa dichuku dinidia, in kwilej a Yesu afanyidina kutongin nakash pa malejan ma usey misambinay Yesu mu chishimu chalonday. Dilejan dia kusambish mu chishimu chinech dikasikeshidin pa usey wa kushal mu diking pakach pa antu a Nzamb, alaminau kudi Tatukwetu utukatina nakash ni utuwanyishidina maswir metu pa ndond pa kulondul maswir ni misangar ya “kwi ngand ya kulemp.”

Dilejan dia kaad didi anch, ang muntu umwing wa pakach petu wapumbuk mwi njil ya Nzamb, ufanyidin nich kwikepish kumuchirikin Tatukwetu chakwel amwanakena.

Dilejan dia kasatu dimekeshin mwikadil wa tatuku winou pamulikishinay mwanend ni mwikadil uyimp wadingay nich mwan mukurump wa kulik kumwak mwanchend wachirika. Chawiy komb, atushalapol a Nzamb afanyidin kulikishin ni kuyak antu apumbuka pakwez akarumuk kal kamu mulong wa kuchirik mu ‘chikumbu cha Tatuku.’ Komb, tufanyidin kusangar anch mwanamakwetu ‘wafila kal wikal mwom’ ni ‘washadikina kal wamekan.’