LUKA 14:7-24

  • DILEJAN PIUR PA KWIKEPISH

  • ANTU ATAZUKAU KU MUSAMBU AKAT KWIYINGISH NICH

Kupwa kwa kumwok muntu wading uyedina musong wa kunan mend ni makas, Yesu wading uchid ku chikumbu cha Mufaris. Yesu wayitala angendj atazukau ku musambu winou akat kutond jindond ja katumb, chawiy pa chisu chinicha Yesu wafundisha dilejan piur pa kwikepish.

Yesu walonda anch: “Anch muntu wakutazuk ku musambu wa kwatan, kangal witondil kushakam ndond ya katumb. Ap amutazukang kal muntu mujim kukupandakanamu ey. Chad muntu wakutazukanganya en awonsu ukwez kudi ey, wakwel anch: ‘Mushila muntu mujim ndond yiney.’ Chad ukwov usany pa kuya kushakam pa ndond yikemp.”—Luka 14:8, 9.

Kupwa Yesu walonda kand anch: “Anch akutazuk kudia, yang ukashakam pa ndond yikemp, chad wakutazukanga ukwez, wakwel anch: ‘Murund nam, ez ushakama ndond yiwamp.’ Chom chinech chikez kukuletin katumb kudi antu awonsu atazukangau.” Chinech chid cha usey nakash kusutamu kwikal ni mikadil yiwamp. Yesu walonda anch: “Mulong muntu mwawonsu ukeza kwijimbish amwinend, akez kumushikumwish, pakwez muntu mwawonsu ukeza kwishikumwish amwinend, akez kumujimbish.” (Luka 14:10, 11) Chakin kamu, Yesu wayikasikesha in kumutesh akudisha mwikadil wa kwikepish.

Kupwa Yesu wafundisha kand dilejan dikwau piur pa Mufaris wamutazuka kudia—mutapu wa kupan yakudia yikutwisha kupan ntumb kud Nzamb. Ndiy walonda anch: “Piukutazuka antu kudia kwol kwey muten ap urel, kangal wayitazuk arund ney, ap anamakwey, ap akwen ampich, mulong niyau akez kukutazuk. Mwamu mu mutapu winou ey ukez kutambul difut dia yisalijok yey. Pakwez anch wasal musambu, yitazuka atuzwendj ni ayilim, ni amputames. Chawiy ey ukez kuyuk, mulong awiy kakutwishap kukutazuk ey.”—Luka 14:12-14.

Yesu kalondap anch chiyipin kuyitazuk arund netu, anamakwetu ap amutej netu ku musambu. Pakwez ndiy wakasikeshina pa usey wa kuyinkish antu adia mu maswir mudi atuzwendj, ayilim ni amputames mulong antu inay akutwish kulet yiyukish ya usey. Yesu wamuleja muntu wamutazuka anch: “Nzamb ukez kukuchirishin pa dichuku dikez kuvumbukau antu atentamina.” Ngendj mukwau watazukau walonda anch: “Wayuk kwend muntu ukutazukau kudia nau ku musambu wa Want wa Nzamb.” (Luka 14:15) Muntu winou wamana anch chading chisend cha usey cha kwikal ku musambu winiwa. Pakwez kadiap antu awonsu atongina mwamu, chawiy chapanay Yesu chilakej chilondina anch:

“Kwading muntu umwing wasala musambu ujim, watazuka antu avud. . . . Ndiy wamulejan kashalapol wend kuya kuyilej antu atazukay anch: ‘Ezany, yom yawonsu yawanyinang kal!’ Pakwez antu awonsu, muntu ni muntu, wasambisha kuman pa kwiyingishin nich. Wa kusambish wamuleja kashalapol anch: ‘Nlikishinany, amboku, am nalandil chir, chifanyidin am kuya kuchital.’ Mukwau walonda anch: ‘Am nalandil angomb dikum a kudim nich, niyil katat kuyital, nlikishinany, amboku.’ Niyend mukwau walonda anch: ‘Namushikijang kal kamu mband, chawiy kinikutwishap kwez, amboku.’”—Luka 14:16-20.

Mayingishin minam madingap makin! Muntu ukat kuya kutal chir kurutu achilanda, pakwez chidiap cha usey kuya kuchital anch wachilandang kal. Muntu wa kasatu kadingap wirijekina mulong wa kwatan. Wading waten kal, chawiy chinech chelap kumukangesh kuya ku musambu wamutazukau. Pateshay mwin musambu yom yiney, wajimana nakash ni wamuleja kashalapol wend anch:

“‘Yang swa mu mikombil ni mu jinjil jikemp ja mu musumb, uyitazuka atuzwendj, ni ayilim, ni amputames.’ Chipasuta chisu chikemp, kashalapol wachirika, wamulej mwant wend anch: ‘Mwant, mazu mey mawonsu mawanyin kal, pakwez kushil kand ndond jikwau.’ Chad mwant wamuleja kashalapol wend anch: ‘Yang mu jinjil jikemp ni mu jinjil jiyila ku makunku, yibachika antu eza chakwel chikumbu cham chizula antu sens. Chakin, nakulejany anch, kwikil muntu ap umwing wa pakach pa antu inatazuka  pakusambish ukeza kupak yakudia ya musambu wam.’”—Luka 14:21-24.

Yom yadiokalay kal kwisambin Yesu yilejen patok mutapu Yehova Nzamb ni Yesu Kristu muyitazukinau antu ku musambu wa Want wa mwiur. In Yuda pakampwil antakel a chirelijon awiy atazukau akusambish ku musambu. Pakwez avud pakach pau alika kwitiy kutazuk kwayitazukau kusutin mudimu wa kulejan wasalay Yesu. Kutazuk kwinoku kwimenap pad awiy bwat. Yesu walonda patok anch mu machuku ma kurutu kukwikal kutazuk kwa kaad kwa antu akwau adia mudi atuzwendj adia pakach pa muchid wa in Yuda ni antu a michid yikwau. Chawiy kukez kwikal kutazuk kwa kasatu ap kwa nsudien kwa antu amenau kudi in Yuda mudi kakwetap usey kurutu kwa Nzamb.—Midimu 10:28-48.

Chakin kamu, yom yalonday Yesu yimekeshin uyakin wa mazu malonday ngendj umwing watazukau walonda anch: “Wayuk kwend muntu ukutazukau kudia nau ku musambu wa Want wa Nzamb.”