MATEU 19:16-30 MARKO 10:17-31 LUKA 18:18-30

  • MPICH WIPWIL PIUR PA MWOM WA CHIKUPU

Yesu udandamedin weny wend wa kudiokal ku Pere mulong wa kuya ku Yerusalem. Nsand umwing mpich waya mau kudi Yesu ni wasa manungin mend kurutu kwa Yesu. Nsand winou wading “mwin kutakel,” pamwing ap ndiy wasalanga mudi ntakel wa mu sinagog ap wading muntu wasalanga mu chisak cha in Sanedrin. Ndiy wamwipula Yesu anch: “Mulej Muwamp, ov, chifanyidin nisal nchik chakwel nikala nich mwom wa chikupu?”—Luka 8:41; 18:18; 24:20.

Yesu wamwakula anch: “Ov, mulong wak wingedila am anch, muwamp? Kwikil muntu udia muwamp, ching kusu Nzamb amwinend.” Pamwing ap palonday nsand winou anch “muwamp” ndiy wasadina dijin dia mwaz, diakatangau kuyitazuk a rabi. Ap anch Yesu wading mulej muwamp, pakwez, ndiy wakimba kumukwash muntu winou ijika anch mwaz “Muwamp” afanyidin kumutazukau ching Nzamb.

Yesu wamuyula anch: “Anch usotil kutambul mwom wa chikupu, lam kwey yijil.” Chawiy nsand winou wamwipula anch: “Ov, yijil ik?” Yesu wajimbula yijil yitan yidia pakach pa Yijil Dikum—kujipan, kwimik dis, kwiy, kulond makasu ni kulimish anvaj. Kupwa wamuleja kand chijil cha usey nakash anch: “Mukata kand mukwen mudi ey amwiney.”—Mateu 19:17-19.

Nsand winou wakula anch: “Am naziyidil kal yijil yiney yawonsu. Ov, yom ik yikwau yinifanyidina kand kusal?” (Mateu 19:20) Ndiy watonga anch kudi kand chom chikwau chiwamp chiburedinay chikumukwasha atambula mwom wa chikupu. Pamekeshay nsand winou yitongijok yend patok, Yesu ‘wamukata.’ (Marko 10:21) Pakwez, nsand winou wading nich chikangesh chikash.

Nsand winou wading ukatin nakash mapit mend, chawiy Yesu wamuleja anch: “Kukushadil chom chimwing. Yang ukalandish yom yawonsu yiukweta, upan nfalang jinej kudi atuzwendj, chawiy ey ukez kwikal nich mapit mwiur. Chad wez wikal mwin kwilej wam.” Chakin kamu, chakwel nsand winou ikala mwin kwilej wa Yesu, ndiy  wafanyina kupan nfalang jend kudi atuzwendj mulong kakutwishap kumuchirishin. Pakwez, Yesu wamumana nsand winou wafunyangesh mu mes, waya nich ushon. Nsand winou wading ukatin nakash mapit mend mulong wading “mpich nakash,” ni mapit minam mawiy mamukangesha kutan mapit makin. (Marko 10:21, 22) Chawiy Yesu walonda anch: “Chikez kwikal chom chikash nakash kudi ampich kwandam mu Want wa Nzamb!”—Luka 18:24.

In kwilej ashimoka nakash mulong wa mazu malonday Yesu ni mulong wa mazu makwau malonday kand anch: ‘Chipipel kudi kamel kusut mu dipan dia ndong, pakwez chipandaken kukasikan kudi mpich kwandam mu Want wa Nzamb.’ Chawiy chayibachika in kwilej ipula anch: “Ov, nany lel ukeza kupand?” Ov, chading chimukasikedin mpich winou kupand? Yesu wayitala neeng kupwa wayakula anch: “Yom yikasikena kudi antu, kiyikasikenap kudi Nzamb.”—Luka 18:25-27.

Pita wamekesha patok anch kutond kwau kushalijadin ni kwa mpich winou palonday anch: “Tal kwa, etu twashil kal yom yawonsu, twakulondula ey, ov, yom ik yitukeza kwikal nich?” Yesu wayileja difut dikezau kutambul mulong wa kutond kwau kuwamp kwatondau palonday anch: “Pa chirungu chikeza kushakamay Mwan a muntu mwi nkwas yend ya uyaj, niyen kand ukez kushakamany mu jinkwas dikum ni yaad ni kurumburishany michid dikum ni yaad ya Isarel.”—Mateu 19:27, 28, TMK.

Chakin kamu, Yesu wading utongidin pa machuku ma kurutu chisu chikezau kurijek divu chakwel dikala mudi mudiadinga mu chir cha Eden. Pita ni in kwilej akwau akutambul difut mulong akuyikel pamwing ni Yesu pa divu diawonsu dikwikala Paradis, difut dined dipandakenamu yom yawonsu yasalau!

Pakwez, kelap kuyifut ching kusu mu machuku ma kurutu. In kwilejend atana yom yiwamp. Yesu walonda anch: “Kwikil muntu washa chikumbu chend, ap mband, ap anamakwend, ap anvaj, ap an, mulong wa Want wa Nzamb, ndiy wez wakangany kutambul yom yipandakenamu ya pa chirung chinech ni mwi ngand yisotila kwez mwom wa chikupu.”—Luka 18:29, 30, TMK.

Chakin kamu, ndond yawonsu yayangau in kwilejend, awiy atananga akadivar in kwifukwil ading ni kuyak nawamp ni kuyisanger nakash kusutamu musangar wadingau nich pamwing ni anamakwau a ku mujimbu. Cha ushon, chimeken anch mpich winou washadisha yiyukish yiney yawonsu kuwejaku mwom wa mwiur mu Want wa Nzamb.

Yesu walonda kand anch: ‘Pakwez antu avud adia a kusambish, akwikal a kwisudiel, chad antu adia a kwisudiel akwikal a kusambish.’ (Mateu 19:30) Chom ik chakimbay kulond?

Nsand winou mpich mwin kutakel wading wa “kusambish,” pakach pa antakel in Yuda. Padingay mwin kulam yijil ya Nzamb, ndiy wamekesha patok yom yadingay ni kutong ni yom yasalangay. Pakwez, ndiy wateka mapit pa ndond ya kusambish mu mwom wend. Chinyim ni chinech, antu avud ading mwi ngand yiniya ajingunina anch malejan ma Yesu madi makin ni matwadin ku mwom. Tukutwish kulond anch awiy ading “ansudien,” pakwez, ashikena ku kwikal “a kusambish.” Awiy achingejin kushakam mu jinkwas ja want mwiur pamwing ni Yesu mulong wa kuyikel pa divu dikwikala Paradis.