Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Yakul ku Yipul 10 Yikatau Ansand Kwiyipul

 CHIPUL CHA 9

Ov, Nifanyidin Kwitiyij Malejan ma Dikarumuk?

Ov, Nifanyidin Kwitiyij Malejan ma Dikarumuk?

MULONG WAK CHIDI CHA USEY

Anch malejan ma dikarumuk madi makin, mwom ukwetap kwau rutong kanang. Anch yom yatangau yidi yakin, tukutwish kutan yakul yisangareshina piur pa mwom ni piur pa machuku ma kurutu.

CHOM IK UFANYIDINA KUSAL?

Tongin bil chom chinech: Alex wovil kamu rumbangan. Umwitiyijining Nzamb ni yom yatangay. Pakwez mulej wend wa bioloji ukasikeshin nakash malejan ma dikarumuk anch madi makin, mulong mimedin pa uyakin wa kukimbijol wa siyans. Alex kakatinap kumekan anch usupin. Wilondidin anch ‘Chad anch in siyans amekeshin anch malejan ma dikarumuk madi makin, am nidi nany mulong wa kuyipul?’

Anch yeya wadia Alex, wafanyinang kwey kwitiy malejan ma dikarumuk mulong amafundin mu ma buku?

TONG BIL!

Chikalap nchik yitongijok yau, antu avud akatining kulond piur pa yom yitiyijinau ap anch kijap mulong wak itiyijin yom yiney.

  • Antu amwing akat kwitiyijang yom yatangau mulong yawiy yayifundishau ku egliz.

  • Antu amwing akat kwitiyijang malejan ma dikarumuk mulong yawiy yayifundishau ku shikol.

 YIPUL MUSAMBAN YA KUSHINSHIKIN

Bibil ulondin anch: “Chikumbu ni chikumbu chikwet muntu wachitunga, pakwez Nzamb udi mwin kutung wa yom yawonsu.” (Hebereu 3:4) Ov, chidi cha manangu kwitiyij mwamu?

Kwitiy anch kwikil Sakatang wa mwom chidi mudi kulond anch kwikil muntu watunga chikumbu chinech

YILONDINAU: Yom yawonsu yidia pa mangand yiyezina kwau kudiokal pakuru.

1. Nany ap chom ik chasala anch yikalaku?

2. Choviken kulond anch—yom yawonsu yiyezina kwau ayinau ap kulond anch yom yawonsu yadiokala kudi muntu kanang?

YILONDINAU: Antu adiokala kudi annam.

3. Anch antu adiokala kudi annam—chilakej muyeny—chad mulong wak antu akwet manangu mashalijadina nakash ni ma amiyeny?

4. Mulong wak kudi “mitapu” kushalijan ya mwom?

YILONDINAU: Malejan ma dikarumuk mimedin pa yom yakin.

5. Ov, antu akata kulond yom yiney akat kushinshikin kamu uman wa yom yiney?

6. Mulong wak antu avud akat kwitiyij malejan ma dikarumuk mulong ayileja kwau anch in manangu awonsu itiyijining malejan minam?

“Anch wendin mu ditikit dijim ni waman chikumbu chiwamp, ukutwish kutong anch: ‘Chiwapin nakash! Umen anch mitond yikutwish kwiwil kwau ayinau mulong wa kusal chikumbu chinech?’ Bwat kwau! Chovikenap. Chad mulong wak tukutwish kwitiyij anch yom yawonsu yidia mu mangand yiyezina kwau ayinau?”—Julia.

“Tong bil anch muntu wakulej anch kwabulang kapat mu sosiete wa kubudishin mikand ni ankre ap mem ma kufund nich mapalangan ku rubumbu ni mabombakan ni mapaper chad masal ndinguril muwamp. Ukwitiyij chom chinech?”—Gwen.

 MULONG WAK KUMWITIYIJ NZAMB?

Bibil ukukasikeshin kusadin ‘ronganyin.’ (Rom 12:1) Chinech chirumburikin anch yitiyij yey mudiay Nzamb yifanyidinap kwimen pa

  • YITONGIJOK (Nitongin anch Nzamb ufanyidin kwikalaku)

  • KUSAL YISADINAU ANTU AKWAU (Ndond nishicha antu amwitiyijin Nzamb)

  • YIBACHIKIN YA ANTU AKWAU (Anvaj am afundishin kumwitiyij Nzamb—Nadingap ni chom cha kusal)

Pakwez ufanyidin kwikal ni mayingishin piur pa yom witiyijina.

“Anch nidi mu shikol ni nikat kumutesh mulej parumburilay mutapu ukata kusal mujimbu wetu, nikatap kutadik anch Nzamb udiaku. Chidi chawonsu cha mujimbu chikwet mudimu wach, ap kachom kakemp kakwet nikawiy usey, ni yom yiney yikat kusal pakad etu kwijik. Mutapu usadina mujimbu wa muntu ushimokishen nakash!”—Teresa.

“Anch naman chikumbu cha etaj, waat ujim ap motak, nikat kwiyipulang anch, ‘Nany wasala chom chinech?’ Chilakej, mulong wa kusal motak, chifanyidin kwikala antu akweta manangu, mulong kudi tuyom tukemp tukemp tufanyidina kutek chakwel yawonsu yisala nawamp. Chad anch motak ausala kudi muntu, komb antu niyau ayitanga.”—Richard.

“Pinidandamedina kwilej siyans, malejan ma dikarumuk mameken kwikal makin. . . . Am nimen anch chifanyidin kwikal ni ‘ritiy’ rikash mulong kwitiyij malejan ma dikarumuk kusutamu kumwitiyij Sakatang.”—Anthony.

UTONGIN NCHIK?

Chikalap nchik uvud wa mivu ya kukimbijol, in siyans ashikedin ku kurumburil yom piur pa malejan ma dikarumuk pakwez awonsu kamitiyinap kwau. Anch in siyans kitiyinap malejan ma dikarumuk—ni atongin anch ij yom nakash—ov, chiyipin kwiyipul piur pa malejan minam?