Yang pafundinau anch yidiamu

Yang pafundinau anch yidiamu

 CHIPUL CHA 4

Mutapu ik Nikutwisha Kusal Anch Narumbuk?

Mutapu ik Nikutwisha Kusal Anch Narumbuk?

MULONG WAK CHIDI CHA USEY

Kwitiyin kurumbuk kwey kukusal anch wikala muntu wa kashinsh ni wa kuchingejin.

CHOM IK UFANYIDINA KUSAL?

Tongin bil chom chinech: Pasengenay ni arund nend, Tim wabul ndundu chad ndundu wawil pa dididish dia mutej nau.

Anch yeya wadia Tim, chom ik wafanyina kusal?

TONG BIL!

UDI KURUTU KWA YOM YISATU:

  1. Kuchin.

  2. Kumufish nich muntu mukwau.

  3. Kumulej mutej yom yasadika kal, ni kufut yom yasheshika kal.

Pamwing ap ukutwish kutond A. Pakwez ufanyidin kwitiyin kurumbuk kwey—ap anch washeshang dididish ap chom chikwau.

 MAYINGISHIN MASATU MULONG WA KWITIYIN KURUMBUK KWEY

  1. Chidi chom chiwamp kusal mwamu.

    Bibil ulondin anch: “Tukat kusot kushakam ni kashinsh mu yom yawonsu.”—Hebereu 13:18, TMK.

  2. Antu akat kuyilikishinang antu akata kwitiyin kurumbuk kwau.

    Bibil ulondin anch: “Muntu mwin kujindjik kurumbuk kwend kakuzangijalap nawamp, pakwez mwin kwitiyil kurumbuk ni kukulik, ukez katan ranaken.”—Jinswir 28:13.

  3. Cha usey nakash, kukat kumusangaresh Nzamb.

    Bibil ulondin anch: “Mulong in [kubwambwil] atakanen kudi [Yehova], pakwez in kutentam adi [arund nend].”—Jinswir 3:32.

Karina, ukweta mivu 20, wasala usu wa kumujindjikin tatukwend anch wajipang chijil cha njil (code de la route). Pakwez katwishap kumujindjik rawonsu. Karina ulondin anch “Kusut kwa muvu umwing, tatuku wamana dijin diam ku list wa antu ajipa chijil cha njil. Manangu marumbangana nakash!”

Dilejan ik didiaku? Karina ulondin anch: “Kudandamen kujindjik kurumbuk kukat kujimbish mulong. Kupwa kwa yawonsu akez kuujingunin!”

MUTAPU WA KWILEJIN KU KURUMBUK KWEY

Bibil ulondin anch: “Etu awonsu tukat kurumbok mu mitapu yivud.” (Jakobu 3:2) Mudi mutwamana kal, chidi chijingidij cha kwikepish ni cha kupam anch witiyin kurumbuk kwey—ni sal mwamu pakad kulab.

Kupwa, ilejina ku kurumbuk kwey. Changadim utazukinau anch Vera ulondin anch: “Nikat kuman anch kurumbuk kwawonsu kukat kwinfumb ni kwinkwash mulong wa kusal yom yiwamp chisu chikwau.” El tumana mutapu ukutwisha kusal mwamu.

Anch wasend nking ya tatukwey kupwa wayiyipish. Chom ik ukusala?

  • Ukulik kulond chom ni kuman anch tatukwey kijap chom.

  • Ukumulej kamu tatukwey patok yom yashikenang.

  • Ukumulej tatukwey yom yashikenang pakwez wamufish nich muntu mukwau.

Wakanganyang ekzame mulong wilejangap nawamp. Chom ik ukusala?

  • Ukulond anch ekzame wading ukasiken.

  • Ukwitiyin anch wakanganyang.

  • Ukulond anch mulej wading wimpompatin.

Kutong piur pa kurumbuk wasala pakur kudi mudi kutal mu dikalash piwendishina motak

 Katat shinshikin pa chinech ni sal usu wa kutong anch yeya wadia (1) tatuku ap (2) mulej. Chom ik chikutwishay tatukwey ap mulej wey kutong anch witiyin kurumbuk kwey? Chom ik chikutwishau kutong anch wajindjik kurumbuk kwey?

Katat tongin piur pa kurumbuk wasadina muvu wasutina ou ni akul ku yipul yilondwilaku ey.

Chom ik wasadina? Mutapu ik wapwishina mulong winou?

  • Naujindjikin.

  • Namufishin nich muntu mukwau.

  • Nawitiyina.

Anch witiyinap kurumbuk kwey, mutapu ik wiyova?

  • Navuramena kamu!

  • Nova usany—nafanyina kulond uyakin.

Mutapu ik wafanyina kupwish mulong winou mu mutapu uwamp?

Chom ik wilejina ku kurumbuk kwey?

CHOM IK UTONGINA?

Mulong wak antu amwing akat kulikang kwitiyin kurumbuk kwau?

Chom ik chikukutonginau antu anch ukat kujindjik kurumbuk kwey, pakwez chom ik chikukutonginau anch witiyin kurumbuk kwey?—Luka 16:10.