Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Yakul ku Yipul 10 Yikatau Ansand Kwiyipul

 CHIPUL CHA 3

Mutapu ik Nikutwisha Kwambamb Nau Anvajam?

Mutapu ik Nikutwisha Kwambamb Nau Anvajam?

MULONG WAK CHIDI CHA USEY

Anch wovijan nawamp nau anvaj ey, ukwikal ni musangar mu mwom wey.

CHOM IK UFANYIDINA KUSAL?

Tongin bil chom chinech: Udi uchuku wa Diakasatu. Geoff ukweta mivu 17, wapwish kal midimu yend ya ku chikumbu, ni ukimbin kupimaku! Wakish kal televizion ni washakam mu chitwamu chikatiningay.

Pawiy pinipa, Tatukwend wiman mu chis, ni kasangerap.

“Geoffrey! Mulong wak usutishin chisu chey pa kutal televizion pa ndond pa kumukwash mwanchey kusal devwar? Ukusalangap yom yikatau kukulej!”

Wilondidin anch “yasambish kal kand,” chakwel amutesha.

Tatukwend uzengamin ku chis. “Yom ik ulondina, nsand ey?”

Geoff uyirumwin mes palondinay kwa kwinan anch “Kwikil kwau chom Tatuku.”

Tatukwend wajiman. Wamwel anch “Yama wakwila mwamu!”

Anch yeya wadia Geoff, ov, mutapu ik wela kwipuk matend minam?

TONG BIL!

Kwambamb nau anvajey kudi mudi kwendish motak. Anch watan njil yijikinau, ukutwish kukimb njil yikwau.

 CHILAKEJ:

Changadim utazukinau anch Leah ulondin anch “Chinkasikedining kwambamb ni tatukwam. Yisu yimwing anch nambambin nend, kupwa ukat kulondang, ‘Nlikishinaku ulondin niyamam?’”

LEAH UDI KURUTU KWA YOM YISATU.

  1. Kumutoyin tatukwend.

    Leah utoyin anch, “Ez kunoku, chidi cha usey! Uteshin!”

  2. Kulik kumulondish tatukwend.

    Leah walik kal kwend kwambamb ni tatukwend piur pa mulong wend.

  3. Kuchingel chisu chiwanyidina, ni kwambambin kand piur pa mulong wend.

    Leah wambambin ni tatukwend mpal ni mpal, ap umufundidin mukand piur pa mulong wend.

Chom ik ukutwisha ey kumuyul Leah chakwel atonda?

SHINSHIKIN CHINECH: Tatukwend a Leah ukwet kampuw—ni kajinguninap runeng rikwetay mwanend. Chad anch Leah watond A, tatukwend kakutwishap kwijik mulong wak mwanend umutoyidin. Anch wasal mwamu tatukwend kakutwishap kutesh yilondinay, ni ukumekesh kuburen kalimish kudi tatukwend. (Efes 6:2) Chakin kamu, kusal mwamu kukutwishap kulet yibudikin yiwamp.

Mudi muwakad kukat anch njil yijikinau yikukangesha kusal weny wey, ukutwish kukimb mutapu uwamp wa kwovijan ni anvajey

Ap anch B ukutwish kwikal uswapela, chikwikalap cha manangu kusal mwamu. Mulong wak? Mulong wa kupwish milong yend nawamp, Leah ufanyidin kwambamb ni tatukwend—ni anch tatukwend ukimbin kumukwash, ufanyidin kwijik yom yimushikedina mwanend. Kuninet kukupwishangap milong.

Chad anch watond C, Leah kalikinap anch njil yijikinau yimukangesha kusal weny. Pakwez, usadin usu wa kwambamb piur pa mulong winou chisu chikwau. Anch Leah watond kumufundin tatukwend mukand, ukutwish kwiyov nawamp.

Kufund mukand kukutwish kand kumukwash kufund nawamp yom yikatinay kulond. Pakutangay mukand, tatukwend a Leah ukujingunin yom yadia yikimbinay mwanend kumulej, chinech chikutwish kumukwash kutesh milong ya mwanend nawamp. Anch watond C Leah ni tatukwend akutaninamu. Ap anch ambamb mpal ni mpal ap anch afundijadin mikand, kusal mwamu kukwatijadin ni chiyul cha Bibil chilondina anch “tulondulany yom yikuletisha chisambu.”—Rom 14:19.

Yom ik yikwau yikutwishay Leah kusal?

Tong anch ukutwish kutan mutapu ukwau wa kusal, ni fund pa ndond yishadinaku ey. Kupwa fund yibudikin yikwikalaku ku kutond kwinoku.

 IPUK KULOND NAYIMP

Vurik anch, yom ulondina ni yitonginau anvajey piulondina yikatap kutanijan.

CHILAKEJ:

Anvajey akutwish kukwipul anch mulong wak umeken mudi ukwetap musangar. Chad walond anch, “Nisotinap kwambamb piur pa mulong winou.”

Pakwez anvajey akutesh anch: “Uyichingejidinap ap pakemp mulong wa kuyilej milong yey. Ukuyilej arund nend piur pa milong yiney pakwez etu bwat.”

Tong bil anch urishin ni mulong ukash ni nvaj wey ukimbin kukukwash. Anch walond anch: “Kangal wiyakamish. Nikutwish kwam kuupwish amwinam.”

  • Nvaj wey ukutwish kutesh anch:

  • Chikutwish kwikal chiwamp anch walond anch: