Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Yakul ku Yipul 10 Yikatau Ansand Kwiyipul

 CHIPUL CHA 6

Mutapu ik Nikutwisha Kurish ni Yibachikin ya Antu Akwau?

Mutapu ik Nikutwisha Kurish ni Yibachikin ya Antu Akwau?

MULONG WAK CHIDI CHA USEY

Anch walik kwilikidij, ukutwish kwikal ni usu wa kutakel mwom wey, pa ndond pa kulik antu akwau autakela.

CHOM IK UFANYIDINA KUSAL?

Tongin bil chom chinech: Pashejinau ansand nend a ku shikol, Brian wov muchim wamuswan mwivum. Tupamp twaad mu rubing, amubachika kuna ruwand. Kading kapamp ka kasatu kumusal mwamu.

Nsand wa kusambish wamwel anch:

“Udi kwey amwiney? Nikimbin nikuleja murund nam.”

Palondinay anch “murund nam” wamukwat pa chikij ni ubudishin chom mu dibeng diend mulong wa kumwinkish Brian.

Brian umen ruwand mu makas mwa nsand winou. Muchim wa Brian wamuswan kand nakash.

Brian wamulej anch “Nlikishinaku.” Nakulejin kal anch am niku . . .”

Nsand wakaad wamukaturij anch: “Lik usup mwamu!”

Brian wikal kal ni usu wa kulond anch “Nisupinap!”.

Nsand wakaad umukwatin Brian pa chikij. Umulejin anch “Send kwey.”

Nsand wa kusambish wamuchofishin ruwand ni wamunungwish anch: “Tukukulejanap kwetu. Kwikil muntu ukwijika.”

Anch yeya wadia Brian, mutapu ik wela kwakul?

 TONG BIL!

Ov, arund nend a Brian inay atongin kamu piur pa yom yisadinau? Akwatin kamu mipak yiwamp? Bwat. Yisu yivud, akat kusalang mwamu mulong ayibachikining kudi arund nau. Akweting kuswir kwa kuyitiy kudi arund nau, chawiy akat kuyilik arund nau ayikwatina mipak pa ndond yau.

Anch yeya wadia urishina ni yom mudi yiney, mupak ik wafanyina kukwat mulong wa kurish ni choziu chinech?

  1. YIUFANYIDINA KUSAL

    Bibil ulondin anch: “Muntu wa manangu anch waman yom yikash, ukat kujingam, pakwez antu amwamu akat kuya kurutu ni kwimesh mar.” —Jinswir 22:3.

    Yisu yivud, ukutwish kuman anch chikukasikedin kusal mwamu. Chilakej, tong bil anch waman arund ney a ku shikol ezin kurutu ni akat kuna ruwand. Mulong wa kwiyep mulong winou, ufanyidin kwijik chiufanyidina kusal.

  2. CHIUFANYIDINA KUTONG

    Bibil ulondin anch: “Lamany kom ken kadia zwang.”—1 Pita 3:16.

    Iyipula anch, ‘nikwiyov nchik anch nayichin arund inay?’ Ufanyidin kwipuk kuyisangaresh arund ney. Kupwa mutapu ik ukwiyova? Ukutwish kuyipish mwikadil wey mulong wa kuyisangaresh arund ney?—Kubudik 23:2.

  3. UFANYIDIN KUKWAT MUPAK

    Bibil ulondin anch: “Mwin manangu ukat kwov wom.”—Jinswir 14:16.

    Tufanyidin kwijik anch, mipak tukwatina yikutwish kwikal ni yibudikin katat ap machuku ma kurutu. Bibil ulejen piur pa antu akwata mipak yiwamp mudi Josef, Job ni Yesu. Ulejen kand piur antu akwata mipak yiyimp mudi Kain, Esau ni Yudas. Chom ik ufanyidina kusal?

Bibil ulondin anch: ‘Sal yom ni kushinshaman.’ (Kuseng 37:3) Anch ukat kutongin piur pa yibudikin ni kukwat mupak, ukuman anch chikuswapedin kulam mwikadil wey—ni ukutaninamu.

Kangal kwiyakamish—ukwetap kuswir kwa kuyilej arund ney yom yivud piur pa Bibil. Chifanyidin kulond kwau anch bwat. Mulong wa kwipuk kupwitijan, ukutwish kulond kwey anch:

  • “Yintadinap kwam!”

  • “Nikutwishap kusal yom yiney!”

  • “Diokal pinap, nikatinap!”

Cha usey chidi kwakul pakad kulab ni kashinsh kawonsu. Anch wasal mwamu, ukutwish kushimwok mutapu ukovau arund ney usany!

 Kurish Ni Mwikadil Wa Kuswingishan

Anch witiy yibachikin ya arund ney, ukwikal mudi robo usadishinau yom ku usu

Chom ik ukusala anch arund ney akusipin? Chikwikal nchik anch alond anch, “Udi nchik—usupin?” Ijik anch kuswing kwa mutapu winou kudi kwau chibachikin cha arund. Mutapu ik ufanyidina kusal? Ukwet yom yaad ufanyidina kusal.

  • Ukutwish kwey kwitiyin kuswing kwinoku. (“Chiwamp, nisupin!” Kupwa lejan mulong wak witiyidin.)

  • Ukutwish kwipuk yibachikin ya arund. Lejan mulong wak ulikin yibachikin yau ni kupwa yitongisha arund ney. (“Nadiap nitongina anch niyey ukat kunang ruwand!”)

Anch arund ney adandamedin kukuswingish, yang kwey! Ijika anch, anch wadandamen kwikal nau yibachikin yikwikal yipandakena. Anch wadiokalap, ukumekesh anch arund ney kakutwishap kukuswimp.

Ap anch chikasiken kwipuk kamu ku yibachikin ya arund, ufanyidin kwijik yom ufanyidina kusal, lam mwikadil wey ni shimpish muchim. Kupwa, yeya wija yom ufanyidina kusal!—Joshua 24:15.