Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Yakul ku Yipul 10 Yikatau Ansand Kwiyipul

 CHIPUL CHA 8

Chom ik Nifanyidina Kwijik Piur pa Kusarumun kwa Masandj?

Chom ik Nifanyidina Kwijik Piur pa Kusarumun kwa Masandj?

MULONG WAK CHIDI CHA USEY

Muvu ni muvu, mamiliyon ma antu akat kuyiyipish mu masandj ni akwatikena nakash mu mulong winou adi ansand.

CHOM IK UFANYIDINA KUSAL?

Mwin kumusarumun Annette wamupwata chikas ni wamuwish kurutu ijika chom chadia chikimbina kusadik. Ulondin anch “nasala usu wawonsu mulong wa kumukangesh. Natoya, pakwez natwishap kubudish dizu. Namubachika, namudjata ni namuponda nzal. Kupwa, wapampa mpak. Naziya nakash.”

Anch yom yiney yakushikena ey, ov, wela kusal mutapu ik?

TONG BIL!

Anch wading witenchikin kal—pamwing ap anch ubabel piubudikina pol uchuku—mulong yom yiyimp yikutwish kushiken. Bibil ulondin anch, ‘kuwin kudingap kwa antu akweta mau nakash, . . . ni kutwish kudingap mulong wa antu akweta ronganyin, mulong chisu ni yom yakad kuchingejin yikat kuyishiken antu awonsu.’—Mulej 9:11.

Mudi Annette, ansand amwing akat kuyiyipish kudi muntu wakad kwikal wa chijiken. Akwau akat kuyisarumun kudi muntu wa chijiken ap muntu wa mu dijuku. Pawanyishay Natalie mivu dikum, amukwata ku usu mulong wa kusal nend masandj kudi nsand wading ushicha piswimp ni kwol kwau. Ulondin anch “Nova wom nakash ni usany ni kwinsambishil, natwishap kumulej muntu ap umwing.”

 UFANYIDINAP KWIFISH NICH

Annette wadandamena kurish ni yovil ya kwifish nich mulong wa yom yamushikena. Ulondin anch, “nadandamena kutong pa yom yashikena uchuku winiwa. Nikat kutong anch nafanyina kusal usu nakash mulong wa kumukangesh. Pakwez, kupwa kwa kwimpamp mpak, nova wom nakash. Natwishap kand kusal chom ap chimwing, pakwez natonga anch nafanyina kusal chom kanang.”

Natalie niyend warisha ni yovila ya kwifish nich. Ulondin anch, “nafanyinap kwichingejin amwinam. Anvaj am atuleja anch tufanyidin kusengen pol pamwing ni mwanamakwam mband, pakwez nateshap. Chawiy chasala anch mutej nam ansala nayimp. Chom chashikena chayovisha nayimp antu a mu dijuku diam, ni namana anch yama nayovisha kal kuyip mwamu. Narisha nakash ni mulong winou.”

Anch niyey wiyovil mudi Annette ap Natalie, ijik anch muntu wakusalang mwamu wakushindilang kwend. Antu amwing akutwish kupipej mulong winou, ni kusambish kulond anch chiwapin kwau ansand kusal mwamu ap kulond anch muntu wayipishangau wading kwend ukatin. Pakwez kwikil muntu uwanyidina kuyipish. Anch yom mudi yiney yakushikenap kal, ufanyidinap kwifish nich!

Chad, chiswapel kutang mutu wa mulong winou ulondina anch, “ufanyidinap kwifish nich”; pakwez kwitiyij kukutwish kukasikan. Antu amwing akat kutong nakash piur pa yom yashikena ni akat kwifish nich ni kwikal ni yovil yiyimp. Pakwez nany ukutaninamu anch waninet—yeya anch mwin kukusal nayimp? Ufanyidin kusal chom chikwau.

YILEJAMU ANTU AKWAU

Bibil utulejin anch mulong wa mar mend makash, Job muntu utentamina walonda anch: “[Nikulond] nich kusansan kwa mupim wam!” (Job 10:1) Ukutwish kutaninamu anch niyey wasal mwamu. Kumulejamu muntu uchingejidina kukutwish kukukwash kurish ni yom yakushikena ni kukukepishin yovil yiyimp.

Yovil yey yikutwish kukulimin nakash. Mulong wak kulik kwit ukwash pa kumulejamu muntu mukwau?

Annette wamana anch chiwapin kusal mwamu. Ulondin anch: “Namulejamu murund nam, ni wankasikesha kwambamb ni amakurump aad a mu chikumangen chetu. Ni nasala mwamu. Ambamba niyamam yisu yivud ni anleja yom nading nikweta nich kuswir kwa kutesh—anleja anch yakushikena yiney yadingap ya rusot rey. Kwikil chom ap chimwing chiyimp nasala.”

Natalie wayileja anvajend piur pa mutapu wamuyipishau. Ulondin anch, “Ankwasha nakash. Ankasikesha kulond piur pa yom yiney, ni chinech chakwasha kukepish ushon ni ujim unadinga nich.”

Malembil mamukasikesha kand Natalie. Ulondin anch, “kwambamb ni Nzamb kwankwasha, nakash chisu niyova anch nikutwishap kumulejamu muntu mukwau. Chisu nikata kulembil, nikat kulondang yawonsu. Nikat kwiyov pee ni kukat kwingik chisambu.”

Niyey ukutwish kuman anch “kudi chisu chikwau cha kwokan.” (Mulej 3:3) Lam nawamp mujimbu ni manangu mey. Pim chisu chiwanyidina. Cha usey nakash, muchingejina Yehova Nzamb mwin rongoj rawonsu.—2 Korint 1:3, 4.

 ANCH WAWANYISHIN KAL MIVU YA KWATAN

Anch udi changadim ni akubachikin kudi akwen kusal yom yiyimp, kwikil kwau uyimp wa kulond pakad wom anch, “Kangal kusal mwamu!” ap anch, “Diosh chikas chey!” Kangal wov wom anch mulong urund wey ni nsand winou ukufa. Anch urund wafa mulong wa mulong winou, komb kakukatinap! Ukwet kuswir kwa ikundj wa kuchingejin, ulimishina mujimbu ni mbil yey.

YIPUL PIUR PA KUSARUMUN KWA MASANDJ

“Ku shikol ansand ampwitang mwi fung a mayel, ni anlondang yom yiyimp—anlejang anch nikwiyov nawamp anch nasal nau masandj.”—Coretta.

Utongin anch ansand inay ading

  1. Amupimin kwau?

  2. Akat kwizez nend?

  3. Akat kumusarumun mulong wa kusal nend masandj?

“Mu motak, nsand umwing wasambisha kwilej yom yiyimp ni kwimpapat. Nadiosha chikas chend ni namuleja anch diokal pinap. Wamana mudi nizarikin.”—Candice.

Ov, utongin anch yom ik yading yikimbinay nsand winou kumusal Candice?

  1. Umupimin kwend?

  2. Wizezin nend?

  3. Wanding ukat kumusarumun mulong wa kusal nend masandj?

“Muvu wasutina ou, nsand wanleja anch winkatin ni ukimbin anch tusambisha kwend nend, wadandamena ap pinamuleja anch bwat. Yisu yimwing, wampapatang ku chikas. Namuleja anch lik, pakwez kateshap kwend. Dichuku dimwing nading nikat kukas moj wa yilat, wambula ku mupany.”—Bethany.

Mutapu ik umena ey, nsand wading:

  1. Umupimin kwend?

  2. Wizezin nend?

  3. Ukat kumusarumun mulong wa kusal nend masandj?

Chakul chakin ku yipul yawonsu yisatu udi C.

Kushalijan ik kudia pakach pa kumusarumun muntu mulong wa kusal nend masandj ni kwizez nend ap kumupim?

Muntu umwing ndiy ukata kumusarumun mukwau mulong wa kusal masandj. Kukat kudandamen ap anch muntu ulikin kwend.

Kumusarumun muntu mulong wa kusal nend masandj udi mulong ukash. Kukutwish kushikij ku kusal masandj ku usu.