Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Yakul ku Yipul 10 Yikatau Ansand Kwiyipul

 CHIPUL CHA 1

Am Nidi Nany?

Am Nidi Nany?

MULONG WAK CHIDI CHA USEY

Kwijik chiudia ni yom yidia ya usey kudi ey kukukukwash kukwat mipak ya manangu chisu chikubachikinau kusal yom yiyimp.

CHOM IK UFANYIDINA KUSAL?

Tongin bil chom chinech: Karen udi mu chisak, pakwez pakad kulab watesh dizu dia muntu wijay.

“Mulong wak udi pinap?”

Karen wakarumuk mulong wa kumutal murund nend Jessica ufungila milond yaad. Umulejin anch mudi maar ma kasu. Jessica umwinkin Karen mulond umwing wa maar ni wamulej anch, “Wapamin kal, ukutwishap niyey kwipuwangej?”

Karen ukimbin kulik, pakwez Jessica udi murund nend. Karen kakatinap anch murund nend atonga anch usupin. Chad, Jessica udi changadim muwamp. Ni chiyipinap kwau ap anch ndiy unil maar. Karen utongin anch, ‘Madi kwau maar.’ ‘Yidiap kwau mudi kuna yom yilewishena.’

Anch yeya wadia Karen, chom ik wafanyinang kusal?

TONG BIL!

Mulong wa kukwat mupak wa manangu pa mulong mudi winou, ufanyidin kwijik chiudia. Kurumburikin kwijik chiudia ni kwijik yom yidia ya usey kudi ey. Kwikal ni ronganyin riner kukukukwash kwikal ni usu wa kutakel mwom wey pa ndond pa kulik autakela kudi antu akwau.—1 Korint 9:26, 27.

Mutapu ik ukutwisha kukudish usu wa mutapu winou? Dikwikal disambishil diwamp anch wakul ku yipul yilondwilaku ey.

 1 YISU MIKADIL YAM YIWAMP?

Kwijik ukaliweny ni mikadil yey yiwamp kukukasikesh kashinsh ukweta.

CHILAKEJ CHA MU BIBIL: Kambuy Paul wafunda anch: “Nidi muntu wakad kwijik kulond nawamp . . . , pakwez kinidiap muntu wakad manangu.” (2 Korint 11:6) Mulong Paul wading ukwet ronganyin ra Mifund, watwisha kujijaman pamutekau mu ubaj kudi antu akwau. Kalikap anch kulond kuyimp kwa antu kuziyisha kashinsh kend.—2 Korint 10:10; 11:5.

ISHINSHIKINA AMWINEY: Kudiokal nlel, fund mikadil yiwamp ukweta.

Chad rumburil piur pa mwikadil uwamp nakash ukweta. (Chilakej, ukat kuyibanginang antu akwau? ukweting muchim wa kupan? uding muntu wa kuchingejin?)

2 YISU MIKADIL YAM YIYIMP?

Muyolal ukasikening anch yinungin yidi yikash, chilik chimwing, kwijik chiudia kukutwish kuyip anch walik yaku yiyimp yikuziyisha.

CHILAKEJ CHA MU BIBIL: Paul wading wij kuziy kwend. Wafunda anch: “Mu muchim wam nikat kusangar mulong wa yijil ya Nzamb. Pakwez mu mujimbu wam mudi yom yikwau yikata kurish nich yom yinikatila nich manangu mam. Ukash wa yom yiney ya yitil yidia mu mujimbu wam yikat kwinkas mudi muntu wa rukan.”—Rom 7:22, 23.

ISHINSHIKINA AMWINEY:Yaku ik yiyimp ufanyidina kushinshikin mulong wa kuyipwish?

 3 YOM IK NITONGINA KUSAL?

Ov, ukutwish kukandam mu motak ni kumulej mwin kwendish anch akuyingumwisha ku yikumbu kushik ni pakupwila mazut? Bwat —chikwikal cha usup nakash!

Dilejan ik didiaku? Kwikal ni yom ya kusal kukukutakel ni kukukukwash kuya kurutu. Wij kuufanyidina kuya ni njil ya kuyil.

CHILAKEJ CHA MU BIBIL : Paul wafunda anch: “Am nikat kubambil mau mes kurutu, matadil kwisudiel.” (1 Korint 9:26) Pa ndond pa kusal yom pakad kuyitongin, Paul witekina jintong ni wasala yom kukwatijan ni yom yiney.—Filip 3:12-14.

ISHINSHIKINA AMWINEY:Kudiokal nlel, fund yom yisatu ufanyidina kuwanyish muvu ukwezap ou.

4 YISU YITIYIJ YAM?

Anch wij nawamp chiudia, udi mudi mutond ukweta mij yikash yikutwisha kuulam ap ku rinkind mukash

Anch ukwetap yitiyij, ukutwishap kukwat mipak. Mudi kangalaseng, ukuswimp mikadil yey mulong wa kwikal mudi arund ney—mudi chibudikin, ukutwishap kand kwijik chiudia.

Pakwez anch yisalijok yey yimedin pa yitiyij yey, ukulam ni ukwijik chiudia—chikalap nchik yom yikusalau antu akwau.

CHILAKEJ CHA MU BIBIL: Padingay nsand, muprofet Daniel ‘wakwata mupak’ wa kuziyil ku yijil ya Nzamb, ap anch wading kulemp ni kwol kwau. (Daniel 1:8) Pasalay mwamu, wikala nich kashinsh ka yitiyij yend ni wasala yom kukwatijan ni yitiyij yiney.

ISHINSHIKINA AMWINENY:Yisu yitiyij yey? Chilakej: Ov, witiyijin mudiay Nzamb? Anch mwawiy, mulong wak? Uman ik ukweta ukwinkishina ey kashinsh anch Nzamb udingaku?

Ov, witiyijin anch yijil ya Nzamb yidiaku mulong wa uwamp wey? Anch mwawiy, mulong wak?

Chad katat, usotin kwikal mud ik—mudi diyij diumina dipwepwilau kudi rikind mukemp anch mudi mutond ujijamena ku rikind mukash? Anch wijik chiudia, ukwikal mudi mutond winou. Ni chinech chikukukwash kwakul ku chipul ech, Am nidi nany?