1, 2. Ov, risu radinga rutong ra Yehova piur pa dichuku dia sambwad ni mutapu ik manangu ma Nzamb mapakiwa pa nsambishil ya dichuku dined?

WAYIP KAL! Muntu, chitangil cha katumb chatangay Nzamb pa dichuku diamusamban, chawa kal nayimp win kamu. Pakwez, Yehova walonda anch: “Yom yawonsu yatangay,” pamwing ni muntu yading “yiwamp kamu.” (Disambishil 1:31) Pansambishil ya dichuku dia sambwad, Adam nenday Ev atonda kumulondul Satan ni amubwambwila Nzamb. Kusutil ku chisal chinech, awiy awila mu chitil, kuburen kuwanyin ni rufu.

2 Chakimbanga kumekan mudi akangesha rusot ra Nzamb chakwel dichuku dia sambwad diwanyin. Mulong dichuku din diang, mudi machuku makwau masambelaku, diafanyidina kwikal dichuku dia tunan ni tunan twa mivu. Yehova wadiyukisha, ni pa dichuku din diang pawiy pafanyidina divu diakabuj kwikal paradis wizwila too ni dijuku dia antu awanyidina. (Disambishil 1:28; 2:3) Ov, mutapu ik wela kuwanyin rusot riner kupwa kwa kubwambul kwinoku kwikalaku? Ov, chom ik chelay Nzamb kusal? Mulong winou wakimba kutek manangu ma Nzamb mu kupakiu—pamwing ap kupandakena kupakiu kwin kwawonsu.

3, 4. (a) Ov, mulong wak chisal chasalay Yehova piur pa kubwambul kwabwambulau mu Eden chidi chilakej chimwing cha manangu mend? (b) Ov, kwikepish kufanyidin kutubachik ku kwijik chom ik pitwilejininga manangu ma Yehova?

3 Yehova wakimba cha kusal kapamp kamwing pa mulong winou. Ndiy wayikatwila antomboj yibau mu chir cha Eden, ni pa chisu chin chang, ndiy walonda chom chimwing chisangareshina piur pa rusot rend ra kupwish mar masambisha kumekan. (Disambishil 3:15) Rutong riner rikusal tunan ni tunan twa mivu kudiok mu Eden, kusutil ku mivu yawonsu yasadina kal antu panap pa divu djat ni mu machuku madia kurutu. Rutong riner riswapel kwau, pakwez, rikwet kand yom yiwamp yikurukina yikutwisha kumubachik mwin kutang Bibil kuyilej ni kutongijokin pa machuku mend  ma mwom pakad kuziy. Twijikany anch, rutong ra Yehova rikez kuwanyin kamu. Ridi rutong rikeza kupwish yom yawonsu yiyimp, chitil ni rufu. Rikez kuyishikij antu ashinshamena ku kuwanyin. Yom yawonsu ey yikez kusadik kurutu kwa dichuku dia sambwad kupwa, chawiy kulond anch, Yehova ukez kuwanyish rusot rend radingay nich piur pa divu ni antu ching pa dichuku ni pa chisu chirijekinay kamu, chikalap nchik kubwambul kwinoku kwasadika!

4 Manangu mudi minam mapepilau matubachikin kumukat Nzamb nakash, ov, kimwawiyap? Kambuy Paul washikena ku kufund anch: “A, kujimb kwa . . . Manangu ma Nzamb!” (Rom 11:33, NW) Pitwilejininga yom kushalijan piur pa ngikadil ya Nzamb yiney, tufanyidin kwikepish chakwel twijika anch chikalap nchik usu wetu tukusala, chitukutambula chidi kwau manangu makemp kusu piur pa manangu majim ma Yehova. (Jobu 26:14) Tushinshikinany chakusambish chirumburikina manangu ma Nzamb.

Manangu ma Nzamb Marumburikin Ik?

5, 6. Ov, kukwatijan ik kudia pakach pa ronganyin ni manangu ni mutapu ik ronganyin ra Yehova ridinga rijim?

5 Manangu mashalijadin nich ronganyin. Akutwish kwandjik yom yivud ya ronganyin mu maordinater, pakwez chikasikening kudiay muntu kulond anch mashiny minam mading nich manangu. Chikalap nchik mwamu, ronganyin ni manangu yiyiling pamwing. (Jinswir 10:14) Chilakej, anch uswiridin chiyul cha manangu piur pa mutapu wa kwiyokish mayej makash, ov, ukuya kudiay muntu wija mudimu wa chimwingang nawamp bil anch ukuya kudiay muntu wakad kwikal nich ronganyin ra umwingang? Ap pakemp! Chawiy, ronganyin rakin riding ra usey chakwel wikala nich manangu makin.

6 Ronganyin rikwetay Yehova ridi rakad mipak. Chidiay “Mwant wa chikupu,” ndiy kusu ukweta mwom wakad nsambishil ni nsudiel. (Kujingunik 15:3) Ndiy wij yom yawonsu yasadikina kal pasutin kal tunan ni tunan twa mivu twakad kuchind. Bibil ulondin anch: “Kwikil chom chikutwisha kujingam kudi Nzamb. Yitang yawonsu yimeken patok, ndiy ukat kuman yom yawonsu zwang, kudi ndiy kwawiy kutukeza karumburil yisalijok yetu yawonsu.” (Hebereu 4:13; Jinswir 15:3) Chidiay Sakatang, Yehova wij nawamp yom yatangay, ni ndiy umening midimu yawonsu ya antu kudiok kwinsambishil. Ndiy ukat kushinshikin muchim wa muntu ni muntu, kavuramediningap chom ap chimwing. (1 Jinsangu 28:9) Chatutangay nich want ipau,  usangering nakash patumeningay tukat kukwat mipak ya manangu mu mwom. Chidiay kand ‘Mwin Kutesh kulembil,’ ndiy uteshining yom yivud yimulejiningau pa kapamp kamwing! (Kuseng 65:2) Chawiy chirumbutikina anch chidiap cha usey kulond anch Yehova kavuramediningap yom.

7, 8. Ov, mu mutapu ik Yehova usadingay yom nich kudimuk, kujingunin ni manangu?

7 Yehova kakwetingap ching ronganyin kusu. Ndiy umening nawamp kukwatijan kudinga pakach pa yom kushalijan ni ujingunyining chom chikutwisha kulangwish yom yikemp yikemp yivud anch yawonsu yawanyin. Ndiy wijing chom ni chom chin chawonsu ni ukwatining mupak, utekining kushalijan pakach pa yom yiyimp ni yiwamp, yom ya usey ni yakadi usey. Chikwau, ndiy kayishinshikidiningap antu piur bwat, pakwez ukimbijodining yom yiwamp yidia mu muchim. (1 Samwel 16:7) Chawiy lel, Yehova ukweting manangu ni kujingunin, ngikadil yidia ya piur kusutamu ronganyin. Pakwez, manangu madi ni usey nakash kupandakan.

8 Manangu mitining kusal pamwing nich ronganyin, kujingunin ni kudimuk mulong wa kusal chom chimwing. Pakwez, yikarumun yimwing ya Bibil yikarumwining dizu “manangu” mudi “mudimu ukweta chibudikin kanang” ap “ukaliweny uwanyidina wa kusadil.” Chawiy, manangu ma Yehova madingap ma mazu kusu. Pakwez, makwashining mu midimu ni makweting yibudikin. Chidiay Yehova nich ronganyin rivud ni manangu mapandakena, yisu yivud, ndiy ukwatining mipak yipandakeninga kuwap ni uyiwanyishining mu mutapu uwamp nakash. Minam mawiy manangu makin kamu! Yehova uwanyishin mazu makin ma Yesu malondina ach: “Manangu ma Nzamb makat kumekan anch madi makin ku yisalijok yau.” (Mateu 11:19) Yom yatangay Yehova yimekeshin nich usu wawonsu manangu makwetay.

Uman Umekeshina Manangu ma Nzamb

9, 10. (a) Ov, manangu ma mutapu ik mamekeshiningay Yehova ni mutapu ik usadiningay mwamu? (b) Ov, mutapu ik selil umekeshiningay patok manangu ma Yehova?

9 Ov, kand kal ushimwokap piumeninga mutapu mwin kuchil utongijokiningay ni manangu chakwel asala yom yiwamp yisadiningau nich mudimu nawamp? Winou udi mutapu umwing wa manangu ushimwokishina. (Kubudik 31:1-3) Yehova amwinend ndiy musul  wa manangu minam ni ndiy amwinend umading nich mawonsu. Chawiy, mwant David walonda piur pa Yehova anch: “Nakujikitish, [Yehova] mulong wantanga nawamp. Midimu yey yawonsu yikwamushen. Nij mwamu nich muchim wam wawonsu.” (Kuseng 139:14) Chakin kamu, pitwilejininga nakash mujimbu wa muntu, manangu ma Yehova makutubachik kand nakash ku kumulimish.

10 Chilakej: Mujimbu wey usambishining mudi selil umwing—diy dia selil winou diadiokila kudi maku, adikudisha nich mem ma chivadik ma tatuku. Pasutap chisu chilemp, selil winou wasambisha kwiyauril mu maselii makwau. Nlel unou, mujimbu wey ukwet maselil miliyar 100. Maselil minam mading makemp makemp nakash. Maselil piswimp ni tunan 10 makutwish kwandam mu dipan dia ndong. Chikalap nchik mwamu, maselil minam masadikining umwing ni mukwau mu mutapu ushimwokishina. Selil uding ni yom yivud nakash mukach mwend kupandakanamu mashiny ap izine mwin mwawonsu wasalau kudi antu. In siyans alondining anch selil uding mudi musumb utunginau nich jimbumbu—ukweta jinjil ja kwandamin ni ja kubudikin jishinshikidiningau nawamp, udi mudi ditenchik dia miotak ya kusendin yom, dia kwambambin ku telefon, dia chapu cha kasu ka nzembu, dia chapu cha kuchapin yom, dia chapu cha kwisukin yishoshot chakwel yibudisha yom yisu, dia chisak cha amasalay ni uding mudi guvernema mujim mukach mwend. Chikwau, selil ukutwish kubudish selil mukwau mudi ndiy kamu mu yisu yikemp!

11, 12. (a) Ov, chom ik chisadininga chakwel tuyikunku tukemp tukemp twa maselil uyila ni kukul twikala yikunku ya mujimbu kushalijan ni mutapu ik yambatena nich Kuseng 139:16? (b) Ov, mutapu ik wong umekeshininga anch ‘atutanga mu mutapu ushimwokishina’?

11 Maselil mawonsu madingap chilik chimwing. Mwawiy mudinga maselil ma mwan udiokila ku kuvadik, maselil ni maselil madandamedining kuvalijan mulong wa kuwanyish yisend kushalijan. Maselil mamwing misadining mulong wong, makwau ma mafup, ma misuny, ma mash ap ma mes. Kushalijan kwinoku kwawonsu akufundin kal mwindond yidia mudi ya kulamin mikand mudia ngikadil jimekeshininga mutapu ukezay kwikal mwan jamburishiningau kudi anvaj (ADN). Chawiy, spiritu wamubachika David chakwel amuleja Yehova anch: “Mes mey masambishil kal kuman yom yam piwakad kal kuwanyish mujimbu wam, machuku mam amafundil kal mu mukand wey.”—Kuseng 139:16, TMK.

 12 Yikunku yimwing ya mujimbu yidining ni yikunku yikwau yivud nakash. Chilakej, tushinshikinany wong wa muntu. Antu amwing alondining anch ku yom yawonsu yilejinau kal panap pa divu, wong udi chom chimwing chikweta yikunku yivud nakash. Ukweting tuyikunku tukemp tusadininga tumijir tukemp tukemp twijikishininga mujimbu yom—tumijir twinetu tuding uvud wa miliyar 100, mudi mudinga uvud wa atutumbu adia mu galaksi wetu. Kachikunku ni kachikunku ka maselil minam kakwet nikawiy tunan ni tunan twa tuyikunku yitwambateshina nich maselil makwau. In siyans alondining anch wong ukutwish kulam yom yawonsu yidinga mu mikand yidia pa mangand mawonsu, ni alondining kand anch uvud wa yom yikutwishau kulam udi wakad nsudiel. Ap anch in siyans ilejin piur pa wong winou ‘watangau mu mutapu ushimwokishina’ mu kusut kwa mivu yivud, alonding anch kajinguniningap mutapu wautangau.

13, 14. (a) Ov, mutapu ik atupwopu ni atungunyanguny umekeshiningau “manangu” mau ma winam ni chom ik chitufundishinau piur pa Sakatang wau? (b) Ov, mulong wak chitwishikina kulond anch chitang chinech cha ntandawaj achitanga nich “manangu”?

13 Pakwez, antu ading kusu chilakej chimwing cha mutapu udiay Yehova Sakatang wa manangu. Kuseng 104:24 ulondin anch: “A! [Yehova], midimu yey yivudil! Ey wayisala yawonsu nich manangu. [Divu] dizwil nich yitang yey.” Manangu ma Yehova mamekening patok mu yitang yin yawonsu yatangay. Twisambinany bil chilakej chakusambish cha kangunyanguny ukweta “manangu nakash.” (Jinswir 30:24) Chakin kamu, yisak yatu yilongining mu mulong mu mutapu ushimwokishina. Atupwop amwing alamining atupwopu akwau, ayikudishining nawamp mudi annam au alaminingau, ni kupwa ayidiling. Atupwop indjing asadining mudi andim, chawiy kulond anch akunining ubu mudi mbut jau, ni aupamishining. Yitang yimwing yivud ayitanga nich ukaliweny wa kusal yom yishimwokishina nich manangu mau ma winam. Rujij ra mu ul rinyingumukininga mu rupang risengening mu rinkind, rikarimokining nawamp win kamu, chom chakadiau kupakish kusal ap pakemp kudi mavio masadiningau antu. Atujil amwing atwikininga maweny malemp ijing njil ya kulondul mu rinkind ku ukwash wa atutumbu, ap kwambatan nich mutapu uyitakedilau ku usu wa divu upwitininga yom mu chamu cha kasu ka nzembu, ap kudi usu udinga mukach mwau mudi kart ka divu. In kwilej milong ya yom yatangau yidia ni mwom  asutishining mivu yivud mu kwilej kusu ngikadil ja manangu jishimwokishininga jatekau mu yitang yiney. Manangu mud ik matekay Nzamb mu yitang yiney yishimwokishina!

14 In siyans ilejin kal nakash piur pa manangu madinga mu yom yatangay Yehova. Kuding kand ni mutapu wa kwilej piur pa kubomb yitang ya Nzamb chakwel yisala yom yifanyikena nay. Chilakej, pamwing ap washimwokap kal piur pa wand wa ntandawaj chisu waumana. Pakwez, kudiay mwin manangu mu milong ya tekinik, chidi chom chatongijokinau kal nakash kurutu kwa kuchibudish. Ku wand winou, kuding tuwand tukwau tumekeninga mudi tukutwish kukatwok swa, pakwez tuding tukasikena kusut ni wand wa chamu cha kujimb kwatu; tukasikening kusut ni wand udinga mukach mwa yom yidjitingau mulong wa kukangesh yidiangu kwandam mu mujimbu. Ov, kukasikana kwa wand winou kuding kwa mutau ik? Tong bil, anch ajimbish wand winou wa ntandawaj wikal mudi wand ukwatiningau nich ansh, wand winou ukutwish kwimik avion usutina ni mau mavud! Chakin kamu, Yehova watanga yom yiney yawonsu “nich manangu.”

Ov, nany watenchika yitang ya pa divu chakwel yikala nich “manangu ma winnam”?

Manangu Madia mu Yom ya Mwiur

15, 16. (a) Ov, atutumbu a mwiur amekeshining patok uman ik piur pa manangu ma Yehova? (b) Chidiay Yehova Kalal Mujim wa angel apandakena kuvul, ov, mutapu ik umekeshinay anch udi Ntakel wa manangu?

15 Manangu ma Yehova mamekening patok mu yom yend yatangay mu mangand mawonsu. Atutumbu a mwiur twisambidina mu Shapitre 5, kilonginingap mu mutapu wa kanvundangesh. Kusutil ku ukwash wa manangu ma Yehova madinga mu “yijil ya mwiur,” atutumbu inay ayilongil mu mutapu uwanyidina kamu mu yisak ya atutumbu atenchikinau kand mu galaksi; yisak yiney yisadin ni yawiy chisak chijim cha atutumbu. (Job 38:33) Chidiap chom cha kukashimuk Yehova patazukiningay yitang yiney ya mwiur mudi ‘chisak!’ (Isay 40:26) Kuding kand chisak chikwau chimekeshininga patok manangu ma Yehova.

16 Mudi mutwayimena mu Shapitre 4, Nzamb wijiken nich chijiken cha “Yehova wa yisak ya amasalay” mulong ndond yend  yikwetay yidi ya piur ni udi Kalal Mujim wa yisak ya tunan ni tunan twa mamiliyon ma yitang ya muspiritu. Chom chinech chimekeshin patok usu wa Yehova. Ov, mutapu ik manangu mend makweta chisend pa mulong winou? Tushinshikinany bil: Yehova ni Yesu kand kal imikap kusal mudimu. (Yohan 5:17) Chidi kand cha manangu kulond anch angel a Kalal Mujim niyawiy akwatikening chisu chawonsu nich mudimu. Vurikany anch, angel atusutinamu etu antu, akwet manangu ni usu upandakena. (Hebereu 1:7; 2:7) Chikwau, Yehova uyinkishin awonsu midimu yiwamp yisadiningau nich musangar kwasutin kal mivu mamiliyar ni mamiliyar—akat “kuwanyish dizu diend” ni—akat “kusal rusot rend.” (Kuseng 103:20, 21, TMK) Musangar mud ik wa kuman mutapu manangu ma Yehova mamushena!

Yehova Udi ‘Amwinend Mwin Manangu’

17, 18. Ov, mulong wak Bibil ulondinay anch Yehova udi “amwinend mwin manangu,” ni mulong wak manangu mend mafanyidina kutushimwokish nakash?

17 Kusutil ku uman winou, ov, chidi chom cha kushimwok pisambidinay Bibil piur pa manangu ma Yehova anch madi ma piur nakash? Chilakej, Bibil ulodin anch Yehova udi ‘amwinend mwin manangu.’ (Rom 16:27) Ching Yehova amwinend kusu ndiy ukweta kamu manangu mapandakena. Ndiy musul wa manangu makin min mawonsu. (Jinswir 2:6) Chawiy lel, ap Yesu, chidiay chitang cha kusambish chiyisutinamu yitang yikwau yawonsu ya Yehova ku manangu, kachingejiningap mu manangu mend amwinend; pakwez, ndiy walondanga mutapu wamutumau kudiay Tatukwend.—Yohan 12:48-50.

18 Kambuy Paul wamekesha mutapu manangu ma Yehova masutinamu kulemp manangu min mawonsu palonday anch: “A, kujimb kwa rupit ni [manangu] ni ronganyin ra Nzamb! Dirumburish diend diakad kwijikan ni jinjil jend jakad kurumburik kudi antu!” (Rom 11:33) Pasambishinay Paul kulond mazu mend anch: “A,” ndiy wamekesha mutapu washimwokangay—nich kalimish kapandakena. Dizu dia Grek diajimbulay mu verse winou dikarumwinau anch “kujimb” diambaten nich dizu “dibuku dikurikina.” Chawiy, mazu mend minam makwet chitongijok chimwing chikash mu manangu. Pitushinshikidininga manangu ma Yehova, tudi mudi antu adjibwidilau mu dibuku dikurikina diakad nsudiel;  manangu minam madi majim ni makurukina, tukutwishap kwijik kuvul kwamu, ap kupakish kurumburil kujimb kwamu ap chimadia. (Kuseng 92:5) Ov, mulong winou utubachikinap ku kwikepish?

19, 20. (a) Ov, mulong wak mbur uwanyidin kwikal chilakej cha manangu ma Nzamb? (b) Ov, mutapu ik Yehova umekeshiningay ukaliweny wend wa kuman yom ya mu machuku ma kurutu?

19 Yehova udi “amwinend mwin manangu” mu mutapu ukwau: Ndiy kusu ukweta ukash wa kuman yom ya mu machuku ma kurutu. Twijikany anch Yehova usadidining chilakej cha mbur mulong wa kumekesh manangu ma winzamb. Mbur ukutwish kwikal nich kulim kwa makilo matan, pakwez mes mend mapandaken kujimb kusutamu mes ma muntu wapamina kal. Mbur ukweting mutapu wend wa kuman yom upandakena nakash umukwashininga kuman tuyom tukemp-tukemp tukutwisha kwikal mu makilometre tunan mwiur, ap kusu pa ndond yidia makilometre mavud! Yehova amwinend wisambidin kapamp ka kusambish piur pa mbur anch: “Mes mend makat kumen yakudia yend kulemp.” (Job 39:29) Chilik chimwing kand, Yehova ukutwish kuman “kulemp” yom ya—machuku ma kurutu!

20 Bibil wizwil too nich uman ulejena uyakin winou. Ukwet tunan twa mauprofet, ap jinsangu jasambelau kufund kurutu. Wisambidin piur pa njit, disambishin ni kuwa kwa winyikel wa dikand dia mangand, ni walejana kand kachom ni kachom piur pa milad ya njit ja yisak ya amasalay—mu mitapu yikwau kurutu kwa tunan twa mivu.—Isay 44:25–45:4; Daniel 8:2-8, 20-22.

21, 22. (a) Ov, mulogn wak chidiap cha usey kulond anch Yehova utakedining yom yawonsu ukeza kusal mu mashakamin mey ma mwom? Let chilakej. (b) Ov, mutapu ik twija anch manangu ma Yehova kimadiap ma yovil ap kimadiap ma ranaken?

 21 Ov, chinech chirumburikin anch Nzamb wijing yom yawonsu ukeza kusal mu mashakamin mey ma mwom? Antu amwing alejeninga yishankur ya yom yikusadika mu machuku makurutu akasikeshining anch mwawiy mudia chakul ku chipul chinech. Pakwez, malejan minam ma katat mambateningap kamu nich manangu ma Yehova, mulong manangu minam makasikeshiningap kushinshikin ukaliweny wend wa kuman yom ya mu machuk ma kurutu. Chilakej: Anch ukwet dizu diwamp dia kuwang nich muminy, ov, chirumburikin anch muminy winou ukupwap piuwangina? Chitongijok chinech chidiap chakin! Chilik chimwing kand, Yehova ukwet ukaliweny wa kujingunin yom yikusadika mu machuku makurutu, pakwez kausadidiningap yisu yawonsu. Anch usadining mwamu, tukutwish kukangany kwikal nich want ipau wetu wa kusal chitukatina kusal mulong chidi chipan cha usey ukash chakadiay nich rusot ra kututambul ap pakemp.—Kuvurik Yijil 30:19, 20.

22 Chipandakena kuyip chidi mutapu ukimbina dilejan dined kumekesh anch manangu ma Yehova madi manangu makad kwikal ma urund, makad kwikal ma rukat, makad kwikal ma kovilan riy ap makad ranaken. Pakwez, chidingap mwamu ap pakemp! Bibil umekeshin patok anch: Yehova udi “mwin manangu.” (Job 9:4) Chirumburikinap anch Yehova niyend ukweting muchim wa chifanikesh, pakwez Bibil usadidining yisu yivud dizu dined kwambatan nich untu wa mukach wend, kuwejinaku yovil ni yibachikin yend mudi rukat. Chawiy lel, mudi mudinga kamu ngikadil jikwau ja Yehova, manangu mend amatakedining kudi rukat.—1 Yohan 4:8.

23. Ov, kujimb kwa manangu ma Yehova kufanyidin kutubachik kusal ik?

23 Chawiy lel, chifanyidin kamu kuchingejin manangu ma Yehova. Chimapandakena manangu metwetu kulemp, Dizu dia Nzamb ditubabeshin nich rukat anch: “Mukungamena [Yehova] nich muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi ndiy, ni ndiy ukutenchik jinjil jey.” (Jinswir 3:5, 6) El amboku twengamidinany pa manangu ma Yehova chawiy lel tukutwish kusej piswimp kudiay Nzamb wetu, mwin manangu mawonsu.