Mwin Kutang Mukatish:

Ov, wiyovilingap anch uding piswimp ni Nzamb? Antu avud atongining anch chitwishikiningap muntu kwikal piswimp ni Nzamb. Amwing atongining mwamu mulong amening anch Nzamb uding kulemp ni antu; akwau atongining kand anch awiy kawanyidinap kwau kwikal piswimp ni ndiy. Pakwez, Bibil utukasikeshin nich mazu minam ma rukat anch: “Sejany piswimp kudi Nzamb, chad niyend ukusej piswimp ni yenen.” (Jakobu 4:8) Nzamb utudishin michim ya in kwifukwil end nich kashinsh anch: “Am [Yehova] Nzamb wen. Nikez kakukasikeshany ni kukulejany anch: ‘Kangal wovany wom, nikukukwashany.’”—Isay 41:13.

Ov, mutapu ik tukutwisha kwikal kamu mu urund wa piswimp nenday Nzamb? Chakwel muntu ikala murund netu, cha kusambish chitining kumwijik ni kusanger mikadil yend ya pakampwil. Chawiy, kwilej ngikadil ja Nzamb ni jinjil jend mu mutapu uyilejenau mu Bibil, chiding chom cha usey ujim. Tukusej piswimp ni Nzamb anch twatongijokin nawamp pa mutapu umekeshiningay ngikadil jend ku umwing ku umwing ni, anch twatongijokin kand pa mutapu uwamp wamekeshay Yesu Kristu ngikadil jend ni kupwa anch twijik mutapu tukutwisha niyetu kudim ngikadil jinej. Tukez kwijik anch Yehova ndiy kamu ukweta mbil ya kwikal mwant utentamina ni Mukaleng wa mangand. Chikwau, ndiy udi Tatuku tuswiridina etu awonsu kwikal nend. Ukwet dikand, kutentam, manangu ni rukat, ni kakuyilikangap ap pakemp an end ashinshamena.

El amboku buku winou akukwasha kusej piswimp ni Yehova Nzamb, chakwel wikala murund nend wa chikupu ni wikala ni mashakamin makutwisha kumushiman ndiy chikupu.

In Kufund