1-3. (a) Ov, chom ik tukutwisha kwilej piur pa mwikadil wa antu anch twashinshikin piur pa urund udia pakach pa anvaj ni anau? (b) Ov, chom ik chikata kusalik pakatau kutumekeshin rukat, ni chipul ik cha usey tukutwisha kwiyipul?

ANVAJ asotining kuman anch mwanau mukemp usipin. Yisu yivud, asejining nend piswimp ni kutalijan nend chifu ni chifu pasipinau ni kulondol nend pakemp-pakemp. Asotining kuman mutapu wakwilau mwanau. Kupwa, mwan ukusambish kwazuril kan kend pakemp-pakemp, ni kusambish kusip kamu. Pasadilay mwamu, kusip kwinoku kumekeshining rukat ra mwan winou pantaliken ni anvajend amukatina.

2 Kusip kwa mwan mukemp kutuvurishin chom chimwing cha usey nakash piur pa antu. Kumekeshin anch tumekeshining rukat kudi antu atukatina. Wawiy mutapu watutangau. (Kuseng 22:9) Pitupamina, ukaliweny winou wa kumekesh rukat uyiling kurutu. Ukutwish kuvurik pamwing ap piwadinga mwanikanch mutapu wamakeshau anvajey ap arund anch akukatin. Ateka mu muchim wey rukat rimwing rakula ni kushiken ku kumekan mu yisal. Kupwa niyey wasambisha kuyikat. Ov, urund wetu ni Yehova umekeshin chilakej chinech?

3 Bibil ulejen anch: “Etu tukwet rukat mulong Nzamb watukata etu pa kusambish.” (1 Yohan 4:19) Mu Chikunku cha 1 kushik ku 3 mu buku winou, akuvurisha anch Yehova Nzamb wamekesha usu wend, kutentam kwend, ni manangu mend nich rukat mulong wa chiyukish chey. Ni mu Chikunku cha 4, wamana mutapu wamekeshay rukat rend kudi antu, ni kudi ey mu mitapu yimwing ya pakampwil. Chipul chawiy ech, chikutwish kwikal pamwing ap chipul chimwing cha usey nakash ukutwish kwiyipul amwiney anch: ‘Ov, mutapu ik nikutwisha kwakul ku rukat ra Yehova?’

 Chirumburikina Kumukat Nzamb

4. Ov, chitongijok ik chiyimp chikwetingau antu ayimp piur pa kurumburik kumukat Nzamb?

4 Yehova, wasambisha rukat, wij nawamp anch rukat rikwet usu umwing ukash wa kuyibachik antu akwau chakwel asala usu wau wawonsu chakwel ayikwasha niyawiy. Chawiy lel, chikalap nchik kudandamen kubwambuk kwa antu akad kushinshaman, Nzamb wadandamena kwikal nich ruchingej anch antu amwing akez kwakul ku rukat rend. Kupwa antu avud asala mwamu. Cha ushon, mulong ma relijon madia mu mangand minam mayimp mayilejap antu nawamp piur pa kurumburik kwa kumukat Nzamb. Chawiy chilondinau antu avud anch amukatin Nzamb, pakwez atongin anch rukat riner rikutwish kwimedin kusu ku mazu. Kwinsambishil chikutwish kwikal mwamu mudi mukatay mwan mukemp kumekesh anch uyikatin anvajend kusutil ku kusip. Pakwez kudi antu apamina muspiritu, kukat kwitin yom yivud nakash.

5. Ov, mutapu ik urumburilay Bibil piur pa rukat ra Nzamb, ni chom ik chidia cha usey kudi etu mu kurumburik kwinoku?

5 Yehova utulejin chirumburikina kumukat. Dizu diend dilejen anch: “Anch chakin, tumukatil Nzamb, tuziyidil kand ku yijil yend.” Chifanyidin kumekesh rukat ra Nzamb mu yisal. Pakwez, antu avud amening anch chikasikening nakash kumuziyil Nzamb. Pakwez, verse winou ulejen kand nawamp anch: “Chawiy yijil yend [Nzamb] kiyikasikenap nakash kudi etu.” (1 Yohan 5:3) Yany ni yijil ya Yehova ayifunda mulong wa chiyukish chetu, kayifundap mulong wa kutumesh mar. (Isay 48:17, 18) Mu Dizu dia Nzamb mudi yany yivud yitukwashina kusej piswimp ni ndiy. Ov, mutapu ik? Shinshikinany amboku pa mikadil yisatu ya urund wetu ni Nzamb. Kwambamb, kumwifukwil ni Kumwilikej Yehova.

Kwambamb ni Yehova

6-8. (a) Ov, mutapu ik tukutwisha kumutesh Yehova? (b) Ov, mutapu ik tukutwisha kusal anch Bibil wikala nich usu mu mwom wetu pitutangina?

6 Shapitre wa 1 wasambisha ni chipul chinech, anch, “Tong bil anch wambambin nend Nzamb” Twamana anch chipul  chinech chidiap kusu chom cha kutongijokin. Mulong Moses wambamba nend Nzamb. Ov, chidi nchik kudi etu? Yehova kakatap kwambambang nlel ni antu kusutil kudi angel end. Pakwez, ukwet mitapu yimwing yiwamp yikwatay kusadil mulong wa kwambamb niyetu nlel unou. Ov, mutapu ik tukutwisha kumutesh Yehova?

7 Mulong “Mazu mawonsu mabachikay Nzamb kumafund mu Mikand,” tumuteshining Yehova kusutil ku Dizu diend Bibil. (2 Timote 3:16) Nfund a Kuseng wayikasikesha atushalapol a Yehova kutang mukand wa Nzamb “muten ni uchuku.” (Kuseng 1:1, 2) Chitin kwikasikesh nakash chakwel tusala mwamu. Pakwez chiwapidil kwikasikesh kusal kutang mukand wa Nzamb. Mudi mutwamena mu Shapitre wa 18, Bibil udi mudi mukand wa usey nakash udiokila kudi Tatukwetu wa mwiur. Chawiy lel kuutang kukutwishap kukasikan. Tufanyidin kuman yom yashikena pitutangina Bibil. Ov, mutapu ik tukutwisha kusal mwamu?

8 Tal mu manangu yiutangina mu Bibil. Tongin bil pa antu isambidinau. Ikasikesha kujingunin mashakamin, mikadil ni yibachikin yau. Kupwa, tongin nakash pa yom utangina; mu kwiyipul amwiney anch: ‘Ov, chom ik nileja kal kusutil ku rusangu riner piur pa Yehova? Ov, mikadil ik yimekeshinay pinap? Ov, chany ik chisotinay Yehova anch nileja, ni mutapu ik nikutwisha kuchisadil mu mwom wam?’ Tong, tongijokin pa yom yiney, ni yisadila mu mwom wey—anch wasal mwamu, Dizu dia Nzamb dikez kwikal nich usu mu mwom wey.—Kuseng 77:12; Jakobu 1:23-25.

9. Ov, nany udia “kashalapol ushishamena ni kubabal,” ni mulong wak chidi cha usey kumutesh “kashalapol” winou nawamp?

9 Yehova ukat kutulej kand kusutil kudi “kashalapol ushishamena ni kubabal.” Mudi mwatakelay Yesu kulejan, chisak chimwing cha azizidilau many achiteka mulong wa kupan “yakudia [ya muspiritu] pa chisu chiwanyidina” mu machuku minam mansudiel ma mar. (Mateu 24:45-47, TMK) Pitutangina mikand yiney yafundau mulong wa kutukwash chakwel twikala nich ronganyin rakin ra Bibil ni pitukata kukumangan ku yikumangan  ni yitentam ya win Kristu, akat kutudishang kudi chisak cha kashalapol winou. Mulong twij anch udi kashalapol wa Kristu, tukat kusadil nich manangu mazu minam ma Yesu anch: “Babalany, mutapu ukata kuteshany.” (Luka 8:18) Tuteshining nawamp mulong tukat kwitiyij anch chisak cha kashalapol winou wawiy njil usadidinay Yehova mulong wa kwambamb netu?

10-12. (a) Ov, mulong wak kulembil chidi chipan chishimokishena chidiokila kudi Yehova? (b) Ov, mutapu ik tukutwisha kulembil mu mutapu umusangareshina Yehova, ni mutapu ik tukutwisha kwikal nich kashinsh anch ukwatin nich usey malembil metu?

10 Pakwez, chidi nchik piur pa kwambamb ni Nzamb? Ov, tukutwish kwambamb ni Yehova? Chitongijok chinech chikutwish kutushimokish. Tongin bil usotin kumulej muntu umwing udia piur nakash mwi ngand yey chakwel umulejan chom chimwing chikweta usey nakash kudi ey, ov, ukutwish kumuman kamu chakwel wambamba nend? Yisu yikwau, kusal mwamu kukutwish kwikal kwa ubaj kamu! Pa chirung cha Ester nenday Maridoke, anch muntu waya kumuman mwant wa in Peris pakad kumutazuk kudi mwant afanyidina kumujip. (Ester 4:10, 11) Katat tongin chikutwisha kurumburik kwez kurutu kwa Mwant wa mangand mawonsu, mu kwilikej nich in kuyikel mangand minam “ameken mudi atubwol.” (Isay 40:22) Ov, wom ukutwish kutukangesh kamu? Bwat kwau!

11 Yehova waleta mutapu umwing uswapela, ni uwamp wa kumusejin ap kwisamb nend—malembil. Ap mwan mukemp nakash ukutwish kumulembil Yehova nich ritiy, ni kusal mwamu mu dijin dia Yesu. (Yohan 14:6; Hebereu 11:6) Chikwau kand, malembil matukwashin kumulej Nzamb yitongijok ni yovil yetu yikash yidia mu muchim wetu ni yom yisansena nakash yitukutwisha kukangany kulond. (Rom 8:26) Chiwampinap kumulej Yehova nich mazu mavud mavud ap makash, ni malembil malemp malemp. (Mateu 6:7, 8) Pakwez, Yehova katekinap mupak ku kulep kwa malembil metu ap ku uvud wa malembil tukutwisha kumulembil yisu yawonsu tusotina kusal mwamu. Dizu diend ditulejin anch “lembilany kwakad kulik.”—1 Tesalonik 5:17.

 12 Vurikany anch Yehova ndiy amwinend utazukinau anch “Ukat kwakul kulembil kwetu,” ni umateshining nawamp. (Kuseng 65:2) Ov, Nzamb ukat kuyilikidil kusu atushalapol end ashinshamena chakwel amulembila pakad amwinend kusot? Bwat, usangaredin kutesh kamu malembil minam. Dizu diend dilikejin malembil minam nich mananash ma res ruwamp, ni mish yend yikwet didjimb diwamp nakash. (Kuseng 141:2; Kujingunik 5:8; 8:4) Chinech chidi chom chishimokishena mudi ik pa kuman anch malembil metu ma kashinsh mayil mwamu kudi Mukaleng Mwant wetu? Chawiy lel, anch usotin kusej piswimp ni Yehova, ufanyidin kumulembil dichuku ni dichuku ap chisu chawonsu nich kwitudish. Muleja Nzamb yom yawonsu yidia mu muchim wey; kangal wajindjik chom ap chimwing. (Kuseng 62:8) Muleja yitongijok yey, musangar wey, kujikitish kwey, ni mushimana Tatukwey wa mwiur. Kupwa, urund wey ni ndiy ukez kupan ni kwikal ukash.

Kumwifukwil Yehova

13, 14. Ov, chom ik chirumburikina kumwifukwil Yehova, ni mulong wak chifanyidin kusal mwamu?

13 Pitwisambina ni Yehova Nzamb, tukatap ching kusu kumutesh ap kwambamb nend mudi mutukata kwisambang ni murund ap mwanamakwetu. Pakwez tukat kumwifukwil, ni kumulimish nakash mulong uwanyidin kumulimish mwamu. Difukwil diakin didi mwom wetu wawonsu. Mwom wetu utwinkishin chisu cha kumekesh anch tumukatin Yehova ni tukat kwipan kudi ndiy nich muchim wetu wawonsu. Difukwil dined diyitekin pamwing yitangil yawonsu yishinshamena yidia mwiur ap yidia pa divu. Mu chishimu chimwing, kambuy Yohan wamutesha mwangel umwing ukat kulond anch: “Mwifukwilany ndiy watanga diur, ni mangand, ni karung, ni misul ya mem!”—Kujingunik 14:7.

14 Ov, mulong wak tufanyidin kumwifukwil Yehova? Tongin bil pa mikadil twisambidina, mudi kwikal utumbila, usu, kushimpish muchim, kutentam, mushiku, riy, manangu, kwikepish, rukat, ranaken, kushinshaman ni uwamp. Twamana anch mu mikadil yiney yawonsu Yehova ndiy wapana chilakej chimwing  chijim nakash cha mikadil yiwamp yitufanyidina kulondul. Pitukata kwisambin mu wiswimp piur pa mikadil yend, tumening anch ndiy udi Muntu umwing mujim nakash chifanyidina kulimish. Ndiy ukwet katumb kajim nakash, ni udi wa piur nakash kutupandakenamu etu. (Isay 55:9) Tukutwishap kutadik Ukaleng wend, ni tufanyidin kumwifukwil chakin kamu. Pakwez, mutapu ik tufanyidin kumwifukwil Yehova?

15. Ov, mutapu ik tukutwisha kumwifukwil Yehova “ku ukash wa Mwiku wend, ni mu uyakin,” Ov, yikumangan ya win Kristu yitwinkishin chisu cha kusal ik pa chinech?

15 Yesu walonda anch: “Nzamb udi Mwiku, in kumwifukwil afanyidin kumwifukwil ku ukash wa Mwiku wend, ni mu uyakin.” (Yohan 4:24) Chinech chirumburikin kumwifukwil Yehova nich ritiy ni rukat, kwikal atakedilau nich spiritu wend. Chinech chirumburikin kand kumwifukwil kukwatijan nich uyakin, ronganyin rakin ridia mu Dizu dia Nzamb. Tukweting  chisu chiwamp cha kumwifukwil Yehova “ku ukash wa Mwiku wend, ni mu uyakin” pitukata kukumangan ni ambay netu akaritiy. (Hebereu 10:24, 25) Pitukata kumushiman Yehova nich miminy, kulembil pamwing, kutesh ni kwisamb piur pa Dizu diend, tumekeshin anch tumukatin kusutil ku difukwil diakin.

Yikumangan ya win Kristu yidi yisu yiwamp ya kumwifukwil Yehova

16. Ov, chijil ik chijim chakash pakach pa yijil yapanau kudi in Kristu akin, ni mulong wak tufanyidin kwikasikesh chakwel tuziyila ku chijil chinech?

16 Tukat kumwifukwilang kand Yehova pitukata kwambambang ni antu akwau piur pend, ap kumushiman patok. (Hebereu 13:15) Chikwau kand, kulejan rusangu ruwamp ra Want wa Yehova chidi pakach pa yijil yimwing yijim nakash yapanau kudi in Kristu akin. (Mateu 24:14) Tukat kuziyil nakash ku chijil chinech mulong tumukatin Yehova. Anch twatongin piur pa mutapu “anzamb a mangand minam,” Satan Djabul, ‘kubwik mes ma michim ya antu akad twitiy,’ ni kupalangesh makasu piur pa Yehova, ov, tukutwishap kusal usu wa kumusadil mudi Atuman a Nzamb wetu, ni kukangesh makasu minam? (2 Korint 4:4, TMK; Isay 43:10-12) Pitukata kutongin pa mikadil yend yishimokishena, ov, tukutwishap kwikasikesh chakwel tuyileja antu akwau piur pend? Chakin kamu, tukwetap chisend chijim nakash mudi kuyikwash antu akwau chakwel amwijika ni kumukat Tatukwetu wa mwiur mudi etu.

17. Ov, chom ik chidia mu difukwil dietu kudi Yehova, ni mulong wak tufanyidin kumwifukwil nich kashinsh?

17 Difukwil dietu kudi Yehova ditin kand yom yivud. Dimedin pa mikadil yawonsu mu mwom wetu. (Kolosay 3:23) Anch twamwitiyij chakin kamu Yehova mudi Mukaleng Mwant wetu, tukusal ching rusot rend mu mwom metu mawonsu—mu dijuku, ku mudimu, mu urund ni antu akwau, ap mu kwiswedish. Tukusot kumusadil Yehova “nich muchim wawonsu,” nich kashinsh. (1 Jinsangu 28:9) Mu kwifukwil kwinoku mukutwishap kwikal muchim utongina uwamp ni ku uyimp ap wa rubabek bwat—rubabek ra kumekan kudi kudi antu anch tukat kumusadil Yehova pakwez tusadin yitil yikash mu ujindj. Ukashinsh ukutwishap kulikidil rubabek riner; rukat rikisining rubabek. Wom wa Nzamb ukutukwash kusal mwamu. Bibil ulejen anch  wom winou uletining urund wa piswimp ni wa chisu chawonsu ni Yehova.—Kuseng 25:14.

Kumwilikej Yehova

18, 19. Ov, mulong wak chitwishikin kutong anch antu akad kuwanyin akutwish kumwilikej Yehova Nzamb?

18 Kwinsudiel kwa chikunku ni chikunku cha buku winou alejana mutapu wa ‘kulondul chilik cha Nzamb mudi anch akatilau.’ (Efes 5:1) Chidi cha usey kuvurik anch ap anch tudi akad kuwanyin, tukutwish kwilikej mutapu umekeshinay Yehova usu wend, kutentam, manangu ni rukat mu mutapu umwing uwanyidina. Ov, mutapu ik twija anch chitwishikin chakin kamu kumwimburij Mwin Dikand Diawonsu? Vurikany anch, dijin dia Yehova dirumburikin anch ndiy ukata kwikalang chawonsu chisotinay kwikal mulong wa kuwanyish rutong rend. Ukwaliweny winou utushimokishin chakin kamu, ov, tukutwishap kumwilikej? Bwat.

19 Atutanga mu chifu cha Nzamb. (Disambishil 1:26) Chawiy chisadina anch antu ashalijana ni yitangil yikwau yidia pa divu. Tudiap yitangil yisadina yom pakad kutong, mulong wa mash metu ap mulong wa mashakamin metu. Yehova watwinkisha chipan chimwing cha usey nakash—want ipau. Chikalap nchik yilim ni kuburen kuwanyin kwetu, tukwet want ipau wa kutond yitukutwisha kusal. Ov, usotin kwikal muntu ukweta rukat, manangu, utentamina ni usadina nawamp usu wend? Ukutwish kusal mwamu nich ukwash wa spiritu wa Yehova! Tongin pa uwamp ukeza kusal mwamu.

20. Ov, chom ik chiwamp tusadina pitukata kumwilikej Yehova?

20 Ukez kumusangaresh Tatukwey wa mwiur, ni kusangaresh muchim wend. (Jinswir 27:11) Ukutwish kand “kusal machuku mawonsu yom yikatilay” Yehova, mulong wij yilim yetu. (Kolosay 1:9, 10) Mu kudandamen kumwilikej Tatukwey wa mukatish mu kusadil mikadil yend yiwamp, ukez kukuyukish mu kukwinkish chisend chimwing chijim nakash cha kwikal chitokish mu mangand minam madia kulemp ni Nzamb. (Mateu 5:1, 2, 14) Ukez kusal anch chitokish chinech cha untu wa katumb wa Nzamb chitokisha pa divu. Kadi katumb mud ik!

 “Sejany Piswimp Kudi Nzamb, Chad Niyend Ukusej Piswimp ni Yenen”

Dandamen amboku kusej piswimp kudi Yehova

21, 22. Ov, weny ik wakad nsudiel ukwetau antu awonsu amukatina Yehova?

21 Dizu dilejenau mu Jakobu 4:8 dipandakenamu rutong. Didi weny. Anch twadandamen kwikal ashinshamena, weny winou ukezap kupwa. Tukezap kwimik kusej piswimp kudi Yehova. Chikwau kand, tukez kudandamen kwilej yom yivud piur pend. Tufanyidinap kutong anch buku winou watulejin yom yawonsu tukutwisha kwijik piur pa Yehova. Mulong, twilej kal yom yikemp nakash piur pa yom yilajenau mu Bibil piur pa Nzamb wetu! Ap Bibil win katulejinap yom yawonsu piur pa Yehova. Kambuy Yohan walonda anch, ang afunda yom yawonsu yasalay Yesu mu mudimu wend pa divu, “mwi ngand yawonsu kimwelap kumekan ndond ya kutek mikand yelau kufund.” (Yohan 21:25) Anch chitwishikin kulond mwamu piur pa Mwan, katat chikwikal nchik piur pa Tatuku!

22 Ap mwom wa chikupu kakezap kusal anch twijika yom yawonsu piur pa Yehova. (Mulej 3:11) Ov, tongin bil pa yom yituchingedina.  Kupwa kwa kushakam yitot, tunan, ap mamiliyon ni mamiliyon ma mivu, tukez kwijik yom yivud nakash piur pa Yehova kupandakenamu yitwija katat. Pakwez, tukez kuman anch kukwikal kand yom yikwau yivud nakash ya kwilej. Tukez kusot kwilej yom yivud nakash, mulong tukez kwikal nich kashinsh ka kwiyov mudi mwiyovay nfund a kuseng pawangay anch: “Chidi chiwamp kamu kusej piswimp kudi Nzamb.” (Kuseng 73:28) Mwom wa chikupu ukez kwikal ni yom yishalijadina ni ya usey nakash yakad etu kutongin. Chawiy lel, mu kusej piswimp kudi Yehova tukez kutambul yiyukish yivud nakash.

23. Ov, chom ik chikukasikeshinau kusal?

23 Chawiy lel, ukutwish kwakul katat ku rukat ra Yehova kusutil ku kumukat nich muchim wey wawonsu, mupim wey wawonsu, manangu mey mawonsu ni usu wey wawonsu. (Marko 12:29, 30) Rukat rey rifanyidin kwikal rishinshamena ni rikasikeshina. Mipak yey yawonsu yiukutwisha kukwat dichuku ni dichuku, kusambishin kukakemp djat ni ku ujim nakash, yawonsu yifanyidin kwimedin pa chany chinech chimwing—kutond jinjil jikeza kukutwal kukukasikesh urund wey ni Tatukwey wa mwiur. Chawiy lel, dandamen amboku kusej piswimp kudi Yehova, ni ukusej piswimp kudi ey—chikupu!