1. Ov, mulong wak chidia cha usey dijuku kwikal mu musangar?

Rusangu ruwamp ridiokil kudiay Yehova, Nzamb wa musangar, usotin majuku ni mawiy mikal nich musangar. (1 Timote 1:11) Ndiy udi musul wa uruw. Uruw wa kufund kurutu kwa mburamatad udi wa usey chakwel dijuku dikal mu musangar ni kwikal mu mashakamin mawamp mulong wa kuyilil an. In Kristu afanyidin kulimish yijil yitadina kufundish kwa uruw.​—Tang Luka 2:1, 4, 5.

Ov, mutapu ik umeningay Nzamb uruw? Ndiy usotin anch uruw wikala mu uumwing machuku mawonsu pakach pa ikundj ni mband. In Kristu afanyidin kulimish yijil yitadina kufundish kwa uruw. Yehova usotin anch amakundj ni amband ikal ashinshamena umwing ni mukwau. (Hebereu 13:4) Ndiy ukisin kujip uruw. (Malakiy 2:16) Pakwez ndiy uyilikidil in Kristu ajipa uruw ni kwatijan kand kakwau anch ambay a uruw asal masandj.​—Tang Mateu 19:3-6, 9.

2. Ov, mutapu ik ufanyidina ikundj ni mband kwisadil umwing ni mukwau?

Yehova wamutanga ikundj ni mband mulong wa kukwashijan kuwanyish yisend ya mu uruw. (Disambishil 2:18) Chidiay mutu wa dijuku, ikundj ufanyidin kuwanyish maswir ma kumujimbu ma dijuku diend ni kufundish yid ya dijuku piur pa Nzamb. Ndiy ufanyidin kwikal mwin kwipan nakash mu rukat mulong wa mukajend. Amakundj ni amband afanyidin kukatijan ni kulimishijan umwing ni mukwau. Mulong amakundj ni amband awonsu adi antu akad kuwanyin, ilejining anch kulikishijan yilim wawiy musul wa musangar mu uruw.​—Tang Efes 4:31, 32; 5:22-25, 33; 1 Pita 3:7.

3. Ov, chifanyidin kulik uruw wakad musangar?

Anch utanijadinany nich milong mu uruw wen, en awonsu aad ufanyidinany kwimekeshinany rukat umwing ni mukwau.  (1 Korint 13:4, 5) Dizu dia Nzamb dilejenap anch kwaurik wawiy mutapu wa kupwish milong yimekenininga mu uruw. ​— Tang 1 Korint 7:10-13.

4. Ov, en an chom ik chisotinay Nzamb piur pen?

Yehova usotin anch en wikalany nich musangar. Ndiy ukwinkishinany chiyul chiwamp piur pa mutapu wa kusanger usand wen. Ndiy usotin en utaninanyamu kusutil ku manangu ni uman wa anvaj en. (Kolosay 3:20) Yehova usotin kand en utanany musangar wa kusal yom mulong wa Sakatang wen ni Mwanend.​—Tang Mulej 11:9–12:1; Mateu 19:13-15; 21:15, 16.

5. Ov, en anvaj mutapu ik ukutwishau anen kutan musangar?

Ufanyidinany kusal usu wa kuyidish, kutan chikumbu cha kuyiladik, ni kuyidjik anen maswin. (1 Timote 5:8) Chakwel anen atana musangar, uswiridinany kand kuyifundish chakwel amukata Nzamb ni kwilej piur pend. (Efes 6:4) Chilakej chen cha kumekesh rukat kudiay Nzamb chikutwish kwikal nich chibudikin chikash mu michim ya anen. Anch chimedin pa Dizu dia Nzamb, umutakel wen ukutwish kwikal nich chibudikin chiwamp mu yitongijok ya anen.​—Tang Kuvurik Yijil 6:4-7; Jinswir 22:6.

An asangaredining chisu ukatany kuyikasikesh ni kuyijikitish. Awiy aswiridining kand kuyiyul ni kuyipup. Dipup dia mutapu winou dikat kuyiking ku yisal yikutwisha kuyikangesh kutan musangar. (Jinswir 22:15) Chikwau kand, dipup difanyidinap kwikal dikash ap dia chisum.​—Tang Kolosay 3:21.

Atuman a Yehova apalangeshining mikand yivud yifundiningau pakampwil mulong wa kuyikwash anvaj ni an. Mikand yiney yengamidining mu Bibil.​—Tang Kuseng 19:7, 11.