1. Ov, Nzamb uteshining malembil mawonsu?

Nzamb uyitazukin antu awonsu chakwel amushejina piswimp mu malembil. (Kuseng 65:2) Chikwau kand, ndiy kateshiningap ap kitiyijiningap malembil mawonsu. Chilakej, malembil ma ikundj umumeshininga mukajend mar makutwishap kukangany. (1 Pita 3:7) Kupwa, padandamenau in Isarel mu uyimp, Nzamb walika kutesh malembil mau. Chakin kamu, kulembil chidi chisend. Pakwez, Nzamb ukez kwitiyij malembil ma in yitil anch awiy akarumun michim yau. ​—Tang Isay 1:15; 55:7.

2. Ov, mutapu ik tufanyidina kulembil?

Kulembil chidi chisend ni chikunku cha difukwil dietu, chawiy lel tufanyidin kulembil ching kusu kudiay Sakatang wetu, Yehova. (Mateu 4:10; 6:9) Mulong tudi akad kuwanyin, tufanyidin kulembil mu dijin dia Yesu mulong ndiy wafa piur pa yitil yetu. (Yohan 14:6) Yehova kasotinap tuchirikina pa mutu ap malembil mafundau kal. Ndiy usotil tulembilang mu mazu metu ayinetu kulondulijan ni yovil yetu.​—Tang Mateu 6:7; Filip 4:6, 7.

Sakatang wetu ukutwish ap kutesh malembil ma mu muchim. (1 Samwel 1:12, 13) Utwitin kulembil mu yisu yawonsu, mudi kwinsambishil ni kwinsudiel kwa dichuku, ni pa chisu turishina nich yikokujol.​—Tang Kuseng 55:22; Mateu 15:36.

3. Mulong wak in Kristu akumangening pamwing?

Kumushejin Nzamb piswimp kuswapelap mulong tushich pakach pa antu akad ritiy mudiay Nzamb ni akata kusip kushilamu kwend kwa kulet chisambu pa divu.  (2 Timote 3:1, 4; 2 Pita 3:3, 13) Chawiy lel, tuswiridin urund wa ambay akaritiy akutwisha kutukasikesh ni atuswiridin.​— Tang Hebereu 10:24, 25.

Kwinung pamwing ni antu amukatina Nzamb kutukwashining kwikal piswimp ni Nzamb. Yikumangan ya Atuman a Yehova yiding yisu yimwing yiwamp ya kukasikeshijan ritiy ra umwing ni mukwau.​—Tang Rom 1:11, 12.

4. Mutapu ik tukutwisha kwikal piswimp ni Nzamb?

Ukutwish kwikal piswimp ni Yehova kusutil ku kutongijokin pa yom twileja mu Dizu diend. Shinshikin mijikit yend, umutakel wend, ni ya kushilamu yend. Kulembil ni kutongijokin kuwamp kukat kukasikesh muchim wetu wa kujikitish mulong wa rukat ra Nzamb ni manangu mend.​—Tang Joshua 1:8; Kuseng 1:1-3.

Ukutwish kwikal piswimp ni Nzamb ching kusu anch wamuchingejin, anch ukwet ritiy mudiay ndiy. Pakwez ritiy ridi mudi chom chikweta mwom chiswiridina ukwash. Ufanyidin kudish ritiy rey kusutil ku kutongijokin pa yom wilejina.​—Tang Mateu 4:4; Hebereu 11:1, 6.

5. Ov, kwikal piswimp ni Nzamb kukukwashin mutapu ik?

Yehova uyibangidin antu amukatina. Ukat kuyiking ku yom yin yawonsu yikutwisha kutek mu ubaj ritiy ni ruchingej rau ra mwom wa chikupu. (Kuseng 91:1, 2, 7-10) Utubabeshin pantaliken ni milad ya mwom yiyipishina mujimbu ni musangar wetu. Yehova utulejin mulad wa mwom upandakena kuwap.​—Tang Kuseng 73:27, 28; Jakobu 4:4, 8.