1. Ov, kuding kusu relijon umwing wakin?

“Yibabelany aprofet amakasu.”—MATEU 7:15, TMK.

Yesu wayileja in kwilej end anch kuding ching kusu relijon umwing udia relijon wakin. Uding mudi njil yitwadininga ku mwom wa chikupu. Yesu walonda anch: ‘Antu akemp kusu awiy akata kuyitan’ njil yiney. (Mateu 7:14) Nzamb witiyijining ching difukwil dimedininga pa Dizu diend dia uyakin. In kwifukwil awonsu akin ading mu uumwing mu ritiy.​—Tang Yohan 4:23, 24; 14:6; Efes 4:4, 5.

2. Ov, chom ik chalonday Yesu piur pa in Kristu amakasu?

“Awiy akat kufa mu kan anch amwij Nzamb, pakwez ku yisalijok yau akat kumutun.”—TITUS 1:16.

Yesu wababesha anch aprofet a makasu akez kuyirumbangesh in Kristu. Amekening ku mes mudi in kwifukwil akin. Maegliz mau malondining mutapu madia ma in Kristu. Pakwez ukutwish kujingunin antu inay mutapu udingau chakin kamu. Ov, ukumajingunin mutapu ik? Ching kusu in kwifukwil akin, awiy akata kubudish ngikadil ni mitapu ya in Kristu akin.​—Tang Mateu 7:13-23.

3. Ov, mutapu ik ukutwisha kuyijingunin in kwifukwil akin?

Shinshikin yijingidij yiney yitan:

  • In kwifukwil akin alimishining Bibil mudi Dizu dia Nzamb. Awiy asadining usu wa kushakam kwambatijan nich mbil jend. Chawiy lel, relijon wakin ushalijadin ni relijon wimedina kusu pa yitongijok ya antu. (Mateu 15:7-9) In kwifukwil akin kalejeninga chom kanang oku awiy akat kusal chindjing.​—Tang Yohan 17:17; 2 Timote 3:16, 17.

  •   In kwilej akin a Yesu alimishining dijin dia Nzamb, Yehova. Yesu walimisha dijin dia Nzamb kusutil ku kwidijikish. Ndiy wayikwasha antu kumwijik Nzamb ni wayifundisha kulembil anch dijin dia Nzamb aditumbish. (Mateu 6:9) Ov, relijon ik wijikishininga dijin dia Nzamb kwindond ushicha?​—Tang Yohan 17:26; Rom 10:13, 14.

  • In Kristu Akin alejening piur pa Want wa Nzamb. Nzamb wamutuma Yesu mulong wa kulejan rusangu ruwamp ra Want. Want wa Nzamb wawiy kusu ruchingej ra antu. Yesu wadandamena kurulejan djat ni ku rufu rend. (Luka 4:43; 8:1; 23:42, 43) Ndiy walonda anch in kwilej end afanyidin kurilejan. Anch muntu kanang wakushejin chakwel akuleja piur pa Want wa Nzamb, ov, muntu winou ukutwish kwikal mu relijon ik? ​—Tang Mateu 24:14.

  • In kwilej a Yesu kadiap chikunku cha mangand minam mayimp. Ukutwish kuyijingunin mulong awiy kiyandijikingap mu milong ya chipolitik ap mu matend ma mitapu ya kushakamin. (Yohan 17:16; 18:36) Chikwau kand, awiy kimburijiningap yisal ni ngikadil jiyimp ja mangand.​—Tang Jakobu 4:4.

  • In Kristu Akin akweting rukat ripandakena rikatau kwimekeshin umwing ni mukwau. Kusutil ku Dizu dia Nzamb, awiy akat kwilej kulimish yisak ya tubil yawonsu. Ap anch yisu yivud in relijon a makasu ayikwashining nakash in michid mu milong ya njit, pakwez in kwifukwil akin alikining kusal mwamu. (Mike 4:1-3) Pakwez, in Kristu akin asadidining chisu chau ni mapit mau nich muchim uwamp mulong wa kuyikwash ni kuyikasikesh antu akwau. ​—Tang Yohan 13:34, 35; 1 Yohan 4:20.

4. Ov, ukutwish kujingunin relijon wakin?

Ov, relijon ik ukata kwimedin pa malejan mend mawonsu ma Dizu dia Nzamb, kulimish dijin dia Nzamb, ni kulejan anch Want wa Nzamb wawiy kusu ruchingej ra antu? Ov, chisak ik chimekeshininga rukat ni kwipuk njit? Ov, ey utongining nchik pa mulong winou?​—Tang 1 Yohan 3:10-12.