1. Ov, mulong wak Nzamb watenchikay Isarel wa pasak?

Nzamb watenchika muchid wa an a nshakur Aburaham ni wayinkisha muruzu wa yijil. Ndiy wayitazuka anch muchid wa “in Isarel” ni wasala anch alama difukwil diakin ni dizu diend. (Kuseng 147:19, 20) Chawiy, antu a michid yawonsu afanyidina kutambul chiyukish kusutil kudi in Isarel.​—Tang Disambishil 22:18.

Nzamb wayitonda in Isarel chakwel ikala atuman end. Rusangu raura pasak rimekeshin mutapu antuwataninaumu kusutil ku kuziyil ku yijil ya Nzamb. (Kuvurik Yijil 4:6) Chawiy, kusutil ku kwilej rusangu ra in Isarel, antu akwau akutwish kumwijik Nzamb wakin.​— Tang Isay 43:10, 12.

2. Ov, mulong wak in Kristu akin irijekin?

Pasak, pashadishay Isarel dilau dia Nzamb, ni Yehova waswinkesha chikumangen cha in Kristu pa ndond ya muchid winou. (Mateu 21:43; 23:37, 38) Katat, pa ndond pa in Isarel, in Kristu akin asadil mudi atuman a Yehova.​—Tang Midimu 15:14, 17.

Yesu wayifumba in kwilej end chakwel alejan ni ayikadish antu a michid yawonsu in kwilej. (Mateu 10:7, 11; 24:14; 28:19, 20) Mudimu winou wikadil kal ukash katat, mu disudiel dia ditenchik dia katat dia yom. Kapamp ka kusambish mu rusangu ra antu, Yehova wakumangeja ma miliyon ma antu a michid yawonsu mu difukwil diakin. (Kujingunik 7:9, 10) In Kristu akin irijekining mulong wa kwikasikesh ni kukwashijan umwing ni mukwau. Pa mangand mawonsu, asangaredining program umwing wa malejan ma mu Bibil ku yikumangan yau.​—Tang Hebereu 10:24, 25.

 3. Ov, mutapu ik wasambisha dirijek dia Atuman a Yehova pa chirung chetu?

Mu mivu ya 1870 kachisak kakemp ka In Kwilej a Bibil kasambisha kujingunyin uyakin wa mu Bibil washadishau pasak. In kwilej inay eza kwijik anch Yesu watenchika chikumangen cha in Kristu mulong wa kulejan, chawiy chasambishau kampany wa kulejan Want mu mangand mawonsu. Mu muvu wa 1931, itiyija kutambul dijin dia Atuman a Yehova.​—Tang Midimu 1:8; 2:1, 4; 5:42.

4. Ov, mutapu ik wirijekinau Atuman a Yehova?

Mu mivu chitot ya kusambish, mu jingand jivud yikumangen ya in Kristu yatana chiyukish chadiokala ku chisak chitakedila chitiyija anch Yesu udi Mutu wa chikumangen. (Midimu 16:4, 5) Chilik chimwing nlel unou, Atuman a Yehova adia mu mangand mawonsu atambwil chiyukish chidiokila ku umutakel wa Chisak Chitakedila cha amakurump akweta ukaliweny. Ku mabiro ma mutiy ma Atuman a Yehova akat kukarumun, kuchap, ni kupalangesh malejan ma kutakel nich malejan ma Bibil mu jindim 600. Chawiy, Chisak Chitakedila chikutwish kupan dikasikesh ni umutakel udiokila mu Bibil ku yikumangen 100 000 ni kusut yidia mu mangand mawonsu. Mu chikumangen ni chikumangen, mudi antu awanyishina yitinau asadila mudi amakurump, ap atulam. Antu inay alamin yisak ya amikoku a Nzamb nich rukat.​—Tang 1 Pita 5:2, 3.

Atuman a Yehova irijekin kal mulong wa kulejan rusangu ruwamp ni kwikadish ni kwilej. Mudi mwasalau atwimbuy, tukat kuyendil antu ku chikumbu ni chikumbu mulong wa kusal mudimu wa kulejan. (Midimu 20:20) Chawiy kand, twilejining malejan ma Bibil ni antu a michim yiwamp akatina uyakin. Chikwau, Atuman a Yehova kadiap kusu ditenchik dimwing. Pakwez tudi dijuku ni tukwet Tatuku mwin rukat. Tudi akadivar ni anambaz akata kwibangin umwing ni mukwau. (2 Tesalonik 1:3) Mulong antu a Yehova irijekining chakwel amusangaresha Nzamb ni kuyikwash antu akwau, awiy asadil dijuku dikwet musangar dia pa divu.​—Tang Kuseng 33:12; Midimu 20:35.