Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Muchirikina Yehova

Mukand Udiokila ku Chisak Chitakedila

Mukand Udiokila ku Chisak Chitakedila

Mbay mukaritiy mukatish:

Mudi muwija, Bibil udi chakin mukand wisambidina piur pa antu avud. Avud anding amakundj ni amband ashinshamena arisha nich yikokujol ya chilik chimwing ni yetwetu. Adinga antu akweta “yovil mudi yetwetu.” (Jakobu 5:17, NWT) Amwing aziya mulong wa twinvundangesh ni yakamish. Akwau ayisala nayimp kudi yidi ya dijuku ap kudi ambay in kwifukwil. Ni avud ading ifishina nich mulong wa yilim yau.

Ov, antu mudi inay amulika Yehova rawonsu? Bwat. Avud iyova mudi mwin kuseng walembila anch: “Nikat kutambitamb mudi mukoku ushadikina. Mukimba kashalapol wey, mulong kinivuramedinap malejan mey.” (Kuseng 119:176) Ov, ukutwish kwikal ni yovil mudi yineney?

Yehova kakatap kuyivuramen atushalapol ashicha mu diyind diend. Chinyim ni chinech, ndiy ukat kuyishejin piswimp—yisu yivud usadil mwamu kusutil kudi ambay nau akaritiy. Chilakej, shishikin mutapu wamukwashay Yehova Kashalapol wend Job, wamana mar nakash—kuwejinaku kushadish nfalang, kushadish akatish nend, ni mayej makash. Job wajijamana kand ku kulond kuyimp kwa antu adinga nend mulong wa kumukwash. Pakwez kamwombap Yehova nyim yend, ap mwamu walikap kupumbuk mu yitongijok yend. (Job 1:22; 2:10) Ov, mutapu ik wamukwashau Job kudi Yehova chakwel achirisha mwikadil wa kujijaman?

Mutapu umwing wamukwashau Job kudi Yehova wading kusutil kudi mbay mukaritiy utazukinau anch Elihu. Pamekeshay Job kwakam kwend, Elihu watesha ni chamubachika kulond. Ov, yom ik yalonday? Ov, wela kumulond Job nayimp ap kusot kumubachik kwifish nich ap kwov usany? Ov, Elihu wimana amwinend mudi umupandakenamu Job? Bwat kwau! Elihu, amubachika kudi mwiku wa Nzamb ni walonda anch: “Am nidi mudi ey kurutu kwa Nzamb, antanga kand nich divu dia kam mudi ey.” Kupwa wamukasikesha Job anch: “Kangal wom wam ukuzadish, ap kinikukushinyinap.” (Job 33:6, 7) Pa ndond pa kumuwejin Job yisend, Elihu wamwinkisha nich rukat chiyul ni dikasikesh diadinga diswiridinay Job.

Ijik amboku anch broshir winou amutenchikin chilik chimwing mu mutapu winou. Pitwatesha kapamp ka kusambish, twashinshikina nakash piur pa mikadil ni mazu ma antu avud adiokala mwinjil ya uyakin. (Jinswir 18:13) Kupwa twakarukina ku Bibil, twashishikina nakash piur pa jinsangu ja mutapu wayikwashay Yehovah atushalapol end pasak padingau ni kurish nich mikadil ya chilik chimwing. Chawiy lel, twabomba jinsangu jiney ja mu Bibil pamwing ni yom yisadikina katat chakwel kubudish broshir winou. Tukwitin nich musangar chakwel ushinshikina broshir winou. Ijik anch tukukatin ni muchim wetu wawonsu.

Chisak Chitakedila cha Atuman a Yehova