Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Muchirikina Yehova

 4

Kwifish nich—“Ntokisha Mulong wa Chitil Cham”

Kwifish nich—“Ntokisha Mulong wa Chitil Cham”

Martha walonda anch: “Mudimu usu wam wawapisha mashakamin ma mwom wa dijuku diam, pakwez wantwala kand mu mijikit kushalijan yakad kufanyin. Nasambisha kusal misambu ya mangand, kwiyandji mu milong ya politik, ni ap kand kukumangan mu egliz. Nadinga mudi umwing wa Atuman a Yehova walikina kal kusal mudimu wa kuleja mu mivu 40. Mulong chisu chivud chasuta, natonga nakash anch Yehova kakezap kand kwinlikishin. Niyova anch nikutwishap kwilikishin amwinam. Kupwa, nading nija uyakin kurutu kwamam kwiyandjik mwi njil yiyimp.”

KWIFISH nich kukutwish kwikal chisend chikash. Mwant David wafunda anch: “Mulong jinshid jam jasutil kal piur pa mutu wam mudi chisend chilimina nakash padi am.” (Kuseng 38:4) In Kristu amwing akwachikin kal nich runengu rupandakena, mulong atongin anch Yehova kakezap ap nchik kuyilikishin. (2 Korint 2:7) Ov, kutong kwa mutapu winou kudi kwa kin? Ap anch wasala chitil chijim nakash, ov, usotin kumulik Yehova anch kakezap kukulikishin ap pakemp? Bwat kwau!

“Ezany, Turijekany”

Yehova kakatap kuyilik akayitil akarumukina. Pakwez, udi piswimp nau! Mu chishimushimu cha mwan washadika, Yesu wamwisikeja Yehova ni tatuku winou mukatish ukweta mwan washa dijuku diend ni kulondul njil ya mwom wijondila. Kupwa, mwan wakwata mupak wa kuchirik ku chikumbu. “Pachadingay kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” (Luka 15:11-20) Ov, usotil kwikal piswimp nend Yehova pakwez utongin anch uchidi “kulemp” ni ndiy? Mudi tatuku mu chishimushimu cha Yesu, Yehova ukwet ranaken mulong weyey. Usotin nakash kukwak piuchirikina.

Chikwikal nchik anch witiyijin anch yitil yey yidi yijim nakash ap yipandakena mulong wa Yehova kukulikishin? Shishikin amboku diladikij dia Yehova didia mu Isay 1:18. Yehova ulondin anch: “Ezany, turijekany. Yitil yen yasuzap nchik, yikez kikal yitok mudi mbundu.” Mwaning, ap anch yitil yasuzap nchik mudi chitaj pa diswin ditok, Yehova ukuyilikishin.

Yehova kasotinap udandamena kuman mar ma kom kifishina nich. Chawiy lel, mutapu ik ukutwisha kuman musangar udiokila ku dilikishin dia Nzamb ni kom kishitwila? Shinshikin yom yaad yasalay Mwant David. Chakusambish, walonda anch: “Nikez kumulej Yehova yitil yam.” (Kuseng 32:5, NWT) Vurik anch, Yehova wakutazukin kal chakwel umushejina piswimp mu malembil ni mulong ‘urijeka yom’ nend. Itiy diladikij dinend. Muleja Yehova yitil yey, ni mwijikisha yovil yey. Kulondulijan ni yamana amwinend, David watwisha kulembil nich kashinsh anch: “Ntokisha mulong wa chitil cham. . . . Ey kiukezap kudjibul muchim ubukukina ni runeng.”Kuseng 51:2, 17, NWT.

Chakaad, David watambula ukwash udiokila kudi muprofet Natan, ntimesh watonday Nzamb. (2 Samuel 12:13) Nlel unou, Yehova watonda kal mu chikumangen amakurump afumbau chakwel  kuyikwash antu asadila yitil akarumukina mulong wa kuchirish urund wau nend Yehova. Anch waya kudi amakurump, akusadil Bibil ni malembil madiokila ku muchim chakwel muchim wey witudisha, kukepish ap kudiosh yovil yiyimp, ni kukukwash uyerika mu spiritu.Jakobu 5:14-16.

Yehova usotin ey wikala nich kom kishitwila

“Wayuk Muntu Ulikishidinau Kuyip Kwend”

Chakin kamu, ukutwish kutong anch kumulej Yehova Nzamb yitil yey ni kuyilejamu amakurump kukwikal pakach pa yom yikasikena nakash kudi ey kusal. Chakin kamu David wadinga ni yovil ya chilik chimwing. Ndiy ‘wajindjika’ chisu chimwing chitil chend. (Kuseng 32:3) Pakwez, kupwa wasangera yiyukish ya kulejan yitil yend ni warijeka mashakamin mend.

David watambulay ukwash ujim wa kuchirish musangar wend. Wafunda anch: “Wayuk muntu ulikishidinau kuyip kwend.” (Kuseng 32:1) Walembila kand anch: “A Mwant [Yehova], mburila milamu yam, ni mukan mwam mukez kulejan kushiman kweyey.” (Kuseng 51:15) Papwa yovil ya kwifish nich yend mulong wa dilikishin dia Nzamb, David wova usu wa kuyilej antu akwau piur pa Yehova.

Yehova usotin ey wikala nich kom kishitwila. Ni usotin ey uyileja antu akwau piur pa pend ni pa ntong jend, kangal nich yovil ya kwifish nich, pakwez nich kashinsh ni musangar ujim nakash. (Kuseng 65:1-4) Vurik diladikij diend anch: “chakwel yitil yen ayijimangesh, ni muten wa kunifundish wez kudi Mwant [Yehova].”Midimu 3:19.

Chawiy chom chamushikena Martha. Ulondin anch: “Mwanam ikundj wadandamena kwintumin magazet ma Chinong cha Kalam ni Réveillez-vous ! Pakemp pakemp, nileja piur pa Yehova. Chikunku chikash cha kuchirik chadinga kwit dilikishin mulong wa yitil yawonsu yinasala. Pakwez, nashikena kumushejin Nzamb mu malembil ni namwita chakwel alikishina. Chikasiken kwitiyij anch pasuta mivu 40 kurutu nimuchirikina Yehova. Yom yanshikena yanginkisha uman anch ap kwinyim kwa mivu yivud, muntu umwing ukutwish kumutwishish mukwau chakwel amusadila Nzamb ni kuchirik mu rukat rend.”