Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Muchirikina Yehova

 2

Yakamish—“Mar ma Mitapu Yawonsu”

Yakamish—“Mar ma Mitapu Yawonsu”

“June ulondin anch: Kupwa kwa mivu 25 ya uruw, am ni nfumwam twajipa uruw. Anam alika uyakin. Mayej mashalijadina makash mankwata. Kupwa nanenganana ni kuburen musangar. Naziya nakash ni natwishap kurish nich chom ap chimwing. Nalika kuya ku yikumangan, ni nalika kusal mudimu wa kulejan.”

ANTU awonsu akweting yakamish—ap antu a Nzamb. Mwin kuseng umwing wafunda anch: “Yakamish yapandakena.” (Kuseng 94:19, NWT) Ni Yesu walonda anch pa chirungu cha nsudiel, “yakamish ya mwom” yikutwish pakampwil kusal anch chikasikana kumusadil Yehova. (Luka 21:34) Ov, chidi nchik ku mutambu wey? Ov, wiyovil kwikal ukwachikina nakash nich kanvundangesh mu milong ya nfalang, ya dijuku ap ya ukash wa mujimbu? Mutapu ik ukutwishay Yehova kukukwash chakwel urisha nich yikokujol yiney?

“Ukash Upandakena Ukash Wawonsu”

Tukutwishap kurish nich yakamish ayinetu. Kambuy Paul wafunda anch: “Tukat kuman mar ma mitapu yawonsu, tukat kunenganan . . . ; akat kutwasol pansh.” Chawiy lel, walonda kand anch “kitushadishinap ruchingej, bwat,” ni “katusheshinap shutit.” Ov, chom ik chitukwashina chakwel kujijaman? “Ukash upandakena ukash wawonsu”—ukash udiokila kudiay Yehova, Nzamb wetu mwin dikand diawonsu.2 Korint 4:7-9.

Tongijokin bil pa mutapu watambula pasak “ukash upandakena ukash wawonsu.” Ov uvurik mutapu udajimbisha diskur dimwing dikasikeshina kusanger kwey mulong wa rukat rishinshamena ra Yehova? Ov, ritiy rey mu kushilam kwa Yehova rakula nakash pawadinga ni kuyilej antu akwau piur pa ruchingej ra Paradis? Pitukata kukumanga ku yikumangan ya in Kristu ni kuyilej antu akwau piur pa ritiy retu, tukat kutambul dikasikesh chakwel kujijaman yakamish ya mwom ni kutambul chisambu cha mu manangu chakwel tutwisha kumusadil Yehova nich musangar.

“Pakany Bil Utalany [Yehova] Mudi Mudiay Muwamp”

Chakin, ukutwish kwiyov uziyila mu mitapu yivud kapamp kamwing. Chilakej, Yehova utwitin kukimb chakusambish Want ni kulam chaku chetu cha mujikit wa muspiritu. (Mateu 6:33; Luka 13:24) Pakwez, chikwikal nchik anch rupompat, kuyip kwa ukash wa mujimbu, ap milong ya dijuku yakutekin mupak ku yom ukutwisha kusal? Ap chikwikal nchik anch mudimu wey wa ku mujimbu wakusend chisu ni usu uwela chisu chimwing kusutish nich chikumangen? Ukutwish kwiyov ukwachikina nakash—piurishina nich yom yivud—ni kwikal ni chisu chikemp ni usu wa kuyisal yawonsu. Pamwing ap wiyipulap kal anch Yehova uchingejin yom yivud kudi ey.

Yehova uteshining. Kakatap kuchingejin yom yivud kupandakanamu yitutwishina kumwinkish. Ni wij anch chitin chisu chilemp chakwel tukamunika ku yakamish ya ku mujimbu ni ya yovil.Kuseng 103:13, 14.

Chilakej, shishikin mutapu wawanyishay Yehova maswir ma muprofet Elija. Paziyay Elija nakash wova wom ni wachin waya mwi mpay, ov, Yehova wamupupa muprof ni kumulej chakwel achirikina chisend chend? Bwat. Yehova watuma tupamp tusatu mwangel umwing chakwel amulangwisha Elija  nich rukat ni kumwikish yakudia. Ap mwamu, kupwa kwa machuku 40, Elija wadandamena kwakam ni kwov wom. Ov, chom ik chikwau chasalay Yehova chakwel kumukwash? Chakusambish, Yehova wamekesha ukumuking. Cha kaad, Yehova wamongoja Elija nich “dizu dikemp dia kunyinyit.” Kupwa, Yehova wamuleja anch kwinikwa kwading tunan twa antu akwau in kumwifukwil Nzamb ashinshamena. Kupwa, Elija wasambisha kand kusal mudi muprofet ukweta mushiku. (1 Ant 19:1-19) Ov, pa dilejan ik? Padingay Elijah nich yakamish nakash, Yehova wamusadila nich kushimpish muchim ni ranaken. Yehova kaswimpiningap. Utubangindin nakash chilik chimwing.

Anch watong piur pa yom ukutwish kumwinkish Yehova, ikal mwin kashinsh. Kangal kwisikej yom ukutwisha kusal nlel nich yiwela kusal pasak. chilakej: Mwin kukink mau ulikin kwiyijidish angond avud ap mivu kakutwishap kuchirish chaku chend cha pasak swa. Pakwez, ukusambish nich kwitekin ntong jikemp mulong wa kuchirish usu ni kujijaman. In Kristu adi mudi in kukink mau. Akat kwiyijidish nich rutong ridia zwang mu manangu. (1 Korint 9:24-27) Ov, mulong wa ukutwishap kulondul rutong ra muspiritu rimekena anch ritwishikin kudi ey kuriwanyish katat kamu? Chilakej, kwitekin rutong ra kukumangan ku chikumangan cha chikumangen. Mwita Yehova chakwel akukwasha kuwanyish rutong rey. Anch wachirish ukash wa muspiritu, ukez ‘kupak bil kutal [Yehova] mudi mudiay muwamp.’ (Kuseng 34:9) Vurik anch yom yin yawosu usadina chakwel kumekesh rukat rey mulong wa Yehova—chimekap nchik chikemp—chidi cha usey kudiay.Luka 21:1-4.

Yehova kakatap kuchingejin yom yivud kupandakanamu yitutwishina kumwinkish

“Dikasikesh Nading Nichingedina”

Ov, mutapu ik wamukasikeshau June kudiay Yehova chakwel amuchirikina? Utulejin anch: “Namulembila Yehova, ni kumwit chakwel ankwasha. Kupwa mawenam wanleja piur pa chitentam mu musumb wam. Nakwata mupak wa kukumangan dichuku dimwing dia chitentam. Nading ni yovil yipandakena kuwap mud ik ya kwikal kand pamwing ni antu a Yehova! Chitentam chinech chikala dikasikesh nading nichingedina. Katat nikwet musangar wa kumusadil kand Yehova. Mwom ukwet usey nakash kudi am. Kupandakanamu pa kusambish, nij anch nikwet kuswir kwa akadivar ni anambaz ni niswiridin ukwash wau. Nisanger anch kwading kamu chisu kudi am chakwel kuchirik.”