‘Mubwambwilany Djabul, ni ndiy ukuchin kulemp niyenen.’—JAKOBU 4:7.

1, 2. Yom ik tufanyidina kwijik piur pa Satan nau ayilembil?

MWOM mwi ngand yisu ya Nzamb ukwikal uwamp nakash. Chawiy, tukwikal ni mashakamin mudi makatinay Nzamb anch twikal nich. Pakwez nlel tushich mu mangand matakedilau kudi Satan nau ayilembil end. (2 Korint 4:4) Ap anch tukutwishap kuyiman, adiaku ni akwet usu nakash.

2 Mu shapitre winou, tukwisambin mutapu tukutwisha kushal piswimp ni Yehova ni kwichidij ku ubaj wa Satan. Yehova ushidinamu anch ukutukwash. Pakwez tufanyidin kujingunin mipit yisadidinay Satan nau ayilembil mulong wa kutudimb ni kutwoz.

“MUDI NTAMBU WONYINA”

3. Yom ik yikatinay Djabul kutusal?

3 Satan ukat kulond anch antu amwifukwidin Yehova mulong wa mayingishin ma choy ni akulik kumusadin Nzamb anch yom ya yikasiken. (Tang Job 2:4, 5.) Anch muntu wamekesh anch ukatin kwilej yom piur pa Yehova, Satan nau ayilembil end akat kwijik ni akat kusal usu wa kumukangesh. Akat kujiman anch aman muntu wipan kudi Yehova ni watambul dibatish. Bibil umufanikeshin Djabul ni “ntambu wonyina ukata kukimb nany  ukudiay.” (1 Pita 5:8) Satan ukatin kuyipish urund wetu ni Yehova.—Kuseng 7:1, 2; 2 Timote 3:12.

Satan ukat kujiman anch twipan kudi Yehova

4, 5. (a) Yom ik yikangenyay Satan kusal? (b) Chom ik chirumburikina ‘kumubwambwil Djabul’?

4 Pakwez tufanyidinap kumov Satan wom nau ayilembil. Yehova watekin kal mipak piur pa yikutwishau kutusal. Yehova ushidinamu anch ‘chisak chijim’ cha in Kristu akin akupand ku “mar makash.” (Kujingunik 7:9, 14) Kwikil chom ap chimwing chikutwishay Djabul kusal mulong wa kukangesh yom yikutwisha kushiken, mulong Yehova uyilamin antu End.

 5 Anch twashal piswimp ni Yehova, Satan kakutwishap kuyipish urund wetu ni Ndiy. Dizu dia Nzamb ditwinkishin kashinsh anch: “[Yehova] udi ni yenen anch niyen wikalany nendendiy.” (2 Jinsangu 15:2; tang 1 Korint 10:13.) Amakundj nau amband ashinshamena a pakur, mudi Abel, Enok, Nowa, Sara, ni Moses, amubwambwila Djabul kusutin kukushal piswimp ni Yehova. (Hebereu 11:4-40) Niyetu tukutwish kusal mwamu. Dizu dia Nzamb dilondin anch: ‘Mubwambwilany Djabul, ni ndiy ukuchin kulemp niyenen.’—Jakobu 4:7.

“TUKAT KURISH”

6. Mutapu ik ukatay Satan kuturishikish?

6 Ap anch Satan wij anch Yehova wateka kal mimbu ku yom yifanyidinay kutusal, ukudandamen kusal yom mulong wa kuziyish urund wetu ni Nzamb. Nlel, Djabul uturishikishin mu mitapu kushalijan ni usadidin mitapu yasadidinay kal mu tunan twa mivu. Yisu mitapu yimwing yikatay kusadin?

7. Mulong wak Satan ukat kuyirishikish antu a Yehova?

7 Kambuy Yohan wafunda anch: “Ngand yakabuj yidi mu chikas cha Satan.” (1 Yohan 5:19, TMK) Satan ndiy utakedila mangand minam mayimp ni ukatin kand kuyitakel antu a Yehova. (Mika 4:1; Yohan 15:19; Kujingunik 12:12, 17) Djabul wij anch kakwetap kand chisu chilemp, chawiy ukat kumubachik muntu ni muntu pakach petu chakwel amubwambwila Nzamb. Yisu yimwing Djabul ukat kuturishikish patok, pakwez yisu yikwau kurishikish kwend kuding mu mutapu wakad kumekan.

8. Yom ik yifanyidinay mwin Kristu mwawonsu kwijik?

8 Tutangin mu Efes 6:12 anch: “Tukat kurish . . . ni yizwepwepu yikweta ukash mwiur.” Mwin Kristu  mwawonsu pakampwil ukat kurish ni Djabul nau ayilembil. Tufanyidin kwijik anch antu awonsu ipanina kudi Yehova adi mu kurish kwinoku. Mu mukand wend wafunday kudi in Efes, kambuy Paul wayikasikesha in Kristu tupamp tusatu mulong wa “kwiman dang.”—Efes 6:11, 13, 14.

9. Satan nau ayilembil asadin usu wa kutusal ik?

9 Satan nau ayilembil asadin usu wa kutudimb mu mitapu kushalijan. Kupandakan choziu chimwing cha Satan kurumburikinap anch kakutwishap kand kutwoz ni choziu chikwau. Djabul ukat kusal usu wa kwijik kuziy kwetu chakwel atonda mupit ukutwishay kutukwat nich. Pakwez tufanyidinap kufa mu mipit yend, mulong Bibil utufundishin piur pa mipit ya Djabul. (2 Korint 2:11; tal Mazu ma Kwinsudiel 31.) Umwing wa mipit yend udi yom ya ayilembil.

IKAL KULEMP NAU AYILEMBIL

10. (a) Yom ya ayilembil chom ik? (b) Mutapu ik umeningay Yehova yom ya ayilembil?

10 Mu yom ya ayilembil mudi usu wa yom yakad kumekanang ukata kuyitek antu mu umwing nau ayilembil, yom mudi ulaj, kubauk, ni kwisamb nau afu. Bibil utulejin anch yom ya ayilembil yidi ‘yitakanena’ ni tufanyidinap kwiyandjik mu yom ya ayilembil ni pa chisu chawiy chimwing tukat kumwifukwil Yehova. (Kuvurik Yijil 18:10-12; Kujingunik 21:8) In Kristu afanyidin kwipuk mitapu yin yawonsu ya yom ya ayilembil.—Rom 12:9.

11. Kukimb kukat usu wakad kumekanang kukutwish kutushikij kwisu?

11 Satan wij anch, ang twakat usu wa yom yakad kumekan, chikumuswapel kutupwitin ku yom ya ayilembil.  Mitapu yin yawonsu ya yom ya ayilembil yikutwish kuyipish urund wetu ni Yehova.

SATAN UKAT KUSAL USU WA KUTUPAK

12. Mutapu ik ukatinay Satan kuyipish mutapu wetu wa kutong?

12 Satan usadin usu wa kuyipish mutapu wa kutong wa antu. Ukat kusadin kwidjidjek, chakwel antu atong anch “kuyip [kudi] kuwap, ni kuwap anch, [kudi] kuyip.” (Isay 5:20) Djabul ukat kukasikesh chitongijok chakwel anch yiyul ya Bibil yikwetap usey ni anch tukwikal ni musangar anch twalik kusadin mbil ja Nzamb.

13. Mutapu ik wasadinay Satan kwidjidjek?

13 Kupalangesh kwidjidjek udi umwing wa mitapu yikash yikatay kusadin Satan. Wasadidin kal mutapu winou mu chisu chilemp. Mu chir cha Eden, wasadina kwidjidjek pamwipulay Ev anch: “Ov, komb, Nzamb wakulejinany anch: ‘Kangal wadiany mitond ya mu chir?’” (Disambishil 3:1) Kupwa, pa chisu cha Job, Satan wamwipula Yehova kurutu kwa angel anch: “Ov, komb Job umwovil Nzamb wom chamwamu?” (Job 1:9) Kupwa kwa dibatish dia Yesu, Satan wamupaka Yesu pamwelay anch: “Anch ey udi Mwan a Nzamb, idiela bil diyal ed dikarumuka kwikal yakudia.”—Mateu 4:3.

14. Mutapu ik uyibachikanay Satan antu kwidjidjek pa ubaj ukweta yom ya ayilembil?

14 Nlel, Djabul udandamedin kusadin kwidjidjek. Usadin usu wa kuyisal antu iyipula anch yom ya ayilembil yidi chakin kamu yiyimp kusutil kusadin mitapu yimwing yimekena kwikal mudi yiwamp. Ap in Kristu amwing akanganya kuman ubaj wa mupit winou. (2 Korint 11:3) Chawiy, chom ik tukutwisha kusal mulong  wa kwichidij ayinetu? Mutapu ik tukutwisha kwikal ni kashinsh anch tudiap adimbinau ku mipit ya Satan? El tushinshikinany mitapu yaad yikutwishay Satan kutwozin: kwipuwangej ni kwiyokish.

SATAN UKAT KUSADIN MAKU METU MA CHIVADIK MULONG WA KUTURISHIKISH

15. Mutapu ik tukutwisha kwikal mu umwing nau ayilembil kusutil kwipuwangej?

15 Nlel, mafilim, mavideo, televizion, ordinater, ni tupend twa Internet yilejen yom ya ayilembil, maji, ni usu wakad kumekan. Antu avud amen yom yiney mudi masengan makad ubaj, ni kakatap kujingunin ubaj wa kulik ayilembil mu mwom yau. Muntu ukutwish kand kwiyandjik mu yom ya ayilembil kusutil yom mudi kubwak, kutal mifund ya mu makas, kutal kart ni kwijik yikushikena, kusadin dibuj dia kristal. Djabul ujindjikin ubaj ni kupakish kusal yom yiney yimekena mudi yom yisu, yisangareshina, ni yisipishena. Muntu ukutwish kutong anch kwikil kwau ubaj udia mu kutal yom ya ayilembil ap usu wakad kumekan anch ndiy kasadinap kwend yom ya ayilembil. Mulong wak kutong mudi kwinoku kudi kwa ubaj?—1 Korint 10:12.

16. Mulong wak tufanyidin kulik kwipuwangej kukweta yom ya ayilembil?

16 Satan nau ayilembil kakutwishap kwijik yitongijok yetu. Pakwez akutwish kwijik yom tukweta nich kuswir ni mutapu tutongina kusutil kushinshikin yom tutondina ayinetu ni dijuku dietu, kuwejaku kand kutond kwetu kwa kwipuwangej. Anch twatond mafilim, mizik, ap mabuku piur pa aspiritu ayimp, yisal ya kukayan, kulam yom ya ayilembil, ulaj, yom ya mayikiyik ni yom  yikwau mudi yiney, Satan nau ayilembil end akutwish kwijik anch tukatin kwijik yom kanang piur pa yom yiney. Akutwish chad kusal usu wa kutwandjik kamu mu yom ya ayilembil.—Tang Galatia 6:7.

17. Mutapu ik ukutwishay Satan kutwoz kusutin maswir metu ma kwikal ni ukash wa mujimbu uwamp?

17 Satan ukutwish kand kusadin maswir metu ma kwikal ni ukash wa mujimbu uwamp. Nlel, antu avud amen mar mulong wa kuburen ukash wa mujimbu uwamp. Muntu ukutwish kusal usu wa kwiyokish mu mitapu kushalijan pakwez kayerikinap. (Marko 5:25, 26) Muntu ukutwish kuburen ruchingej ni kupakish kusal  chom chin chawonsu chakwel ayerika. Pakwez mulong tudi in Kristu, tufanyidin kubabal chakwel kangal tutonda mon ya kwiyokish nich yisadinau nich ‘nkau.’—Isay 1:13.

Muchingejina Yehova chisu uyedinak

18. Kwiyokish kwa mutapu ik kufanyidinay mwin Kristu kwipuk?

18 Mu Isarel wa pasak, kwading antu amwing asadina yom ya ‘nkau.’ Yehova wayileja anch: “Piukuzambulanya makas men mulong wa kulembil, kinikukubanganyakup. Ap anch wavudishany kulembil, kinikukuteshanyap, mulong makas men mizwil sens nich mash.” (Isay 1:15) Tong bil—Yehova kafanyinap kutesh malembil mau! Tukatinap kusal chom chikutwisha kuyipish urund wetu ni Yehova ni chikutwisha kumukangesh kutukwash, pakampwil chisu tuyedina. (Kuseng 41:3) Chawiy tufanyidin kushinshikin anch kwiyokish tukatina kukwatijadin mu mutapu win wawonsu ni yom ya ayilembil ap usu wakad kumekan. (Mateu 6:13) Anch twajingunin anch kukwatijadin ni yom yiney, tufanyidin kwipuk kwiyokish kwinoku!—Tal Mazu ma Kwinsudiel 32.

NSANGU PIUR PA AYILEMBIL

19. Mutapu ik ukatay Djabul kuyovish antu avud wom?

19 Padandamedinau antu amwing kutong anch Djabul nau ayilembil yidi kwau yom yikatau antu kwitongin, akwau ij anch ayilembil adingaku mulong wa yom yamanau kal. Antu avud ovil wom wa aspiritu ayimp ni adi asuk a yishankur ya makasu. Akwau akat kwovishan wom wa ayilembil kusutin kulejan yom yikash yikatau kusal kudi antu. Yisu yivud, nsangu jinej jikat kuyishimokish antu ni kusal anch ajilejan kudi antu akwau. Nsangu jinej jikat kusal anch antu ova wom wa Djabul.

20. Mutapu ik tukutwisha kupalangesh makasu ma Satan?

 20 Tongin bil pa chinech—Satan ukatina anch antu amwova wom. (2 Tesalonik 2:9, 10) Udi mukamakasu wija mutapu wa kubachik manangu ma antu akatina yom ya ayilembil ni kusal anch itiyija yom yakad kwikal yakin. Antu inay akutwish kulond nsangu ja yom yitonginau, yamenau ni yateshinau. Pakatau antu kudandamen kulond nsangu mudi jinej, nsangu jinej jikat kwikal jikash. Tukatinap kumukwash Satan kupalangesh wom kusutin kulond nsangu jinej.—Yohan 8:44; 2 Timote 2:16.

21. Pa ndond pa kulond nsangu piur pa ayilembil, yom ik tufanyidina kwambambin?

21 Anch umwing wa pakach pa antu a Yehova wiyandjika mu yom ya ayilembil, kafanyidinap kulond yom yiney kudi antu akwau. Antu a Yehova kafanyidinap kwov wom wa chom chin chawonsu chikutwishay Djabul ap ayilemb kusal. Pakwez, tufanyidin kushinshikin padi Yesu ni pa usu wamwinkau kudi Yehova. (Hebereu 12:2) Yesu kayilejap in kwilejend nsangu piur pa ayilembil. Washinshikina pa uruu wa Want ni pa “midimu yijim yasalay Nzamb.”—Midimu 2:11; Luka 8:1; Rom 1:11, 12.

22. Ukwatin mupak wa kusal ik?

22 Kangal wavuramen anch chitongijok cha Satan chidi cha kuyipish urund wetu ni Yehova. Ukusal yawonsu mulong wa kuyipish urund winou. Pakwez tubabedin mitapu yisadidinay Djabul ni tukwatin mupak wa kurish ni mitapu yin yawonsu ya ayilembil. ‘Kangal twamushil Djabul chisu’ cha kuziyish mupak wetu. (Tang Efes 4:27.) Inge, anch twamubwambwil Djabul, tukwiyep ku mipit yend ni tukwikal mu diking dia Yehova.—Efes 6:11.