‘Tukatin kushakam ni win kashinsh mu yom yawonsu.’—HEBEREU 13:18.

1, 2. Mutapu ik ukatay Yehova kwiyov anch watuman tukat kusal usu mulong wa kwikal in kashinsh?

ANCH mwan udiokil ku shikol uyil ku chikumbu, watan pansh ka sakosh kizwila ni nfalang. Yom ik yikusalay? Ukutwish kukanon. Kupwa, wachirish ka sakosh kinak ka nfalang kudi mwin ka sakosh. Anch makwend wa mwan winou watesh yom yasalangay mwan, ukwibaz nakash mulong wa mwan.

2 Anvaj avud akweting musangar anch anau adi in kashinsh. Tatukwetu wa mwiur, Yehova, udi “Nzamb wa uyakin,” ni chikat kumusangaresh anch tudi in kashinsh. (Kuseng 31:5) Tukatin kumusangaresh ndiy ni ‘kushakam ni win kashinsh mu yom yawonsu.’ (Hebereu 13:18) El twisambina yom yinying ya mwom mukutwisha win kashinsh kwikal mulong. Kupwa tukushinshikin yiyukish yimwing tukwikala nich anch mulong winou washiken.

KWIKAL IN KASHINSH AYINETU

3-5. (a) Mutapu ik tukutwisha kwikal in kashinsh ayinetu? (b) Yom ik yikutukwasha kwikal in kashinsh ayinetu?

3 Mulong wa kwikal in kashinsh nau antu akwau, tufanyidin chakusambish kwikal in kashinsh ayinetu. Chinech chiswapelingap. Mu mivu chitot ya kusambish, akadivar a mu chikumangen cha Laodisey idimba ayinau  mu kutong anch ading amusangareshin Nzamb pakwez mu kulond patok chadingap mwamu. (Kujingunik 3:17) Niyetu tukutwish kwidimb ayinetu piur pa muntu tudia kamu chakin.

4 Mwin kwilej Jakobu warumburila anch: “Anch muntu utongil anch: ‘Nidi mwin kumwitiyij Nzamb,’ pakwez kalaminap rudim rend, ritiy rend ridi ramwamu, ukat kwidimb amwinend.” (Jakobu 1:26) Tukutwish kwidimb ayinetu ang twatong anch mulong twasadin kal yom yiwamp, Nzamb kakutwishap kubangaku anch twalond mazu mayimp ap twadimban. Yom ik yikutwisha kutukwash kwipuk kwidimb ayinetu?

5 Anch twital pa dikalash, tukutwish kwiman chitudia piur. Chisu tutangina Bibil, tukutwish kuman mutapu tudia mukach. Bibil ukutwish kutukwash kwijik pitukasikedina ni kuziy kwetu. Twilejin mutapu tuswiridina kuswimp mu kutong, mu yisal, ni mu kulond. (Tang Jakobu 1:23-25.) Pakwez anch twalond ayinetu anch tukwetap ulim, tukutwishap kusal usu wa kuuwapish. Chawiy tufanyidin kusadin Bibil mulong wa kushinshikin win kashinsh wetu. (Madil ma Jeremiy 3:40; Age 1:5) Malembil ni mawiy makata kutukwash kuman chitudia kamu chakin. Tukutwish kumwit Yehova mu malembil mulong wa kuman ulim wetu mwamu tukutwish kuurijek. (Kuseng 139:23, 24) Tukat kuvurik anch ‘Yehova ukisin in kubwambul, [ap akweta chaku cha kudimban] pakwez udi mu urund nau antu atentamina.’—Jinswir 3:32.

WIN KASHINSH MU DIJUKU

6. Mulong wak ikundj ni mband afanyidin kwikal in kashinsh umwing ni mukwau?

6 Win kashinsh udi kamu wa usey mu dijuku. Anch ikundj ni mband akat kulejijan yom patok umwing ni mukwau,  ukwiyov kwikal mu diking ni akutwish kuchingejijadin umwing ni mukwau. Kuburen win kashinsh mu uruw kukutwish kumekan mu mitapu kushalijan. Chilakej, muntu watena ap wachikina ukutwish kusambish kusengan ni maku ma muntu mukwau ap kutal pornografi ap ukutwish kukudish mu ujindj rukat ni muntu wakad kwikal mbay nend wa uruw. Shinshikin yom yalonday nfund a kuseng: ‘Kinishichap nau antu a makasu, ni kwipuk antu ijindjikina chidiau.’ (Kuseng 26:4) Anch uburedin win kashinsh kudi mbay ney wa uruw ap mu yitongijok yey, chinech chikutwish kuyipish uruw wey.

Lik pakad kulab yom yikutwisha kuziyish uruw wey

7, 8. Mutapu ik ukutwisha kusadin Bibil mulong wa kuyifundish aney usey wa kwikal in kashinsh?

7 An niyau afanyidin kwijik anch win kashinsh udi wa  usey. Anvaj akutwish kusadin Bibil mulong wa kuyifundish nich. Bibil ukwet yilakej yimwing yiyimp ya antu aburena win kashinsh: Akan, wikala mwij; Gehaz, wadimbana mulong wa kutambul nfalang; ni Yudas, wiya nfalang ni kupwa wamulandisha Yesu kwi nfalang 30 ja utad wa argent.—Joshua 6:17-19; 7:11-25; 2 Ant 5:14-16, 20-27; Mateu 26:14, 15; Yohan 12:6.

8 Mu Bibil mudi kand yilakej yivud yiwamp ya antu ading in kashinsh: Jakob, wayileja anend kuchirish nfalang jatanau mu jintuku; Jefite ni mwanend mband, awanyisha kushilamu kudi Nzamb; ni Yesu, wading mwin kashinsh ap mu yishiken yikash. (Disambishil 43:12; Ankalansambu 11:30-40; Yohan 18:3-11) Yilakej yiney yikutwish kuyikwash an kutesh usey wa kwikal in kashinsh.

9. Mutapu ik chikutwisha kuyikwash an anch anvajau adi in kashinsh?

9 Anvaj akutwish kwilejin kwi mbil ya Bibil yiney ya usey: ‘Ey ukata kuyilej akwen, kiwilejinap amwiney? Ey ukata kulejan anch, ‘kangal wiyany,’ ey ukat kwiy?’ (Rom 2:21) An ijing chisu chikatau anvajau kulond chom kanang pakwez awiy asal chom chindj. Anch twayilej an kwikal in kashinsh pakwez etu ayinetu tudiap in kashinsh, an akwikal mu kanrumbangesh. Anch an ijik anch anvajau akat kudimban, mu tuyom tukemp, niyau akutwish kusal mwamu. (Tang Luka 16:10.) Ku mutambu ukwau, anch an aman anch anvajau adi in kashinsh, chikutwish kuyikwash niyau kwikal anvaj akuchingejin chisu chikwikalau nau an.—Jinswir 22:6; Efes 6:4.

WIN KASHINSH MU CHIKUMANGEN

10. Mutapu ik tukutwisha kwikal in kashinsh mu mambamb metu nau ambay netu in Kristu?

10 Tufanyidin kwikal in kashinsh pantaliken ni akadivar nau anambaz netu in Kristu. Chidi chiswapela kukarumun  mambamb metu ma dichuku diawonsu kwikal mboj ap kafukej. Anch twalond chom pakad kwijik anch chidi chakin, tukutwish kupalangesh makasu. Chidi chiwamp nakash ‘kukand milamu yetu.’ (Jinswir 10:19) Kwikal in kashinsh kurumburikinap anch tufanyidin kulond yom yin yawonsu tutongina, twija, ap twateshina. Ap anch yom tukimbina kulond yidi yakin, yikutwish kwikal yom yakad kututal, ap chidiap cha usey ni chiwapinap kwau kuyilond. (1 Tesalonik 4:11) Antu amwing akat kwiyingish nich mulong wa kulond kuyimp kusutin kulond anch: “Nidi kwam mwin kashinsh.” Pakwez mulong tudi antu a Yehova, tukatin kulond mazu mawamp ni ma kalimish.—Tang Kolosay 4:6.

11, 12. (a) Mutapu ik ukutwishay muntu wasadina chitil kuyipish mulong mu kulik kwikal mwin kashinsh piur pa chitil? (b) Yipul ik yimwing tufanyidina kwiyipul? (c) Mutapu ik tukutwisha kwikal in kashinsh pantaliken ni dirijek dia Yehova?

11 Yehova wayinkisha amakurump chisend cha kukwash chikumangen. Chiswapel kudi amakurump kutukwash anch tudi in kashinsh kudi awiy. Mulong wak? Anch wading uyedin ni waya kwa Dokter mulong wa kukimb ukwash, ov, wafanyina kumujindjikin yijingidij yimwing ya mayej? Anch wasala mwamu, mutapu ik welay kukukwash? Chilik chimwing, anch twarumbuk nakash, tufanyidinap kudimban piur pa kurumbuk kwinoku. Pa ndond pa kusal mwamu, tufanyidin kuya kudi amakurump ni kuyilej nich kashinsh kawonsu piur pa kurumbuk kwinoku. (Kuseng 12:2; Midimu 5:1-11) Katat tongin pa mitapu kushalijan: Chikwikal nchik anch wajingunin anch murund ney wasalang kurumbuk kukash? (In Levi 5:1) Ukulond  anch: “Anch nidi chakin kamu murund nend, nikulam ujindj”? Ap, ukuvurik anch amakurump adiaku mulong wa kumwinkish ukwash uswiridinay mulong wa kurijek ni kukasikesh urund wend ni Yehova?—Hebereu 13:17; Jakobu 5:14, 15.

12 Tufanyidin kand kwikal in kashinsh pantaliken ni dirijek dia Yehova chisu twizwishina marapor, mudi rapor wa mudimu wa kulejan. Ni tudi in kashinsh chisu tusadina mudimu wa uchibol ap mudimu win wawonsu.—Tang Jinswir 6:16-19.

13. Mutapu ik tukutwisha kwikal in kashinsh anch tusadin mudimu pamwing ni mbay netu mwin Kristu?

13 Akadivar nau anambaz in Kristu afanyidin kwauril milong ya kwisak ni difukwil. Chilakej, tufanyidinap kwisak chisu tudia ku Chot cha Want ap mu mudimu wa kulejan. Ni tufanyidinap kutaninamu pa mitu ya akadivar nau anambaz netu pitusadina midimu ya kwisak. Anch in kusal mudimu ey adi Atuman, yifuta in kusal mudimu pa chisu, yinkisha nfalang wovijadinanya nau, ni kuyinkish yom yawonsu yifanyidinau kutambul kukwatijan ni mbil ja mudimu. Mukutwish kwikal kand kwiyokish ap konje. (1 Timote 5:18; Jakobu 5:1-4) Ni anch usadin mudimu kwa mbay ney Kaman, kangal kuchingej anch akusadin yom mu mutapu wa pakampwil. (Efes 6:5-8) Ikal ni kashinsh ka kusal mudimu mu chisu wovijananya ni sal mudimu ukufutidinau.—2 Tesalonik 3:10.

14. Yom ik yifanyidinau kusal in Kristu kurutu kwa kusal milong ya kwisak pamwing?

14 Chidi nchik anch tusadin mudimu wa kwisak ni mukadivar ap nambaz? Chikutwish kwikal kusondam nfalang mulong wa kusal mudimu wa kwisak. Mu milong  mudi yiney, kudi mbil ya Bibil yikutwisha kutukwash: Fundany yom yawonsu ukovijananya! Chisu chalanday Jeremiy chir, afunda mikand yaad ya kuland nich chir, atekap sinyatir wa atuman pa ma kopi maad, ni wayilama mulong wa kuyital kand machuku ma kurutu anch ayiswiriken. (Jeremiy 32:9-12; tal kand Disambishil 23:16-20.) Antu amwing amening anch kufund mukand wa kovijan ukutwish kumekesh mudi kamuchingejidinap mukadivar nau. Pakwez, kufund mukand wa kwovijan kukutwish kukwash mulong wa kukepish milong, kupwitijan, ni kulik kovijan. Ap mu milong ya kwisak, vurik anch chisambu cha chikumangen chidi cha usey nakash kusutamu milong ya nfalang.—1 Korint 6:1-8 tal Mazu ma kwinsudiel 30.

KWIKAL IN KASHINSH MU MIDIMU YA MANGAND

15. Mutapu ik wiyovilingay Yehova piur pa kuburen win kashinsh mu milong ya kwisak?

15 Tufanyidin kwikal in kashinsh kudi muntu win mwawonsu, kuwejaku nau antu akad kwikal Atuman a Yehova. Chidi cha usey kudi Yehova anch twikal in kashinsh. ‘Chipim cha makasu chitakanen kudi [Yehova], pakwez chipim chitentamina chikat kumusangaresh.’(Jinswir 11:1; 20:10, 23) Pasak, yipim ayisadina mu mudimu wa kwisak. Pakwez in kwisak amwing ayidimbang antu kusutin kukuyinkish yom yikemp kusutamu mutapu wovijanau ap kusutin kuyifutish nfalang jivud kusutamu jafanyinau kufut. Nlel, mudi kand pasak, kuburen kashinsh kupandaken nakash mu mudimu wa kwisak. Mudi mwadingay mukisinay Yehova kuburen win kashinsh kwau, mwamu mukisinay kand nlel.

16, 17. Mitapu ik ya kuburen win kashinsh tufanyidina kwipuk?

 16 Etu awonsu turishin nich yom yikutwisha kutushikij ku kuburen win kashinsh—mudi chisu tufundina mukand mulong wa kukimb mudimu, kwizwish mikand ya ngand, ap kusal ekzamen ku shikol. Antu avud atongining anch chiyipinap kwau kudimban, kuwejinaku yom, ap kupan yakul ya makasu. Chinech chikutwishap kutukashimwish. Bibil watakela kulejan anch mu machuku ma kwinsudiel ma mangand, antu akwikal “in kwikat ayinau, in kukat nfalang, . . . in kukis yom yiwamp.”—2 Timote 3:1-5.

17 Yisu yimwing chikutwish kumekan mudi antu akad win kashinsh atwishin kusal yom mu mangand ma nlel. (Kuseng 73:1-8) Mwin Kristu ukutwish ap kushadish mudimu wend, kulik kumufut nfalang jiwanyidina, ap kumusadin nayimp ku mudimu mulong wa win kashinsh wend. Pakwez win kashinsh usutinamu kwipan kwawonsu. Mulong wak?

YIYUKISH YIDIOKILA KU KWIKAL IN KASHINSH

18. Mulong wak ntumb yiwamp yikwet usey?

18 Ntumb ya kwikal ni win kashinsh, muntu uchingejidinau, ni ushinshamena yidi ya usey nakash ni yikasikena mu mangand minam. Muntu ni muntu wa pakach petu ukwet mutapu wa kukasikesh ntumb yiney. (Mike 7:2) Chakin, antu amwing akutwish kukusip mulong udi mwin kashinsh ni kukutazuk anch chisup. Pakwez antu akwau akutwish kusanger win kashinsh wey ni ku kuchingejin. Pa mangand mawonsu, Atuman a Yehova ijiken mulong wa win kashinsh wau. Amakurump a midimu amwing akatining kusal nau Atuman mulong ijing anch akwikal in kashinsh ku mudimu. Ni chisu chikatau  kuyidiosh in kusal mudimu amwing mulong wa kuburen win kashinsh, Atuman akat kuyilam ku midimu yau.

Tukutwish kumutumbish Yehova kusutin mudimu wetu ukash

19. Mutapu ik kwikal mwin kashinsh kukutwisha kwikal ni usu pa urund wey ni Yehova?

19 Kwikal mwin kashinsh mu yom yawonsu kukutwish kukwinkish kom kawamp ni kukuletin chisambu mu manangu. Tukutwish kwikal mudi Paul, wafunda anch: “Twij nawamp anch, tukwet kom ka zwang.” (Hebereu 13:18) Cha usey nakash, Tatukwey mukatish,Yehova ukuman ni kusanger usu wey usadina mulong wa kwikal mwin kashinsh mu yom yawonsu.—Tang Kuseng 15:1, 2; Jinswir 22:1.