Yang pafundinau anch yidiamu

Yang pafundinau anch sou-meni

Atuman a Yehova

Uruund

Ov, Usotil Wijika Uyakin?

Ov, Usotil Wijika Uyakin?

UYAKIN wa chom ik? Piur pa yipul yimwing ya usey nakash yakadiau kal antu kwakul. Pamwing utongijokidin pa yipul mudi yiney:

  • Ov, chakin kamu Nzamb utubangidin?
  • Ov, njit ni mar yikez kapwa?
  • Chom ik chikata kutushiken pitufilinga?
  • Ov, kudi ruchingej kanang piur pa afu?
  • Mutapu ik nifanyidina kulembil chakwel Nzamb antesha?
  • Mutapu ik nikutwisha kushiken ku kutan musangar mu mwom?

Ov, kwisu utongidina ku ukutwisha kutan yakul ya yipul yiney? Anch waya ku yikumbu kudia jinkil ja mikand, ukutwish kutanaku tutikit twa mikand yilondila anch yikutwish yalet yakul. Pakwez, chisu ni chisu, mukand umwing ukutwish wasambish kutadikijan ni ukwau. Yimwing yimekening anch ayiyingin mu kachisu kupwa yikusik ni ayichapiril kakwau.

Pakwez, kudi, mukand umwing ukweta yakul yakin. Udi mukand wa uyakin. Yesu Kristu wamulembila Nzamb walond anch: “Dizu diey diawiy uyakin.” (Yohan 17:17) Ilel twij Dizu dined mudi Bibil Utumbila. Mu mapaj malondwilaku am, ukutesh mu wiswimp yakul ya zwang ya Bibil, pa yipul yiney.

Ov, Chakin Kamu Nzamb Utubangidin?

Ikundj wombilaumu kudi runtu

MULONG WIPWILINGAU CHIPUL CHINECH: Tushich mu mangand mwizwila too chisum ni kuburen kutentam. Marelijon mavud malejen anch mar mitumena madi rusot ra Nzamb.

CHIFUNDISHINAY BIBIL: Nzamb kakatap kulet yom yiyimp. Yob 34:10 ulondil anch: “Nzamb udi kulemp ni kuyip, Mwin Dikand Diawonsu kakutwishap kupengam.” Nzamb ukwet rutong ra rukat mulong wa antu. Wawiy mulong watulejinay Yesu chakwel tulembilang anch: “Tatukwetu udia mwiur… , Want wey weza. Rusot rey arusala pansh mudi mwiur.” (Mateu 6:9, 10, Manswik Masu) Nzamb utubangidin nakash chawiy chisadilay usu wend wawonsu mulong wa kuwanyish rutong rend.—Yohan 3:16.

Tal kand Disambishil 1:26-28; Yakob 1:13; ni 1 Pita 5:6, 7.

Ov, Njit ni Mar Yikez Kapwa?

Amasalay

MULONG WIPWILINGAU CHIPUL CHINECH: Njit jinongishin tutikit ni tutikit twa antu. Etu awonsu tukwachikin nich mar ma antu.

CHIFUNDISHINAY BIBIL: Nzamb wasambela kulond anch kukez kwikal chisu chikezay kulet chisambu pa divu diawonsu. Mu winyikel wa Want wend, guvernema wa mwiur, antu kakez “kilejap kand kurish njit.” Pakwez, akez “kachil jimpak [jau jikal] jinkasu.” (Isay 2:4) Nzamb ukez kusudish kuburen kutentam ni mar mawonsu. Bibil ushidilamu anch: “[Nzamb] ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulongyom yikuru yasutil kal.”—Kuburik 21:3, 4.

Tal kand Kuseng 37:10, 11; 46:9; ni Mika 4:1-4.

Chom ik Chikata Kutushiken Pitufilinga?

Jinzay

MULONG WIPWILINGAU CHIPUL CHINECH: Marelijon mavud madia mu mangand malejen anch kudi chom mu muntu chikata kudandamen nich mwom kupwa kwa kufa. Mamwing makasikeshidin anch afu akutwish ayisal nayimp antu aom ap anch Nzamb ukat kuyipup antu ayimp kusutil ku kuyifish nich mar ma chikupu mu kasu.

CHIFUNDISHINAY BIBIL: Kupwa kwa, antu kadingap aom. Mulej 9:5 ulondil anch: “Afu kijap chom.” Mulong afu kijap chom, kakutwishap atesh, ap kuman chom ap chimwing, kakutwishap ayisal nayimp—ap kuyikwash—antu aom.—Kuseng 146:3, 4.

Tal kand Disambishil 3:19 ni Mulej 9:6, 10.

Ov, Kudi Ruchingej Kanang Piur pa Afu?

Mwan unenganena mulong wa rufu ra mukatish nend

MULONG WIPWILINGAU CHIPUL CHINECH: Tusotil kwikal aom, ni tusotil kusanger mwom pamwing ni antu tukatina. Tukweting impu ya chivadik ya kuyiman kakwau akatish netu afa kal.

CHIFUNDISHINAY BIBIL: Antu avud afa kal akez kuyibumbul. Yesu washilamu anch “awonsu adia mwi nzay [ya chivurikish akez]…[kubudikamu].” (Yohan 5:28, 29) Kukwatijan nich rutong ra kusambish ra Nzamb, akezau kuvumbul ikala antu akez kuyinkish mutapu wa kushakam pa divu dikezau kwikadish paradis. (Luka 23:43) Mu kushilamu kwinoku kwa kurutu mudi ukash wa mujimbu uwanyidina ni mwom wa chikupu ukezau kuyinkish antu aziyidila. Bibil ulondil anch: “Mwin kutentam ukez kaswan ngand, ukez kashakamamu chikupu.”—Kuseng 37:29.

Tal kand Yob 14:14, 15; Luka 7:11-17; ni Midimu 24:15.

Mutapu ik Nifanyidina Kulembil Chakwel Nzamb Antesha?

Ikundj ulembila

MULONG WIPWILINGAU CHIPUL CHINECH: Antu adia mu marelijon mawonsu akat kulembil. Pakwez, avud amending anch malembil mau kakatap kumakul.

CHIFUNDISHINAY BIBIL: Yesu watuleja twipuk kuchirikin-chirikin malembil mawiy mamwing-mamwing. Ndiy walonda anch: “[Piukulembilanya] kangal wavudishany mazu mamwamu.” (Mateu 6:7) Anch tusotil anch atesha malembil metu, tufanyidin kulembil mwi njil yitiyijinay. Chakwel tutwisha kusal mwamu, tuswiridin twileja chidia rusot ra Nzamb ni kulembil kukwatijan nich. 1 Yohan 5:14 urumburil anch: “Anch twit chom ku rusot rend [Nzamb], ndiy ukutwov.”

Tal kand Kuseng 65:2; Yohan 14:6, 14; ni 1 Yohan 3:22.

Mutapu ik Nikutwisha Kushiken ku Kutan Musangar mu Mwom?

Mband ukimbina kutan musangar kusutil ku kutang Bibil

MULONG WIPWILINGAU CHIPUL CHINECH: Antu avud itiyijin anch nfalang, ntumb, ap ufun wa chifu yikutwish yayisangaresh. Chawiy chikatau kuyisurab yom yiney—ni akat kushiken ku kujinguinin anch kakwetap musangar.

CHIFUNDISHINAY BIBIL: Yesu walejana musul wa musangar palonday anch: “Ayuk kwau atuzwendj mu michim.” (Mateu 5:3) Tukutwish kutan musangar wakin ching anch twikwatin mupak wa kuwanyish maswir metu ma usey nakash—nzal yetu ya uyakin wa muspiritu piur pa Nzamb ni rutong rend padi etu. Uyakin winou udi mu Bibil. Kuwijik uyakin winou kukutwish kutukwash tujingunin chom chidia chakin kamu cha usey ni chakad kwikal cha usey. Kuulik uyakin wa Bibil utakela mipak yitukwatina ni yisal yetu kutwadiling ku mwom urumburikina chakin kamu—Luka 11:28.

Tal kand Jinswir 3:5, 6, 13-18 ni 1 Timote 6:9, 10.

Kwinoku kwadi kwau kusu kushinshikin mu wiswimp yakul ya Bibil ku yipul yiney musamban. Ov, usotil wijika yivud kupandakanamu yiney? Anch udi umwing wa “atuzwendj mu michim,” chakin kamu usotil wijik. Ukutwish wavurik yipul yikwau, mudi: ‘Anch utubangidin, ov, mulong wak ulikidinay tuyimp mwamu ni mar mu rusangu rawonsu ra muntu? Mutapu ik nikutwisha kuwapish mashakamin mam?’ Bibil utwinkishin yakul yakin ni yisangareshina yivud ya yipul yiney ni ya yikwau yivud.

Pakwez, ilel antu avud idjidjekin pa kumutang Bibil. Amumening anch mukand upandakena kujimb ni yisu yimwing ukasikena kutesh. Ov, usotil utana chakul mu Bibil? Atuman a Yehova apanining yom yaad yikutwisha kukukwash.

Chakusambish, buku Chom Ik Chakin Kamu Chifundishinay Bibil? amutenchikin mulong wa kuyikwash antu chakwel ashinshikin yakul ya zwang ya Bibil yitadila yipul yijim nakash. Chakaad program wa kwilej Bibil pakad kufut ap diey. Pakad kumufut, mutej ney uwanyishina yitinau chakwel kulejan Bibil ukutwish wez kwol kwey ap pa ndond yin yawonsu yiusotila chakwel usutishany kachisu kakemp rubing ni rubing mu kwilej ney Bibil. Tutikit twa antu mu mangand atanidinamu nakash mu program winou. Avud au ashikena ku kulond anch: “Natan kal uyakin!”

Kwikil dipit dipandakenamu dined. Uyakin wa Bibil utukodil mu yishankur ya makasu, mu kanrumbangesh, ni ku wom wa usup. Utwinkishin ruchingej, rutong, ni musangar. Yesu walodna anch: “Ukez kijikany uyakin, ni uyakin ukez kanikolany.”—Yohan 8:32.

1. Ikundj wilejina chifundishinay Bibil; 2. Mband wilejina chifundishinay Bibil

CHAKWEL WIJIKA YOM YIVUD

Kwit Dilejan dia Bibil Pakad Kufut Nfalang

Ov, Mulong Wak Kwilej Bibil?

Bibil ukwashining mamiliyon ma antu adia mu mangand kutan yakul ku yipul ya usey nakash ya mwom. Ov, ukusot kwikal umwing wa pakach pau?