Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA KANYING

Yesu Kristu Udi Nany?

Yesu Kristu Udi Nany?

1, 2. (a) Umwij nawamp muntu kanang wijikena nakash anch wij ching kusu dijin diend? Rumburil. (b) Yom ik yitiyijinau antu piur pa Yesu?

KUDI antu avud ijikena nakash pa mangand. Ukutwish kwijik dijin dia muntu kanang wijikena nakash. Pakwez, kumwijik dijin diend kurumburikinap anch umwij nawamp. Kurumburikinap anch wij kachom ni kachom piur pa mwom wend ni mutapu udingay chakin kamu.

2 Pamwing ap wateshinap kal piur pa Yesu Kristu, ap anch Yesu washakama pa divu pasutin kal piswimp mivu 2000. Pakwez antu avud kijap anch Yesu wading muntu wa mutapu ik. Amwing alondining anch wading muntu muwamp, akwau anch wadinga muprofet, akwau itiyijining anch udi Nzamb. Ing ey utongin nchik?—Tal Mazu ma kwinsudiel 12.

3. Mulong wak chidi cha usey kudi ey kumwijik Yehova Nzamb ni Yesu Kristu?

3 Chidi cha usey kudi ey kwijik uyakin piur pa Yesu. Mulong wak? Bibil utulejin anch: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.” (Yohan 17:3) Mwaning, anch wijik uyakin piur pa Yehova ni Yesu, ukutwish kushakam chikupu mu paradis pa divu. (Yohan 14:6) Chikwau kand, kumwijik Yesu kukez kukukwash mulong udi chilakej chipandakena kuwap cha mutapu wa kushakam ni kuyisadil antu akwau. (Yohan 13:34, 35) Mu Shapitre wa 1, twilejin uyakin piur  pa Nzamb. Katat tukwilej chifundishinay Bibil piur pa Yesu.

TWAMUTANANG KAL MESIA!

4. Mazu “Mesia” ni “Kristu” marumburikin ik?

4 Mivu yivud kurutu kwa Yesu kuvadik, Yehova washilamu mu Bibil anch ukez kutum Mesia, ap anch Kristu. Dizu “Mesia” didiokil ku dizu dia Hebereu, ni dizu “Kristu” didiokil ku dizu da Grek. Mazu minam maad marumburikin anch Nzamb wafanyina kutond Mesia washilaumu ni kumwinkish chisend cha pakampwil. Mesia ukuwanyish kushilamu kwawonsu kwa Nzamb. Yesu ukukukwash kand kudiosh katat. Pakwez kurutu kwa Yesu kuvadik, antu avud adinga ni kwiyipul anch: ‘Nany ukwikala Mesia?’

5. Ov, in kwilej a Yesu itiyija anch Yesu wading Mesia?

5 In kwilej a Yesu katadikap anch Yesu wadinga Mesia washilaumu. (Yohan 1:41) Chilakej, Simon Pita wamuleja Yesu anch: “Ey udi Kristu.” (Mateu 16:16) Mutapu ik tukutwisha kwikal nich kashinsh anch Yesu udi Mesia?

6. Mutapu ik wayikwashay Yehova antu a kashinsh chakwel amujingunina Mesia?

6 Kurutu kwa Yesu kuvadik, aprofet a Nzamb afunda yom yivud yafanyina kuyikwash antu kumujingunin Mesia. Yom yiney yayikwasha mutapu ik? Tong bil anch akulej kuya kwindond yikata kwimen motak chakwel umusenda muntu wakad ey kwijik. Anch muntu wakurumburil nawamp mutapu udiay muntu winou, ukutwish kumujingunin. Chilik chimwing, Yehova wayisadila aprofet end mulong wa kutulej piur pa yom yikusalay Mesia ni yom yafanyina kumushiken. Kuwanyin kwa uprofet winou wawonsu kuyikwashin antu akashinsh chakwel ijika anch Yesu udi Mesia.

7. Uprofet ik waad umekeshina anch Yesu udi Mesia?

 7 Unou udi uprofet waad wa pakach pa uprofet winou. Chakusambish, mivu 700 kurutu kwa Yesu kuvadik, Mike wasambela kulond anch Mesia ukuvadikin mu musumb ukemp wa Betlehem. (Mike 5:2) Ni kwawiy kwavadikinay Yesu! (Mateu 2:1, 3-9) Cha kaad, Daniel wasambela kulond anch Mesia ukumekan mu muvu wa 29 C.C. (Daniel 9:25) Winou wawiy kusu uprofet waad wa pakach pa uprofet uvud umekeshina patok anch Yesu udi Mesia washilaumu.—Tal Mazu ma kwinsudiel 13.

Pamubatishau, Yesu wikala Mesia, ap Kristu

8, 9. Chom ik chashikena pamubatishau Yesu chimekeshina anch udi Mesia?

8 Yehova walejana patok anch Yesu udi Mesia. Nzamb wamukana Yohan Mubatish kumwinkish chijingidij chakwel atwisha kwijik nany wadinga Mesia. Payay Yesu kudi Yohan chakwel amubatisha mu wit wa Yordan mu muvu wa 29 C.C., Yohan wamana chijingidij chinech. Bibil utulejin chom chashikena anch: “Pamubatishau, Yesu watuntuka mu mem; ni watala, diur dianzurikang kal, chad wamana [spiritu] wa Nzamb wading mudi iyemb wamushirikin. Chawiy dizu diadiokala mwiur anch: ‘Winou ndiy Mwanam unikatila nakash, unikata kusanger.’” (Mateu 3:16, 17, NWT) Pamanay Yohan ni kutesh chijingidij chinech, wijika anch Yesu wadinga Mesia. (Yohan 1:32-34) Kudiosh pa dichuku dinidia, Yehova wamwinka spiritu wend utumbila, Yesu  wikala Mesia. Wadinga muntu watonday Nzamb kwikal Ntakel ni Mwant.—Isay 55:4.

9 Uprofet wa Bibil, mazu ma Yehova amwinend, ni chijingidij chapanay pamubatishau Yesu yamekesha anch Yesu udi Mesia. Pakwez, kwisu kwadiokalay Yesu, ni wadinga muntu wa mutapu ik? Tushinshikinany chilejenay Bibil.

 KWISU KWADIOKALAY YESU?

10. Chom ik chifundishinay Bibil piur pa mwom wa Yesu kurutu kwa kwez pa divu?

10 Bibil ufundishin anch Yesu wading mwiur mivu yivud kurutu kwa kwez pa divu. Mike walonda anch Mesia wadingaku kudiosh ‘pasak.’ (Mike 5:2) Yesu amwinend walonda yisu yivud anch wadinga mwiur kurutu kwa kuvadik mudi muntu. (Tang Yohan 3:13; 6:38, 62; 17:4, 5.) Ap kurutu kwa kwez pa divu, Yesu wading mu urund wa pakampwil ni Yehova.

11. Mulong wak Yesu ukwet usey nakash mwamu kudi Yehova?

11 Yesu ukwet usey nakash kudi Yehova. Mulong wak? Mulong Nzamb wamutanga kurutu kwa kutang yom yawonsu ni antu akwau awonsu. Chawiy lel, Yesu amutazukin anch “Mwan wa kusambish wa yom yawonsu yatangau.” * (Kolosay 1:15, NWT) Yesu ukwet kand usey nakash kudi Yehova mulong ndiy umwing kusu watangay kapamp kamwing. Chawiy chimutazukinau anch: “Mwanend kapwokal.” (Yohan 3:16) Yesu ndiy kand umwing kusu wasadilay Yehova mulong wa kutang yom yikwau yawonsu. (Kolosay 1:16) Yesu ndiy umwing kusu utazukinau anch “Dizu,” mulong Yehova wamusadina mulong wa kupan uruu ni mbil kudi angel ni antu.—Yohan 1:14.

12. Mutapu ik twija anch Yesu ni Nzamb kadiap muntu umwing?

12 Antu amwing itiyijining anch Yesu ni Nzamb udi muntu umwing. Pakwez kimwawiyap mufundishinay Bibil. Bibil ulondin anch Yesu amutanga, chirumburikin anch Yesu ukwet nsambishil. Pakwez Yehova,  watanga yom yawonsu, kakwetingap nsambishil. (Kuseng 90:2) Chidiay Mwan a Nzamb, Yesu kapakishap ap pakemp kwikal Nzamb. Bibil ufundishin patok anch Tatuku udi mujim kumupandakanamu Mwan. (Tang Yohan 14:28; 1 Korint 11:3.) Yehova ndiy “Nzamb Mwin Dikand Diawonsu.” (Disambishil 17:1) Ndiy kamu upandakena kujimb ni muntu ukweta usu upandakena mu mangand mawonsu.—Tal Mazu ma kwinsudiel 14.

13. Mulong wak ulondinay Bibil anch Yesu “udi chifu chimekena ku mes cha Nzamb wakad kumekan ku mes”?

13 Yehova ni Mwanend, Yesu, asala mu umwing nakash mu mamiliyar ma mivu kurutu kwa kutang diur ni divu. Afanyina kukatijan nakash umwing ni mukwau! (Yohan 3:35; 14:31) Yesu wimburija mikadil ya tatukwend nawamp chawiy chimutazukinau mu Bibil anch: “udi chifu chimekena ku mes cha Nzamb wakad kumekan ku mes.”—Kolosay 1:15.

14. Mutapu ik chasadika anch Mwan upandikena usey wa Yehova avadika mudi muntu?

14 Mwan upandakena usey wa Yehova witiyina kudiokal mwiur ni kuvadik pa divu mudi muntu. Chom chinech chasadika mutapu ik? Yehova washemunina mu chilay mwom wa Mwanend mwiur ni kuutek mwivum mwa mujik Mariy. Chawiy lel, Yesu kadingap ni kuswir kwa tatuku wa ukauntu. Mariy wavala mwan uwanyidina, ni wamupila anch Yesu.—Luka 1:30-35.

YESU WADING MUNTU WA MUTAPU IK?

15. Mutapu ik ukutwisha kushiken kumwijik Yehova nawamp?

15 Ukutwish kwilej yom yivud piur pa Yesu, piur pa mwom wend ni mikadil yend kusutil kutang mukand wa Bibil wa Mateu, Marko, Luka ni wa Yohan. Mikand yiney ayitazukin anch Ma Evanjil. Mulong Yesu udi  mudi Tatukwend, yom utangina yikukukwash kand kumwijik Yehova nawamp. Chawiy chamubachika Yesu kulond anch: “Muntu mwawonsu wanmena kal am, wamumen kal Tatuku.”—Yohan 14:9.

16. Yom ik yafundishay Yesu? Kwisu kwadiokala malejan ma Yesu?

16 Antu avud amutazuka Yesu anch: “Mulej.” (Yohan 1:38; 13:13) Chom chimwing chafundishay chadinga cha usey nakash radinga “rusangu ruwamp ra Want.” Want winou chom ik? Udi want wa Nzamb ukudiokala mwiur ni ukuyikela pa mangand mawonsu ni kulet yiyukish kudi antu amuziyidila Nzamb. (Mateu 4:23) Yom yawonsu yafundishay Yesu yadiokala kudiay Yehova. Yesu walonda anch: “Malejan minilejena kimadiap mamam amwinam, pakwez madiokil kudi Nzamb wantuma.” (Yohan 7:16) Yesu wading wij anch Yehova ukimbin antu atesha rusangu ruwamp anch Want wa Nzamb ukez kayikel pa mangand mawonsu.

17. Yesu walejanang kwisu? Mulong wak wasala mudimu nakash mulong wa kuyilej antu akwau?

17 Kwisu kwafundishinangay Yesu? Kwawonsu kwatanangay antu. Wafundishanga mwi mpay ni mu misumb, mu mal, mu sok, mwi ndond ja kwifukwil ni ku yikumbu ya antu. Kachingelangap anch antu eza kudi ndiy. Wadinga ni kuya kudi awiy. (Marko 6:56; Luka 19:5, 6) Yesu wipana nakash ni wasutisha chisu chivud ni usu wend mu kuyifundish antu. Mulong wak? Mulong wading wij anch Nzamb wakata anch asala mwamu ni mulong wadinga ni kumuziyil Tatukwend. (Yohan 8:28, 29) Yesu walejana kand mulong wayovila antu riy. (Tang Mateu 9:35, 36.) Wamana anch antakel a marelijon kadingap ni kuyifundish uyakin piur pa Nzamb ni Want wend. Chawiy lel wasala usu wa kuyikwash chakwel atesha rusangu ruwamp.

18. Mikadil ik ya Yesu yikusangareshina nakash?

 18 Yesu wading muntu wa rukat ni mwin kuyitongin antu akwau. Wading muntu muwamp ni uswapela kwambamb nend. Ap an akemp akatang kwez kudi ndiy. (Marko 10:13-16) Yesu wading muntu utentamina. Wading ukisin kukatul milamu ni kasolikany. (Mateu 21:12, 13) Washakama pa chisu chayikwatangau amband nich usey ukemp ni kayilimishangap. Pakwez Yesu wayilimisha ni kuyikwat nich usey chisu chawonsu. (Yohan 4:9, 27) Yesu wading chakin kamu wikepishina. Chilakej, urel umwing wayowisha atwimbuy end ku mend, mudimu umwing wading wa kashalapol.—Yohan 13:2-5, 12-17.

Yesu walejanang kwawonsu kwatanangay antu

19. Chilakej ik chimekeshina anch Yesu wading wij chakin maswir ma antu ni wakimba kuyikwash?

19 Yesu wading wij chakin maswir ma antu, ni wakata kuyikwash. Chinech chamekana patok pasadilay usu wa Nzamb chakwel ayoka antu mu yilay. (Mateu 14:14) Chilakej, ikundj umwing wadinga ni musong wa kasu weza kudi Yesu ni wamwela anch : “Anch ey ukatil, ukutwish kwingok.” Yesu wova nayimp mulong wa kusansan ni mar ma ikundj winou. Wamwovila riy nakash ni wakata kumukwash. Yesu wonina chikas chend, wamukwata ni wamwela anch: “Nikatil kukok, chawiy katat yerik.” Pawiy kamu pinipa ikundj winou wading uyedina wayerika! (Marko 1:40-42) Ukutwish kutong mutapu wafanyinay ikundj winou kwiyov?

WADING USHINSHAMEN KUDI TATUKWEND

20, 21. Mutapu ik udiay Yesu chilakej chipandakena kuwap cha kumuziyil Nzamb?

20 Yesu udi chilakej chiwamp cha kumuziyil Nzamb. Yikalap nchik yom yamushikena ap yamusalau kudi akankuny nend, ndiy washinshamana kudi Tatukwend.  Chilakej, Yesu kasalap chitil pamupakau kudi Satan. (Mateu 4:1-11) Antu amwing a mu dijuku dia Yesu kitiyijap anch wadinga Mesia ni alonda anch ndiy “warumbanganang kal,” pakwez Yesu wadandamena kusal mudimu wa Nzamb. (Marko 3:21) Pamusalau uyimp kudi akankuny nend, Yesu washala ushinshamena kudi Nzamb ni kakimbap ap kapamp kamwing kuyisal nayimp.—1 Pita 2:21-23.

21 Ap pamanay Yesu mar ni rufu risansena, ndiy washala ushinshamena kudi Yehova. (Tang Filip 2:8.) Tong bil mutapu wafanyinay kujijaman pa dichuku diafay. Amukasa, antu apana uman wa makasu anch udi mwin masaal, anzuj ayimp amufisha nich, yisak ya antu yamusipa ni amasalay amumesha mar ni amupampina pa mutond. Padingay piswimp ni kufa walonda ni dizu  dikash anch: “Katat yom yawonsu yawanyin kal!” (Yohan 19:30) Kupwa kwa machuku masatu ma rufu ra Yesu, Yehova wamuvumbula ni wamwinkisha mujimbu wa muspiritu. (1 Pita 3:18) Kupwa kwa mbing jikemp, Yesu wachirika mwiur, “washakama ku chikas cha katatuku cha Nzamb,” ni wachingela chakwel Nzamb amudisha Want.—Hebereu 10:12, 13.

22. Mulong Yesu washala ushinshamena kudi Tatukwend, yom ik tukutaninamu katat?

22 Mulong Yesu washala ushinshamena kudi Tatukwend, tukwet katat mutapu wa kushakam chikupu pa divu mu paradis, mudi kamu mwadinga chitongijok cha Yehova. Mu shapitre ulondwilaku ou, tukwisambin mutapu utukwashina rufu ra Yesu kwikal nich mwom wa chikupu.

^ par. 11 Yehova amutazukining anch Tatuku mulong udi Sakatang. (Isay 64:8) Yesu amutazukining anch Mwan a Nzamb mulong Yehova wamutanga. Angel, pamwing ni Adam, ayitazukining kand anch an a Nzamb.—Job 1:6; Luka 3:38.