Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA CHINAN

Want wa Nzamb Chom Ik?

Want wa Nzamb Chom Ik?

1. Malembil ik mijikena tukwambambina katat?

MAMILIYON ma antu mij malembil mijikena ma Tatukwetu, ap Malembil ma Nsalejetu. Yesu wasadina malembil minam mulong wa kuyifundish in kwilejend mutapu wa kulembil. Walembila mulong wa yom ik? Ni mulong wak malembil minam madi ma usey kudi etu nlel unou?

2. Yom ik yisatu ya usey yatufundishay Yesu kulembil?

2 Yesu walonda anch: “Chawiy chifanyidin kulembilany mwamu: ‘Tatukwetu udia mwiur, dijin diey aditumbish. Want wey weza. Rusot rey arusala pansh mudi mwiur.’ ” (Tang Mateu 6:9-13.) Mulong wak Yesu watufundisha kulembil mulong wa yom yiney yisatu?—Tal Mazu ma kwinsudiel 20.

3. Chom ik tuswirikedina kwijik piur pa Want wa Nzamb?

3 Twileja anch dijin dia Nzamb ndiy Yehova. Ni twisambidin piur pa rusot ra Nzamb mulong wa antu ni divu. Pakwez, chirumburikin ik palonday Yesu anch: “Want wey weza”? Tukwilej chidia Want wa Nzamb, chiukeza kusal, ni mutapu ukutumbisha dijin dia Nzamb.

WANT WA NZAMB CHOM IK?

4. Want wa Nzamb chom ik, ni nany udia Mwant?

4 Yehova watekin kal want mwiur ni wamutonda Yesu kwikal Mwant. Bibil uwutazukin want winou anch Want wa Nzamb. Yesu udi “Mwant wa ant, Nsalejau wa ansalejau.” (1 Timote 6:15) Yesu ukutwish kusal  yom yivud kuyipandakanamu antu awonsu ayikedina, ni ukwet usu upandakena wa antu awonsu ayikedina anch aubomb pamwing.

5. Want wa Nzamb ukuyikel kudiokal kwisu? Ukuyikel pak?

5 Machuku makum manying kupwa kwa kuvumbuk kwend, Yesu wachirika mwiur. Kupwa, Yehova wamutonda kwikal Mwant wa Want winou. (Midimu 2:33) Kudiokal mwiur want wa Nzamb ukuyikel pa divu. (Kujingunik 11:15) Chawiy chitazukinay Bibil Want winou anch “Want wend wa mwiur.”—2 Timote 4:18.

6, 7. Chom ik chisadina anch Yesu ikala mwant muwamp kuyisutamu ant awonsu a antu?

6 Bibil ulondin anch Yesu uyisutinamu ant akwau awonsu mulong ‘ndiy amwinend wakad kufang.’ (1 Timote 6:16) Anyikel awonsu a antu akat kufang, pakwez Yesu kakezap kufa. Yom yawonsu yiwamp yikutusadinay Yesu yikushal chikupu.

7 Uprofet wa Bibil ulondin anch Yesu ukwikal Mwant utentamina ni mwin ranaken: ‘Spiritu wa Yehova ukez kamwinkish ndiy manangu, ni ronganyin, ni chiyul cha kuyikel nich antwend. Ndiy ukez kajingunin rusot ra Yehova ni kumulimish. Ndiy ukez kasangar pakumuziyil Yehova. Ndiy kakez karumburishap kulondulijan ni yimekena kumes, ap kwa kutesh kulondol kwa antu. Chad ukez kayirumburish atuzwendj nich kutentam.’ (Isay 11:2-4) Ukutwish kukimb anch mwant wen ikala mwamu?

8. Mutapu ik twija anch Yesu kakezap kuyikel amwinend?

8 Nzamb watonda antu amwing mulong ayikela pamwing ni Yesu mu want wa mwiur. Chilakej, kambuy Paul wamuleja Timote anch: ‘Anch twadandamen kujijaman, tukez kuyikel kand pamwing nend  ndiy.’ (2 Timote 2:12) Uvud wa antu inch akuyikela pamwing ni Yesu?

9. Antu inch akuyikela pamwing ni Yesu? Chisu ik chasambishay Nzamb kuyitond?

9 Mudi kamu twilejina mu Shapitre wa 7, kambuy Yohan wamumana mu chishimushimu Yesu mudi Mwant mwiur ni ant akwau 144000. Antu 144000 awiy anany? Yohan urumburil anch “akwet dijin diend [Yesu] ni dijin dia Tatukwend amafundil pa jimpal jau.” Ni wawejinaku anch: Inay “awiy adia ni kumulondul Mwan a mukoku [ndiy kamu Yesu] kwawonsu kwadingay ni kuya. [Inay] awiy adioshau kal mukach mwa antu.” (Tang Kujingunik 14:1, 4.) Antu 144000 adi in Kristu ashinshamena atondau kudi Nzamb “mulong wa kuyikel mudi ant pa divu” pamwing ni Yesu. Anch afa, akat kuyivumbul mulong wa mwom wa mwiur. (Kujingunik 5:10, NWT) Kudiosh pa chirung cha atwimbuy, Yehova watondang in Kristu ashinshamena mulong wa kwikal pakach pa chisak cha ant 144000.

10. Mulong wak chidi cha rukat kudi Yehova kumutek Yesu ni antu 144000 mulong wa kuyikel antu?

10 Yehova ututongidining nakash, chawiy chirijekinay mulong wa antu kuyikel pamwing ni Yesu. Yesu ukwikal nyikel muwamp mulong ututeshining. Uyij antu nawamp ni mar mamenau. Paul walonda mutapu wovilingay Yesu mulong wetwetu, anch ukutwish “kutwovil riy mulong wa kuziy kwetu,” ni “amwoza mitapu yawonsu mudi mukat kutwozau etu.” (Hebereu 4:15; 5:8) Antu 144000 niyawiy ij chidingay muntu. Ni arisha nich kuburen kuwanyin ni mayej. Chawiy lel tukutwish kwikal nich kashinsh anch Yesu ni antu  144000 akutesh mutapu twoviling ni milong turishina nich.

WANT WA NZAMB UKUSAL IK?

11. Mulong wak Yesu wayifundisha in kwilejend kulembil anch rusot ra Nzamb risadika mwiur?

11 Yesu wayifundisha in kwilejend kulembil mulong rusot ra Nzamb risadika mwiur. Mulong wak? Twilejin mu Shapitre wa 3 anch Satan Djabul wamubwambwila Yehova. Kupwa kwa Satan kubwambwil, Yehova wamulika ndiy ni angel akad kushinshaman, ap ayilembil, chakwel ashakama mwiur mu chisu kanang. Kadingap angel awonsu adia mwiur asalanga rusot ra Nzamb. Mu Shapitre wa 10, tukwilej yom yivud piur pa Satan ni ayilembil.

12. Yom ik yaad ya usey yirumburilau mu Kujingunik 12:10?

12 Bibil urumburil anch machuku makemp kupwa kwa kumudish Yesu Mwant wa Want wa Nzamb, wamurishisha Satan njit. (Tang Kujingunik 12:7-10.) Verse wa 10 urumburil yom yaad ya usey nakash. Want wa Nzamb wasambisha kuyikel ni Yesu Kristu wikala Mwant, ni Satan amudiosha mwiur ni amudjibula pansh. Mudi kamu tukwileja, yom yiney yasadika kal.

13. Chom ik chasadika mwiur pamudjibulau Satan pansh?

13 Bibil ulejen piur pa musangar wovau angel ashinshamena kupwa kwa kumudjibul Satan ni ayilembil end pansh. Tutangin anch: “Sangarany mwiur ni yenen ushichanyamu.” (Kujingunik 12:12, TMK) Mwiur mudi katat chisambu chijim ni uumwing mulong awonsu adiamu asadil rusot ra Nzamb.

Kudiosh pamudjibwilau Satan ni ayilembil end pansh, kwikala mar mavud pa divu. Mar minam makupwa kurutu oku

14. Yom ik yashikena pa divu pamwopatau Satan mwiur?

14 Pakwez mwom wa pa divu ushalijadin nakash.  Yom yikash yayishikena antu “mulong Satan washirik kal pansh,” ni “ukwet ujim nakash, wij kal anch kwamushal kal chisu chikemp kusu.” (Kujingunik 12:12) Satan ukwet ujim nakash. Amudjibwila kal pansh ni wij anch akumushesh kamu piswimp ap. Usadil yom yawonsu yikutwishay mulong wa kulet kanvundangesh, kusansan ni mar pa divu diawonsu.

15. Chitongijok ik chikwetay Nzamb mulong wa divu?

15 Pakwez chitongijok cha Nzamb mulong wa divu chaswimpap. Ukatin anch antu awanyidina ashakama chikupu mu paradis pa divu. (Kuseng 37:29) Chawiy, mutapu ik ukeza Want wa Nzamb kusal anch yom yiney yisadika?

16, 17. Yom ik yitulejinay Daniel 2:44 piur pa Want wa Nzamb?

16 Uprofet wa Daniel 2:44 ulondin anch: “Mu machuku ma ant inaya, Nzamb wa mwiur ukez [kimik] want wakad kwez kudiosh. Ni want kakezap kuupan kud antu akwau. Ukez kapuchol ni kupwish mant makwau minam mawonsu, ni wawiy ukez kashakam chikupu.” Uprofet winou utufundishin ik piur pa Want wa Nzamb?

17 Chakusambish, utulejin anch Want wa Nzamb ukusambish kuyikel “mu machuku ma ant inaya.” Chinech chirumburikin anch mant makwau makudandamen kwikalaku pa divu pakusambisha Want kuyikel. Cha kaad, utulejin anch Want wa Nzamb ukushal chikupu ni kakezap kuuswinkan kudi want ukwau. Cha kasatu, kukwikal njit pakach pa Want wa Nzamb ni mant ma mangand minam. Want wa Nzamb ukez kuwin ni ukwikal want umwing ukuyikela pa divu diakabuj. Kupwa, antu akwikal ni want upandakena kuwap wakad kwikalangawap kal nich.

18. Njit ja nsudiel jikusadika pakach pa Want wa Nzamb ni mant ma mangand minam ajitazukin nchik?

 18 Mutapu ik ukeza Want wa Nzamb kuyikel pa divu diawonsu? Kurutu kwa njit ja nsudiel jitazukinau anch njit ja Harmagedon, ayilembil akuyidimb “ant a ngand ya kabuj ni kuyikumangej pamwing, arisha njit pa dichuku dijim dia Nzamb wa Dikand Diawonsu.” Mwaning, mant ma antu makez kurish njit ni Want wa Nzamb.—Kujingunik 16:14, 16; tal Mazu ma kwinsudiel 10.

19, 20. Mulong wak tuswirikedin anch Want wa Nzamb uyikela pa divu?

19 Mulong wak tuswirikedina Want wa Nzamb? Kudi mayingishin masatu. Chakusambish tudi akayitil, chawiy lel tukat kuyel ni kufa. Pakwez Bibil ulondin anch mu Want wa Nzamb, tukushakam chikupu. Chakin,Yohan 3:16 ulondin anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.”

20 Diyingishin diakaad dituswirikedina Want wa Nzamb didi anch atunyingumukin kudi antu ayimp. Antu avud alondining makasu, iyining ni kusal masandj. Tukutwishap kusal chom ap chimwing mulong wa kuyidiosh pa divu, pakwez Nzamb ukutwish kusal mwamu. Antu adandamedina kusal yom yiyimp akez kuyishesh kwi njit ja Harmagedon. (Tang Kuseng 37:10.) Diyingishin diakasatu tuswirikedina Want wa Nzamb didi anch mant ma antu makwetap usu, madi ma chisum, ni mayimp. Makatap kwipan mulong wa kuyikwash antu chakwel amuziyina Nzamb. Bibil ulondin anch “muntu ukat kumuyikel mukwau mulong wa kumumesh mar.”—Mulej 8:9, NWT.

21. Mutapu ik ukwikala Want nich kashinsh anch rusot ra Nzamb arusadin pa divu?

 21 Kupwa kwa Harmagedon, Want wa Nzamb ukwikal nich kashinsh anch rusot ra Nzamb arisadin pa divu. Chilakej, kumudiosh Satan ni ayilembil end. (Kujingunik 20:1-3) Chakin kamu, kwikil muntu ap umwing ukeza kuyel ap kufa. Mulong wa difut, antu awonsu ashinshamena akutwish kushakam chikupu mu Paradis. (Kujingunik 22:1-3) Want ukez kutumbish dijin dia Nzamb. Chinech chirumburikin ik? Chirumburikin anch pakuyikela want wa Nzamb pa divu, antu awonsu akez kulimish dijin dia Yehova.—Tal Mazu ma kwinsudiel 21.

CHISU IK CHIKALAY YESU MWANT?

22. Mutapu ik twija anch Yesu kadingap Mwant padingay pa divu ni kikalap Mwant kapamp kamwing kupwa kwa kuvumbuk kwend?

22 Yesu wayifundisha in kwilejend kulembil anch: “Want wey weza.” Chawiy lel chovikena nawamp anch want wa Nzamb ukwez mu machuku ma kurutu. Chakusambish Yehova ukwimik want wend ni kumutek Yesu Mwant wa want winou. Yesu wikala Mwant kapamp kamwing kupwa kwa kuchirik mwiur? Bwat, wafanyina kuchingel. Chisu chimwing kupwa kwa kuvumbuk  kwa Yesu, Pita ni Paul arumburila patok chisu chikuwanyina uprofet udia mu Kuseng 110:1 piur pa Yesu. Mu uprofet winou Yehova ulondin anch: “Ez ushakam ku chikas cham cha katatuku, djat ni pinikuyiteka akankuny ney kwishin kwa yidjatil yey.” (Midimu 2:32-35; Hebereu 10:12, 13) Yesu wafanyina kuchingel kushik ni chisu ik kurutu kwa Yehova kumutek Mwant?

Want wa Nzamb ukwikal nich kashinsh anch rusot ra Nzamb arisadin pa divu

23. (a) Chisu ik chasambishay Yesu kuyikel mudi Mwant wa want wa Nzamb? (b) Yom ik tukwileja mu shapitre ulondwilaku ou?

23 Mivu yivud kurutu kwa muvu wa 1914, chisak cha in Kristu akin ajingunina anch muvu winou ukwikal muvu wa usey mu uprofet wa Bibil. Yom yashikena pa mangand kudiosh mu muvu wa 1914 yamekesha anch yalondau yading yakin. Yesu wasambisha kuyikel mudi Mwant mu muvu winou. (Kuseng 110:2) Kupwa kwa yom yiney, amudjibula Satan pa divu, katat “chisu chend chashal kal chikemp.” (Kujingunik 12:12) Mu shapitre ulondwilaku ou, tukwilej nakash piur pa uman umekeshina anch tushich mu chisu chinech. Tukwilej kand anch piswimp ap Want wa Nzamb ukushinshikin anch rusot ra Nzamb risadika pa divu.—Tal Mazu ma kwinsudiel 22.