Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM NI CHIDIVU

Shal Piswimp ni Yehova

Shal Piswimp ni Yehova

1, 2. Kwisu tukutwisha kutan diking nlel?

TONG BIL anch udi pol chisu cha urel ni kudi rinkind muyimp. Diur diajal kal, milayilay yasambish kal, ni ruval wasambish kal kubarumok. Kapamp kamwing ruval wasambish kunak. Wasambish kukimb ndond ya kujingam. Ukwov nchik anch waman ndond yiwamp ni yiumina!

2 Tudi mu chisu chifanakena ni chinech nlel. Mikadil ya mangand yiyil kupandakan kuyip. Ukutwish kwiyipul anch, ‘Kwisu nikutwisha kutan diking?’ Nfund a kuseng wafunda mu Bibil anch: ‘Nikumulej Yehova anch: ‘Ey udi Dipat diam ni kwikang kwam, Nzamb wam, mwawiy munikungamedina.’’ (Kuseng 91:2) Mwaning, Yehova ukutwish kutukwash kupwish milong yetu, ni utwinkin ruchingej ripandakena kuwap mulong wa machuku ma kurutu.

3. Mutapu ik tukutwisha kumutek Yehova kwikal diking dietu?

3 Mutapu ik ukutwishay Yehova kutuking? Ukutukwash kupwish milong yetu yivud tukweta, ni ukwet usu kusutamu muntu win mwawonsu ukimbina kutusal nayimp. Chawiy anch chom chiyimp chatushiken nlel, tukutwish kwikal ni kashinsh anch Yehova ukez kapwish uyimp winou machuku ma kurutu. Bibil utukasikeshin anch : “Ilamany ayinen mu rukat ra Nzamb.” (Jud 21) Tufanyidin kusej piswimp ni Yehova mulong wa kutambul ukwash mu yirung ya yakamish. Pakwez mutapu ik tukutwisha kusal mwamu?

KWAKUL KU RUKAT RA NZAMB

4, 5. Mutapu ik wamekeshay Yehova rukat rend kudi etu?

4 Chakwel tushala piswimp ni Yehova, tufanyidin kwijik mutapu utukatinay. Tongin pa yom yasalay Yehova  mulong wetwetu. Watwinkisha divu dipandakena kuwap dizwila ni mitond ni annam. Watwinka kand yakudia yiwamp ni mem mawamp mulong wa kuna. Kusutin Bibil, Yehova watufundisha dijin dend ni mikadil yend yipandakena kuwap. Cha usey nakash, wamekesha rukat rend mulong wetwetu pamutumay Mwanend mukatish, Yesu, pa divu mulong wa kupan mwom wend mulong wetwetu. (Yohan 3:16) Ni mulong wa chakupesh chinech, tukwet ruchingej ripandakena kuwap mulong wa machuku mezina kurutu.

5 Yehova watenchika Want wa Mesia, want winou ukupwish mar mawonsu kurutu oku. Want ukukarumun divu kwikal paradis mukushakamau antu awonsu mu chisambu ni mu musangar wa chikupu. (Kuseng 37:29) Mutapu ukwau wamekeshay Yehova rukat rend kudi etu kudi kutufundish mutapu wakushakam nlel unou. Chikwau kand utwitin anch tumulembila, ni uteshining chisu chin chawonsu malembil metu. Yehova wamekesha patok rukat rend kudi muntu ni muntu pakach petu.

6. Mutapu ik ukwakula ku rukat ra Yehova?

6 Mutapu ik ukwakula ku rukat ra Yehova? Mekesh anch umujikitishin nakash mulong wa yom yawonsu yasalay mulong weyey. Cha ushon, antu avud nlel adi akad kujikitishang. Yom yiney yading ya kashinsh pa chisu chadingay Yesu pa divu. Dichuku dimwing Yesu wayoka in musong wa kasu dikum, pakwez umwing kusu pakach pau ndiy wamujikitisha. (Luka 17:12-17) Tukimbin kwikal mudi ikundj wamujikitisha Yesu. Tukimbin kumujikitish Yehova chisu chawonsu.

7. Mutapu ik tufanyidina kumukat Yehova?

7 Tukwet kand kuswir kwa kumekesh rukat retu kudi Yehova. Yesu wayileja in kwilejend anch afanyidin kumukat Yehova nich muchim wau wawonsu, nich mupim wau wawonsu, ni manangu mau mawonsu. (Tang Mateu 22:37.) Chinech chirumburikin ik?

8, 9. Mutapu ik tukutwisha kumekesh anch tumukatin Yehova?

 8 Chiwanyidin kulond kwau anch tumukatin Yehova? Bwat. Anch tumukatin Yehova ni muchim wetu wawonsu, ni manangu metu mawonsu, ni mupim wetu wawonsu, tukumekesh rukat retu kudi ndiy kusutin yisal yetu. (Mateu 7:16-20) Bibil ufundishin patok anch ang tumukatin Nzamb, tukuziyin ku yijil yend. Ov, yijil yiney yikasiken? Bwat, mulong yijil ya Yehova ‘yikasekenap.’—Tang 1 Yohan 5:3.

9 Anch twamuziyin Yehova, tukwikal ni chisambu ni mwom usangareshina. (Isay 48:17, 18) Pakwez chom ik chikutukwasha kusej piswimp ni Yehova? Chingelany tumanany.

DANDAMEN KUSEJ PISWIMP NI YEHOVA

10. Mulong wak ufanyidin kudandamen kwilej piur pa Yehova?

10 Mutapu ik ukutwisha kwikal murund nend a Yehova? Mu dilejan diey dia Bibil, ukushiken ku kumwijik Yehova nakash ni kukudish urund wey ni ndiy. Urund winou udi mudi kasu kakundakeshinau chakwel kangal kajim. Mutapu kasu kakweting kuswir kwa nkuny chakwel kaka, ukwet niyey kuswir kwa kudandamen kwilej piur pa Yehova mulong urund wen wikala ukash.—Jinswir 2:1-5.

Mudi kasu, rukat rey mulong wa Yehova rikwet kuswir kwa nkuny chakwel ridandamena kuzut

11. Mutapu ik ukutwisha malejan ma Bibil kukushik ku muchim?

11 Piudandamedina kwilej Bibil, ukwilej chakin kamu yom yikukushika ku muchim. Tal mutapu wayishika in kwilej aad a Yesu uprofet wa Bibil wayirumburilau kudi Yesu. Alonda anch: “Ov, michim yetu kiyaswanangap mwivumu padingay ni kuturumburil mwi njil mazu ma mikand ya Nzamb?”—Luka 24:32.

12, 13. (a) Chom ik chikutwisha kushiken ku rukat retu mulong wa Nzamb? (b) Mutapu ik tukutwisha kudandamen kukasikesh rukat retu ni Yehova?

12 Mudi mutapu wayishika ku michim in kwilej yom  yateshau yidiokila mu Mifund, ukutwish niyey kwov musangar anch wasambish kutesh kurumburik kwa yom yilondinay Bibil. Yiney yikukukwash umwijika ni umukata Yehova. Ukukimbap anch rukat riner ritalala.—Mateu 24:12.

13 Anch wikal murund nend a Nzamb, ufanyidin kusal usu wa kulam urund wey ukash. Ufanyidin kudandamen kwilej piur pendendiy ni piur pa Yesu ni kutongin piur pa yom wilejina ni mutapu ukutwisha kuyisadin mu mwom wey. (Yohan 17:3) Anch utangin ap wilejin Bibil, iyipula anch: ‘Yom yiney yinfundishin ik piur pa Yehova Nzamb? Mutapu ik nikutwisha kumukat ni muchim wam ni mupim wam win wawonsu?’—1 Timote 4:15.

14. Malembil matukwashin mutapu ik kukasikesh urund wetu ni Yehova?

14 Anch ukwet murund muwamp, wambambining nend chisu chawonsu, chinech chikasikeshining urund wen. Chilik chimwing, anch twabambining ni Yehova chisu  chawonsu mu malembil, malembil minam makusal anch rukat retu rikala rikash. (Tang 1 Tesalonik 5:17.) Malembil chidi chipan chipandakena kuwap chidiokila kudi Tatukwetu wa mwiur. Tufanyidin kumulej chisu chawonsu yom yidiokila mu muchim wetu. (Kuseng 62:8) Tufanyidinap kuchirikin yom yimwing yimwing mu malembil metu, pakwez tufanyidin chakin kutesh kurumburik kwa yom tulondina. Mwaning, anch twadandamen kwilej Bibil ni kulembil yom yidiokila mu muchim wetu, tukudandamen kukasikesh rukat retu mulong wa Yehova.

KUYILEJ ANTU AKWAU PIUR PA YEHOVA

15, 16. Mutapu ik umena mudimu wa kulejan?

15 Anch tukimbin kudandamen kusej piswimp ni Yehova, tufanyidin kand kuyilej antu akwau piur pa ritiy retu. Kuyilej antu akwau piur pa Yehova chidi chisend chipandakena kuwap. (Luka 1:74) Ni chidi chisend chapanay Yesu kudi in Kristu awonsu akin. Muntu mwawonsu pakach petu ufanyidin kulejan rusangu ruwamp ra Want wa Nzamb. Wasambishin kal kusal mwamu?—Mateu 24:14; 28:19, 20.

16 Kambuy Paul wamana anch mudimu wa kulejan wading wa usey nakash; wautazuka anch ‘dipit.’ (2 Korint 4:7) Kuyilej antu akwau piur pa Yehova ni chitongijok chend, udi mudimu umwing wa usey nakash ukutwisha kusal. Wawiy mutapu weyey kumusadin Yehova, ni ndiy ukwatin nich usey yom umusadidina. (Hebereu 6:10) Mudimu wa kulejan ukutwish kukukwash utaninamu ey ni antu akuteshina mulong uyikwashin antu akwau ni amwiney kusej piswimp ni Yehova ni ukwikal ni mwom wa chikupu. (Tang 1 Korint 15:58.) Ov, kudi kand mudimu ukwau ukutwisha kukuletin musangar nakash?

17. Mulong wak mudimu wa kulejan udi wa kuswapej?

 17 Mudimu wa kulejan udi wa kuswapej nakash. Tufanyidin ‘kulejan dizu,’ ni tufanyidin ‘kulejan kamu.’ (2 Timote 4:2) Antu akwet kuswir kwa kutesh piur pa Want wa Nzamb. Bibil ulondin anch: “Dichuku Dijim dia [Yehova] didi piswimp, didi kamu piswimp, dezil mau!” ni ‘Dikulabap, bwat!’ (Sofoniy 1:14; Abakuk 2:3) Mwaning, piswimp ap, Yehova ukujiyish mangand mayimp ma Satan. Kurutu kwa yom yiney kushiken, chifanyidin kuyibabesh antu chakwel atwisha kutond kumusadin Yehova ap bwat.

18. Mulong wak tufanyidin kumwifukwil Yehova pamwing nau in Kristu akwau akin?

18 Yehova ukimbin to tumwifukwila pamwing nau in Kristu akwau akin. Bibil ulondin anch: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing. Pakwez chifanyidin tupandakeshany kukasikeshijan muntu ni mukwau, mulong umenany anch, Dichuku dikurumburishay Nsalejetu dikat kusej piswimp.” (Hebereu 10:24, 25) Tufanyidin kusal usu wetu wawonsu chakwel twikala ku yikumangan yawonsu. Yikumangan yitwinkishin mutapu wa kukasikeshijan muntu ni mukwau.

19. Chom ik chikutwisha kutukwash kuyikat akadivar ni anambaz netu in Kristu?

19 Anch wakumangan, ukutan arund awamp akukukwasha kumwifukwil Yehova. Ukusankan akadivar ni anambaz kushalijan akukatina, asadina usu wau wawonsu mulong wa kumwifukwil Yehova. Adi antu akad kuwanyin ni akat kurumbukang mudi ey. Anch akurumbukin, ukutwish kuyilikishin. (Tang Kolosay 3:13.) Chisu chawonsu, shinshikin pa mikadil yiwamp ya akadivar ni anambaz ney in Kristu, mulong kusal mwamu kukukwash kuyikat ni kushej piswimp ni Yehova.

 MWOM UDIA WAKIN

20, 21. “Mwom udia wakin” chom ik?

20 Yehova ukatin anch arund nend awonsu atambula mwom upandakena kuwap. Bibil utufundishin anch mwom wetu wa machuku ma kurutu ukushalijan kamu nakash ni mwom wetu wa nlel.

Yehova ukimbin anch usangera “mwom udia wakin.” Ov, ukatin?

21 Mu machuku ma kurutu, tukushakam chikupu, tukushakamap kand kwetu mu mivu 70 ap 80. Tukusanger “mwom wa chikupu” ni ukash wa mujimbu, chisambu, ni musangar mu paradis upandakena kuwap. Yawiy yitazukinay Bibil anch “mwom udia wakin.” Yehova washilamu kutwinkish mwom udia wakin, pakwez tufanyidin kusal yom yawonsu tukutwisha katat mulong wa ‘kulam dang’ mwom winou.—1 Timote 6:12, 19.

22. (a) Mutapu ik tukutwisha ‘kulam dang mwom udia wakin’? (b) Mulong wak tuwanyidinap kutambul mwom wa chikupu?

22 Mutapu ik tukutwisha ‘kulam dang mwom udia wakin’? Tufanyidin “kusal yom yiwamp” ni “kwikal ampich mu midimu yiwamp.” (1 Timote 6:18) Chinech chirumburikin anch tufanyidin kusadil yom yawonsu twilejina mu Bibil. Pakwez, mwom udia uwamp wimedinap pa usu wetu ayinetu. Tuwanyidinap kutambul mwom wa chikupu. Chidi chipan cha riy chidiokila kudi Yehova mulong wa atushalapol end ashinshamena mudi chilakej cha “ranaken” rend. (Rom 5:15) Tatukwetu wa mwiur ukimbin chakin kamu kuyinkish atushalapol end ashinshamena chipan chinech.

23. Mulong wak ufanyidin kutond nawamp katat?

23 Iyipula anch: Ov, ‘Nikat kumwifukwil Nzamb mu mutapu witiyinay?’ Anch waman anch ukwet kuswir kwa kuswimp, ufanyidin kusal mwamu swa. Anch twamuchingejin Yehova ni twasal yawonsu tukutwisha kusal mulong wa kumuziyin, Yehova ukwikal diking dietu. Ukuyilam antu end ashinshamena mu machuku ma  nsudiel ma mangand mayimp ma Satan. Chawiy Yehova ukushinshikin anch tukushakam chikupu mu Paradis, mudi kamu mwashilayimu. Mwaning, ukutwish kwikal ni mwom udia wakin anch watond nawamp katat!