1, 2. Yipul ik yikatau antu kwiyipul?

AN AKAT kwipulang yipul yivud. Ukutwish kuyirumburil chom kanang, pakwez yisu yivud ipwiling anch: ‘Mulong wak?’ Ni anch wapim kuyakul, akutwish kwipul kand anch: ‘Mulong wak?’

2 Twikalap nchik mwanikanch ap mukurump, etu awonsu tukat kwipulang. Tukutwish kwipul piur pa yom tukudia, tukudjala ap tukulanda. Ap tukutwish kwikal nich yipul ya usey piur pa mwom ni piur pa machuku ma kurutu. Pakwez anch tutaninap yakul yisangareshina ku yipul yiney, tukutwish kulik kukimb yakul.

3. Mulong wak antu avud atongining anch kakutwishap kutan yakul ku yipul yau ya usey?

3 Bibil ukweting yakul ku yipul ya usey tukata kwipulang? Antu amwing akutwish kutong mwamu, pakwez atongining kand anch Bibil ukasikening kumutesh. Akutwish kutong anch ching kusu alej ap amwimpel awiy akutwisha kwakul. Akwau oviling usany wa kwitiyin anch kijap yakul. Chom ik utongina?

4, 5. Chipul ik cha usey ukweta? Mulong wak ufanyidin kudandamen kukimb yakul?

4 Ukimbining pamwing ap yakul ku yipul mudi ey: Mwom autanga mulong wak? Chom ik chishikedininga pakatay muntu kufa? Nzamb uding wa mutapu ik? Yesu, Mulej mujim, walonda anch: ‘Dandamenany kwit, akukwinkishany; dandamenany kukimb, ukutanany; dandamenany kukokal, akukwazurilany.’ (Mateu 7:7) Kangal waziy kushik ni paukeza kutan yakul ukutwisha kuchingejin.

 5 Anch ‘wadandamenany kukimb,’ ukez kutanany yakul mu Bibil. (Jinswir 2:1-5) Yakul yiney yikasikeningap kwau kutesh. Yom wilejina yikukwinkish mwom wa musangar katat ni ruchingej ripandakena kuwap mulong wa machuku ma kurutu. Twisambinany bil amboku piur pa chipul chimwing chiyitekina antu avud mu kanvundangesh.

NZAMB UKAT KUTUTONGINANG BIL ANCH UDI MWIN KUMESHAN MAR?

6. Mulong wak antu amwing amening anch Nzamb kakatap kuyitongin piur pa mar mamenau?

6 Antu avud amening anch Nzamb kakatap kututongin. Akat kutong anch ang Nzamb ukat kututongin chakin kamu, ing mangand melang kwikal ndond yiwamp. Tumen njit, rukuny ni mar ndond yawonsu. Antu akat kuyel, amen mar ni kufa. Amwing akat kwiyipul anch: ‘Ang Nzamb ukat kututongin, mulong wak kapwishinap mar minam mawonsu?’

7. (a) Mutapu ik uyilejinau antu kudi antakel a marelijon anch Nzamb udi mwin kumeshan mar? (b) Mulong wak tukutwish kwikal nich kashinsh anch Nzamb kadiap musul wa yom yiyimp yikata kushikenang?

7 Yisu yimwing antakel a marelijon akat kuyibachik antu ku kwitiyij anch Nzamb udi mwin kumeshan mar. Pakata kushikenang yom yiyimp, alondining anch ridi rusot ra Nzamb. Akat kulond anch ndiy wakatang chisadika mwamu. Palondinau mwamu, akat chakin kamu kumekesh anch Nzamb ndiy musul wa yom yiyimp. Pakwez Bibil ulejen anch Nzamb kadiap ap pakemp musul wa yom yiyimp. Jakobu 1:13 utulejin anch Nzamb kakatap kumupak muntu ap umwing nich yom yiyimp. Ulondin anch: “Muntu anch amwoz, kangal walond anch: ‘Angozil [ap ampakin] kudi Nzamb.’ Mulong Nzamb kakwozanangip nich kuyip, ni amwinend kakumwozangip  muntu.” Chinech chirumburikin anch ap anch Nzamb kakatap kukangesh kushiken kwa yom yiyimp, ndiy kakatap ap pakemp kusal chakwel yishikena. (Tang Job 34:10-12.) Tusadilany bil amboku chilakej chimwing.

8, 9. Mulong wak chiwapinap kulond anch Nzamb ndiy musul wa milong yetu? Let chilakej.

8 Tong bil piur pa nsand uchidia ku chikumbu cha anvajend. Tatukwend umukatin nakash ni umulejin mutapu wa kukwat mipak yiwamp. Kupwa, nsand winou wamubwambwil tatukwend ni wadiokal ku chikumbu. Wasal yom yiyimp ni kulet kanvundangesh. Ukulond anch tatukwend ndiy udia musul wa yom yashikena kal mulong kamukangeshinap mwanend kudiokal ku chikumbu? Bwat kamu! (Luka 15:11-13) Mudi tatuku winou, Nzamb kayikangeshap antu patondau kumubwambwil ni kusal yom yiyimp. Chawiy lel anch chom chiyimp chashiken, tufanyidin kuvurik anch kadiap Nzamb usadila anch chishikena. Chikwikal chakad kutentam kulond anch Nzamb udi musul wa yom yiyimp yikata kushikenang.

9 Kudi diyingishin diwamp nakash diasala anch Nzamb alika kukangesh yom yiyimp kushiken. Mu Shapitre wa 11, ukwilej chilondinay Bibil piur pa chom chinech. Pakwez ukutwishany kwikal nich kashinsh anch Nzamb utukatin ni kadiap musul wa milong yetu. Pakwez, ndiy kusu umwing ukutwisha kuyipwish.—Isay 33:2.

10. Mulong wak tukutwish kwikal nich kashinsh anch Nzamb ukurijek yom yawonsu yayipishau kudi antu ayimp?

10 Nzamb udi utumbila. (Isay 6:3) Yom yawonsu yikatay kusal yidi yishitwila, yinangina, ni yiwapina. Chawiy lel tukutwish kumuchingejin. Pakwez antu kadingap mwamu. Yisu yimwing asadining yom yiyimp. Ap antakel a kashinsh nakash kakwetingap usu wa kurijek yom  yawonsu yiyipishinau kudi antu ayimp. Kwikil muntu ap umwing ukweta usu mudi wa Nzamb. Nzamb ukutwish ni ukez kurijek yom yawonsu yayipishau kudi antu ayimp. Ukez kudiosh uyimp wawonsu chikupu.—Tang Kuseng 37:9-11.

MUTAPU IK WOVILINGAY NZAMB PAMENAU ANTU MAR?

11. Mutapu ik wovilingay Nzamb piur pa mar mey?

11 Mutapu ik wovilingay Nzamb pamenay yom yisadikina pa mangand ni mutapu ik wiyovila niyey? Bibil ulejen anch Nzamb “ukatil kutentam.” (Kuseng 37:28) Chawiy lel ukat kushinshikin nakash piur pa yom yitentamina ni yom yiyimp. Ukisin payimenay antu akat kuman mar. Bibil ulondin anch: “ndiy wova ushon mu muchim wend” pamanay kuyip kwa antu kwavulijan kal pansh. (Disambishil 6:5, 6) Nzamb kaswimpiningap. (Malakiy 3:6) Bibil ulondin anch chakin kamu Nzamb ukat kukutongin.—Tang 1 Pita 5:7.

Bibil ufundishin anch Yehova udi Sakatang mwin rukat wa mangand mawonsu

12, 13. (a) Mulong wak tuyikatining antu akwau ni kuyitongin, ni mutapu ik tukata kwiyov piur pa mar madia mu mangand? (b) Mulong wak tukutwish kwikal nich kashinsh anch Nzamb ukudiosh mar mawonsu ni kasolikany?

12 Bibil ulondin anch Nzamb watutanga mu chifu chend. (Disambishil 1:26) Chinech chirumburikin anch Nzamb watutanga ni mikadil yiwamp ya mutapu umwing ni yikwetay ndiy. Chawiy anch ey woviling nayimp piumena antu akad mulong akat kuman mar, Nzamb ufanyidin kwov nayimp nakash pamenay yom ya mutapu winou! Mutapu ik twija mwamu?

13 Bibil utulejin anch “Nzamb udi rukat.” (1 Yohan 4:8) Nzamb usadining yom yawonsu nich rukat. Chawiy lel tumukatining Nzamb mulong utukatin. Tong bil piur pa chinech: Anch wading nich usu, welang kudiosh  mar mawonsu ni kasolikany pa mangand? Mwaning welang kudiosh, mulong uyikatin antu. Chidi nchik piur pa Nzamb? Mulong ndiy ukwet usu, ni utukatin, chawiy lel ukudiosh mar mawonsu ni kasolikany. Ukutwish kwikal nich kashinsh anch kushilamu kwawonsu kwa Nzamb kulejenau kwinsambishil kwa buku winou kukez kwikal kwakin! Chakwel utwisha kuchingejin mu kushilamu kwinoku, ufanyidin kwijik yom yivud piur pa Nzamb.

NZAMB UKATIN ANCH EY UMWIJIKA

Anch ukimbin kwikal murund wa muntu kanang, ukumulej dijin diey. Nzamb utulejin dijin diend mu Bibil

14. Nzamb dijin diend ndiy nany, ni mutapu ik twija anch tufanyidin kudisadin?

14 Anch ukimbin kwikal murund wa muntu kanang, chom ik chakusambish ukata kumulejang yisu yivud? Dijin diey. Nzamb ukwet dijin? Marelijon mavud malondining anch dijin diend Nzamb ap anch Nsalejam, pakwez minam kimadiap majin mend ma pakampwil. Yiney yidi kusu maz (yijiken), mudi “mwant” ap “nyikel.” Nzamb watuleja anch dijin diend Yehova. Kuseng 83:18, NWT, ulondin anch: “Chifanyidin antu ijika anch Yehova diawiy dijin diey, yey umwing kusu Udia Piur pa divu diawonsu.” Antu afunda Bibil asadila dijin dia Nzamb tupamp tunan ni tunan. Yehova ukatin anch wijika dijin diend ni kudisadin. Wakuleja dijin diend chakwel wikala murund nend.

15. Dijin dia Yehova dirumburikin ik?

 15 Dijin dia Nzamb, Yehova, dikwet kurumburik kujim. Dijin dined dirumburikin anch Nzamb ukutwish kuwanyish kushilamu kwin kwawonsu kwakanay ni ukutwish kuwanyish chitongijok chend. Kwikil chom ap chimwing chikumukangesha. Yehova ndiy kusu ukutwisha kwikal nich dijin dined. *

16, 17. Chom ik chirumburikina (a) “Mwin Dikand Diawonsu”? (b) “Mwant wa chikupu”? (c) “Sakatang”?

 16 Mudi mutwatangang, Kuseng 83:18 ulondin piur pa Yehova anch: “Yey umwing kusu Udia Piur.” Kujingunik 15:3, NWT ulondin niyend anch: “Midimu yey yipandiken ni ya kushimokish, Yehova Nzamb Mwin Dikand Diawonsu. Jinjil jey jitentamin ni ja kashinsh, Mwant wa chikupu.” Mwaz “Mwin Dikand Diawonsu” urumburikin ik? Chirumburikin anch Yehova ukwet usu upandakena wa muntu mwin mwawonsu mwiur ap pa divu. Ni mwaz “Mwant wa chikupu” urumburikin anch ndiy udingaku chisu chawonsu. Kuseng 90:2 urumburil anch ndiy udiaku chikupu ni chikupu. Chinech chishimokishin mudi ik!

17 Yehova ndiy Sakatang. Kujingunik 4:11, NWT ulondin anch: “Ey Yehova Nzamb wetu, yey uwanyidina kutambul uyaj, ni katumb, ni ukash. Mulong yey watanga  yom yawonsu, ni yom yawonsu yidiaku yishich mulong wa rusot rey.” Mwaning, kudiosh ku angel mwiur, atutumbu mwiur, mabuj ku mitond djat ni ansh mu karung—Yehova watanga yom yawonsu ukutwisha kutongin!

UKUTWISH KWIKAL MURUND NEND A YEHOVA?

18. Mulong wak antu amwing akutwish kutong anch kakutwishap kwikal arund a Nzamb? Bibil ulondin ik piur pa chinech?

18 Pakatau antu kutang piur pa mikadil yishimokishina ya Yehova, akat kwov wom ni kutong anch: ‘Nzamb ukweta usu upandakena, ukweta usey, ni udia kulemp mwamu, ov, ukutwish kamu kwintongin am?’ Pakwez, Nzamb ukatin anch twiyova mwamu? Bwat kwau. Yehova ukatin kwikal piswimp niyetwetu. Bibil ulondin anch Nzamb “kadiap kulemp ni muntu mwawonsu.” (Midimu 17:27) Nzamb ukimbin anch umusejina piswimp ni ndiy wakana anch: “ukusej piswimp ni yenen.”—Jakobu 4:8.

19. (a) Mutapu ik ukutwisha kwikal murund nend a Nzamb? (b) Mwikadil ik wa Yehova ukatina nakash?

19 Mutapu ik ukutwisha kwikal murund nend a Nzamb? Yesu walonda anch: “Antu akwikal nich mwom wa chikupu anch ashiken ku kukwijik ey Nzamb wakin, ni kumwijik Yesu Kristu watuma ey.” (Yohan 17:3, NWT) Dandamen kwilej, ni ukushiken ku kumwijik Yehova ni Yesu. Kupwa ukutwish kwikal nich mwom wa chikupu. Chilakej, twilej kal anch “Nzamb udi rukat.” (1 Yohan 4:16) Pakwez ukwet kand mikadil yikwau yivud yishimokishena. Bibil utulejin anch Yehova udi mwin “ranaken ni mwin riy, wakad kwovang ujim swa, wizwila sens nich rukat ni uyakin.” (Kubudik 34:6) Yehova udi “muwamp ni ukat kulikishin.” (Kuseng 86:5) Nzamb udi mwin kushimpish muchim ni ushinshamena. (2 Pita 3:9; Kujingunik 15:4) Ukwilej yivud nakash piur pa mikadil yend yishimokishena piutangina piur pend mu Bibil.

20-22. (a) Mutapu ik tukutwisha kwiyov anch tudi piswimp ni Nzamb ap anch tukumumanangap? (b) Chom ik ufanyidina kusal anch antu amwing akimb anch akukangesh kwilej Bibil?

 20 Mutapu ik ukutwisha kwiyov anch udi piswimp nakash ni Nzamb ap anch umumenap? (Yohan 1:18; 4:24; 1 Timote 1:17) Anch watang piur pa Yehova mu Bibil, ukumwijik mudi Muntu wakin. (Kuseng 27:4; Rom 1:20) Anch wilej yom yivud piur pa Yehova ukwiyov anch udi piswimp nakash ni ndiy.

Tatuku uyikatining anend, pakwez Tatukwetu wa mwiur utukatin nakash kupandakanamu

21 Ukwijik anch Yehova udi Tatukwetu. (Mateu 6:9) Watwinkisha mwom, ni ukimbin anch twikala ni mashakamin mawamp. Yawiy yikatinay tatuku mwin rukat mulong wa anend. (Kuseng 36:9) Mwaning, Bibil ulejen anch ukutwish kwikal murund nend a Yehova. (Jakobu 2:23) Tong bil. Yehova, Sakatang wa mangand mawonsu, ukatin anch wikala murund nend!

22 Antu amwing akutwish kukukangesh chakwel ulika kwilej Bibil. Akutwish kwov wom anch ukez kuswimp relijon wey. Pakwez kangal walik muntu ap umwing akukangesha kwikal murund wa Yehova. Ndiy udi Murund upandakena kuwap ukutwisha kwikal nend.

23, 24. (a) Mulong wak ufanyidin kudandamen kwipul yipul? (b) Yom ik tukwisambina mu shapitre ulondwilaku ou?

23 Piwilejina Bibil, kukwikal yom yiwakad kutesh. Kangal kwey wov usany wa kwipul yipul ap kwit ukwash. Yesu walonda anch tufanyidin kwikepish, mudi anikanch. (Mateu 18:2-4) An akat kwipulang yipul yivud. Nzamb ukatin anch utana yakul. Chawiy lel, ileja Bibil nawamp nakash chakwel ushinshikin anch yom wilejina yidi yakin.—Tang Midimu 17:11.

24 Mutapu upandakena kuwap wa kwilej piur pa Yehova kudi kwilej Bibil. Mu shapitre udia kurutu, tukujinguninmutapu ushalijadinay Bibil ni mikand yikwau yawonsu.

^ par. 15 Anch Bibil wey kakwetap dijin dia Yehova ap anch ukimbin jinsangu jivud piur pa kurumburik ni mutapu wa kutazuk dijin dia Nzamb, tal amboku Mazu ma kwinsudiel 1.