Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM NI YINYING

Dijuku Diey Dikutwish Kwikal ni Musangar

Dijuku Diey Dikutwish Kwikal ni Musangar

1, 2. Yom ik yikatinay Yehova mulong wa majuku?

YEHOVA NZAMB watenchika uruw wa kusambish. Bibil utulejin anch wamutanga mband wa kusambish ni “wamupana kudi ikundj.” Adam wasangara nakash ni walonda anch: “Dined katat didi difup dia mafup mam ni musuny wa misuny yam!” (Disambishil 2:22, 23) Chinech chitulejin anch Yehova ukatin anch antu atijadina ikala ni musangar.

2 Cha ushon, antu avud kamenap musangar wa mwom mu dijuku. Pakwez, Bibil ukwet yiyul yivud yikutwisha kuyikwash antu awonsu adia mu dijiku chakwel atwisha mashakamin ma mwom wa dijuku diau ni asangara kushakam pamwing.—Luka 11:28.

CHOM CHITINAY NZAMB KUDI AMAKUNDJ

3, 4. (a) Mutapu ik ufanyidinay ikundj kumuman mukajend? (b) Mulong wak chidi cha usey kudi ikundj ni mband kulikishijadin umwing ni mukwau?

3 Bibil ulondin anch ikundj muwamp ufanyidin kumumekeshin mukajend rukat ni kalimish. Tang amboku Efes 5:25-29. Ikundj ufanyidin chisu chawonsu kumumekeshin mukajend rukat. Ufanyidin kand kumulam, ni kulik kusal chom chikumwovisha kuyip.

4 Pakwez chom ik chifanyidinay ikundj kusal anch mukajend warumbuk? Ayilejin amakundj anch: ‘Dandamenany kuyikat akajen, kangal kuyizazimwokin.’ (Kolosay 3:19) Amakundj, vurikany anch niyen ukat  kurumbukany. Ni anch ukimbin anch Nzamb akulikishin, ufanyidin kumulikishin mukajey. (Mateu 6:12, 14, 15) Anch ikundj ni mband awonsu aad itiyin kulikishijadin, chikuyikwash kwikal ni musangar mu uruw.

5. Mulong wak ikundj ufanyidin kumulimish mukajend?

5 Yehova umwitin ikundj anch amulimisha mukajend. Ikundj ufanyidin kutongin nakash piur pa maswir ma mukajend. Winou udi mulong ujim nakash. Anch ikundj walik kumusadin mukajend yom yiwamp, Yehova kakuteshap malembil mend. (1 Pita 3:7) Chom chisadila anch antu ikala ni usey kudi Yehova chidi anch Yehova uyikatin. Kakutwishap kuyikat amakundj ni kuyikis amband.

6. Chirumburikin ik kudi ikundj ni mband kwikal “mujimbu umwing”?

6 Yesu warumburila anch ikundj ni mband ‘kadiap aad, pakwez adi mujimbu umwing.’ (Mateu 19:6) Afanyidin kwikal ashinshamena umwing ni mukwau. (Jinswir 5:15-21; Hebereu 13:4) Amakundj ni amband afanyidin pakad choy kutongin ku maswir ma kumanijan ma umwing ni mukwau. (1 Korint 7:3-5) Ikundj ufanyidin kuvurik anch: “kwikil muntu ukisina mujimbu wend amwinend, pakwez ukat kuudish ni kuulam nawamp.” Chawiy lel ufanyidin kumukat mukajend ni kumukwat nich usey. Kusutamu muntu win mwawonsu, mband ukimbining anch nfumwend amukata ni ikala mwin ranaken.—Efes 5:29.

CHOM CHITINAY NZAMB KUDI AMBAND

7. Mulong wak dijuku dikwet kuswir kwa ntakel wa dijuku?

7 Dijuku diawonsu dikwet kuswir kwa mutu wa dijuku, muntu mwin kutakel dijuku chakwel asala nawamp pamwing. Bibil ulondin mu 1 Korint 11:3 anch: “Kristu; ndiy Mwant wa [ikundj] mwawonsu, chad ikundj  ndiy mwant wa mband, chawiy Nzamb ndiy Mwant wa Kristu.”

8. Mutapu ik ukutwishay mband kumekesh kalimish kudi nfumwend?

8 Ikundj mwawonsu urumbukining. Pakwez anch mband witiy mupak ukwatinay ikundj ni kusal nend pamwing ni musangar, dijuku diawonsu dikutaninamu. (1 Pita 3:1-6) Bibil ulondin anch: ‘Mband mwawonsu ufanyidin kumulimish nfumwend.’ (Efes 5:33) Chikwikal nchik anch ikundj kakwetap ritiy rimwing ni mukajend? Ufanyidin kumulimish nakash. Bibil ulondin anch: “Chawiy chimwing niyen amband, yiziyilany anfumwen, ap anch amwing a pakach pau kitiyinap nchik dizu dia Nzamb, ukutwishany kuyipwitany ku ritiy pakumanau yisalijok yen yiwamp. En kiukwikalanyap nich kuswir kwa kulond dizu, mulong awiy akez kuman yaku yen ya zwang ni kalimish ken.” (1 Pita 3:1, 2) Chilakej chiwamp cha mband chikutwish kumukwash nfumwend chakwel ijika ni alimisha ritiy rend.

9. (a) Chom ik chifanyidinay mband kusal anch kitiyinap yom yilondinay nfumwend? (b) Chiyul ik piur pa amband chidia mu Titus 2:4, 5?

 9 Chom ik chikutwishay mband kusal anch kitiyinap yom yilondinay nfumwend? Ufanyidin kulejan yitongijok yend mu mutapu wa kalimish. Chilakej, Sara wamuleja Aburaham chom chimwing chalika kumusangaresh, pakwez Yehova wamuleja anch: “Tesh kwey yom yawonsu yikukulejau kudi Sara.” (Disambishil 21:9-12) Yisu yivud mupak wa nsudiel wa ikundj mwin Kristu ukwatijadining ni yilondinay Bibil, chawiy lel mband ufanyidin kwitiy mupak winou. (Midimu 5:29; Efes 5:24) Mband muwamp utongidining dijuku diend. (Tang Titus 2:4, 5.) Anch ikundj ni an aman mutapu usadinay nakash mulong wawawiy, akumukat ni kumulimish nakash.—Jinswir 31:10, 28.

Mutapu ik udiay Sara chilakej kudi amband?

10. Yom ik yilondinay Bibil piur pa kwaurik ni kujip uruw?

10 Yisu yimwing antu atijadina akat kukwat mupak swa wa kwaurik ap kujip uruw. Pakwez, Bibil ulondin anch: “mband udia ku uruw kangal walikijan nend nfumwend, bwat” ap “ikundj kafanyidinap kulikijan nend mukajend.” (1 Korint 7:10, 11) Kudi milong yimwing yikash nakash yikutwisha kuyauril antu atijadina, pakwez winou udi mupak ukash. Chidi nchik piur pa kujip uruw? Bibil ulejen anch diyingishin dimwing diakin mulong wa kujip uruw didi anch ching ikundj ap mband wasal masandj ni muntu wakad kwikal nfumwend ap mukajend.—Mateu 19:9.

CHOM CHITINAY NZAMB KUDI ANVAJ

Yesu udi chilakej chiwamp kudi muntu ni muntu udia mu dijuku

11. Yom ik yikwau yikwetau nich an kuswir kusutamu yom yawonsu?

11 Anch chiswapel, anvaj shakamany yisu yivud ni anen. Anen akwet kuswir kwenen, kusutamu yom yin yawonsu, akwet kuswir kwenen mulong wa kuyifundish piur pa Yehova.—Kuvurik Yijil 6:4-9.

12. Yom ik yifanyidinau anvaj kusal mulong wa kuyichidij anau?

 12 Mangand ma Satan mapandiken kuyip nakash, ni kudi antu amwing akutwisha kukimb kuyisal anetu nayimp ap kand kuyiyipish mu masandj. Anvaj amwing amening anch chiyikasikedin kwisamb piur pa mulong winou. Pakwez anvaj afanyidin kuyibabesh anau piur pa antu mudi inay ni kuyifundish mutapu wa kuyiyep. Anvaj, ufanyidinany kuyichidij anen. *1 Pita 5:8.

13. Mutapu ik ufanyidinau anvaj kuyifundish anau?

13 Anvaj akwet chisend cha kuyifundish anau mutapu  wa kwikal ni yaku yiwamp. Mutapu ik ukutwisha kuyifundish aney? Aney akwet kuswir kwa kuyifumb, pakwez kupup kufanyidinap kwikal kwa chisum ap kukash nakash. (Jeremiy 30:11) Chawiy chifanyidinap kumupup mwaney anch ujimen. Chifanyidinap mazu mey mikala mudi “kutap kwa mpak ya musamun” ni ma kuyisudish ku muchim. (Jinswir 12:18) Yifundisha aney kutesh mulong wak afanyidin kuziyil.—Efes 6:4; Hebereu 12:9-11; tal Mazu ma kwinsudiel 30.

CHOM CHITINAY NZAMB KUDI AN

14, 15. Mutapu ik ufanyidinau an kuziyin kudi anvajau?

14 Yesu wading kumuziyin Tatukwend chisu chawonsu, ap mu yisu yikash. (Luka 22:42; Yohan 8:28, 29) Yehova uyitin kand an kuyiziyin anvaj au.—Efes 6:1-3.

15 An, ap anch umenany anch chikasiken kudi en kuyiziyin anvajen, vurikany anch, ang waziyinany, Yehova ni anvajen akukusangerany. *Jinswir 1:8; 6:20; 23:22-25.

Chom ik chikutwisha kuyikwash ansand chakwel ikala ashinshamena kudi Nzamb anch ayibachik kusal yom yiyimp?

16. (a) Mutapu ik ukatay Satan kuyibachik ansand kusal yom yiyimp? (b) Mulong wak chidi cha usey kutond arund amukatina Yehova?

16 Djabul ukutwish kuyisadin arund ney ni ansand akwau chakwel akubachika usala chom chiyimp. Wij anch chibachikin chinech chikutwish kwikal chikash nakash kuchijijamen. Chilakej, Dina mwan mband wa Jakobu wadinga ni arund akad kumukat Yehova. Chinech chaleta kanvundangesh nakash kudi ndiy ni mu dijuku diau. (Disambishil 34:1, 2) Anch arund ney kamukatinap Yehova, akutwish kukubachik kusal chom kanang chikisinay Yehova chikutwisha kulet mar nakash  kudi ey, ku dijuku dien, ni kudi Nzamb. (Jinswir 17:21, 25) Chidi cha usey nakash kukimb arund amukatina Yehova.—1 Korint 15:33.

DIJUKU DIEN DIKUTWISH KWIKAL NI MUSANGAR

17. Chisend ik chikwetay muntu ni muntu mu dijuku?

17 Anch antu adia mu dijuku alondul yiyul ya Nzamb, akwiyep kanvundangesh ni milong yivud. Chawiy, ey ikundj, mukata mukajey ni musadina yom nich rukat. Ey mband, ikal ni kalimish ni muziyina nfumwey ni kwimburij chilakej cha mband ulejenau mu Jinswir 31:10-31. Anch udi nvaj, yifundisha aney kumukat Nzamb. (Jinswir 22:6) Anch udi tatuku, takel dijuku diey “nawamp.” (1 Timote 3:4, 5; 5:8) An, yiziyinany anvajen. (Kolosay 3:20) Vurikany anch muntu ni muntu mu dijuku ukutwish kurumbuk, chawiy ikepishany ni kulikishijadin. Mwaning, Bibil ukwet wintankel wa Yehova mulong wa muntu mwawonsu wa mu dijuku.

^ par. 12 Ukutwish kutan jinsangu jivud piur pa mutapu wa kuyichidij anen mu shapitre wa 32 wa buku Ilejina Kudiay Mulej Mujim, wapalangeshau kudi Atuman a Yehova.

^ par. 15 Mwan kakuziyinap kudi anvajend anch amulej kusal chom chakad kwovijan ni chijil cha Nzamb.—Midimu 5:29.