Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM NI YITAN

Mutapu Uwamp wa Kumwifukwil Nzamb

Mutapu Uwamp wa Kumwifukwil Nzamb

1. Nany ufanyidina kutulej mutapu uwamp wa kumwifukwil Nzamb?

MARELIJON mavud malondining anch mafundishin uyakin piur pa Nzamb. Pakwez yiney yidiap ya kashinsh, mulong marelijon mavud mafundishin yom yishalijadina piur pa mutapu udiay Nzamb ni mutapu tufanyidina kumwifukwil. Tukutwish kwijik nchik mutapu uwamp wa kumwifukwil Nzamb? Yehova ndiy amwinend ufanyidina kutulej mutapu tufanyidina kumwifukwil.

2. Ov, ukutwish kwilej nchik mutapu uwamp wa kumwifukwil Nzamb?

2 Yehova watwinkisha Bibil chakwel tutwisha kwilej mutapu uwamp wa kumwifukwil. Chawiy ileja Bibil, ni Yehova ukukukwash kutambul ukwash wa malejan mend mulong ukat kukutongin nakash.—Isay 48:17.

3. Chom ik chikimbinay Nzamb anch etu tusala?

3 Antu amwing alondining anch Nzamb witiyining marelijon mawonsu, pakwez Yesu katufundishap mwamu. Walonda anch: “Kadiap antu awonsu akata kwintazuk anch: ‘Nsalejetu, Nsalejetu’ akeza kwandam mu Want wa Mwiur, pakwez ching antu akata kusal mudi musotilay Tatukwam udia mwiur.” Chawiy chidi cha usey nakash kudi etu kwilej chidia rusot ra Nzamb ni kurisal. Winou udi mulong ukash mulong Yesu wayifanakesha antu akad kumuziyil Nzamb mudi, “antu ayimp.”—Mateu 7:21-23.

4. Yom ik yalonday Yesu piur pa kusal rusot ra Nzamb?

4 Yesu watuleja anch, anch tukimbin kusal rusot ra Nzamb, tufanyidin kusal usu. Walonda anch: “Andamany  mu kachis kiwongina; yibwabwangena ni njil yijim yitwadin ku kujiy, akata kwandaminamu avudin. Mulong kachis kiwongina ni kajil katentamina yitwadin ku kupand, antu akemp kusu akata kuyitan.” (Mateu 7:13, 14, TMK) Kajil katentamina ap mutapu uwamp wa kumwifukwil Nzamb, utwadin ku mwom wa chikupu. Njil yijim, ap mutapu uyimp wa kumwifukwil Nzamb, yitwadin ku rufu. Pakwez Yehova kakatinap anch muntu ap umwing afa. Ukat kuyinkish antu awonsu mutapu wa kwilej piur pend.—2 Pita 3:9.

MUTAPU UWAMP WA KUMWIFUKWIL NZAMB

5. Mutapu ik ukutwisha kuyijingunin antu amwifukwidina Nzamb mu mutapu uwamp?

5 Yesu walonda anch tukutwish kuyijingunin antu amwifukwidina Nzamb mu mutapu uwamp. Tukuyijingunin kusutil ku yom yitiyijinau ni yisadinau. Walonda anch: “Ukez kayijikinany ku mabuj mau.” Ni wawejinaku kand anch: “Mutond uwamp ukat kusong mabuj mawamp.” (Mateu 7:16, 17, TMK) Chinech chimekeshinap anch antu amwifukwidina Nzamb adi awanyidina. Pakwez akat kwikasikesh chisu chawonsu kusal yom yiwamp. Tumanany katat yom yikutukwasha kuyijingunin antu amwifukwidina Nzamb mu mutapu uwamp.

6, 7. Mulong wak difukwil diakin dimedin pa Bibil? Chilakej cha Yesu chitufundishin ik?

6 Difukwil dietu difanyidin kwimen pa Bibil. Bibil ulondin anch: ‘Mazu mawonsu ma mukand wa Nzamb amapepila ku spiritu wa Nzamb, mawanyidin kulejan nich, ni kukand nich, kupup nich, ni kuyilej nich antu mu kutentam. Chakwel muntu wa Nzamb ukwikal uwanyidina ni kwikal kand nich ukash wa kusal midimu yawonsu yiwamp.’ (2 Timote 3:16, 17) Kambuy Paul wayifundina in Kristu anch: “Pitwakulejanya dizu dia Nzamb, en  waditeshanya, chad waditambulany. Kiwadiakanyap mudi “dizu dia muntu, pakwez wadiakanya mudi dizu diakin dia Nzamb.” (1 Tesalonik 2:13) Difukwil diakin dimedin ching pa Dizu dia Nzamb, Bibil. Dimedinap pa yitongijok, pa yaku ya pakur ya antu, ap yom yikwau.

7 Yom yawonsu yafundishay Yesu yading yimedin pa Dizu dia Nzamb. (Tang Yohan 17:17.) Wajimbula yisu yivud Mifund ya Bibil. (Mateu 4:4, 7, 10) Atushalapol akin a Nzamb, alondwil chilakej cha Yesu ni yom yawonsu yifundishinau yimedin pa Bibil.

8. Yom ik yatufundishay Yesu piur pa kumwifukwil Yehova?

8 Tufanyidin kumwifukwil ching Yehova. Kuseng 83:18, NWT, ulondin anch: “Chakwel ijika anch ey, dijin diey Yehova,Yey kamu amwiney udia Piur Nakash pa mangand mawonsu.” Yesu wakimba anch antu ijika nawamp nany udia Nzamb wakin, ni wayifundisha dijin dia Nzamb. (Tang Yohan 17:6, NWT.) Yesu walonda anch: ‘Ufanyidin kumwifukwil [Yehova] Nzamb wey, ni kumusadil ching ndiy!’ (Mateu 4:10) Chawiy mulong tudi atushalapol a Nzamb tukat kulondul chilakej cha Yesu. Tukat kumwifukwil ching Yehova, tusadidining dijin diend, ni tuyifundishining antu akwau dijin dia Nzamb ni yom yikusalay mulong wetwetu.

9, 10. Mutapu ik tumekeshina rukat kudi muntu ni mukwau?

9 Tufanyidin kuyikat chakin kamu antu akwau. Yesu wayifundisha in kwilej end kukatijan muntu ni mukwau. (Tang Yohan 13:35.) Chikalap nchik ndond tudiokila, yishankur, mpich ap kazwendj. Rukat retu mulong wa muntu ni mukwau rifanyidin kututek mu umwing mudi akadivar ni anambaz. (Kolosay 3:14) Chawiy tukwiyandjikangap mu milong ya njit mulong wa kuyijip antu. Bibil ulondin anch: “Mwamu tukutwish kujingunin patok an a Nzamb ni an a Sakudimban. Muntu mwawonsu  wakad kusal yom yitentamina kadiap mwan a Nzamb, chawiy chimwing kand, ni muntu mwawonsu wakad kumukat mwanamakwend.” Ni wawejinaku anch: “Chifanyidin tukatijanany muntu ni mukwau. Kitufanyidinap kwikal mudi Kain watakelau kudi Sakudimban, chad wamujip mwanamakwend.”—1 Yohan 3:10-12; 4:20, 21.

10 Tusadidin chisu chetu, usu wetu ni yom yetu mulong wa kukwash ni kukasikeshijan umwing ni mukwau. (Hebereu 10:24, 25) Tukat “kusal nawamp kudi antu awonsu.”—Galatia 6:10.

11. Mulong wak tumwitiyin Yesu mudi njil yitwadila kudi Nzamb?

11 Tufanyidin kumuziyil Yesu mulong udi njil yitwadina kudi Nzamb. Bibil ulondin anch: “Dipandish dikat kumeken mwi ndiy kusu. Mwi ngand yawonsu mwikil mukwau wapanay Nzamb mulong wa kutupandish.” (Midimu 4:12) Mu Shapitre wa 5 wa buku winou, twilejin anch Yehova wamutuma Yesu mulong wa kupan mwom wend mudi difut mulong wa antu aziyidina. (Mateu 20:28) Yehova wamutonda Yesu mulong wa kuyikel mudi Mwant wa pa mangand mawonsu. Chawiy lel Bibil utulejin anch tufanyidin kumuziyil Yesu anch tukwet kuswir kwa kushakam chikupu.—Tang Yohan 3:36.

12. Mulong wak twiyandjikinigap mu milong ya politik?

12 Tufanyidinap kwiyandjik mu milong ya politik. Yesu kiyandjikap mu milong ya politik. Padingay mu choziu, wamuleja Pilat nyikel wa Rom anch: “Want wamam kiudiap wa mangand minam.” (Tang Yohan 18:36.) Mudi Yesu, tushinshamen ku Want wa Nzamb wa mwiur, ni mulong wa diyingishin dined, chikalap nchik ndond tushicha, tukatap kwiyandjik mu milong ya politik. Pakwez, Bibil utukasikeshin kuyiziyin “in kutakel,” charumburik anch ant. (Rom 13:1) Tuziyidin ku yijil ya ngand tushicha. Pakwez, anch chijil charishish yijil ya Nzamb,  tukat kuyimburij atwimbuy, alonda anch: “Tufanyidin kumuziyil Nzamb kupandikan kuyiziyil antu.”—Midimu 5:29; Marko 12:17.

13. Yom ik tukata kulejan piur pa Want wa Nzamb?

13 Twitiyijin anch Want wa Nzamb wawiy ukupwisha milong ya pa mangand. Yesu walonda anch “rusangu ruwamp ra Want” akurilejan ku mangand mawonsu. (Tang Mateu 24:14.) Kwikil want wa antu ukutwisha kusal yom yikusala Want wa Nzamb mulong wetwetu. (Kuseng 146:3) Yesu watufundisha kulembil mulong wa Want wa Nzamb palonday anch: “Want wey weza. Rusot rey arusala pansh mudi mwiur.” (Mateu 6:10) Bibil utulejin anch Want wa Nzamb ukez kashesh mant mawonsu ma antu ni anch “wawiy ukez kushakam chikupu.”—Daniel 2:44.

14. Anany umena amwifukwidina Nzamb mu mutapu winou?

14 Kupwa kwa kwilej yom yiney, iyipula anch: ‘Anany akweta mafundish mimedina pa Bibil? Anany ayilejina akwau piur pa dijin dia Nzamb? Anany amekeshina rukat rakin kudi umwing ni mukwau ni itiyijina anch Nzamb wamutuma Yesu mulong wa kutupandish? Anany akad kwiyandjik mu milong ya politik? Anany alejening anch ching Want wa Nzamb wawiy ukutwisha kupwish milong yetu?’ Ching kwau Atuman a Yehova.—Isay 43:10-12.

CHOM IK UKUSALA?

15. Chom ik tufanyidina kusal anch tukimbin anch Nzamb itiya difukwil dietu?

15 Chiwanyidinap kwitiy kwau anch Nzamb udiaku. Ap ayilembil itiyijin anch Nzamb udiaku, pakwez kakatap kumuziyin. (Jakobu 2:19) Anch tukimbin anch Nzamb itiya difukwil dietu, tufanyidinap ching kwitiyij anch udiaku, pakwez tufanyidin kand kusal yom yitulejinay.

16. Mulong wak tufanyidin kudiokal mu relijon wa makasu?

16 Chakwel Nzamb itiya difukwil dietu, tufanyidin  kudiokal mu relijon wa makasu. Muprofet Isay wafunda anch: “Diokalany wakad kupukun ku chom chitakanena.” (Isay 52:11; 2 Korint 6:17) Chawiy tufanyidin kulik yom yawonsu ya mu difukwil dia makasu.

17, 18. “Babilon Mujim” chom ik, ni mulong wak tufanyidin kuswapej mulong wa kudiokalamu?

17 Relijon wa makasu chom ik? Udi relijon mwawonsu ufundishina kumwifukwil Nzamb mu mutapu wakad kukwatijan ni Dizu diend. Bibil utazukin marelijon mawonsu ma makasu anch “Babilon Mujim.” (Kujingunik 17:5) Ov, mulong wak? Kupwa kwa Mabeb ma pa chirung cha Nowa, mafundish mavud ma marelijon ma makasu masambishina mu musumb wa Babilon. Mafundish minam ma makasu mapalangana pa mangand mawonsu. Chilakej, antu adinga mu Babilon ifukwilanga anzamb asatu. Nlel kand, marelijon mavud mafundishin anch Nzamb udi Usatu, pakwez Bibil ufundishin patok anch kudi ching Nzamb umwing wakin, Yehova, ni anch Yesu udi Mwanend. (Yohan 17:3) Antu adinga mu Babilon itiyijanga kand anch chikunku chimwing cha muntu chikat kudandamen ni mwom kupwa kwa kufa kwa mujimbu ni anch chikunku chinech chikutwish kuman mar mu karung ka kasu. Winou udiap uyakin.—Tal Mazu ma kwinsudiel 14, 17, ni 18.

18 Nzamb wakwatin kal mupak anch piswimp ap marelijon mawonsu ma makasu akumashesh. (Kujingunik 18:8) Ov, umenap anch ufanyidin kuswapej nakash mulong wa kudiokal mu relijon wa makasu? Yehova Nzamb ukimbin anch ey usala mwamu pakad kulab.—Kujingunik 18:4.

Kusutil ku kumusadil Yehova pamwing ni antu end, ukwikal pakach pa dijuku dia mangand mawonsu dia akadivar

19. Anch wakwat mupak wa kumusadil Yehova, mutapu ik ukukulamany?

19 Anch wakwat mupak wa kudiokal mu relijon wa makasu ni kumusadin Yehova, amwing pakach pa arund ney  ap anamakwey kakutwishap kutesh kurumburik kwa mupak ukwatina ni akutwish ap kukumesh mar. Pakwez, Yehova kakukulikap. Ukwikal mu dijuku dia pa mangand mawonsu dia ma miliyon ma antu akatijadina chakin kamu umwing ni mukwau, ni ukwikal ni ruchingej ra kushakam chikupu pa mangand masu ma Nzamb. (Marko 10:28-30) Pamwing ap arund ney amwing ni anamakwey akisina mupak wey wa kumusadil Yehova, akutwish niyau kwitiy kwilej Bibil.

20. Mulong wak chidi cha usey kumwifukwil Nzamb mu mutapu uwamp?

20 Piswimp ap, Nzamb ukudiosh uyimp wawonsu ni Want wend ukuyikel pa mangand mawonsu. (2 Pita 3:9, 13) Chikwikal chisu chimwing chipandikena kuwap! Antu awonsu akumwifukwil Yehova mu mutapu ukatinay anch tumwifukwila. Chawiy lel chidi cha usey kudi ey kukwat mupak katat ni kumwifukwil Nzamb mu mutapu uwamp.