“Ndiy watanga diur ni divu” ukatin kutesh malembil metu.—Kuseng 115:15

1, 2. Mulong wak utongin anch malembil madi chipan cha pakampwil, ni mulong wak tukwet kuswir kwa kwijik yifundishinay Bibil piur pa malembil?

ANCH twafanikesh divu ni mangand mawonsu, divu didi dikemp nakash. Anch Yehova watal pa divu, antu a michid yawonsu ameken mudi dinans dia mem didjila mu chitay. (Kuseng 115:15; Isay 40:15) Ap anch tudi akemp pa kutufanikesh ni mangand mawonsu, Kuseng 145:18, 19 ulondin anch: ‘Yehova udi piswimp kudi awonsu akata kumutazuk, kudi awonsu akata kumutazuk nich uyakin. Ukuwanyish rusot ra awiy akata kumwov wom, ukwov kudil kwau ni kuyipandish.’ Chidi chisend chiwamp mud ik tukweta! Yehova, Sakatang mwin dikand diawonsu, ukimbin anch twikal nend piswimp, ni ukatin kutesh malembil metu. Mwaning, malembil chidi chisend ni chipan cha pakampwil chitwinkishinay Yehova.

2 Pakwez Yehova ukututesh ching anch twamulembil mu mutapu ukatinay. Mutapu ik tukutwisha kusal mwamu? Tushinshikinany yom yilondinay Bibil piur pa malembil.

MULONG WAK KUMULEMBIL YEHOVA?

3. Mulong wak ufanyidin kumulembil Yehova?

3 Yehova ukatin tumulembila, ap kwambamb nend. Mutapu ik twija mwamu? Tang amboku Filip 4:6, 7. Tongin piur pa mulong winou. Sakatang wa mangand mawonsu ukat kukusanger nakash ni ukatin anch umuleja piur pa mutapu ukata kwiyov ni piur pa milong yey.

4. Kumulembil Yehova chisu chawonsu kukutwish nchik kukasikesh urund wey ni ndiy?

 4 Malembil matukwashin kwikal ni urund wa piswimp ni Yehova. Anch arund akat kwambamb chisu chawonsu piur pa yitongijok yau, yom yiyitadina, ni yovil yau, urund wau ukat kwikal ukash. Yidi chilik chimwing ni kumulembil Yehova. Ulejen mu Bibil piur pa yitongijok yend ni mutapu wovilay mulong weyey, ni ukulejin yom yikusalay machuku ma kurutu. Ukutwish niyey kumulej yovil yey yikash kusutin ku kumulembil chisu chawonsu. Anch wasal mwamu, urund wey ni Yehova ukwikal ukash nakash.—Jakobu 4:8.

CHOM IK TUFANYIDINA KUSAL CHAKWEL NZAMB ATESHA MALEMBIL METU?

5. Mutapu ik twija anch Yehova kakatap kutesh malembil mawonsu?

5 Ov, Yehova uteshining malembil mawonsu? Bwat. Pa chisu cha muprofet Isay, Yehova wayileja in Isarel anch: “Piukuzambulanya makas men mulong wa kulembil, kinikukubanganyakup. Ap anch wavudishany kulembil, kinikukuteshanyap, mulong makas men mizwil sens nich mash.”  (Isay 1:15) Chawiy anch tubabelap, tukutwish kusal yom yikutwisha kututwal kulemp ni Yehova, ni kusal anch alika kutesh malembil metu.

6. Mulong wak ritiy ridi ra usey? Mutapu ik ukutwisha kumekesh anch ukwet ritiy?

6 Anch tukimbin anch Yehova atesha malembil metu, tufanyidin kwikal ni ritiy mudiay ndiy. (Marko 11:24) Kambuy Paul warumburila anch: “Wakad ritiy muntu kakutwishap kumusangarish Nzamb, mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.” (Hebereu 11:6) Pakwez chiwanyidinap kusu kulond anch tukwet ritiy. Tufanyidin kumekesh ritiy retu patok kusutil ku kumuziyin Yehova dichuku diawonsu.—Tang Jakobu 2:26.

7. (a) Mulong wak tufanyidin kwikal ikepishina ni in kalimish chisu tumulembila Yehova? (b) Mutapu ik tukutwisha kumekesh anch tudi in kashinsh chisu tulembila?

7 Tufanyidin kwikal ikepishina ni in kalimish chisu tumulembila Yehova. Mulong wak? Anch tuyil kwambamb ni mwant ap ntakel wa ngand, tukwambamb nend mu kalimish. Yehova udi Nzamb wa Dikand Diawonsu, ov, umenap anch tufanyidin kumekesh kalimish nakash ni kwikepish pitwambambina nend? (Disambishil 17:1; Kuseng 138:6) Tufanyidin kand kwikal in kashinsh ni kumulembil Yehova malembil madiokila mu muchim wetu, kangal kuchirikin ching mazu mamwing mamwing chisu chawonsu.—Mateu 6:7, 8.

8. Pitukata kulembil piur pa chom kanang, yom ik tufanyidina kusal?

8 Kupwa, anch twalembil piur pa chom kanang, tufanyidin kusal yawonsu tukutwisha kusal chakwel yikwatijan ni malembil metu. Chilakej, anch twamulembil Yehova mulong wa maswir metu ma dichuku ni dichuku, tufanyidinap kwikal ni usweral ni kuchingel anch Yehova atwinkisha yom yawonsu anch tukwet usu wa kusal mulong wa kuman yom  twitina. Tufanyidin kusal mudimu nakash ni kwitiy mudimu win wawonsu tukutwisha kusal. (Mateu 6:11; 2 Tesalonik 3:10) Chad, anch twamulembil Yehova chakwel atukwasha kulik kusal chom chiyimp, tufanyidin kwiyep chom chawonsu chikutwisha kutubachik tusala kand chom chinech. (Kolosay 3:5) Tushinshikinany katat yipul yimwing yikatau antu kwiyipul piur pa malembil.

YIPUL PIUR PA MALEMBIL

9. Nany tufanyidina kulembil? Yom ik yitufundishinay Yohan 14:6 piur pa kulembil?

9 Nany tufanyidina kulembil? Yesu wayifundisha in kwilejend kulembil anch: “Tatukwetu udia mwiur.” (Mateu 6:9) Walonda kand anch: ‘Am nidi njil, ni uyakin, ni mwom. Kwikil muntu ukuya kwa Tatuku pakad kusutin kudi am.’ (Yohan 14:6, NWT) Chawiy tufanyidin kumulembil ching Yehova kusutil kudi Yesu. Kumulembil kusutil kudi Yesu kurumburikin ik? Chakwel Yehova itiya malembil metu, tufanyidin kumekesh kalimish mulong wa chisend cha pakampwil chamwinkishau Yesu kudi Yehova. Twilejin anch, Yesu weza pa divu mulong wa kutukwol ku chitil ni rufu. (Yohan 3:16; Rom 5:12) Yehova wamuteka kand Yesu kwikal Mwin Kupesh Mujim ni Nkalansambu.—Yohan 5:22; Hebereu 6:20.

Ufanyidin kulembil chisu chawonsu

10. Ov, tufanyidin kwikal ni mutapu wa pakampwil pitukata kulembil? Rumburil.

10 Ov, tufanyidin kwikal ni mutapu wa pakampwil pitukata kulembil? Bwat, Yehova katwitinap kwas manungun, kushakam, ap kwiman piur pitukata kulembil. Bibil utufundishin anch tukutwish kumulembil Yehova mu mutapu win wawonsu pakwez wa kalimish. (1 Jinsangu 17:16; Nehemiy 8:6; Daniel 6:10; Marko 11:25) Cha usey nakash kudi Yehova kudiap kwas manungun, kushakam, ap kwiman piur pitukata kulembil, pakwez cha usey chidi kumulembil ni chitongijok chiwamp. Tukutwish kulembil ni dizu dia piur ap dia mwishin ndond yawonsu tudia wikalap nchik muten  ap uchuku. Pitumulembila Yehova, tukutwish kwikal ni kashinsh anch ukututesh ap anch kwikil muntu ututeshina.—Nehemiy 2:1-6.

11. Yom ik tufanyidina kumwit Yehova mu malembil?

11 Tufanyidin kulembil mulong wa yom ik? Tufanyidin kulembil mulong wa chom chin chawonsu chitiyinay Yehova. Bibil ulondin anch: ‘Anch twamwit chom, mudi mudia rusot rend, ndiy ukututesh.’ (1 Yohan 5:14, NWT) Ov, tufanyidin kulembil piur pa yom yimutadina muntu ni muntu panrend? Mwaning. Kumulembil Yehova kufanyidin kwikal mudi kwambamb ni murund ney wa piswimp. Tukutwish kumulej Yehova yom yawonsu yidia mu manangu metu ni mu muchim wetu. (Kuseng 62:8) Tukutwish kumulembil mulong atwinkisha usu wa spiritu wend utumbila chakwel atukwasha kusal yom yiwamp. (Luka 11:13) Tukutwish kand kumwit Yehova manangu chakwel tukwata mipak yiwamp, ni tukutwish kumulembil chakwel atwinkisha usu wa kurish nich milong. (Jakobu 1:5) Tufanyidin kumwit Yehova mulong atulikishina yitil yetu. (Efes 1:3, 7) Tufanyidin kand kulembil mulong wa antu akwau, kuwejinaku dijuku dietu ni akadivar ni anambaz a mu chikumangan.—Midimu 12:5; Kolosay 4:12.

12. Yom ik yifanyidina kwikal ya usey nakash mu malembil metu?

12 Chom ik chifanyidina kwikal cha usey nakash mu malembil metu? Yehova ni rusot rend. Tufanyidin kumujikitish ni muchim wetu wawonsu mulong wa yom yawonsu yatusadidinay. (1 Jinsangu 29:10-13) Twij mwamu mulong pezay Yesu pa divu, wayifundisha in kwilejend mutapu wa kulembil. (Tang Mateu 6:9-13.) Walonda anch afanyidin kulembil chakusambish mulong wa kutumbish dijin dia Nzamb, chirumburikin, kudiman mudi ditumbila. Kupwa Yesu wamekesha anch tufanyidin kulembil chakwel Want wa Nzamb weza ni rusot ra Yehova risadika pa mangand mawonsu. Chawiy, kupwa kwa kulembil mulong wa yom yiney ya usey nakash pawiy palonday Yesu anch tufanyidin kulembil  mulong wa maswir metu. Anch twamutek Yehova ni rusot rend pa ndond ya kusambish mu malembil metu, tumekeshin anch chidi cha usey nakash kudi etu.

13. Malembil metu mafanyidin kwikal ni kulep ik?

13 Malembil metu mafanyidin kwikal ni kulep ik? Bibil kalejenap. Malembil metu makutwish kwikal miswimp ap malemp, kukwatijan ni milong tukweta. Chilakej, tukutwish kusal malembil miswimp kurutu kwa kudia, pakwez malembil makutwish kwikal malemp anch tumulejin Yehova  piur pa yakamish yetu ap anch tumujikitishin. (1 Samwel 1:12, 15) Tufanyidinap kusal malembil malemp mulong wa kwimekesh kudi antu akwau, mudi mwasalangau antu amwing pa chirung cha Yesu. (Luka 20:46, 47) Yehova kakatap kukashimuk mulong wa malembil ma mutapu winou. Chom cha usey kudi Yehova chidi anch tulembila malembil madiokila mu muchim wetu.

14. Tufanyidin kulembil tupamp twinch, ni chinech chitufundishin ik piur pa Yehova?

14 Tufanyidin kulembil tupamp twinch? Yehova utwitin twambamba nend chisu chawonsu. Bibil ulondin anch tufanyidin kudandamen ‘kulembil,’ ni anch “lembilany yisu yawonsu,” ni kand anch “lembilany kwakad kulik.” (Mateu 26:41; Rom 12:12; 1 Tesalonik 5:17) Yehova udiaku mulong wa kututesh chisu chawonsu. Tukutwish kumujikitish dichuku ni dichuku mulong wa rukat ni muchim wend wa  kupan. Tukutwish kand kumwit umutakel wend, usu wend, ni rongoj rend. Anch twaman chakin usey wa chisend tukweta cha kumulembil Yehova, tukusadil yisu yawonsu tukweta mulong wa kwambamb nend.

15. Mulong wak tufanyidin kwakul anch “amen” kwinsudiel kwa malembil?

15 Mulong wak tufanyidin kwakul anch “amen” kwinsudiel kwa malembil? Dizu “amen” dirumburikin anch “chakin kamu” ap anch “chikala mwamu.” Udi mutapu wa kumekesh anch yom tulondina mu malembil metu yawiy tukweta nich kashinsh. (Kuseng 41:13) Bibil utufundishin anch chiwapin kand kwakul anch “amen” mu muchim ap ni dizu dia piur kwinsudiel kwa malembil masadinau kudi muntu umwing kurutu kwa antu avud mulong wa kumekesh anch twitiyin yom yalonday kal.—1 Jinsangu 16:36; 1 Korint 14:16.

MUTAPU UKATAY NZAMB KWAKUL KU MALEMBIL METU

16. Ov, Yehova wakwiling chakin ku malembil metu? Rumburil.

16 Yehova wakwiling chakin kamu ku malembil metu? Mwaning, wakwiling. Bibil umutazukin anch: ‘Mwin kutesh malembil.’ (Kuseng 65:2) Yehova uteshining ni wakwiling ku malembil makin ma mamiliyon ma antu, ni wakwiling mu mitapu kushalijan.

17. Mutapu ik ukatay Yehova kuyisadil angel ni atushalapol end mulong wa kwakul ku malembil metu?

17 Yehova usadidining angel end ni atushalapol end adia pa divu mulong wa kwakul ku malembil metu. (Hebereu 1:13, 14) Kudi yilakej yivud ya antu alembila mulong wa kuyikwash kutesh Bibil ni kupwa kwa machuku makemp ayendila kudi Atuman a Yehova. Bibil ulondin anch angel asadin mu mudimu wa kulejan “rusangu ruwamp” pa mangand mawonsu. (Tang Kujingunik 14:6.) Chikwau kand, antu avud pakach petu amulembila Yehova piur pa milong  ya pakampwil ap maswir mau, ni kupwa atambula ukwash wadingau nich kuswir kudi akadivar ni anambaz.—Jinswir 12:25; Jakobu 2:16.

Yehova ukutwish kwakul ku malembil metu kusutil ku ukwash wa in Kristu akwau

18. Mutapu ik ukatay Yehova kusadil spiritu wend utumbila ni Bibil mulong wa kwakul malembil?

18 Yehova usadidining spiritu utumbila mulong wa kwakul ku malembil metu. Anch twalembil mulong atukwasha kurish nich milong, ukutwish kusadil spiritu wend utumbila chakwel atwinkisha umutakel ni usu. (2 Korint 4:7) Yehova usadidining kand Bibil mulong wa kwakul ku malembil metu ni kutukwash chakwel tukwata mipak ya manangu. Pitutangina Bibil, tukutwish kutan maverse makutukwasha. Yehova ukutwish kand kumubachik muntu kanang akula ku chikumangan chakwel alonda yom tukweta nich kuswir kwa kutesh ap mukurump umwing mu chikumangen ambamba netu piur pa dinans kanang dia mu Bibil.—Galatia 6:1.

19. Mulong wak chikutwish kumekan anch Yehova kakwilap ku malembil metu?

19 Pakwez, yisu yimwing tukutwish kwiyipul anch: ‘Mulong wak Yehova kakwilap ku malembil mam?’ Vurik anch ndiy wij chisu ni mutapu wa kwakul ku malembil metu. Wij yom tukweta nich kuswir. Tukutwish kudandamen kulembil mu chisu kanang mulong wa kumekesh anch tuteshin chakin kurumburik kwa yom tumulejina ni kumekesh chakin anch tukwet ritiy mwi ndiy. (Luka 11:5-10) Yisu yimwing Yehova wakwiling ku malembil metu mu mutapu twakad etu kutongin. Chilakej, tukutwish kulembil piur pa mwikadil wa mar, pakwez pa ndond pa kupwish mulong winou, ukutwish kutwinkish usu chakwel tujijamana.—Tang Filip 4:13.

20. Mulong wak tufanyidin kumulembil Yehova chisu chawonsu?

20 Chidi chisend chipandakena kuwap mud ik tukweta cha kumulembil Yehova! Tufanyidin kwikal nich kashinsh anch ukututesh. (Kuseng 145:18) Anch twamulembil nakash Yehova malembil madiokila mu muchim wetu chisu chawonsu, urund wetu ni ndiy ukwikal ukash.