1, 2. Anany adinga arund nend a Yehova?

NANY ukatina anch ikala murund ney? Muntu ukatina. Muntu ukata kwovijan nend, niyend ukat kwovijan ney. Muntu muwamp ni ukweta mikadil yikusangareshina nakash.

2 Yehova Nzamb ukat kutond antu amwing kwikal arund nend. Chilakej, Aburaham wading murund wa Yehova. (Isay 41:8; Jakobu 2:23) Yehova wamukata kand David. Walonda anch David wadinga ‘muntu ukatilau kudi muchim wam.’ (Midimu 13:22) Muprofet Daniel wading niyend muntu wa “usey nakash” kudi Yehova.—Daniel 9:23, NWT.

3. Mulong wak Aburaham, David, ni Daniel ikala arund a Yehova?

3 Mutapu ik Aburaham, David, ni Daniel wikalau arund nend a Yehova? Yehova wamuleja Aburaham anch: “Waziyil kal dizu diam.” (Disambishil 22:18) Yehova ukat kwikal murund wa antu ikepishina ni amuziyidina. Ap muchid wakabuj ukutwish kwikal mu urund ni Nzamb. Yehova wayirumburila in muchid wa Isarel anch: “Anch waziyilany ku dizu diam nikwikal Nzamb wen, niyen ukwikalany antu am.” (Jeremiy 7:23, NWT) Chawiy lel niyey ufanyidin kumuziyil Yehova anch ukatin chakin kwikal murund nend.

YEHOVA UKAT KUYILAM ARUND NEND

4, 5. Mutapu ik ukatay Yehova kuyilam arund nend?

4 Bibil ulondin anch Yehova ukimbining mitapu kushalijan ‘chakwel amekesha usu wend kudi antu akweta muchim  uwanyidina kudi ndiy.’ (2 Jinsangu 16:9) Mu Kuseng 32:8, Yehova uyikanin arund nend anch: ‘Nikukulejany en ni kukwijikishany njil yiufanyidinanya kulondul. Nikukutalany ni kukuyulany.’

5 Mukankuny mukash ukat kusal usu mulong wa kutukangesh kwikal arund nend a Nzamb. Pakwez Yehova ukatining kutulam. (Tang Kuseng 55:22.) Mulong tudi arund nend a Yehova, tumusadidin nich muchim wawonsu. Tushinshamen kudi ndiy chikalap nchik milong yitushikedina. Ni tukwet kashinsh mudi kadingay nich nfund a kuseng. Wafunda piur pa Yehova anch: ‘Mulong ndiy udi ku chikas cham cha katatuku, am kinikez kashemunikap.’ (Kuseng 16:8; 63:8) Mutapu ik ukatay Satan kupakish kutukangesh kwikal arund nend a Nzamb?

KUFUNDAN KWA SATAN

6. Yom ik yikatay Satan kulond piur pa antu?

6 Mu Shapitre wa 11 twilejin anch Satan wamusarumuna Yehova ni kumufund anch udi mwin kudimban ni mwin kasolikany, wakad kulik anch Adam ni Ev akwata mupak ayinau piur pa yom yidia yiwamp ni yiyimp. Mukand wa Job utufundishin anch Satan ukat kuyifund kand antu akimbina kwikal arund a Nzamb. Satan ulondin anch antu akat kumusadil Nzamb mulong wa yom yikutwishau kutambul kudiay ndiy, kadiap anch mulong amukatin. Satan ulondin kand anch ukutwish kuyidiosh antu awonsu kudiay Nzamb. Tushinshikinany yom tukutwisha kwilejin kudiay Job ni mutapu wamulamau kudi Yehova.

7, 8. (a) Mutapu ik wovay Yehova piur pa Job? (b) Yom ik yalonday Satan piur pa Job?

7 Job wading nany? Wading muntu muwamp wadingaku pasutin kal mivu piswimp ni 3600. Yehova walonda anch pa chirungu chinicha kwadingap muntu mudi ndiy  pa divu. Job wading umulimishin Nzamb nakash, ni wading ukisin yom yiyimp. (Job 1:8) Mwaning, Job wading murund wakin wa Yehova.

8 Satan walonda anch Job wamusadinang Nzamb mulong wa kutaninamu. Satan wamuleja Yehova anch: “Bwat, mulong ey umuchidijin, ni dijuku diend, ni yom yend yawonsu, ni yivam yend yavulijadil kal mwi ngand. Pakwez katat tandjek bil chikas chey, umusheshil mapit mend, chakin kamu, ching wez wakushing patok!”—Job 1:10, 11.

9. Yom ik yalikay Yehova chakwel Satan asala?

9 Satan wamufunda Job anch umusadidin Yehova mulong wa yom yikutwishay kutambul kudiay ndiy. Satan walonda kand anch ukutwish kumukangesh Job kumusadin Yehova. Yehova kamwitiyap Satan, pakwez wamulika Satan chakwel amupaka Job ni kuman anch wading murund wa Yehova mulong umukatin.

AKAT KUMURISHISH JOB KUDI SATAN

10. Mutapu ik wamurishishau Job kudiay Satan, ni mutapu ik wasalay Job?

10 Chakusambish, Satan wasenda ni wajiyisha annam awonsu a Job. Wajipa atushalapol avud a Job. Job washadisha yom yawonsu. Kupwa, Satan wajipa an a Job dikum ku rinkind mukash. Pakwez Job washala ushinshamena kudiay Yehova. “Mu mar mawonsu Job kasalap chitil, ap kamushinyinap Nzamb kuyip.”—Job 1:12-19, 22.

Yehova wamuyukisha Job mulong wa kushinshaman kwend

11. (a) Yom ik yikwau yamusalau Job kudi Satan? (b) Mutapu ik wasalay Job?

11 Satan kalikap. Wamusarumuna Nzamb palonday anch: ‘Shesh mafup mend ni mujimbu wend, chakin, ukukushing patok.’ Chawiy Satan wamwasa Job mayej mamwing mayimp nakash. (Job 2:5, 7) Kapamp kakwau, Job washala ushinshamena kudiay Yehova. Walonda  anch: “Djat ni ku rufu ram, nikezap kulik kushinshaman kwam!”—Job 27:5, NWT.

12. Mutapu ik wamekeshay Job anch Satan wading mukamakasu?

12 Job kadingap wij chom ap chimwing piur pa kufundan kwa Satan ap mulong wak wamana mar mwamu. Watonga anch Yehova ndiy wading musul wa mar mend. (Job 6:4; 16:11-14) Pakwez ap mwamu, Job washala ushinshamena kudiay Yehova. Kwadingap kand ntad. Job kadingap ni choy. Wading murund nend a Nzamb mulong wading umukatin. Kufukej kwawonsu kwa Satan kwading kwa makasu!

13. Kushinshaman kwa Job kwikala ni yibudikin ik?

13 Ap anch Job kijikap yom yashikena mwiur, wading ushinshamen kudi Nzamb ni wamekesha anch Satan wading muyimp. Yehova wamuyukisha Job mulong wa kushinshaman kwend.—Job 42:12-17.

MUTAPU UKUFUKEJIDINAY SATAN

14, 15. Yom ik yifukejinay Satan mulong wa amakundj ni amband awonsu?

14 Ukutwish kwilej yom ya usey kusutin ku yamushikena Job. Nlel unou, Satan utufukejidin anch tumusadidin Yehova mulong wa yom yitukutwisha kutambul kudiay ndiy. Mu Job 2:4, Satan walonda anch: “Yom yawonsu yikwetay muntu ukuyipan mulong wa kuchidij mwom wend!” Chawiy Satan ukat kuyifukejin amakundj ni amband awonsu anch akwet choy, kulik ching Job. Yitot ya mivu kupwa kwa Job kufa, Satan wadandamena kumusaal Yehova ni kuyifund atushalapol end. Chilakej, mu Jinswir 27:11, tutangin anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsaala masaal.”

15 Ukutwish kutond kumuziyil Yehova ni kwikal murund nend ushinshamena, ni kumekesh anch Satan udi  mukamakasu. Ap anch ufanyidin kuswimp nakash mu mwom wey mulong wa kwikal murund nend a Nzamb, udi mupak uwamp nakash ukutwisha kukwat! Mupak winou chidi chom cha usey nakash. Satan ulondin anch ey ukushalap ushinshamena kudi Nzamb anch ukwet milong. Ukat kusal usu wa kutudimb chakwel tulika kumushinshamen Nzamb. Mutapu ik?

16. (a) Yom ik yisadidinay Satan mulong wa kusal usu wa kuyikangesh antu kumusadin Yehova? (b) Mutapu ik ukutwishay Satan kusal usu wa kukukangesh kumusadil Yehova?

16 Satan ukat kusadin mitapu kushalijan mulong wa kusal usu wa kutukangesh kwikal arund a Nzamb. Ukat kurishikish “mudi ntambu wonyina ukata kukimb nany ukudiay.” (1 Pita 5:8) Kangal washimok anch arund ney, anamakwey, ap antu akwau apakish kukukangesh kwilej Bibil ni kusal yom yitentamina. Ukutwish kwiyov mudi akurishikishin. * (Yohan 15:19, 20) Satan ukat kand kwikarumun amwinend “mudi mwangel wa kutok.” Chawiy ukat kusal usu wa kutudimb chakwel tumubwambwila Yehova. (2 Korint 11:14, TMK) Chom chikwau chisadidinay Satan mulong wa kusal usu wa kutukangesh kumusadil Yehova chidi kusal anch tutonga anch tuwanyidinap nakash kumusadin Nzamb.—Jinswir 24:10.

ZIYIL KU YIJIL YA YEHOVA

17. Mulong wak tumuziyidining Yehova?

17 Anch twamuziyin Yehova, tukumekesh anch Satan udi mukamakasu. Yom ik yikutukwasha chakwel twikala aziyidina? Bibil ulondin anch: ‘Ufanyidin kumukat  [Yehova] Nzamb wey nich muchim wen wawonsu, nich mupim wen wawonsu, nich usu wen wawonsu.’ (Kuvurik Yijil 6:5) Tumuziyidining Yehova mulong tumukatin. Anch rukat retu mulong wa Yehova rapam, tukusal yom yawonsu yitwitinay kusal. Kambuy Yohan wafunda anch: “Anch chakin, tumukatil Nzamb, tuziyidil kand ku yijil yend. Chawiy yijil yend kiyikasikenap . . . kudi etu.”—1 Yohan 5:3.

18, 19. (a) Yom ik yimwing yilondinay Yehova anch yiyipin? (b) Mutapu ik twija anch Yehova kakutwishap kutwit kusal chom chitukasikedina kusal?

18 Pakwez yom ik yimwing yitulejinay Yehova anch yidi yiyimp? Kudi yilakej yimwing mu mushet “ Kis YomYikisinay Yehova.” Chakusambish, ukutwish kutong anch yom yimwing pakach pa yom yiney yiyipinap. Pakwez anch watang maverse ma Bibil ni kutongijokin nawamp piur pa yom utangina, ukwov kurumburik kwa usey wa kuziyin  ku yijil ya Yehova. Ukutwish kwiyov kand anch ufanyidin kuswimp yom yimwing mu mwom wey. Ap anch yikutwish yakukasiken yisu yimwing, pakwez anch waswimp yom kanang mu mwom wey, ukwikal ni chisambu ni musangar udiokila ku kwikal murund ushinshamena wa Nzamb. (Isay 48:17, 18) Mutapu ik twija anch tukutwish kuswimp yom mu mwom?

19 Yehova kakutwishap kutwit kusal chom chitukasikedina kusal. (Kuvurik Yijil 30:11-14) Mudi murund wakin, utwij nawamp nakash kusutamu mutapu twiyija ayinetu. Wij usu wetu ni kuziy kwetu. (Kuseng 103:14) Kambuy Paul utukasikeshin anch: ‘Nzamb ushinshamen, ni kakwitiyap anch wuwila mu choziu chiwakad ey kutwish kupandakan, pakwez anch choziu chashiken ukurijek chakwel utwisha kujijaman.’ (1 Korint 10:13) Tukutwish kwikal ni kashinsh anch Yehova ukutwinkish chisu chawonsu usu mulong wa kusal yom yitentamina. Ukukwinkish “ukash upandakena ukash wawonsu” mulong wa kukukwash  kujijaman mu mar. (2 Korint 4:7) Kupwa kwa kuman ukwash wa Yehova mu chisu mudi chinech, Paul watwisha kulond anch: “Mulong wa yom yawonsu nikwet ukash udiokila kudi ndiy wingikishina usu.”—Filip 4:13, NWT.

ILEJA KUKAT YOM YIKATINAY NZAMB

20. Mikadil ik ufanyidina kwimburij, ni mulong wak?

20 Anch tukimbin kwikal arund nend a Yehova, tufanyidin kulik kusal yom yilondinay Yehova anch yidi yiyimp, pakwez tufanyidin kand kusal yom yikwau. (Rom 12:9) Arund nend a Nzamb akatining yom yikatinay. Yom yiney ayilejen mu Kuseng 15:1-5. (Tang.) Arund nend a Yehova imburijining mikadil yend ni kumekesh ‘rukat, musangar, chisambu, kushimpish kwa muchim, kudimuk, kuwap, win yakin, kwitudish, ni kwilam.’—Galatia 5:22, 23.

21. Mutapu ik ukutwisha kwilej kumekesh mikadil yikatinay Nzamb?

21 Mutapu ik ukutwisha kwilej kumekesh mikadil yipandakena kuwap yiney? Ufanyidin kwilej yom yikatinay Yehova kusutin ku kutang ni kwilej Bibil pakad kujing. (Isay 30:20, 21) Anch wasal mwamu, rukat rey mulong wa Yehova rikupam, ni anch rukat rey mulong wendendiy rapam, ukukatish kumuziyin.

22. Yom ik ukutaninamu anch wamuziyin Yehova?

22 Kuswimp ufanyidina kusal mu mwom wey akutwish kukwisikesh ni kudjol masun makur ni kudjal masu. Bibil ulondin anch ufanyidin ‘kumudjol muntu mukur’ ni kumudjal ‘muntu musu.’ (Kolosay 3:9, 10) Kusal mwamu kuswapelap, pakwez tufanyidin kumekesh kuswimp kwinoku ni kumuziyil Yehova, washilamu kutwink “difut dijim.” (Kuseng 19:11) Mwaning, tond kumuziyin Yehova ni mekesh anch Satan udi mukamakasu. Musadina Yehova, kadiap ching mulong wa kutambul difut dia machuku ma kurutu, pakwez mulong wa rukat rakad choy ukweta. Mwamu ukwikal murund wakin wa Nzamb!

^ par. 16 Chinech chirumburikinap anch Satan ukat kuyitakel antu asadina usu wa kukukangesh kwilej Bibil. Pakwez Satan udi “nzamb wa ditenchik dined dia yom,” ni “ngand yakabuj yidi mu ulabu wend.” Chawiy chishimokishinap anch antu amwing asal usu wa kutukangesh kumusadil Yehova.—2 Korint 4:4, NWT; 1 Yohan 5:19, NWT.