Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM NI UMWING

Mulong Wak Kudi Mar Nakash Mwamu?

Mulong Wak Kudi Mar Nakash Mwamu?

1, 2. Yom ik yiyipwilingau antu avud?

RINKIND mukash washesh kal ul. Mwin kujipan umwing wandam mu egliz ni wabul yidiang, antu asupok yitat ni akwau afa. Kanser wamujip kal maku umwing, ni washa kal an atan.

2 Anch yom yiney yiyimp yayishiken, antu avud akat kwiyipulang anch, “Mulong wak?” Antu avud iyipwiling anch mulong wak mangand mizwil ni uyimp ni mar. Ov, niyey wiyipwilap kal mwamu?

3, 4. (a) Yipul ik yipulay Abakuk? (b) Yehova wamwakula mutapu ik?

3 Mu Bibil, mudi rusangu ra muntu umwing wadinga ni ritiy rikash mudiay Nzamb ni wipula yipul mudi yiney. Chilakej, muprofet Abakuk wamwipula Yehova anch: “Mulong wak witiyina am kuman yom yiyimp? Ni mulong wak ulikina chisum? Mulong wak kushesh ni yisal ya chisum yidi kurutu kwam? Ni mulong wak matend ni kupwitijan kwavulijan kal?”—Abakuk 1:3, NWT.

4 Mu Abakuk 2:2, 3, mudi yakul ya Nzamb ku yipul ya Abakuk ni Wakana anch ukupwish mulong winou. Yehova uyikatin antu nakash. Bibil ulondin anch: “Ndiy ukat kukubanginany.” (1 Pita 5:7, NWT) Pakwez, Nzamb ukisining nakash kuman mar matushikedina. (Isay 55:8, 9) Chawiy lel, el twambambin chipul chilondina anch: Mulong wak kudi mar nakash mwamu mu mangand?

 MULONG WAK KUDI MAR NAKASH MWAMU?

5. Yom ik yifundishinau alej a marelijon piur pa mar? Chad chom ik chifundishinay Bibil?

5 A paster, amwimpel, nau alej a marelijon alondining yisu yivud anch mar mamenau antu ridi rusot ra Nzamb. Antu amwing akat kulond anch yom yawonsu yikata kumushiken muntu, ni mar makash, Nzamb ndiy watenchika anch yisadika mwamu ni twijap mulong wak. Akwau niyau akat kulond kand anch amakurump nau an akemp, akat kufa mulong wa kuya kushakam mwiur ni Nzamb. Pakwez udiap uyakin. Yehova kakatap kuletish yom yiyimp. Bibil ulondin anch: “Nzamb udi kulemp ni kuyip, Mwin Dikand Diawonsu kakutwishap kupengam!”—Job 34:10.

6. Mulong wak antu avud amufishining nich Nzamb pamenau mar mawonsu madia mu mangand?

6 Antu avud amufishining nich Nzamb pamenau mar mawonsu madia mu mangand mulong atongining anch ndiy uyikedina mangand. Pakwez mudi mutwilejina mu Shapitre wa 3, Satan Djabul ndiy kamu uyikedina mangand minam.

7, 8. Mulong wak kudi mar nakash mwamu mu mangand?

7 Bibil utulejin anch “ngand ya kabuj yidi mu chikas cha Satan.” (1 Yohan 5:19, TMK) Nyikel wa mangand minam, Satan, udi mwin chisum ni muyimp nakash. Ndiy “kamu mwin kuyipumbol antu a mangand mawonsu.” (Kujingunik 12:9) Antu avud akat kumwimburij. Chawiy mangand mizwil ni makasu, rikis, ni yisal ya chisum.

8 Kudi kand yom yikwau yisadina anch kwikala mar nakash mwamu mu mangand. Kupwa kwa kubwambwil kwa Adam ni Ev, ayishila anau chitil. Mulong wa chitil, antu akat kuyimesh akwau mar. Akatining yisu yivud  kwikwat nich usey nakash kusutamu antu akwau. Akat kurish, akat kuya kwi njit, ni akat kuyimesh akwau mar. (Mulej 4:1; 8:9) Yisu yimwing antu amening mar mulong ‘yisu ni yom yakad kuchingejin yikat kuyishikenang antu awonsu.’ (Mulej 9:11) Chisu chidiau pa ndond yiyimp ni pa chisu chiyimp, ma akisidan ni yom yikwau yiyimp yikutwish kuyishiken.

9. Mulong wak tukutwish kwikal nich kashinsh anch Yehova ukwet diyingishin diwamp nakash dia kulik mar madandamena?

9 Yehova kakatap kuletish mar. Ni kakatap kuyipup antu kusutin kwi njit, yisal ya chisum, ni kuyimesh mar. Kadiap Nzamb ukata kuletish yom yiyimp mudi kuzal kwa divu, rikind mukash ni mabeb. Pakwez ukutwish kwiyipul anch, ‘Anch Yehova ukwet usu upandakena mu mangand mawonsu, mulong wak ukangeny kupwish yom yiyimp yiney yisadikina?’ Twij anch Nzamb ututongidining nakash, chawiy lel, ufanyidin kwikal nich diyingishin diwamp nakash dia kulik mar madandamena.—1 Yohan 4:8.

MULONG WAK NZAMB ULIKIDIN MAR

10. Satan wamusarumuna Yehova mutapu ik?

10 Mu chir cha Eden, Djabul wamudimba Adam ni Ev. Satan walonda anch Nzamb udi Nyikel muyimp. Walonda kand anch Nzamb wamujindjikina Adam ni Ev chom chimwing chiwamp. Satan wakimba chakwel itiyija anch ndiy ukwikal nyikel muwamp nakash kumusutamu Yehova ni anch kakwetap kuswir kwa Nzamb.—Disambishil 3:2-5; tal Mazu ma kwinsudiel 27.

11. Chipul ik tufanyidina kwakul?

11 Adam ni Ev alika kumuziyin Yehova ni amubwambwila. Atonga anch akwet mbil ya kukwat mupak ayinau wa kutond chidia chiwamp ni chiyimp. Mutapu ik  welay Yehova kumekesh anch in kubwambwil asala nayimp ni anch ndiy wij yidia yiwamp mulong wetwetu?

12, 13. (a) Mulong wak Yehova kayijipap in kubwambwil pinipa? (b) Mulong wak Yehova walika anch Satan ikala nyikel wa mangand minam ni anch antu iyikela ayinau?

12 Yehova kamujipap Adam ni Ev pinipa. Pakwez, walika chakwel avala an. Kupwa, Yehova wasala anch an a Adam ni Ev ikala ni mutapu wa kutond nany ukukatau anch ikala nyikel wau. Chitongijok cha Yehova chading anch divu dizula ni antu awanyidina, ni chinech chafanyina kuwanyin chikalap nchik yom yapakishay Djabul kusal.—Disambishil 1:28; Isay 55:10, 11.

13 Satan wamusarumuna Yehova kurutu kwa ma miliyon ma angel. (Job 38:7; Daniel 7:10) Chawiy lel Yehova wamushila Satan chisu mulong wa kumekesh anch yom yalonday yading yakin ap bwat. Wayishila kand antu chisu mulong wa kutek mant mau mwinshin mwa umutakel wa Satan chakwel amekesh anch akutwish kutakel pakad ukwash wa Nzamb.

14. Yom ik yimekena mu chisu chipakishinau antu kwiyikel ayinau?

14 Mu tunan twa mivu antu apakisha kwiyikel ayinau, pakwez akangeny. Satan wamekana kwikal mukamakasu. Antu akwet kuswir kwa ukwash wa Nzamb. Muprofet Jeremiy walonda yakin palonday anch: “Nij anch kwikil muntu umwing ukutwisha kurijek yom yikumanay kurutu. Kwikil muntu ukutwisha kutakel mwom wend amwinend.”—Jeremiy 10:23.

MULONG WAK YEHOVA WACHINGELA CHISU CHILEMP MWAMU?

15, 16. (a) Mulong wak Yehova walika mar madandamena chisu chilemp? (b) Mulong wak Yehova kakatap kutenchik milong yiletinay Satan?

15 Mulong wak Yehova walika mar madandamena  chisu chilemp mwamu? Mulong wak kakangeshap yom yiyimp kushiken? Chita chisu chilemp mulong wa kumekesh anch winyikel wa Satan wakangany kal. Antu apakishin mitapu kushalijan ya mant, pakwez katwishinap. Ap anch antu ayil kurutu mu milong ya siyans ni tekinoloji, kudi kasolikany, uzwendj, yisal ya chisum ni njit kusutamu pakur. Tukutwishap kwiyikel ayinetu nawamp pakad Nzamb.

16 Pakwez, Yehova kakatap kutenchik milong yiletinay Satan. Anch wasal mwamu, chelang kumekesh anch Nzamb ukwashin ku winyikel wa Satan, ni kakezap kusal mwamu. Chikwau kand, antu akwitiyij anch akwet usu wa kuyikel ayinau ni kutwish. Pakwez minam madi makasu, ni Yehova kakutwishap kuyikwash. Kakudimbanangap.—Hebereu 6:18.

17, 18. Yom ik yikusalay Yehova piur pa uyimp waletay Satan?

17 Ov, Yehova ukutwish kupwish uyimp wawonsu waletau kusutil ku kubwambwil kwa Satan ni antu? Mwaning. Yom yawonsu yiswapel kudi Nzamb. Yehova wij chisu chikwakulay ku kusarumun kwawonsu kwa Satan. Kupwa ukusal divu dikala paradis, mudi mudiafanyina kwikal. Awonsu adia “mwi nzay ya chivurikish” akuvumbuk. (Yohan 5:28, 29, NWT) Antu kakuyelap kand ap kufa. Yesu ukudiosh uyimp wawonsu waletay Satan. Yehova ukumusadin Yesu mulong wa “kushesh midimu ya Sakudimban.” (1 Yohan 3:8) Tujikitishin nakash mulong Yehova washimpisha muchim mulong wetwetu, mwamu tukutwish kushiken ku kumwijik ni tukutwish kutond anch tukatin ikala Nyikel wetu. (Tang 2 Pita 3:9, 10.) Ap chisu tumening mar, utukwashining chakwel tujijamana.—Yohan 4:23; tang 1 Korint 10:13.

 18 Yehova kakatap kutushindil mulong tumutonda ndiy mudi Nyikel wetu. Wayinkisha antu chipan cha want ipau. Tushinshikinany mutapu urumburikina chipan chinech cha usey kudi etu.

MUTAPU IK UKUSADINA CHIPAN CHA WANT IPAU?

19. Chipan ik chipandakena kuwap chatwinkishay Yehova? Mulong wak tufanyidin kujikitish mulong wa chipan chinech?

19 Chipan chipandakena kuwap cha Yehova chisadin anch tushalijana nakash ni annam. Annam asadining yom ni manangu ma winnam, pakwez etu tukutwish kutond mutapu tukatina kushakam ni kutond mutapu wa kumusangaresh Yehova. (Jinswir 30:24) Chikwau, tudiap mudi mashiny makata kusal ching yom yitenchikinau mulong wa kusal. Tukwet want ipau mulong wa kutond piur pa mutapu tukatina kwikal, anany tukatina ikala arund netu, ni chitukatina kusal mu mwom wetu. Yehova ukatin tusangera mwom.

20, 21. Kutond ik kupandakena kuwap ukutwisha kutond katat?

20 Yehova ukimbin anch tumukata. (Mateu 22:37, 38) Udi mudi tatuku usangera kumutesh mwanend ulondina anch: “Nikukatin” anch yilondinay yidiokil mu muchim wend ni mulong kamubachikinap. Yehova watwinkisha want ipau wa kutond anch tukumusadin ndiy ap bwat. Satan, Adam, ni Ev atonda kumulik Yehova. Mutapu ik ukusadina chipan chey cha want ipau?

21 Sadin want ipau mulong wa kumusadin Yehova. Kudi ma miliyon ma antu makwata kal mupak wa kumusangaresh Nzamb ni kumulik Satan. (Jinswir 27:11) Yom ik ukutwisha kusal katat mulong wikala niyey mwi ngand yisu ya Nzamb pakudioshay mar mawonsu? Shapitre ulondwilaku ou ukwakul ku chipul chinech.

Yehova ukatin anch tumusadina mulong tumukatin.