Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA KATAN

Difut—Chipan cha Nzamb Chipandakena Kujimb

Difut—Chipan cha Nzamb Chipandakena Kujimb

1, 2. (a) Chom ik chimekeshina anch chipan chikwet usey kudi ey? (b) Mulong wak difut did chipan cha Nzamb chipandakena kujimb?

CHIPAN ik chiwamp nakash watambulap kal? Chipan chitinap nfalang jivud chakwel uchikwata nich usey. Anch chipan chakusangaresh, ap anch chidi chom uswiridina chakin, ukusangar nakash.

2 Ku yipan yawonsu yatwinkishay Nzamb, kudi chipan chimwing tuswiridina kupandakanamu yom yawonsu. Chidi chipan chipandakena kujimb chapanay Nzamb kudi antu. Mu shapitre winou, tukwilej anch Yehova wamutuma Mwanend, Yesu Kristu, chakwel tutambula mwom wa chikupu. (Tang Mateu 20:28.) Kusutil ku kumutum Yesu pa divu mudi difut, Yehova wamekesha anch utukatin chakin kamu.

DIFUT CHOM IK?

3. Antu afiling mulong wak?

3 Difut yidi njil yisadidinay Yehova mulong wa kuyikamunin antu ku chitil ni ku rufu. (Efes 1:7) Chakwel tutesha mulong wak kwadinga kuswir kwa difut, tufanyidin kwijik yom yashikena mu tunan twa mivu yasutina kal mu chir cha Eden. Anvaj etu akusambish, Adam ni Ev, asala chitil. Mulong asala chitil, chawiy afa. Niyetu tukat kufang mulong twaswana chitil cha Adam ni Ev.—Tal Mazu ma kwinsudiel 9.

4. Adam wadinga nany, ni chom ik chadingay nich?

 4 Yehova pamutangay muntu wa kusambish, Adam, Wamwinkisha chom chimwing chipandakena usey. Wamwinkisha Adam mwom uwanyidina. Wadinga ni manangu mawanyidina ni mujimbu uwanyidina. Kelap kuyel ap pakemp, kelap kunanap ap pakemp, ni kelap kufa. Mulong Yehova ndiy wamutanga Adam, Ndiy wading mudi tatukwend. (Luka 3:38) Yehova wambambanga nend chisu chawonsu. Nzamb wamurumburila Adam patok piur pa yom yamwitay kusal ni wamwinkisha mudimu wa kusal usangareshina.—Disambishil 1:28-30; 2:16, 17.

5. Chirumburikin ik palondinay Bibil anch Adam amutanga “mu chifu cha Nzamb”?

5 Adam amutanga “mu chifu cha Nzamb.” (Disambishil 1:27) Yehova wamwinkisha mikadil mudi Yendendiy, kuwejinaku rukat, manangu, kutentam ni usu. Wamwinkisha Adam want ipau wa kwitondin. Adam kamusalap mudi mashiny ma robo. Nzamb wamutanga chakwel ukutwish kutond chidia chiwamp ni chiyimp. Anch Adam watonda kumuziyil Nzamb, wela kushakam chikupu mu Paradis.

6. Pamubwambwilau Nzamb kudi Adam, chom ik chashadishay? Mutapu ik ututadina chom chinech?

6 Pamubwambwilau Nzamb ni payifishau nich mulong wa kufa, Adam wafuta kamu usey upandakena. Washadisha urund wend wa pakampwil ni Yehova, mwom wend uwanyidina ni Paradis wend mwading mushichay. (Disambishil 3:17-19) Adam ni Ev atonda kumubwambwil Nzamb, chawiy ashadisha ruchingej. Mulong wa yom yasalay Adam, “chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.” (Rom 5:12) Pasalay Adam chitil, “wilandisha” amwinend, niyetu kand watulandisha  mu usuk wa chitil ni rufu. (Rom 7:14) Kwadinga kand ruchingej piur petu? Mwaning, kwadinga.

7, 8. Difut chom ik?

7 Difut chom ik? Dizu difut dirumburikin yom yaad. Chakusambish, difut didi nfalang jifutinau mulong wa kumukol muntu ap kuswinkesh chom kanang chasheshikang. Cha kaad, difut didi nfalang jisikena ap jiwanyidina ni chom chashadikang.

8 Kwikil muntu wafanyina kufut uyimp upandakena wasalay Adam pasalay chitil ni kutuletin rufu. Pakwez Yehova watenchika njil mulong wa kutukol ku chitil ni rufu. El twilejany mutapu usadila difut ni mutapu tukutwisha kutaninamu.

MUTAPU WAPANAY YEHOVA DIFUT

9. Mutapu ik wafanyinau kufut difut?

9 Kwikil muntu wa pakach petu wafanyina kufut difut mulong wa mwom uwanyidina washadishay Adam. Mulong wak? Mulong etu awonsu tudi akad kuwanyin. (Kuseng 49:7, 8) Difut diafanyinau kufut wadinga mwom uwanyidina wa muntu mukwau. Chawiy lel aditazukining anch “difut disikena.” (1 Timote 2:6) Difut diading difanyididin kwikal nich usey wa chilik chimwing mudi mwom washadishay Adam.

10. Mutapu ik wapanay Yehova difut?

10 Mutapu ik wapanay Yehova difut? Yehova wamutuma Mwanend upandakena usey pa divu. Mwan winou, Yesu, wading chitang chend cha kusambish kamu. (1 Yohan 4:9, 10) Yesu witiya amwinend kumusha Tatukwend ni washa ndond yend ya mwiur. (Filip 2:7) Yehova wamudiosha Yesu mwiur mulong wa kwez pa divu, ni Yesu wavadika mudi muntu uwanyidina, wakad chitil.—Luka 1:35.

Yehova wamupana Mwanend upandakena usey mudi difut mulong wetwetu

11. Mutapu ik watwishay muntu umwing kupan difut mulong wa antu awonsu?

 11 Muntu wakusambish, Adam, washadisha mwom uwanyidina wa antu awonsu pamubwambwilay Yehova. Kwadinga muntu mukwau wafanyina kudiosh rufu mulong wa an awonsu a Adam? Mwaning. (Tang Rom 5:19.) Yesu, kasalap chitil, wapana mwom wend uwanyidina mudi difut. (1 Korint 15:45) Mwom wend uwanyidina afanyina kuusadil chakwel adiosha rufu mulong wa an awonsu a Adam.—1 Korint 15:21, 22.

12. Mulong wak Yesu wamana mar makash mwamu?

12 Bibil ulejen mutapu wamanay Yesu mar kurutu kwa kufa. Amubula nayimp, amupampina pa mutond wa mar, ni wajijamena pakemp-pakemp mar ni rufu. (Yohan 19:1, 16-18, 30) Mulong wak Yesu wamana mar makash mwamu? Mulong Satan walonda anch kwikil muntu ukutwisha kushal ushinshamena kudi Nzamb anch amupak nakash. Yesu wamekesha anch muntu uwanyidina ukutwish kushal ushinshamena kudi Nzamb ap anch waman mar mapandakena nakash. Tong bil mutapu wasangaray Yehova piur pa Yesu!—Jinswir 27:11; Tal Mazu ma kwinsudiel 15.

13. Mutapu ik wafutau difut?

13 Mutapu ik wafutau difut? Yesu wapana usey wa mwom wend kudi Tatukwend. Mu muvu wa 33, pa dichuku dia 14 dia ngond wa Nisan wa kalandriye wa in Yuda, Yehova walika chakwel akankuny a Yesu amujipa. (Hebereu 10:10) Kupwa kwa machuku masatu, Yehova wamuvumbula Yesu kumuchirish ku mwom, kadiap mudi muntu wa mujimbu wa mbij pakwez mudi muntu wa muspiritu. Kupwa, pachirikay Yesu mwiur kudi Tatukwend, wapana usey wa mwom wend uwanyidina kudi Yehova mudi difut. (Hebereu 9:24) Nlel unou mulong wa  difut diafutau, tukwet katat mutapu wa kukamunik ku chitil ni rufu.—Tang Rom 3:23, 24.

MUTAPU UKUTWISHA KUTANINAMU MU DIFUT

14, 15. Chom ik tufanyidina kusal mulong atulikishina yitil yetu?

14 Twatanidinamu kal mu chipan cha Nzamb chipandakena kujimb. Tushinshikinany mutapu tutanidinamu katat ni mutapu tukutaninamu mu machuku ma kurutu.

15 Yitil yetu akat kuyilikishin. Chikasiken kusal yom yiwamp chisu chawonsu. Tukat kurumbuk, ni yisu yimwing tulondining ni kusal yom yiyimp. (Kolosay 1:13, 14) Mutapu ik ukutwishau kutulikishin? Tufanyidin chakin kamu kunenganan mulong wa yom yiyimp twasadila ni kwikepish mu kwit dilikishin kudi Yehova. Tukutwish kwikal nich kashinsh anch akutulikishin yitil yetu.—1 Yohan 1:8, 9.

16. Chom ik tufanyidina kusal chakwel twikala ni kom kawamp?

16 Tukutwish kwikal ni kom kawamp. Anch kom ketu katulej anch twasal kal chom chimwing chiyimp, tukat kwifish nich, pamwing ap tukushadish ruchingej ni tukwiman mudi tukwetap usey. Pakwez tufanyidinap kuziy. Anch twit dilikishin kudi Yehova, tukutwish kwikal nich kashinsh anch ukututesh ni kutulikishin. (Hebereu 9:13, 14) Yehova ukatin anch tumuleja piur pa milong yetu yawonsu ni kurumbuk kwetu. (Hebereu 4: 14-16) Mudi chibudikin, tukutwish kwikal mu chisambu ni Nzamb.

17. Yiyukish ik tukutwisha kutambul mulong Yesu watufila?

17 Tukwet ruchingej ra mwom wa chikupu. Bibil ulondin anch: “Difut dia chitil didi rufu, pakwez kupan kwa Nzamb kudi mwom wa chikupu mu Kristu Yesu Nsalejetu.” (Rom 6: 23, TMK) Mulong Yesu watufila, tukutwish kwikal ni mwom wa chikupu ni kusanger ukash wa mujimbu uwanyidina. (Kujingunik 21:3, 4) Pakwez chom ik tufanyidina kusal chakwel tutambula yiyukish yiney?

 UKWITIY DIFUT?

18. Mutapu ik twija anch Yehova utukatin?

18 Tong bil mutapu ukata kwov mu muchim wey anch muntu kanang wakwinkish chipan chipandakena kuwap. Difut chidi chipan chipandikena usey kudi antu awonsu, ni tufanyidin kumujikitish Yehova nakash mulong wa chipan chinech. Yohan 3:16 utulejin anch: “Nzamb wakata ngand nakash, ndiy wamupana Mwanend kapwokal.” Mwaning, Yehova watukata nakash chawiy watwinkisha Mwanend mukatish, Yesu. Ni twij anch Yesu niyend utukatin, mulong wakata kufa mulong wetwetu. (Yohan 15:13) Chipan cha difut chifanyidin kumekesh kudi ey anch Yehova ni Yesu akukatin chakin kamu.—Galatia 2:20.

Mudi mutwilejina piur pa Yehova, tukwikal arund nend ni rukat retu mulong wendendiy rikupandakan

19, 20. (a) Mutapu ik ukutwisha kwikal murund wa Yehova? (b) Mutapu ik ukutwisha kumekesh anch witiyijin chakupesh cha difut dia Yesu?

19 Katat piwileja kal piur pa rukat rijim ra Nzamb, mutapu ik ukutwisha kwikal murund nend? Chiswapelap kumukat muntu wakad kwijik. Yohan 17:3 ulondin anch tukutwish kushiken ku kumwijik Yehova. Anch wasal mwamu, rukat rey mulong wendendiy rikupandakan, ukukat kumusangaresh, ni ukwikal murund nend. Chawiy lel, dandamen kwilej piur pa Yehova kusutil ku kwilej Bibil.—1 Yohan 5:3.

20 Itiy difut dia chakupesh cha Yesu. Bibil ulondin anch: “Muntu mwawonsu umwitiyijina Mwan ukwet mwom wa chikupu.” (Yohan 3:36) Kumwitiyij kurumburikin ik? Kurumburikin kusal yom yatufundishau kud Yesu. (Yohan 13:15) Tukutwishap kusu kulond anch tumwitiyijin Yesu. Chakwe l kwitiyij difut, tufanyidin kusal chom kanang piur pa ritiy retu. Mu Jakobu 2:26, tutangin anch: “Ritiy rakad yisalijok yiwamp rufil.”

21, 22. (a) Mulong wak tukat kukumangan ku Chivurikish cha rufu ra Kristu muvu ni muvu? (b) Yom ik tukwisambina mu Shapitre wa 6 ni wa 7?

 21 Kumangan ku Chivurikish cha rufu ra Kristu. Urel kurutu kwa Yesu kufa, watufundisha anch tufanyidin kusal chivurikish cha rufu rend. Tukat kusalang mwamu pa muvu ni muvu, ni achitazukin anch Chivurikish cha “Yakudia ya Urel ya Mwant.” (1 Korint 11:20, TMK; Mateu 26:26-28) Yesu ukatin anch tuvurika anch wapana mwom wend uwanyidina mudi difut mulong wetwetu. Walonda anch: “Ukez kusalangany mwamu mulong wa kwinvurik am.” (Tang Luka 22:19.) Anch wakumangan ku Chivurikish, ukumekesh anch uvurikin difut ni rukat ripandakena rikwetay Yehova ni Yesu mulong wetwetu.—Tal Mazu ma kwinsudiel 16.

22 Difut chidi chipan chipandakena kujimb twatambula. (2 Korint 9:14, 15) Chipan chinech cha usey chikwikal cha ukwash kudi mamiliyon ma antu afila kal. Shapitre wa 6 ni wa 7 makurumburil mutapu ukusadika chom chinech.