Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

Mazu ma kwinsudiel

Mazu ma kwinsudiel

1 YEHOVA

Yehova diawiy dijin dia Nzamb, ni dirumburikin anch “Ukat Kwikadish.” Yehova udi Nzamb wa dikand diawonsu, ni sakatang wa yom yawonsu. Ukwet usu wa kusal yawonsu yikatinay kusal.

Mu dizu dia Hebereu, dijin dia Nzamb adifunda ni mamuny manying. Mu dizu dia Français, mamuny minam amafundin anch YHWH ap JHVH. Dijin dia Nzamb didi mu mifund ya kusambish ya Bibil ya dizu dia Hebereu piswimp ni tupamp 7000. Dijin dia Yehova adisadidin kudi antu awonsu a pa mangand mu mitapu kushalijan, pakwez aditazukining kulondwish nich dizu diau.

Shapitre 1, par. 15

2 BIBIL “AMUPEPILA KUDI NZAMB”

Bibil udi buku wa Nzamb, pakwez Nzamb wasadina antu mulong wa kumufund. Yidi mudi mwin kwisak umulejina kalerik (sekreter) kufund mukand ukweta yitongijok yend. Nzamb wasadina spiritu wend mulong wa kuyitakel in kufund Bibil chakwel afunda yitongijok yend. Spiritu wa Nzamb wayikwasha mu mitapu kushalijan, yisu yimwing wayikwasha kuman yishimushimu ap yilat ya yom yafanyinau kufund.

Shapitre 2, par. 5

3 MBIL

Mbil ja mu Bibil madi mafundish ma Bibil marumburila uyakin wa pa dishin. Chilakej, mafundish malondina anch “arund ayimp akat kuyipish yaku yiwamp” matufundishin anch tukutwish twasal yom yiwamp ap yiyimp kulondwish yom yisadinau antu tudia nau. (1 Korint 15:33) Mu mafundish malondina anch “yikukunay muntu, yawiy yikez kwangulay.” Matufundishin anch tukutwishap kwiyep yibudikin ya yisal yetu.—Galatia 6:7.

Shapitre 2, par. 12

 4 UPROFET

Ridi rusangu rudiokila kudi Nzamb. Uprofet ukutwish kurumburil rusot ra Nzamb, mashakamin mishitwila, yijil ap kurumburish. Ukutwish kwikal kand uruu ulondina piur pa yom yikushikena machuku ma kurutu. Mu Bibil mudi uprofet uvud wawanyina kal.

Shapitre 2, par. 13

5 UPROFET PIUR PA MESIA

Uprofet uvud piur pa Mesia wawanyina padiay Yesu. Tal mushet “ Uprofet Piur pa Mesia.”

Shapitre 2, par. 17.

6 CHITONGIJOK CHA YEHOVA MULONG WA DIVU

Yehova watanga divu kwikal paradis chakwel antu amukatina ashakamamu. Chitongijok chend chaswimpap. Piswimp ap, Nzamb ukudiosh uyimp wawonsu ni kuyinkish antu end mwom wa chikupu.

Shapitre 3, par. 1

7 SATAN DJABUL

Satan ndiy mwangel wasambisha kumubwambwil Nzamb. Amutazukin anch Satan, chirumburikin anch “Mwin kubwambwil,” mulong wamurishikisha Yehova. Amutazukin kand anch Djabul, chirumburikin anch “Sakudimban.” Amutazukin dijin dined mulong walonda makasu piur pa Nzamb ni wayidimba antu.

Shapitre 3, par. 4

 ANGEL

Yehova watanga angel kurutu kwa kutang divu. Wayitanga mulong wa kushakam mwiur. Kudi tutikit ni tutikit twa angel. (Daniel 7:10) Akwet majin ni mikadil kushalijan, angel ashinshamena ni ikepishina kakatiningap anch antu ayifukwila. Ayilongin mu mitapu kushalijan ni ayinkin yisend ni midimu kushalijan. Amwing pakach pau asadining kurutu kwa nkwas ya Yehova, akwau akat kulejan uruu wend, akwau kand akat kuyilam ni kuyitakel atushalapol end adia pa divu, ni akwau akat kuwanyish mipak yend, akwau niyawiy akwashin mudimu wa kulejan. (Kuseng 34:7; Kujingunik 14:6; 22:8, 9) Mu machuku ma kurutu, akumukwash Yesu kwi njit ja Harmagedon.—Kujingunik 16:14, 16; 19:14, 15.

Shapitre 3, par. 5; Shapitre 10, par. 1

9 CHITIL

Yom tukata kwov, kutong, ap kusal yakad kumukatish Yehova ap yakad kwikal mu rusot rend yidi yitil. Mulong chitil chikat kuyipish urund wetu ni Nzamb, watwinkisha yijil ni mbil yikata kutukwash kwiyep yitongijok yitwadina ku chitil. Kwinsambishin, Yehova watanga yom yawonsu yiwanyidina, pakwez patonday Adam ni Ev kumubwambwil Yehova, asala chitil ni kashalap kand awanyidina. Ananapa ni afa, niyetu tukat kunanap ni kufa mulong twaswana chitil cha Adam.

Shapitre 3, par. 7; Shapitre 5, par. 3

10 HARMAGEDON

Jidi njit ja Nzamb jikumujiyisha Satan ni mangand mayimp.

Shapitre 3, par. 13; Shapitre 8, par. 18

 11 WANT WA NZAMB

Want wa Nzamb udi want wa Yehova udia mwiur. Yesu Kristu ndiy Mwant uyikedila. Mu machuku ma kurutu, Yehova ukusadin Want winou mulong wa kudiosh uyimp wawonsu. Want wa Nzamb ukuyikel pa mangand mawonsu.

Shapitre 3, par. 14

12 YESU KRISTU

Nzamb wamutanga Yesu kurutu kwa kutang yom yawonsu.

Yehova wamutuma Yesu pa mangand mulong wa kuyifil antu awonsu. Kupwa kwa kumujip Yesu, Yehova wamuvumbula.

Yesu uyikedin katat mwiur ni udi Mwant wa Want wa Nzamb.

Shapitre 4, par. 2

13 UPROFET WA MBING 70

Bibil watakela kulejan chisu chafanyinay Mesia kumekan. Chisu chinech chafanyina kushiken kwinsudiel kwa chirung chitazukinau anch mbing 69, chasambisha mu muvu wa 455 K.C.C. ni chapwa mu muvu wa 29 C.C.

Mutapu ik twija anch chisu chinech chafanyina kupwa mu muvu wa 29 C.C.? Mbing 69 jasambisha mu muvu wa 455 K.C.C. chisu chashikay Nehemiy mu Yerusalem ni kusambish kutungiril musumb. (Daniel 9:25; Nehemiy 2:1, 5-8) Dizu “dikum ni yaad” ditutongishin pa uvud wa 12, chawiy dizu “rubing” dituvurishin uvud wa 7. Mbing jilondinau mu uprofet winou jidiap mbing ja machuku sambwad, pakwez jidi mbing ja mivu sambwad, kukwatijan ni uprofet ulondina anch “dichuku dimwing, muvu umwing.” (Kuchind Michid 14:34; Ezekiel 4:6) Chinech chirumburikin anch rubing rawonsu rikwet mivu sambwad ni kulep kwa mbing 69 kuwejinaku mivu 483 (69 x 7). Anch twachind mivu 483 kudiokal mu muvu wa 455 K.C.C., yitutwadin ku muvu wa 29 C.C. Wawiy kamu muvu wamubatishau Yesu ni kwikal Mesia!—Luka 3:1, 2, 21, 22.

 Uprofet winou wasambela kulond piur pa rubing rikwau riwejinaku rikweta nirawiy mivu sambwad. Mu chisu chinech, mu muvu wa 33 C.C., afanyina kumujip Mesia, kupwa mu muvu wa 36 C.C., rusangu ruwamp ra Want wa Nzamb afanyina kurilejan mu michid yawonsu, kafanyinap kurilejan ching kwa in Yuda.—Daniel 9:24-27.

Shapitre 4, par. 7

 14 MAFUNDISH MA MAKASU MA USATU

Bibil ufundishin anch Yehova Nzamb udi Sakatang ni wamutanga Yesu kurutu kwa yom yawonsu. (Kolosay 1:15, 16) Yesu kadiap Nzamb wa Dikand Diawonsu. Kandikal alondangap anch wisiken ni Nzamb. Chawiy, Yesu walonda anch: “[Tatuku] udi mujim kwimpandakanamu am.” (Yohan 14:28; 1 Korint 15:28) Pakwez marelijon mamwing makat kufundish Usatu anch, Nzamb udi antu asatu mu muntu umwing: Tatuku, Mwan, ni spiritu utumbila. Dizu “Usatu” didiap mu Bibil. Minam madi mafundish ma makasu.

The Spiritu utumbila udi usu wa Nzamb, usu wend wakad kumekan usadidiningay mulong wa kuwanyish rusot rend.Kadiap muntu. Chilakej, in Kristu akusambish “izula ni [spiritu] utumbila,” ni Yehova walonda anch: “nikez kupan [spiritu] wam kudi antu awonsu.”—Midimu 2:1-4, 17.

Shapitre 4, par. 12; Shapitre 15, par. 17

15 DIKURUS

Pakatau in Kristu akin kumwifukwil Nzamb, kukusadinangap dikurus. Mulong wak?

  1. Mu mivu yivud, dikurus adisadinang mu relijon wa makasu. Pasak, adisadinang mu difukwil ni mu yishankur ya upagan yijondila. Mu mivu 300 ya kusambish kupwa kwa Yesu kufa, in Kristu kasadinap dikurus mu difukwil diau. Pasuta chisu, Constantin Mwant wa in Rom wasala anch dikurus dikala chijingidij cha win Kristu. Chijingidij chinech achisadina mulong wa kusal anch win Kristu wijikana. Pakwez mafundish ma dikurus makwatijadinap ni Yesu Kristu. Buku New Catholic Encyclopedia urumburil anch: “Malejan ma dikurus madingaku kurutu kwa in Kristu kwikalaku ni amasadinang kudi apagan.”

  2. Yesu kafilap pa dikurus. Dizu dia Grek dikarumwinau anch “dikurus” dirumburikin chakin anch “mutond utentamina [ap wonikina],” ap “mutond.” Buku the Companion Bible  urumburil anch: “Kwikil chom ap chimwing mu [Manswik Masu] ma dizu dia Grek chilondina piur pa yikunku yaad ya mutond.” Yesu wafila pa mutond wonikina.

  3. Yehova kakatinap anch etu tusadina atupwany ap yirumbidij mu difukwil dietu.— Kubudik 20:4, 5; 1 Korint 10:14.

Shapitre 5, par. 12

16 CHIVURIKISH

Yesu wayileja in kwilej end anch afanyidin kusal Chivurikish cha rufu rend. Asadining Chivurikish chinech muvu wawonsu dichuku dia 14 ngond wa Nisan, diawiy dichuku diasalangau in Isarel musambu wa Pasak. Mukat ni nviny, yiding chijingidij cha mujimbu ni mash ma Yesu yisutishiningau kurutu kwa muntu ni muntu ku Chivurikish. Antu akuyikela ni Yesu mwiur awiy akata kudia mukat ni kuna nviny. Awonsu akweta ruchingej ra kushakam panap pansh chikupu alimishining chikumangan cha Chivurikish pakwez kakudiangap mukat ap kuna nviny.

Shapitre 5, par. 21

17 MUPIM

Mu dikarumun dia Inglish dia Traduction du monde nouveau, dizu “mupim” adisadidin mulong wa kumekesh (1) muntu, (2) nnam, ap (3) mwom wa muntu ap wa nnam. Yilakej yimwing yawiy ey:

  • Muntu. “Mu chirung cha Nowa . . . mipim chinan, awiy kusu apanda pasutau pa mabeb ma mem.” (1 Pita 3:20, NWT)—Pinap dizu “mipim” yirumburikin—Nowa ni mukajend, anend asatu ni akajau.

  • Annam. “Nzamb walonda anch: ‘Chifanyidin mem mabudisha yitang yivud yikweta mwom [mipim], ni atujil atwikila pa ruzwizu ra mwiur.’Kupwa Nzamb walonda anch: ‘Chifanyidin divu dibudisha yitang yikweta mwom ya mitapu ni mitapu, yivam ni yom yikata kwikak pansh, ni annam  amwisuku a mitapu ni mitapu.’ Mwamu muchikala.”—Disambishil 1:20, 24.

  • Mwom wa muntu ap wa nnam. Yehova wamuleja Moses anch: “antu awonsu adinga ni kusot mwom [“mupim”] wey afil kal.” (Kubudik 4: 19) Padingay Yesu panap pansh, walonda anch: “Am nidi kafung muwamp, witiya kupan mwom [“mupim”] wend mulong wa amikoku.”—Yohan 10:11.

    Chikwau kand, anch muntu wasal chom ni “mupim wend wawonsu,” chirumburikin anch usadin kwa kwisotin ni usu wend wawonsu mu mutapu uwamp. (Mateu 22:37; Kuvurik Yijil 6:5) Dizu “mupim” akutwish kudisadin kand mulong wa kurumburil maswir ap nzal ya chitang chikweta mwom. Dizu mufu ap mujimbu ufila akat kudisadin mulong wa kumekesh mujimbu wakad mupim.—Kuchind Michid 6:6; Jinswir 23:2; Isay 56:11; Hagai 2:13.

Shapitre 6, par. 5; Shapitre 15, par. 17

18 SPIRITU

Mu Hebereu ni mu Grek dizu dikarumwinau anch “spiritu” mu dikarumun dia Inglish dia Traduction du monde nouveau dikutwish kurumburik yom kushalijan. Chad akat kudisadinang mulong wa kulond piur pa chom chakad kumekan kudi antu, mudi rinkind ap kupim kwa antu ni kwa annam. Dizu dined akutwish kand kudisadin mulong wa kulond piur pa angel ap piur pa spiritu utumbila, usu usadiningay nich Nzamb. Bibil kafundishinap anch kudi chikunku cha muntu chikata kudandamen kwikal ni mwom kupwa kwa muntu kufa.—Kubudik 35:21; Kuseng 104:29; Mateu 12:43; Luka 11:13.

Shapitre 6, par. 5; Shapitre 15, par. 17

19 GEHEN

Gehen didi dijin dia nkurubuk yading piswimp ni Yerusalem mwadingau kwoshin yishoshot mulong wa kuyijiyish. Kwikil uman umekeshina anch pa chirung cha Yesu ayimeshang  annam ap antu mar ni kuyosh aom mwi nkurubuk yiney. Chawiy Gehen kadiap chijingidij cha ndond yakad kumekan mukatau kuya antu afiling mulong wa kuyimesh mar ni kuyosh mu kasu ka chikupu. Palonday Yesu mulong wa antu akudjubulau mu Gehen, walonda mulong wa kujiy kwa chikupu.—Mateu 5:22; 10:28.

Shapitre 7, par. 20

20 MALEMBIL MA NSALEJETU

Madi malembil malonday Yesu payifundishay in kwilej end mutapu wa kulembil. Amatazukining kand anch malembil ma Tatukwetu ap malembil ma chilakej. Chilakej, Yesu watufundisha kulembil anch:

  • “Dijin diey aditumbish”

    Tukat kumulembil Yehova chakwel dijin diend aditumbisha, ap adilimish ku makasu mawonsu madidimbenau. Chinech chimekeshin anch awonsu adia mwiur ni adia pansh afanyidin kulimish dijin dia Nzamb.

  • “Want wey weza”

    Tulebiling chakwel want wa Nzamb ushesha mangand mayimp ma Satan, utakela pa divu ni kukarumun divu dikala paradis.

  • “Rusot rey arusala . . . pansh”

    Tulembiling chakwel chitongijok cha Nzamb mulong wa divu chiwanyina, mulong antu amuziyidina ikala awanyidina chakwel ashakama chikupu mu Paradis, mudi mwakatay Yehova patangay antu..

Shapitre 8, par. 2

21 DIFUT

Yehova wapana difut mulong wa kuyikwol antu ku chitil ni rufu. Difut chading chipan cha usey mulong wa kuchirish mwom uwanyidina washadishay muntu wa kusambish, Adam, ni kuchirish urund wayipishay muntu ni Yehova. Nzamb wamutuma Yesu chakwel afa mulong wa akayitil.  Mulong wa rufu ra Yesu, antu awonsu akwet katat mutapu wa kushakam chikupu ni kwikal awanyidina.

Shapitre 8, par. 21; Shapitre 9, par. 13

22 MULONG WAK MUVU WA 1914 UDI WA USEY?

Uprofet udia mu Daniel Shapitre 4 utulejin anch Nzamb wateka Want mu muvu wa 1914.

Uprofet: Yehova wamuleja Mwant Nebukadinesar mu chilat uprofet wa mutond ujim wawishau pansh. Mu chilat chinech, akasa mwoj wa utad ujal ni bronze ku chishij chakwel kangal chisapurika mu chirung cha “yisu sambwad.” Kupwa, mutond wafanyina kusapurik kand.—Daniel 4:1, 10-16.

Chirumburikina uprofet winou kudi etu: Mutond aufanakeshin ni winyikel wa Nzamb. Mu mivu yivud, Yehova wasadina ant mu Yerusalem mulong wa kutakel muchid wa in Isarel. (1 Jinsangu 29:23) Pakwez ant inay ikala akad kushinshaman, ni want wau wapwa. Yerusalem amushesha mu muvu wa 607 K.C.C. Diading disambishil dia “yisu sambwad.” (2 Ant 25:1, 8-10; Ezekiel 21:25-27) Palonday Yesu anch, “In michid yikwau akez kushesh musumb wa Yerusalem shutit, djat ni pakuwanyina chisu chau,” walonda piur pa “yisu sambwad.” (Luka 21:24) Chawiy “yisu sambwad” yawanyinap chisu chadingay Yesu panap pansh. Yehova wakana anch ukutek Mwant kwinsudien kwa “yisu sambwad.” Winyikel wa Mwant winou musu, Yesu, wafanyina kulet yiyukish ya chikupu kudi antu awonsu a Nzamb adia pa mangand.—Luka 1:30-33.

Kulep kwa “yisu sambwad”: Yisu sambwad” yasala mivu 2520. Anch twachind mivu 2520 kudiokal mu muvu wa 607 K.C.C., tukushiken ku muvu wa 1914. Chawiy chisu chamutekau Yesu wading mesia ikala Mwant wa Want wa Nzamb mwiur.

 Mutapu ik twatana uvud wa 2520? Bibil ulondin anch yisu yisatu ni chikunku yikwet machuku 1260. (Kujingunik 12:6, 14) Chawiy, “yisu sambwad” yidi uvud kapamp kaad ka uvud winou, ap machuku 2520. Machuku 2520 makwet mivu 2520 mulong kuyikel kwa uprofet kudi kwa “dichuku dimwing, [mulong wa] muvu umwing.”—Kuchind Michid 14:34; Ezekiel 4:6.

Shapitre 8, par. 23

23 MIKAYEL MUKURUMP WA ANGEL

Dizu “mukurump wa angel” dirumburikin anch “mwant wa angel.” Mu Bibil mudi ching mwant umwing wa angel, ni dijin diend Mikayel.—Daniel 12:1; Jud 9.

Mikayel udi Ntakel wa chisak cha angel ashinshamena a Nzamb. Kujingunik 12:7 ulondin anch: “Mikayel ni angel end ading ni kurish nend nnak mujim, . . . ni angel end.” Mukand wa kujingunik ulondin anch Ntakel wa chisak cha amasalay a Nzamb udi Yesu, chawiy, Mikayel didi dijin dikwau dia Yesu.—Kujingunik 19:14-16.

Shapitre 9, par. 4

24 MACHUKU MA NSUDIEL

Mazu minam malondin piur pa chisu chikushikena yom yivud pa divu kurutu Want wa Nzamb ujiyisha mangand ma Satan. Mazu mudi ‘disudiel dia ditenchik dia yom’ ni “[kwikalaku] kwa Mwan a muntu,” amasadidin mu uprofet wa Bibil mulong wa kumekesh chirung chimwing. (Mateu 24:3, 27, 37) “Machuku ma kwisudiel” masambisha chisu chasambisha Want wa Nzamb kuyikel mwiur mu muvu wa 1914 ni makupwa pakujiyishau mangand ma Satan ku Harmagedon.— Timote 3:1; 2 Pita 3:3.

Shapitre 9, par. 5

 25 DIVUMBUK

Anch Nzamb wamuchirish muntu wafila kal ku mwom, diawiy ditazukinau anch divumbuk. Mu Bibil alejenamu jinsangu ja kuvumbuk ja antu chidivu. Elija, Elisha, Yesu, Pita, ni Paul awiy avumbula antu. Yilay yiney yasadika mulong wa usu wa Nzamb. Yehova washilamu anch ‘antu atentamina ni akad kutentam akez kavumbuk’ pa divu. (Midimu 24:15) Bibil ulejen kand piur pa antu akuvumbuka mulong wa kuya mwiur. Divumbuk dined dikat kusadik anch ayivumbul antu atondau kal ap azizidilau many kudi Nzamb mulong wa kwikal mwiur pamwing ni Yesu.—Yohan 5:28, 29; 11:25; Filip 3:11; Kujingunik 20:5, 6.

Shapitre 9, par. 13

26 KWIKAL MU UMWING NI AYILEMBIL (YOM YA ULAJ)

Yom ya alembil ap ya ulaj yidi yisal yiyimp ya kupakish kwambamb nau aspiritu kudi muntu amwinend ap kusutil kudi muntu mukwau, mudi ngang, ap mwin kupong. Antu akata kusal yom ya ulaj akat kusal mwamu mulong itiyining mafundish ma makasu malondina anch muntu anch wafa, mupim wend ukufangap ni ukat kwikal ni usu nakash. Ayilembil asadining kand usu wa kuyibachik antu amubwambwila Nzamb. Kutal atutumbu, kubwak, maji, ulaj, kwitiy yom ya makasu, kwilej piur pa usu wakad kumekanang yidi niyawiy mitapu ya yom ya ayilembil. Ma buku, magazet, kutal atutumbu, ma filim, yipich, ni mas yikata kuyisangaresh ayilembil ap kuyisarumun. Kudi yishankur yivud ya kuyidil, mudi kupan milambu ya afu, misambu ya pa chidil, musambu wa kuvurik dichuku diafay muntu, yom yimusadiningau muntu ufishina, ni yishankur yikwau, yidi mu umwing nau ayilembil. Antu akat kusadinang nakash yom yilewishena papiminingau kusadin usu wa ayilembil.—Galatia 5:20; Kujingunik 21:8.

Shapitre 10, par. 10; Shapitre 16, par. 4

 27 UKALENG WA YEHOVA

Yehova udi Nzamb wa Dikand Diawonsu, ndiy watanga mangand mawonsu. (Kujingunik 15:3) Chawiy lel, ndiy mwin yom yawonsu ni ukwet want piur pa yitang yawonsu. (Kuseng 24:1; Isay 40:21-23; Kujingunik 4:11) Wateka yijil mulong wa yom yawonsu yatangay. Yehova ukwet kand usu wa kuyinkish antu akwau want. Tukat kupan ukwash ku ukaleng wa Nzamb pitumukatina ni kumuziyin.—1 Jinsangu 29:11.

Shapitre 11, par. 10

28 KUDIOSH MADIKAJ

Kudiosh madikaj ap divumu kudi kujip mwan wakad kal kuvadik kwa kwikatin. Chidiap mulong wa akisidan ap mulong wa mayej. Kudiokal dichuku dia kwimish, mwan udia mwivumu kadiap chikunku cha mujimbu wa makwend. Pakwez udi muntu panrend

Shapitre 13, par. 5

29 KUTEK MASH

Udi mutapu wa kwok wa chimwingang witina kutek mash ap chikunku chimwing cha yikunku yinying ya mash madioshinau mu mujimbu wa muntu ni kumatek mu mujimbu wa muntu mukwau ap kumutek muntu mash malamau kal. Yikunku yinying ya mash yidi maplasma, maglobil masuz, maglobil matok, ni maplaket.

Shapitre 13, par. 13

 30 DIPUP

Mu Bibil, dizu ‘kupup’ didiap ching mulong wa kupan chibau. Pakatau kutupup, atufundishining, atufumbining ni atubabeshining. Yehova kamekeshiningap chisum kudi antu akatay kupup. (Jinswir 4:1, 2) Yehova wayishila anvaj chilakej chiwamp nakash. Mutapu ukatay Yehova kumupup muntu uding uwamp ni usadining anch muntu wapupangau akata kupup kwinoku. (Jinswir 12:1) Yehova uyikatining antu end, ni ukat kuyifundish. Ukat kuyinkish yiyul yikutwisha kuyikwash kudiosh yitongijok yiyimp mu manangu ni kuyikwash chakwel ileja ni atongin pa yom yimusangareshina Nzamb. Kuyipup an kudi anvaj kurumburikin kuyikwash chakwel ijika mulong wak afanyidin kuziyil. Kupup kurumburikin kand kuyifundish kumukat Yehova, Dizu diend Bibil, ni kutesh yiyul yend.

Shapitre 14, par. 13

31 AYILEMBIL

Adi aspiritu ayimp akad kumekan akweta usu kuyisutamu antu. Ayilembil adi angel ayimp. Pamubwambwilau Nzamb, angel inay ikala ayimp, ni akankuny end. (Disambishil 6:2; Jud 6) Amulondula Satan mu kumubwambwil Yehova.—Kuvurik Yijil 32:17; Luka 8:30; Midimu 16:16; Jakobu 2:19.

 Shapitre 16, par. 4