Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA CHIDIVU

Disudiel dia Mangand Didi Piswimp?

Disudiel dia Mangand Didi Piswimp?

1. Kwisu tukutwisha kwilej piur pa machuku ma kurutu?

WATESHINAP kal jinsangu ni watonginap kal anch: ‘Yom yipandaken kuyip nakash?’ Kudi mikadil yiletina ushon nakash ni ya chisum yikata kuyitongish antu avud anch tudi kwinsudiel ya mangand. Winou udi uyakin? Kudi mutapu wa kwijik yom yikushikena kurutu? Mwaning. Ap anch antu kakutwishap kulejan yikushikena kurutu, Yehova Nzamb ukutwish. Utulejin mu Bibil piur pa yom yikutusadinay ni yikusalay mulong wa divu mu machuku ma kurutu.—Isay 46:10; Jakobu 4:14.

2, 3. Yom ik yakimbau in kwilej a Yesu kwijik, ni Yesu wayakula mutapu ik?

2 Pitutangina mu Bibil piur pa disudiel dia mangand, chirumburikinap disudiel dia Divu, pakwez chirumburikin disudiel dia uyimp. Yesu wayileja antu anch Want wa Nzamb ukuyikel pa mangand. (Luka 4:43) In kwilej a Yesu akimba kwijik chisu chikweza Want wa Nzamb, ni amwipula Yesu anch: “Ov, chisu ik chikeza kushik yom yiney ap chijingidij ik chikeza kulejan chisu cha kushik kwey, ni cha disudiel dia mangand?” (Mateu 24:3) Yesu kayilejap dichuku dikushika yom yiney, pakwez wayileja yom yikushikena kurutu kwa disudiel dia mangand. Yom yalonday Yesu anch yikusadik, yawiy yimekena katat.

3 Mu shapitre winou, tukwisambin yom yimekeshina anch tushich chisu chidia piswimp ni disudiel dia mangand. Chakusambish, tukwet kuswir kwa kwilej piur  pa njit jasadika mwiur, chakwel tutwisha kujingunin mulong wak yom yidi kamu yiyimp panap pansh.

NJIT MWIUR

4, 5. (a) Yom ik yasadika mwiur kupwa kwa Yesu kwikal Mwant? (b) Kulondwish Kujingunik 12:12, chom ik chafanyina kusadik kupwa kwa kumudjibul Satan pa divu?

4 Mu Shapitre wa 8 twilejin anch Yesu wikala Mwant mwiur mu muvu wa 1914. (Daniel 7:13, 14) Mukand wa Kujingunik utulejin yom yasadika anch: ‘Njit jijim jamekana mwiur: Mikael [Yesu] ni angel end ading ni kurish nend nnak mujim [Satan], nnak mujim ni angel end warisha nau.’ * Satan ni ayilembil end akanganya njit ni ayidjubula pansh. Tong bil mutapu wasangarau angel! Chad yom ik yayishikena antu adia pa divu? Bibil walonda anch chikwikal chisu cha kanrumbangesh kudi antu a pa divu. Mulong wak? Djabul ukwet ujim nakash mulong, ‘wij kal anch kwamushal kal chisu chikemp.’—Kujingunik 12:7, 9, 12.

5 Djabul uletin nakash kamu karumbangesh pa divu. Ukwet ujim nakash mulong wij anch kwamushal kal chisu chikemp kurutu Nzamb amushesha. Tushinshikinany yalonday Yesu yikutwisha kushiken pa chirung cha machuku ma kwinsudiel.—Tal Mazu ma kwinsudiel 24.

MACHUKU MA KWINSUDIEL

6, 7. Yom ik tukutwisha kulond nlel piur pa njit ni nzal?

6 Njit. Yesu walonda anch: “Muchid ukez kurish ni muchid ukwau, want ukez kurish ni want ukwau.” (Mateu 24:7) Antu avud ayijipa kwi njit pa  chirung chetu kusutamu yirung yikwau mu rusangu ra antu. Rapor umwing udiokila ku Worldwatch Institute ulejen anch kudiosh mu muvu wa 1914, njit jajipa antu mamiliyon 100 ni kusut. Uvud wa antu afa mwi njit jinej wadinga tupamp tusatu kusutamu wa antu ajipau mwi njit jasadika pa chirung cha mivu 100 pakach pa muvu wa 1900 ni 2000 mudi ajipau pa chirung cha mivu 1900 yasambela. Tong bil pa runeng ni kusansan kwova mamiliyon ma antu mulong wa njit!

7 Nzal. Yesu walonda anch: “Kukez kikal kabwakat.” (Mateu 24:7, TMK) Ap anch angwiling yakudia yivud nakash nlel unou kusutamu machuku ma kwinyim, antu avud aburedin yakudia. Mulong wak? Mulong antu avud kakwetap nfalang ja kuland nich yakudia ap ndond ya kudim. Mamiliyar ma antu asadidining uvud wa nfalang mwinshin mwa dolar umwing pa dichuku. Organisation mondiale de la santé ulondin anch: mamiliyon ma an akat kufa muvu ni muvu, nakash mulong kakwetap yakudia yivud yifanyidina kulam mijimbu yau.

8, 9. Yom ik yimekeshina anch uprofet wa Yesu piur pa kuzal kwa divu ni mayej udi wakin?

 8 Kuzal kwa divu. Yesu walonda anch: “Kukez kikal kuzal kwa divu.” (Luka 21:11) Nlel kuzal kukash kwa divu kupandaken kusadik muvu ni muvu. Kudiosh mu muvu wa 1900, antu mamiliyon maad ni kusut afa mulong wa kuzal kwa divu. Ap anch tekinoloji ukwashin mulong wa kujingunin kurutu piur pa kuzal kwa divu, antu avud adandamedin kufa.

9 Mayej. Yesu wasambela kulejan anch kukwikal “yipupu.” Mayej makash mameken ni majipin antu avud pakad kulab. (Luka 21:11) Ap anch adokiter ilejin mutapu wa kwok mayej mavud, katwishinap kwok mayej makwau. Chakin kamu, rapor umwing urumburil anch muvu ni muvu, mamiliyon ma antu akat kufa ni mayej mudi mayej ma mwintul, malaria, ni kolera. Kimadiap ching kusu mayej minam bwat, mulong adokiter ajingunin mayej makwau 30 ma katat, ni mamwing pakach pa mayej minam, katwishinap kumwok.

 MUTAPU UKWIKALAU ANTU MU MACHUKU MA KWINSUDIEL

10. Mutapu ik umekenay 2 Timote 3:1-5 kwikal wakin nlel?

10 Mu 2 Timote 3:1-5, Bibil ulondin anch: “Machuku ma kwisudiel makez kwikal ma mar nakash.” Kambuy Paul walejana mutapu ukwikalau antu mu machuku ma kwinsudiel. Walonda anch antu akwikal

  • in kwikat ayinau

  • in kukat nfalang

  • in kuyibwambwil anvaj au

  • in kwishimek

  • akad kukatijan mu dijuku

  • akad kushimpish muchim

  • akwikal in chisum ni dizaz

  • in kwisangaresh ayinau Nzamb bwat

  • amekeshin mudi amukatin Nzamb pakwez alikin kumuziyil

11. Kulondulijan ni Kuseng 92:7, yom ik yikuyishikena antu ayimp?

11 Antu avud a ndond ushicha akwet yaku mudi yiney? Pa mangand, antu avud mwawiy mudiau. Pakwez Nzamb ukusal chom chimwing piur pa milong yiney. Ukanin anch: “Anch  antu ayimp avulijan mudi masuku, anch in kusal kuyip asapukap nchik, chidi kusu mulong wa kuyijiyish chikupu.”—Kuseng 92:7, NWT.

RUSANGU RUWAMP MU MACHUKU MA KWINSUDIEL

12, 13. Yom ik yitufundishinay Yehova mu machuku ma kwinsudiel?

12 Bibil wasambela kulond anch mu machuku ma nsudiel, mangand makwizul nich kusansan ni mar. Pakwez, Bibil ulondin kand anch kukwikal yom yiwamp.

“Chifanyidin Rusangu Ruwamp ra Want wa Nzamb ez arulejan bil ku mangand mawonsu.”—Mateu 24:14

13 Kutesh kurumburik kwa Bibil. Muprofet Daniel wafunda piur pa machuku ma kwinsudiel. Walonda anch: “Ronganyin rakin rikuvulijan.” (Daniel 12:4) Nzamb ukuyinkish antu end usu wa kutesh Bibil nawamp nakash kusutamu pakusambish. Yehova wasala chinech pakampwil kudiosh mu muvu wa 1914. Chilakej, watufundisha kal usey wa dijin diend ni chitongijok chend mulong wa divu pamwing ni uyakin piur pa difut, chikata kutushikenang pitukata kufa, ni divumbuk. Twilejin anch Want wa Nzamb wawiy ukutwisha kupwish milong yetu yawonsu. Twilejin kand mutapu wa kwikal nich musangar ni mutapu wa kushakam umusangareshina Nzamb. Pakwez chom ik chisadinau atushalapol a Nzamb ni yom yilejau? Uprofet ukwau utwakwil.—Tal Mazu ma kwinsudiel 21 ni 25.

14. Kwisu kulejenau rusangu ruwamp ra Want, ni anany arulejena?

14 Mudimu wa kulejan pa mangand mawonsu. Yesu walonda piur pa machuku ma kwinsudiel anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu.” (Mateu 24:3, 14) Rusangu ruwamp ra Want arulejen mu jingand 230 ni kusut ni mu mazu 700 ni kusut. Mwaning, pa mangand mawonsu, Atuman a Yehova adiokila “ku mangand  mawonsu, ni ku michid yawonsu” ayikwashin antu kutesh chirumburikina Want winou ni yom ukusala mulong wa antu. (Kujingunik 7:9) Asadin mudimu winou pakad difut. Ap anch ayikisin ni kuyizengol kudi antu avud, kwikil chom ap chimwing chikutwisha kwimik mudimu wa kulejan, mudi kamu mwalonday Yesu.—Luka 21:17.

UKUSAL NCHIK?

15. (a) Witiyijin anch tudi machuku ma kwinsudiel, ni mulong wak? (b) Yom ik yikuyishikena antu amuziyidina Yehova ni akad kumuziyin?

15 Witiyijin anch tudi mu machuku ma kwinsudiel? Uprofet uvud wa Bibil piur pa machuku ma kwinsudiel umeken kwikal wakin. Piswimp ap Yehova ukukwat mupak wa kwimik mudimu wa kulejan rusangu ruwamp, ni “disudiel” dikwez. (Mateu 24:14) Disudiel chom ik? Jidi njit ja Harmagedon, pakudioshay Nzamb uyimp wawonsu. Yehova ukumusadil Yesu ni angel end a usu mulong wa kumujiyish muntu mwawonsu ulikina kumuziyil Ndiy ni Mwanend. (2 Tesalonik 1:6-9) Kupwa kwa chinech, Satan ni ayilembil end kakuyidimbap kand antu. Ni awonsu akata kumuziyil Nzamb ni itiyina Want wend akuman anch yom yawonsu yashilayamu Nzamb yidi yakin.—Kujingunik 20:1-3; 21:3-5.

16. Mulong disudiel didi piswimp, ufanyidin kusal chom ik?

16 Mangand matakedinau kudi Satan akumashesh piswimp ap. Chidi cha usey nakash twiyipul anch: ‘Chom ik nifanyidina kusal?’ Yehova ukatin anch ey wileja yivud kusutin Bibil. Ufanyidin kwilej nich mushiku. (Yohan 17:3) Yikumangan ya Atuman a Yehova yidiaku rubing ni rubing mulong wa kuyikwash antu kutesh Bibil. Sal usu wa kuya ku yikumangan yawonsu. (Tang Hebereu 10:24, 25.) Anch yiwilejina yikubachikin ku kuswimp, kangal wov wom wa kuswimp. Piukusala  mwamu, ukukasikesh urund wey ni Yehova.—Jakobu 4:8.

17. Mulong wak antu avud akukashimuk pakushika disudiel?

17 Kambuy Paul warumburila anch disudiel dia uyimp dikwez chisu chakad antu avud kutongin, “mudi mukat kwezay mwij uchuku.” (1 Tesalonik 5:2) Yesu wasambela kulond anch antu avud akuvuramen chijingidij chimekeshina anch tudi mu machuku ma kwinsudiel. Walonda anch: “Yom yasuta pa chirung cha Nowa, yawiy kand yikeza kusut pa chirung cha Mwan a Muntu [ap mu machuku ma nsudiel]. Mu machuku mading Mabeb kand kal mashika, antu ading ni kudiang ni kuna, amakundj ni amband atijananga djat ni ku dichuku diandamay Nowa mu waat. Awiy kijikap chom chikushika djat ni pezina Mabeb mayijiyish awonsu shutit. Yom yiney yikez kwikal kand mwamu pa dichuku dikez kwezay Mwan a Muntu.”—Mateu 24:37-39.

18. Yesu watubabesha nchik?

18 Yesu watubabesha anch kangal twikal ni kampuw “mulong wa kwifund kudia, ap kukwachik maar, ap mulong wa yakamish ya mwom.” Walonda anch disudiel dikwez kapamp kamwing, “mudi mupit.” Walonda kand anch: “dikat kwez kudi antu awonsu a pa mangand.” Kupwa wawejinaku anch: “Chishany ku mes, lembilany yisu yawonsu chakwel wez urezikanyaku ku yom yiney yawonsu piyikumekana, chad wez wimanany kurutu kwa Mwan a Muntu.” (Luka 21:34-36) Mulong wak chidi cha usey kutesh kubabesh kwa Yesu? Mulong piswimp ap mangand mayimp ma Satan akumajiyish. Ching kusu antu itiyijinay Yehova ni Yesu awiy akupanda kwinsudiel ni kushakam chikupu mwi ngand yisu.—Yohan 3:16; 2 Pita 3:13.

^ par. 4 Mikael did dijin dikwau dia Yesu Kristu. Mulong wa jinsangu jikwau, tal amboku Mazu ma kwinsudiel 23.