Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM NI CHINAN

Ov, Nifanyidin Kwipan kudi Nzamb ni Kwimbatish?

Ov, Nifanyidin Kwipan kudi Nzamb ni Kwimbatish?

1. Chom ik ukutwisha kutong kupwa kwa kwilej buku winou?

WILEJIN uyakin uvud wa Bibil piwilejina buku winou, mudi kushilamu kwa Nzamb mulong wa mwom wa chikupu, mwikadil wa afu ni ruchingej ra divumbuk. (Mulej 9:5; Luka 23:43; Yohan 5: 28, 29; Kujingunik 21:3, 4) Pamwing ap wasambishin kal kukumangan ku yikumangan ya Atuman a Yehova ni witiyijin anch asadidin difukwil diakin. (Yohan 13:35) Pamwing ap wasambishin kal urund wa piswimp ni Yehova, ni wakwatin kal mupak wa kumusadin. Chawiy ukutwish kutong anch: ‘Chom ik nifanyidina kusal katat mulong wa kumusadin Nzamb?’

2. Mulong wak ikundj mwin Etiopi wakimba kutambul dibatish?

 2 Chawiy chatongay mwin Etiopi wa pa chirungu cha Yesu. Kupwa kwa Yesu kuvumbuk, Filip mwin kwilej wa Yesu wamufundisha ikundj winou. Filip wamuleja patok anch Yesu wading Mesia. Ikundj mwin Etiopi wakashimuka mulong wa yom yilejay ni walonda kapamp kamwing anch: “Pinap padi mem, ov kudi chom chikutwisha kwinkangesh am kutambul dibatish?”—Midimu 8:26-36.

3. (a) Mbil ik yapanay Yesu kudi in kwilejend? (b) Mutapu ik ufanyidinau kumubatish muntu?

3 Bibil ufundishin patok anch ang ukimbin kumusadin Yehova, ufanyidin kutambul dibatish. Yesu wayileja in kwilej end anch: “Yangany kudi antu a michid yawonsu, yikarumunany kwikal in kwilejam. Yibatishany.” (Mateu 28:19) Yesu waleta kand amwinend chilakej kusutil ku kutambul dibatish. Amwandjika mu mem wakabuj, kamuzizinap kusu mem pa mutu wend. (Mateu 3:16) Nlel unou anch mwin Kristu watambul dibatish, afanyidin kumwandjik mu mem wakabuj, ap kumwandjik mu mem jimu.

4. Dibatish diey dimekeshin ik kudi antu akwau?

4 Anch watambul dibatish, chimekeshin kudi antu akwau anch ukatin chakin kamu kwikal murund wa Nzamb ni kumusadil. (Kuseng 40:7, 8) Chawiy ukutwish kwiyipul anch: ‘Chom ik nifanyidina kusal chakwel nitambula dibatish?’

RONGANYIN NI RITIY

5. (a) Chom ik ufanyidina kusal chakusambish kurutu utambula dibatish? (b) Mulong wak yikumangan ya in Kristu yidi ya usey?

5 Kurutu kwa kutambul dibatish, ufanyidin kushiken ku kumwijik Yehova ni Yesu. Wasambishin kal kusal mwamu kusutil ku kwilej Bibil. (Tang Yohan 17:3.)  Pakwez kupwilap. Bibil ulondin anch chifanyidin “akwizwishany nich ronganyin” ra rusot ra Yehova. (Kolosay 1:9) Yikumangan ya Atuman a Yehova yikukukwash kwikal ni urund wa piswimp ni Yehova. Diawiy diyingishin dia usey kudi ey kukumangan ku yikumangan yiney pakad kujing.—Hebereu 10:24, 25.

Kurutu utambula dibatish, ufanyidin kwilej Bibil

6. Yom yinch ufanyidina kwijik piur pa Bibil kurutu utambula dibatish?

6 Mwaning, Yehova kakwitinap wijika yom yawonsu yidia mu Bibil kurutu utambula dibatish. Kamwitap ikundj mwin Etiopi kwijik yom yawonsu kurutu atambula dibatish. (Midimu 8:30, 31) Tukudandamen kwilej piur pa Nzamb chikupu. (Mulej 3:11) Pakwez mulong wa kutambul dibatish, ufanyidin kwijik ni kwitiy mafundish ma pa dishin madia mu Bibil.—Hebereu 5:12.

7. Dilejan diey dia Bibil diakukwashin mutapu ik?

7 Bibil ulondin anch: “Wakad ritiy muntu kakutwishap kumusangarish Nzamb.” (Hebereu 11:6) Chawiy ufanyidin kwikal ni ritiy kurutu utambula dibatish. Bibil utulejin anch antu amwing ading mu musumb wa Korint wa pakur atesha yom yayifundishau kudi in kwilej a Yesu ni, mudi chibudikin, “amwitiyija, chad ayibatish.” (Midimu 18:8) Chilik chimwing, dilejan diey dia Bibil diakukwashin kwikal ni ritiy mu kushilamu kwa Nzamb ni mu usu wa chakupesh cha Yesu, chikutwisha kutukwol ku chitil ni rufu.—Joshua 23:14; Midimu 4:12; 2 Timote 3:16, 17.

YILEJA ANTU AKWAU PIUR PA UYAKIN UDIA MU BIBIL

8. Chom ik chikukubachika uyileja antu akwau piur pa yom wilejina?

8 Piwilejina yom yivud yidiokila mu Bibil ni kuman  mutapu yikukwashina mu mwom wey, ritiy rey rikukasikan. Ukukat kuyilej antu akwau piur pa yom wilejina. (Jeremiy 20:9; 2 Korint 4:13) Pakwez anany ufanyidina kulej?

Ritiy rukukubachik kuyilej antu akwau yom witiyijina

9, 10. (a) Anany ukutwisha kusambish kulej yom wilejina? (b) Yom ik ufanyidina kusal anch ukimbin kulejan pamwing ni chikumangen?

9 Ukutwish kuyilej a mu dijuku diey, arund ney, amutej ney ap ambay ney a mudimu piur pa yom wilejina. Chiwapin, pakwez sal mwamu mu mutapu uwamp ni rukat. Kupwa, ukutwish kulejan pamwing ni chikumangen. Anch waman anch ukutwish katat kusal mwamu, ukutwish kwambamb ni Kaman wilejina ney Bibil ni kumulej anch ukatin kusambish mudimu wa kulejan pamwing ni chikumangen. Anch muntu ukufundishina waman anch ukutwish, ni anch ushich kukwatijan ni yijil ya mu Bibil, ukuyany kuyital amakurump aad a mu chikumangen.

10 Yom ik yikusadika ku chikumangen? Amakurump akwambamb ney mulong wa kuman anch uteshin ni witiyijin mafundish ma dishin ma Bibil, anch uziyidin ku yom yilondinay Bibil mu mwom wey wa dichuku diawonsu, ni anch ukimbin chakin kwikal umwing wa Atuman a Yehova. Vurik anch amakurump ayibangidin antu awonsu adia mu chikumangen, pamwing ni yey, chawiy kangal wov wom wa kwambamb nau. (Midimu 20:28; 1 Pita 5:2, 3) Kupwa kwa mambamb minam, amakurump akukwijikish anch ukutwish kusambish kulejan pamwing ni chikumangen.

11. Mulong wak chidi cha usey ukarumuka kurutu kwa kulejan pamwing ni chikumangen?

11 Amakurump akukurumburil anch kudi yom ufanyidina kuswimp kurutu kwa kusambish kulejan pamwing ni chikumangen. Mulong wak chidi cha usey uswimpa?  Mulong pituyilejina antu akwau piur pa Nzamb, tudi antimesh a Yehova ni tufanyidin kushakam mu mutapu wa kumulimish.—1 Korint 6:9, 10; Galatia 5:19-21.

KARUMUK NI DIOKAL KU YITIL

12. Mulong wak antu awonsu akwet kuswir kwa kukarumuk?

12 Kudi yom yikwau ufanyidina kusal kurutu kwa kutambul dibatish. Kambuy Pita walonda anch: “Karumukany, udiokalany ku yitil, wezany kudi Nzamb chakwel akulikishinany yitil yen.” (Midimu 3:19) Kukarumuk kurumburikin ik? Kurumburikin kwov ushon nakash mulong wa yom yawonsu yiyimp twasala. Chilakej, anch wading ni kusalang masandj, ufanyidin kukarumuk. Ap anch wasadin usu wa kusal yom yidia yiwamp nakash mu mwom wey, uchikwet kuswir kwa kukarumuk, mulong etu awonsu tusadining yitil ni tukwet kuswir kwa kumwit Nzamb atulikishina.—Rom 3:23; 5:12.

13. ‘Kudiokal ku yitil’ kurumburikin ik?

13 Chiwanyidin ching kusu kwau kwov ushon wa yom wasala? Bwat. Pita walonda anch chifanyidin kand “udiokalany ku yitil.” Chinech chirumburikin anch ufanyidin kulik yaku yiyimp yawonsu ya pakur ni kusambish kusal yom yidia yiwamp. Chilakej, tong bil anch uyil kapamp ka kusambish mu weny kwi ndond kanang. Kupwa, wajingunin anch washadik kal, waya kal mwi njil yindjing. Chom ik ukusala? Pakad kwidjidjek ukwiman ni kuchirik, ni kupwa ukuya mwi njil yiwamp. Chilik chimwing, piwilejina Bibil, ukutwish kujingunin anch kudi yaku yimwing ap yom ufanyidina kuswimp mu mwom wey. Itiy ‘kudiokal ku yitil’—chirumburikin, kusal usu wa kukarumuk—ni kusambish kusal yom yidia yiwamp.

 KWIPAN KWEY AMWINEY

Washidinamu anch ukumusadin Yehova?

14. Mutapu ik ukwipana kudi Nzamb?

14 Chom chikwau cha usey chiufanyidina kusal kurutu kwa kutambul dibatish chidi kwipan kwey kudi Yehova. Anch wipan amwiney kudi Yehova, ukumulej mu malembil anch ukumwifukwil ching ndiy ni kusal rusot rend rikala chom cha usey mu mwom wey.—Kuvurik Yijil 6:15.

15, 16. Chom ik chikumubachika muntu chakwel ipana kudi Nzamb?

15 Kushilamu kumusadil ching Yehova kudi mudi kushilamu kusutish chisu chishadinaku mu mwom wey pamwing ni muntu ukatina. Tong bil anch ikundj ni mband akat kwendijadin mulong wa kwatijan. Anch ikundj wamwijik mband nawamp, ukumukat ni ukukimb kumwat. Ap anch winou udi mupak umwing ukash, ikundj ukwitiyin chisend chinech mulong umukatin mband.

16 Piwilejina piur pa Yehova, ukushiken kumukat ni ukukimb kusal usu wa kumusadin. Chinech chikukukasikesh kumulej mu malembil anch ukumusadin. Bibil ulondin anch muntu mwawonsu ukatina kumulondul Yesu ufanyidin “kwidiul amwinend.” (Marko 8:34) Chirumburikin ik? Chirumburikin kumuziyil Yehova chakusambish mu mwom wey. Chikatinay Yehova chidi cha usey nakash kusutamu maswir mey ni yitongijok yey.—Tang 1 Pita 4:2.

KANGAL WOV WOM WA KUKANGANY

17. Mulong wak antu amwing alikin kwipan ayinau kudi Yehova?

17 Antu amwing alikining kwipan kudi Yehova, mulong oviling wom anch kakutwishap kulimish kushilamu  kwau kwa kumusadin. Kafanyidinap kwau kwov wom wa kumunenganesh Yehova, ap kutong anch, anch alik kwipan kudi ndiy, Yehova kakuyichindinap uyimp usadinau.

18. Chom ik chikukukwasha kupwish wom win wawonsu wa kumurumbukin Yehova?

18 Rukat rey mulong wa Yehova rikukukwash kupwish wom win wawonsu wa kumurumbukin. Mulong umukatin, ukusal usu wey wawonsu mulong wa kulam kushilamu kwey kudi ndiy. (Mulej 5:4; Kolosay 1:10) Ukutongap anch chikasiken kamu kusal rusot ra Yehova. Kambuy Yohan wafunda anch: ‘Mulong rukat ra Nzamb rawiy er, chakwel tukulam yijidik yend; ni yijidik yend yikasikenap.’—1 Yohan 5:3.

19. Mulong wak ufanyidinap kwov wom wa kwipan kudi Yehova?

19 Chitinap kwikal uwanyidina chakwel wipana kudi Yehova. Kakutwitangap yom yikash yitwakad etu kutwish kusal. (Kuseng 103:14) Ukukukwash kusal yom yidia yiwamp. (Isay 41:10) Muchingejina Yehova ni muchim wey wawonsu, ni “Ndiy ukez katenchik jinjil jey.”—Jinswir 3:5, 6.

KWIPAN KWA PATOK MULONG WA DIPANDISH

20. Kupwa kwa kwipan kudi Nzamb, chom ik chikwau ufanyidina kusal?

20 Utongin anch ukutwish kwipan kudi Yehova? Kupwa kwa kwipan kwey kudi Yehova, ukwet kand chom chikwau cha kusal. Ufanyidin kutambul dibatish.

21, 22. Mutapu ik ukumekesha “kulond ku kan patok” mulong wa ritiy rey?

21 Ukumwijikish ntakel wa chisak cha amakurump a chikumangen chen anch wipanin kal kudi Yehova  ni ukimbin kutambul dibatish. Kupwa ntakel ukuyilej amakurump amwing mulong uchirikinany mafundish ma dishin ma Bibil. Ang aman anch uwanyidin, akukulej anch ukutambul dibatish ku chitentam cha Atuman a Yehova chezina kurutu. Ku chitentam, akukulej ni kukurumburil chirumburikina dibatish. Muntu usadina diskur ukulejan anch awonsu akutambula  dibatish akutwish kwakul ku yipul yaad yikwipulay. Yakul ku yipul yiney, kudi “kulond ku kan patok” mulong wa ritiy.—Rom 10:10.

22 Chawiy ukutambul dibatish. Akukwandjik mu mem ey mwawonsu wakabuj. Dibatish dikumekesh kudi  antu akwau anch wipanin kal amwiney kudi Yehova ni udi katat kaman wa Yehova.

CHIRUMBURIKINA DIBATISH DIEY

23. Kutambul dibatish “mu dijin dia Tatuku ni dia Mwan ni dia spiritu utumbila” chirumburikin ik?

23 Yesu walonda anch in kwilejend akuyibatish “mu dijin dia Tatuku, ni dia Mwan, ni dia spiritu utumbila.” (Tang Mateu 28:19, TMK) Chirumburikin ik? Chirumburikin anch wij ulabu wa Yehova ni chisend cha Yesu mu chitongijok cha Nzamb ni spiritu utumbila udi usu wa Nzamb usadidinay mulong wa kuwanyish rusot rend.—Kuseng 83:18; Mateu 28:18; Galatia 5:22, 23; 2 Pita 1:21.

Mwin kwilej Bibil wipanin kudi Nzamb mu malembil

24, 25. (a) Dibatish dimekeshin chom ik? (b) Chom ik tukwambambina mu shapitre wa nsudien?

24 Dibatish dimekeshin chom chimwing cha usey nakash. Anch akwandjik mu mem, chirumburikin anch wafa kal, ap kulik yom yikur yiwadia kusal mu mwom wey. Anch watuntuk pampat, chirumburikin anch wasambish kal mashakamin masu mulong wa kusal rusot ra Nzamb. Chimekeshin anch ukumusadin Yehova kudiokal pinap. Vurik anch wipaninap kudi muntu, ap mu ditenchik kanang, ap ku mudimu. Wapanin mwom wey kudi Yehova.

25 Kwipan kukukukwash kupamish urund wey ni Nzamb. (Kuseng 25:14) Chirumburikinap anch muntu ukupand mulong watambwil kal dibatish. Kambuy Paul wafunda anch: “Sadilany dipandish dien nich wom ni kwakam.” (Filip 2:12) Dibatish didi kwau disambishin. Pakwez mutapu ik ukutwisha kushal piswimp ni Yehova? Shapitre wa nsudien wa buku winow ukwakul ku chipul chinech.