Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chom ik Chitufundishinay Bibil?

 SHAPITRE WA DIKUM

Uyakin Piur pa Angel

Uyakin Piur pa Angel

1. Mulong wak kwilej piur pa angel?

YEHOVA ukatin anch twijika yom piur pa dijuku diend. Angel adi chikunku cha dijuku dia Nzamb. Mu Bibil ayitazukin anch “an a Nzamb.” (Job 38:7, NWT) Yom ik yisadiningau angel? Mutapu ik wayikwashau antu pasak? Ni mutapu ik ukutwishau kutukwash nlel?—Tal Mazu ma kwinsudiel 8.

2. Kwisu kwadiokalau angel? Ni ayitanga inch?

2 Tukwet kuswir kwa kwijik kwisu kwadiokalau angel. Kolosay 1:16 utulejin anch kupwa kwa kumutang Yesu, Yehova ‘watanga yom yawonsu mwiur ni pansh kusutin kudi ndiy.’ Kuwejinaku ni angel. Ayitanga inch? Bibil ulondin anch kudi mamiliyon ni mamiliyon ma angel.—Kuseng 103:20; Kujingunik 5:11.

3. Chom ik chitulejina mukand wa Job 38:4-7 piur pa angel?

3 Bibil utufundishin kand anch Yehova watanga angel kurutu kwa kutang divu. Ova nchik pamanau divu? Mukand wa Job utulejin anch asangara nakash. Diading dijuku dia piswimp dimusadidina Yehova mu umwing.—Job 38:4-7.

ANGEL AYIKWASHINING ANTU A NZAMB

4. Mutapu ik twija anch angel ayibangidining antu?

4 Angel akat kuyibangin antu ni kubangin kand chitongijok cha Yehova piur pa antu ni divu. (Jinswir 8:30, 31; 1 Pita 1:11, 12) Kubwambwil kwa Adam ni Ev kwayovisha kuyip nakash. Oviling kand kuyip pameningau antu akat kumubwambwil Yehova. Pakwez anch muntu  wakarumuk ni wamuchirikin Nzamb, awiy akat kusangar nakash. (Luka 15:10) Angel ayibangidining nakash antu amusadidina Nzamb. Yehova ukat kuyisadin angel mulong wa kuyikwash ni kuyilam atushalapol end adia pa divu. (Hebereu 1:7, 14) El tushinshikin yilakej yimwing.

“Nzamb wam watuma [mwangel] wend wa mwiur kujik tun twa antambu.”—Daniel 6:22

5. Mutapu ik wayikwashau atushalapol a Nzamb a pasak kudi angel?

 5 Yehova wamutumina Lot angel aad mulong wa kumukwash ndiy ni dijuku diend kudiokal mu Sodom ni Gomor chakwel apanda. (Disambishil 19:15, 16) Kupwa kwa yitot ya mivu, amudjibula muprofet Daniel mu dibuku dia antambu, pakwez antambu kamusalap nayimp mulong “Nzamb . . . watuma [mwangel] wend wa mwiur kujik tun twa antambu.” (Daniel 6:22) Kupwa, padingay kambuy Pita mu rukan, Yehova watuma mwangel mulong wa kumubudish mu rukan. (Midimu 12:6-11) Angel amukwasha kand Yesu padingay pa divu. Chilakej, kupwa kwa kutambul dibatish, ‘angel amukwasha.’ (Marko 1:13) Kurutu kwa Yesu kufa, mwangel ‘wamukasikesha.’—Luka 22:43.

6. (a) Mutapu ik twija anch angel ayikwashining antu a Nzamb nlel? (b) Yipul ik tukwakula katat?

6 Nlel unou, angel kakuyimekenangap kand antu. Pakwez Nzamb udandamedin kuyisadin mulong wa kuyikwash atushalapol end. Bibil ulondin anch: “Mwangel wa [Yehova] ukat kujing nau awiy akata kumwov Ndiy wom ni kuyikamunin.” (Kuseng 34:7) Mulong wak tukwet kuswir kwa diking? Mulong tukwet akankuny akweta usu nakash ni akimbina kutusal nayimp. Akankuny inay awiy anany? Kwisu kudiokalau? Mutapu ik ukatau kusal usu wa kutusal nayimp? Mulong wa kwakul ku yipul yiney, tumanany bil mu wiswimp yom yasadika kupwa kwa kumutang Adam ni Ev.

AKANKUNY ETU AKAD KUMEKAN

7. Chom ik chasalau antu mulong wa makasu ma Satan?

7 Twilejin mu Shapitre wa 3 anch mwangel umwing wamubwambwila Nzamb ni wakimba kuyitakel akwau. Bibil umutazukin anch Satan Djabul.  (Kujingunik 12:9) Satan wakimba kand anch angel akwau amubwambwila Nzamb. Watwisha kumudimb Ev, ni kudiokal chisu chinicha wayidimba kand antu avud. Pakwez antu amwing, mudi Abel, Enok, ni Nowa, ashala ashinshamena kudi Yehova.—Hebereu 11:4, 5, 7.

8. (a) Mutapu ik wikalau angel amwing ayilembil? (b) Chom ik chasalau ayilembil chakwel apanda ku Mabeb?

8 Pa chirung cha Nowa, angel amwing abwambwila ni asha ndond yau ya mwiur ni eza kushakam panap pansh. Mulong wak? Bibil ulondin anch akata kwat amband. (Tang Disambishil 6:2.) Pakwez chadingap chiwamp kudi angel kusal mwamu. (Jud 6) Mudi angel inay ayimp, antu avud ikala niyawiy ayimp ni in chisum nakash. Yehova wakwata mupak wa kuyijiyish antu ayimp a ngand yakabuj ku mabeb. Pakwez wayipandisha atushalapol end ashinshamena. (Disambishil 7:17, 23) Chakwel apanda, angel ayimp achirika mwiur. Bibil uyitazukin angel ayimp inay anch ayilembil. Atonda kumulondul Satan mu wimbwambol, ni Djabul wikala mukurump wau.—Mateu 9:34.

9. (a) Chom ik chayishikena ayilembil pachirikau mwiur? (b) Chom ik chikwau tukwileja?

9 Mulong abwambwila, Yehova kitiyap anch ayilembil achirika mu dijuku diend. (2 Pita 2:4) Ayilembil katwishiningap kand kudjal mijimbu ya chiuntu, pakwez adandamedin kamu “kuyipumbol antu a mangand mawonsu.” (Kujingunik 12:9; 1 Yohan 5:19) El twileja mutapu utwishinau kuyidimb ap kuyipumbul antu.—Tang 2 Korint 2:11.

MUTAPU UYIDIMBINAU ANTU KUDI AYILEMBIL

10. Mutapu ik uyoziningau antu kudi ayilembil?

10 Ayilembil akat kuyidimb antu mu mitapu kushalijan. Anch muntu wikal mu umwing nau ayilembil, ukat  kwambamb nau amwinend ap kusutil muntu mukwau, mudi ngang ap mwin kupong. Kwambamb nau ayilembil akutazukin anch kwikal mu umwing nau ayilembil, ap anch yom ya ulaj. Pakwez Bibil utulejin anch tufanyidin kwiyep yom yisadidinau kudi ayilembil. (Galatia 5:19-21) Mulong wak? Mudi mutilingau mupit mulong wa koz annam, ayilembil niyau atiling mipit mulong wa kuyoz antu.—Tal Mazu ma kwinsudiel 26.

11. Kubwak chom ik, ni mutapu ik tufanyidina kwiyep mupit winou?

11 Umwing pakach pa mipit yiney udi kubwak. Kudi kusadin usu wa ulaj mulong wa kusambel kwijik yom yikusadika kurutu ap kujingunin yom yakad kwijikan. Muntu ukutwish kusal mwamu kusutil ku kutal atutumbu, kwijik yom ya kurutu, kutal kart ni kwijik yikushikena, kusadin dibuj dia kristal, ap kutal mifund ya mu chikas. Antu avud atongining anch yom yiney yidiap kwau yiyimp, pakwez kimwauyap. Yidi yiyimp nakash. Chilakej, Bibil ulejen anch yom yiney ayitakedin kudi ayilembil. Mu Midimu 16:16-18 alejen piur pa “chilembil wamwinkishanga [changadim] usu wa kubwak” mulong wa “kubwak yikweza kurutu.” Kupwa kwa kumudiosh chilembil winou kudi kambuy Paul, changadim washadisha usu wa kubwak nich yom ya kurutu.

12. (a) Mulong wak chiyipin kwambamb nau afu? (b) Mulong wak atushalapol a Nzamb kafanyidinap kwiyandjik mu yishankur yidia mu umwing nau ayilembil?

12 Ayilembil asadidining kand mupit ukwau mulong wa kuyoz antu. Akat kusal usu mulong etu twitiya anch tukutwish kwambamb nau afu, ni afu adi kwi ndond kanang ni akutwish kwambamb niyetwetu ap kutusal nayimp. Chilakej, muntu ukweta murunend ap mwanamakwend wafila kal ukutwish kuya kupong kudi ngang mulong amutazukinay mwanamakwend wafila kal  chakwel ambamb nend. Mwin kupong ukutwish kumulej muntu winou yom yimusangareshina nakash piur pa murund nend ap mwanamakwend mu kwimburij dizu dia muntu wafa kal. (1 Samwel 28:3-19) Yishankur yivud ya yidil yimedining kand pa kulond anch afu adi ndond kanang. Pakach pa yishankur yiney padi misambu ya yidil, kuvurik dichuku diafay muntu, milambu ya afu, yom yimusadiningau muntu ufishina (uses), ap kand yom yikwau yisadiningau pa chidil. Anch in Kristu alik kwiyandjik mu yishankur ya angak, anamakwau ap antu a mu ul wau akutwish kuyilond nayimp, kuyisaal, ap kand kulik kuyikwash. Pakwez in Kristu ij anch afu kadiakwap. Tufanyidinap kwambamb nau, ni kakutwishap kutusal nayimp. (Kuseng 115:17) Chifanyidin kubabal. Kangal kupim kwambamb ni muntu wafila kal ap nau ayilembil, ni kangal kwiyandjik mu yishankur yidia mu umwing nau ayilembil.—Tang Kuvurik Yijil 18:10, 11; Isay 8:19.

13. Yom ik yatwishau kusal antu avud ading kuyovang ayilembil wom?

13 Ayilembil kakatap ching kuyoz antu, pakwez akat kuyovish kand wom. Nlel unou, Satan ni ayilembil end ij anch “chisu [chau] chashal kal chikemp” kurutu Nzamb ayidiosha panap pansh, chawiy chivudishinau uyimp kusut pakur. (Kujingunik 12:12, 17) Pakwez, antu avud ading kwovang wom wa ayilembil, nlel unou kakatap kand kuyov wom. Mutapu ik watwishau kulik kuyov ayilembil wom?

JIJAMAN NI LIK KUYOV AYILEMBIL WOM

14. Mudi in Kristu a mu mivu chitot yakusambish, mutapu ik tukutwisha kulik kwov wom wa ayilembil?

14 Bibil utulejin mutapu wa kujijaman ni mutapu wa kulik kuyov ayilembil wom. Chilakej, antu amwing  a mu musumb wa Efes ambambang nau ayilembil kurutu ileja uyakin. Mutapu ik wapwishau wom? Bibil ulondin anch: “Antu avud a pakach pau in ulaj akumangeja mikand yau, chad ayosh patok kurutu kwa antu.” (Midimu 19:19) Mulong akata kwikal in Kristu, ajiyisha mikand yau yawonsu yilondina piur pa ulaj. Chidi kand cha usey kusal mwamu nlel. Muntu win mwawonsu ukatina kumusadin Yehova ufanyidin kulik kutongin ni kusal yom yidia mu umwing nau ayilembil. Pakach pa yom yiney padi mabuku, majurnal, in kwilej atutumb, masengan, mas, ni yipich yisadinau in maji, ayilembil, ap usu wa kwijik nich yom yezina kurutu, ap yishimokishena. Padi kand yom yikwau yadjalangau antu mulong wa kwichidij ku yom yiyimp.—1 Korint 10:21.

15. Chom ik chikwau tufanyidina kusal mulong wa kumurishikish Satan nau ayilembil end?

15 Mu kusut kwa mivu kupwa kwa in Efes kwosh mabuku mau ma ulaj, kambuy Paul wafunda anch adandamena “kurish” ni “yizwepwepu yikweta ukash.” (Efes 6:12) Chakin, ap anch osha mabuku mau, ayilembil ading ching kupim kuyisal nayimp. Chom ik chikwau chafanyinau kusal? Paul wayileja anch: “Tambulany kand rikibu ra ritiy, chakwel ukez kwakany [ap kwimik] nich jinseu jiyimp ja Satan jikweta kasu kakasidilauku.” (Efes 6:16, TMK) Mulong rikibu rimukwashining isalay kwichidij kwi njit, chilik chimwing, ritiy retu rikutwish kutulam. Anch tukwet kashinsh anch Yehova ukutwish kutulam, tukutwish kumurishikish Satan nau ayilembil end.—Mateu 17:20.

16. Mutapu ik tukutwisha kukasikesh ritiy retu mudiay Yehova?

16 Mutapu ik tukutwisha kukasikesh ritiy retu mudiay Yehova? Tufanyidin kutang Bibil dichuku diawonsu  ni kwilej mutapu wa kumuchingejin chakwel atuchidija. Anch tukwet kashinsh mudiay Yehova, Satan nau ayilembil end kakutwishap kutusal nayimp.—1 Yohan 5:5.

17. Yom ik yikwau yikutukwasha kwichidij kudi ayilembil?

17 Chom ik chikwau chading chifanyidinau in Kristu a mu Efes kusal? Ading mu musumb wizwila ni yom yidia mu umwing nau ayilembil. Chawiy Paul wayileja anch: “Lembilany yisu yawonsu.” (Efes 6:18) Ading afanyidin kwit ukwash wa Yehova chisu chawonsu. Chidi nchik piur petwetu? Niyetu tudi mu mangand mizwila ni yom yidia mu umwing nau ayilembil. Chawiy tukwet kuswir kwa kumwit Yehova ukwash wend, ni tufanyidin kusadin dijin diend pitulembila. (Tang Jinswir 18:10.) Anch twadandamen kumwit Yehova mulong atukola mu mipit ya Satan, Yehova ukwakul ku malembil metu.—Kuseng 145:19; Mateu 6:13.

18, 19. (a) Mutapu ik tukutwisha kuwin njit turishina ni Satan nau ayilembil? (b) Chipul ik chikwakulau mu shapitre ulondwilaku ou?

18 Anch twalik yom yidia mu umwing nau ayilembil twadia tusadina mu mashakamin metu ni kumuchingejin Yehova, tukutwish kumurishikish Satan nau ayilembil end. Tufanyidinap kuyov wom. (Tang Jakobu 4:7, 8.) Yehova ukwet usu kusutamu ayilembil. Pa chirung cha Nowa wayipupa, ni mu machuku ma kurutu ukuyijiyish. (Jud 6) Vurik anch, turishinap ayinetu mwi njit jinej. Yehova ukat kusadin angel end mulong wa kutulam. (2 Ant 6:15-17) Tufanyidin kwikal ni kashinsh anch ku ukwash wa Yehova, tukutwish kuwin njit turishina ni Satan nau ayilembil.—1 Pita 5:6, 7; 2 Pita 2:9.

19 Ap anch Satan nau ayilembil aletishin mar nakash, mulong wak lel Nzamb kayijiyishinap? Chipul chinech akuchakul mu shapitre ulondwilaku ou.