IN KRISTU ayinkisha mbil ya kusal musambu wa Chivurikish cha rufu ra Kristu. Musambu winou autazukining kand anch “yakudia ya Mwant.” (1 Korint 11:20) Musambu winou urumburikin ik? Chisu ik ni mutapu ik chifanyidina kuusal?

Yesu Kristu wasambisha musambu winou pa uchuku wa kuvurik Kusut kwa Yehova kwa in Yuda mu muvu wa 33 C.C. Kusut kwa Yehova adinga ni kukuvurik kapamp kamwing pa muvu, pa dichuku dia 14 dia ngond wa Nisan wa in Yuda. Chakwel kuchind mulong wa kushik pa dichuku dined dia ngond, chimeken anch in Yuda adinga ni kuchingel chirung cha ruvul wa nsudiel chikweta kulep kwa muten ni uchuku kwilikena. Dined diawiy dichuku diding piswimp asaa 12 a muten ni asaa 12 a uchuku. Musambu wa kusambish wa ngond musu piswimp nich chirung cha ruvul wa nsudiel chikweta kulep kwa muten ni uchuku kwilikena kukat kumekesh nsambishil ya Nisan. Kusut kwa Yehova kwasadikang kwinyim kwa machuku 14, kupwa kwa muten kwandam.

Yesu wasala musambu wa Kusut kwa Yehova nau apostol end, wamubudisha Yudas Isakariot, kupwa wasambisha musambu wa Yakudia ya Mwant. Yakudia yiney yaswinkana musambu wa Kusut kwa Yehova wa in Yuda ni chawiy chifanyidina kuusal ching kapamp kamwing pa muvu.

Rusangu ruwamp ra Mateu rilejen anch: “Yesu watambul dibot,  wayukish, wadiumbol; wadipan kudi in kwilej end walond anch: Tambulany, diangany; winou udi mujimbu wam. Ndiy wanon rupas, wapan kujikitish, wayinkish awiy walond anch: Nangany en awonsu; Mulong minam madi mash mam ma manswik mayichilau avud ku dijimangeshil [dilikishin, NW] dia yitil.”—Mateu 26:26-28.

Antu amwing itiyijin anch Yesu wakarumuna dibot kwikal mbij ja mujimbu wend ni nviny kwikal mash mend. Pakwez, mujimbu wa mbij wa Yesu wadinga kamu uwanyidin wawonsu papanay dibot dined. Ov, apostol a Yesu adia chakin kamu mbij jend ni kuna mash mend? Bwat, mulong chom chinech chela kwikal chisal cha muntu kudia mbij ja muntu ni kujiril chijil cha Nzamb. (Disambishil 9:3, 4; In Levi 17:10) Kwambatan nich Luka 22:20, Yesu walonda anch: “Rupas riner rawiy manswik masu ma mash mam, mawiy kamu madjishilau mulong wenen.” Ov, rupas riner rawiy rikala “manswik masu”? Chom chinech chitwishikinap, mulong manswik madi kwovijan, madiap chom kanang chimekena.

Chawiy, dibot ni nviny yawonsu yaad yidi yijingidij. Dibot didi chijingidij cha mujimbu uwanyidina wa Kristu. Yesu wasadila dibot diashalaku ku yakudia ya musambu wa Kusut kwa Yehova. Dibot adisala pakad chivish. (Kubudik 12:8) Bibil usadidil yisu yimwing chivish mud chijingidij cha chitil ap cha kwijond. Chawiy dibot diafanikesha mujimbu uwanyidina wapanay Yesu mud mulambu. Wadingap nich chitil.—Mateu 16:11, 12; 1 Korint 5:6, 7; 1 Pita 2:22; 1 Yohan 2:1, 2.

Nviny musuz wafanikesha mash ma Yesu. Mash minam mawiy matwishisha manswik masu. Yesu walonda anch mash mend michika mulong wa “dijimangeshil [dilikishin, NW] dia yitil.” Chawiy antu akutwish kumekan ku mes ma Nzamb kwikal akad yitil ni akutwish kwandam mu manswik masu nend Yehova. (Hebereu 9:14; 10:16, 17) Manswik minam, ap kwovijan, mayitwishishin in Kristu ashinshamena 144 000 kuya mwiur. Kwinikwa kwawiy kukezau kusadil mud ant ni in kupesh mulong wa chiyukish cha antu awonsu.—Disambishil 22:18; Jeremiy 31:31-33; 1 Pita 2:9; Kujingunik 5:9, 10; 14:1-3.

Anany afanyidina kudia ni kuna yijingidij ya Chivurikish? Chakin kamu, ching kusu antu adia mu manswik masu—charumburik anch, antu akweta ruchingej ra kuya mwiur—awiy afanyidina kudia dibot ni kuna nviny. Spiritu utumbila wa Nzamb ukat  kuyitiyijish antu inay anch ayitonda kal kwikal ant mwiur. (Rom 8:16) Adi kand mu manswik ma Want nend Yesu.—Luka 22:29.

Ov, chidi mutapu ik kud awiy achingejina kushakam chikupu mu Paradis pa divu? Aziyidil kwi mbil ya Yesu ni akat kukumangan ku Yakudia ya Mwant, pakwez awiy ading in kutal akweta kalimish, kakatap kudia ni kuna. Kapamp kamwing pa muvu kupwa kwa muten kwandam pa Nisan 14, Atuman a Yehova akat kusal musambu wa Yakudia ya Mwant. Ap anch antu alondina kwikal nich ruchingej ra kuya mwiur adi ching kusu tunan tukemp pa mangand mawonsu, musambu winou udi wa usey ujim kud in Kristu awonsu. Chidi chisu chikutwishau antu awonsu kutongijokin pa uman upandikena kujimb wa rukat ra Yehova Nzamb ni ra Yesu Kristu.—Yohan 3:16.