MUPROFET Daniel washakama mivu 500 ni kusut kurutu kwa kuvadik kwa Yesu. Ap mwamu, Yehova wamujingunina Daniel rusangu rikutwishisha kwijik muten ukezau kumuzizin Yesu many, ap kumutond, ikal Mesia, ap anch Kristu. Amuleja Daniel anch: “Chakwel wijika kurumburik kwa chom chinech, kudiokal pa chisu chilejenau anch akez kuchirish ni kutungiril Yerusalem, djat ni chisu chikushikay Mesia Ntakel, pakez kasut mbing sambwad, ni  pakez kusut kand mbing makum musamban ni jaad.”—Daniel 9:25, NW.

Chakwel kwijik muten ukushikay Mesia, tuswiridin chakusambish kwijik chisu chasambisha chirung chiyila djat ku kwez kwa Mesia. Kwambatan nich uprofet winou, chidi “kudiokal chisu chalejanau anch akez kutungiril ni kuchirish Yerusalem.” “Kudiokal chisu chalejanau” kwinoku kwasambisha chisu ik? Kwambatan nend mwin kufund Bibil Nehemi, dizu dined dia kuya kutungiril mbumbu ja Yerusalem diabudika “Mu muvu wa makum maad wa kuyikel wa Aritaserisis.” (Nehemi 2:1, 5-8) In kwilej rusangu ra muntu ashinshikidin anch muvu wa 474 K.C.C. wadinga muvu  wa kusambish wakabuj wa kuyikel kwa Aritaserisis. Chawiy, muvu wa makum maad wa kuyikel kwend wadinga muvu wa 455 K.C.C. Katat tukwet nsambishil ya uprofet wa Daniel piur pa Mesia, udi muvu wa 455 K.C.C.

Daniel ulejen kulep kwa chirung chiyila djat ku kwez kwa “Mesia, Ntakel.” Uprofet ujimbwil “mbing sambwad, ni mbing makum musamban ni jaad”—kujibombakesh pamwing jidi mbing 69. Chirung chinech cha muten chikwet kulep ik? Yikarumun yivud ya Bibil yilondil anch jinej, jidiap mbing ja machuku sambwad, pakwez mbing ja mivu. Charumburik anch, rubing ni rubing ridi ra mivu sambwad. Chitong chinech cha mbing ja mivu, ap anch yirund ya mivu sambwad, chadinga chijiken nakash kud in Yuda a pakur. Chilikej, adinga nikusal musambu wa muvu wa Sabat pa muvu ni muvu wa sambwad. (Kubudik 23:10, 11) Chawiy, mbing 69 ja mivu jikwet uvud udiokila ku mivu 7 tupamp 69, ap uvud wa mivu 483.

Chitufanyidina katat etu awonsu kusal chidi kuchind. Anch twachind kudiosh mu muvu wa 455 K.C.C., mivu 483 yitushikijin ku muvu wa 29 C.C. Wawiy winou muvu wamubabatishau Yesu ni wikala Mesia! * (Luka 3:1, 2, 21, 22) Ov, kwinoku kudiap kuwanyin kujim kwa uprofet wa Bibil?

^ par. 2 Kudiosh mu muvu wa 455 K.C.C. djat ku wa 1 K.C.C. padi mivu 454. Kudiosh mu muvu wa 1 K.C.C. djat ku wa 1 C.C. padi muvu umwing (kwadingap muvu zero). Ni kudiosh pa muvu wa 1 C.C. djat ku wa 29 C.C. padi mivu 28. Kubombakesh uvud winou usatu pamwing utwinkishin uvud wa mivu 483. Yesu ‘amujipa’ mu muvu wa 33 C.C., pa rubing ra 70 ra mivu. (Daniel 9:24, 26) Tal shapitre wa 11 wa buku Prêtons attention à la prophétie de Daniel !, ni Étude perspicace des Écritures, Volim wa 2, paj wa 995-997. Mawonsu maad amapalangesha kud Atuman a Yehova.