Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

Mukand Udiokila ku Chisak Chitakedila

Mukand Udiokila ku Chisak Chitakedila

Anamakwetu Akaritiy:

Pitudia in kwifukwil a Yehova, tukatining Dizu diend Bibil. Tukwet kashinsh anch Bibil utulejining jinsangu jidia jakin, utwinkishin ukwash wakin mulong wa mashakamin, ni uman wa patok wa rukat ra Yehova piur pa antu. (Kuseng 119:105; Luka 1:3; 1 Yohan 4:19) Tukatining nakash kuyilej antu akwau piur pa uyakin wa usey udia mu Dizu dia Nzamb. Pa chinech, tukwet musangar nakash wa kubudish buku, “Malejan Ukutwisha Kwilej mu Bibil.” El amboku tukulej yom yikemp piur pa buku winou.

Buku winou amufundin, nakash mulong wa anikanch. Pakwez, ukutwish kand kuyikwash amakurump akatina kwilej yom yivud piur pa Bibil. Mulong Bibil udi buku wa antu awonsu, pakad kwidjidjek etu awonsu tukutaninamu mu kwilej malejan mend makutwisha kutukwash twikala ni musangar wakin.

Pakwetay jinsangu ja mu Bibil, buku winou ulejen jinsangu ja antu kudiokal payitanginau. Twasadin usu wawonsu mulong wa kulejan jinsangu ja mu Bibil mu mutapu wovikena ni uswapela, kulondwish mutapu jasadika.

Pakwez, buku winou ulejen yom yivud kusutamu kwau ching kurumburil jinsangu. Yom yifundinawamu ni yipich yidiamu ayitenchikin mu mutapu wa kumekesh anch jinsangu ja mu Bibil jisadikin katat ni mulong wa kwijik mutapu wading wiyovilau antu isambidinau.

Buku winou utukwashin kwijik mutapu ulondinay Bibil jinsangu ja antu—amuziyina Yehova ni alika kumuziyin. Ni utukwashin kwilejin ku yilakej yau. (Rom 15:4; 1 Korint 10:6) Buku winou amwangen mu yikunku 14. Kwinsambishin kwa chikunku chin chawonsu, kudi mazu mafundinau mu winswimp mulong wa malejan tukwileja.

 Anch udi nvaj, ufanyidin kutang dilejan pamwing ni mwaney ni kwisambin yipich. Kupwa en awonsu aad ukutangany mifund ya Bibil mudioshinau dilejan dined. Mukwasha mwaney amana kutanijan kudia pakach pa yom yitanginay mu Bibil ni malejan madia mu buku. Mutapu winou udi kand wa usey piumukwashina muntu mukurump chakwel ova kurumburik kwa uruu wa mu Bibil.

Tukwet ruchingej anch buku winou ukuyikwash antu awonsu akweta michim yiwamp—anikanch ap amakurump—kwilej Dizu dia Nzamb ni kusadin malejan minam mu mwom yau. Mudi chibudikin, akutwish niyau kumwifukwil Yehova mudi antu a mu dijuku diend dikatinay.

Akadivar nen,

Chisak Chitakedila cha Atuman a Yehova