Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 51

Kalal wa Amasalay ni Changadim

Kalal wa Amasalay ni Changadim

Kwading changadim mwin Isarel wadinga mwi ngand ya Siria kulemp ni kwol kwau. Amukwata mu dijuku diau kudi amasalay in Siria kupwa wikala kashalapol wa mband wa mukurump wa amasalay dijin diend Naaman. Changadim winou wading mwin kumwifukwil Yehova ap anch antu adingay nend kamwifukwilangap.

Naaman wading ni musong wa mak ni musong winou wamumesha mar nakash. Pakwez, changadim wakata kumukwash. Wamuleja mukajend a Naaman anch: ‘Nij muntu ukutwisha kumwok nfumwey. Mu Isarel mudi muprofet umwing wa Yehova dijin diend Elisha. Ndiy ukutwisha kumwok nfumwey.’

Mukajend wa Naaman wamuleja nfumwend yom yalondangay changadim winou. Naaman witiyija chakwel aya amumana Elisha kwol kwend mu Isarel. Naaman wakata anch Elisha amwaka mudi muntu wa usey nakash. Pakwez, pa ndond pa kwambamb nend amwinend, Elisha watuma kashalapol wend chakwel ambamba ni  Naaman ni kumulej anch: ‘Yang ukowala mu Wit wa Yordan tupamp sambwad. Chawiy ukuyerik.’

Naaman waziya nakash. Ni walonda anch: ‘Natongang anch muprofet winou ukutwish kwingok kusutil ku kumulembil Nzamb ni kwazuk chikas chend pa mayej mam. Pakwez, ndiy wanlej kal niya nowala mu wit wa mu Isarel. Tukwet mawit mawamp mu Siria. Mulong wak nikutwishap kuya kwinikwa?’ Naaman wajimana nakash ni wadiokal ku chikumbu cha Elisha.

Atushalapol a Naaman amukwasha kutong nawamp pa mulong winou. Amuleja anch: ‘Ukatinap kwey kusal chom kanang mulong uyerika? Yom yakulejangau kusal kudi muprofet oku yiswapel kwau. Mulong wak ulikina kusal mwamu?’ Naaman wayitesha. Kupwa waya ku Wit wa Yordan ni wowala tupamp sambwad. Powalay tupamp sambwad, Naaman watuntuka mu wit wayerikankal. Wasangara nakash ni wachirika kumujikitish Elisha. Naaman walonda anch: ‘Katat nijik kal anch Yehova ndiy Nzamb wakin.’ Mutapu ik utongina piur pa mutapu wiyovay changadim pachirikay Naaman wayerikankal?

“Ey wayileja kal anikanch ni an a ku mayel kukushiman ey.”—Mateu 21:16