Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 56

Yosias Wading Ukatin Yijil ya Nzamb

Yosias Wading Ukatin Yijil ya Nzamb

Yosias wikala mwant wa Yuda pawanyishay mivu chinan. Mu chirung chinicha, antu ading kusalang yom ya ulaj ni kwifukwil akish. Pawanyishay Yosias mivu 16, wileja mutapu wa kumwifukwil Yehova mu mutapu uwamp. Pakwez, pawanyishay kand mivu 20 wasambisha kubumwon akish ni yintamb yawonsu yading mwi ngand. Pawanyishay kand mivu 26, wakwata mupak wa kurijek tempel wa Yehova.

Mu tempel winou, mwin kupesh mujim Hilikija watanamu muvungur wa Yijil ya Yehova—pamwing ap muvungur winou aufunda kudi Moses. Shafan sekreter wa mwant wamutwadina Yosias muvungur winou ni wamutangina Yijil nich dizu dia piur. Pateshay Yosias yijil yiney, wajingunina anch antu adinga amubwambwidin kal Yehova mu mivu yivud. Mwant Yosias wamuleja Hilikija anch: ‘Yehova ujimen nakash mulong wetwetu. Yang wambamba nend. Yehova ukutulej yom tufanyidina kusal.’ Yehova wayakula kusutil muprofet mband Hulida palonday anch: ‘Antu a mu Yuda anlikin kal. Nikuyipup pakwez nikumupupap mwant Yosias mulong udi mwin kwikepish.’

Pateshay Mwant Yosia mazu minam, waya ku tempel ni wayitazuka antu awonsu a mu Yuda. Kupwa wayitangina antu awonsu a mu muchid Yijil ya Yehova nich dizu dia piur. Yosias ni antu awonsu akana anch akumuziyin Yehova nich muchim wau wawonsu .

 Muchid wa Yuda wasalangap musambu wa kusut kwa Yehova (Pasak) mu mivu yivud. Pakwez, patangay Yosias Yijil anch Musambu wa Pasak afanyidin kuusal mu muvu wawonsu, ndiy wayileja in Yuda anch: ‘Tukusal Musambu wa Pasak.’ Kupwa, Yosias warijeka milambu yivud ni watonda chisak cha antu in kuwang mu tempel. Chawiy, muchid winou wasala Musambu wa Pasak kupwa wasala kand Musambu wa Mabot Makad Chivish mu machuku sambwad. Musambu wa Pasak winou kausalap mudi mwausalau mu chirung cha Samwel. Yosias wakata chakin kamu Yijil ya Nzamb. Ukat kusanger kwilej piur pa Yehova?

“Dizu diey didi kutok ku mend mam ni chimunyik mwi njil yam.”—Kuseng 119:105, TMK.