Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 55

Mwangel wa Yehova Wamukinga Ezekias

Mwangel wa Yehova Wamukinga Ezekias

Want wa in Asiria wakwata michid dikum ya want wa Isarel. Pakwez, mwant Sanakerib wa Asiria wakata kukwat kand michid yaad ya want wa Yuda. Wasambisha kukwat misumb ya Yuda umwing ku umwing. Pakwez, musumb wakatay nakash wading musumb wa Yerusalem. Sanakerib kadingap wij anch Yehova wading ukingin musumb wa Yerusalem.

Ezekias mwant wa Yuda wamufuta Sanakerib nfalang jivud mulong asha musumb wa Yerusalem. Ap anch Sanakerib watambula nfalang jinej, ndiy wadandamena kutum amasalay end akweta usu mulong wa kurishikish Yerusalem. Antu a mu musumb ova wom mulong in Asiria asambisha kusej piswimp nakash ni musumb. Chawiy Ezekias wayileja anch: ‘Kangal wovany wom. In Asiria akwet usu, pakwez Yehova ukutusal anch twikala ni usu kuyipandakanamu awiy.’

Sanakerib watuma kashalapol wend, Rabishakey kuya ku Yerusalem mulong wa kuyiswingish antu. Rabishakey wimana pol pa musumb ni watoya anch: ‘Yehova kakukukwashanyap kwen. Pikil walikany Ezekias akudimbany. Kwikil nzamb ap umwing ukutwisha kukukingany mu makas metu.’

Pakwez, Ezekias wamwipula Yehova yom yifanyidinay kusal. Yehova wamwakula anch: ‘Kangal kwov wom mulong wa yom yalondinay Rabishakey. Sanakerib kakukwatap Yerusalem.’ Kupwa, Ezekias watambula mikand yadiokala kudiay Sanakerib. Mikand yiney yalonda anch: ‘Likap kwey. Yehova kakukupandishap.’ Ezekias walembila anch: ‘Yehova, tupandishaku amboku, chakwel antu awonsu ijika anch yeya Nzamb wakin.’ Yehova wamwakula anch: ‘Mwant wa Asiria kakwezap kukwat Yerusalem. Nikuking musumb wam.’

Sanakerib wading ni kashinsh anch Yerusalem ukwikal musumb wend. Pakwez, Yehova  watuma mwangel uchuku pa ndond padingau amasalay pol pa musumb. Mwangel winou wajipa amasalay uvud wa 185 000! Mwant Sanakerib washadisha amasalay end awonsu akweta usu nakash. Kamanap chom cha kusal ni wachirika kwol kwend ni usany wawonsu. Yehova wamukinga Ezekias ni wakinga kand Yerusalem mudi mwakanay. Anch niyey wading mu Yerusalem, wela kumuchingejin Yehova?

“Mwangel wa [Yehova] ukat kujing nau awiy akata kumwov ndiy wom ni kuyikamunin.”—Kuseng 34:7, TMK.

CHAKWEL WIJIKA YOM YIVUD

MAFILIM

‘Yehova, . . . Nikuchingejidin Ey’

Yom ik tukutwisha kwilejin ku chilakej cha Ezekias cha kumuchingejin kamu Yehova Nzamb?