Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 44

Tempel wa Yehova

Tempel wa Yehova

Pikalay Salomon mwant wa mu Isarel, Yehova wamwipula anch: ‘Chom ik ukatina chakwel nikwinkisha?’ Salomon wakula anch: ‘Nichid kwamu nsand, nijap kwamu yom nifanyidina kusal. Nginkishaku amboku manangu makutwisha kwinkwash nilama nich antu ey.’ Yehova wamwakula anch: ‘Mulong wangit kal anch wikala ni manangu, chawiy ukwikal mwin manangu nakash pa divu dia kabuj. Ukwikal kand mpich nakash. Ni anch wanziyin, ukusal mivu yivud.’

Salomon wasambisha kutung tempel. Wasadina utad wa or ni utad wa argent uwamp nakash, mabay ni mayal ma usey nakash. Tunan twa amakundj ni amband akweta ukaliweny awiy asala mudimu wa kutung tempel winou. Kupwa kwa mivu sambwad papwishau kutung tempel, afanyina kumupan kudi Yehova. Mu tempel winou mwading chintamb cha kupeshin padinga ya kupesh. Salomon wasa manungin mend kurutu kwa chintamb ni walembila anch: ‘A! Yehova tempel winou kadiap mujim nakash ap wa ufun nakash ku mes mey, pakwez, itiy amboku difukwil dietu ni tesh kulembil kwetu.’ Mutapu ik watongay Yehova piur pa tempel winou ni malembil ma Salomon? Papwishay kamu Salomon kulembil, kasu kadiokala mwiur ni kwosha mulambu wadinga pa chintamb. Yehova witiya anch tempel winou ikala wendendiy. Pamanau in Isarel yom yiney asangara nakash.

Mwant Salomon wijikana nakash mu Isarel mwawonsu ni ku jindond ja kulemp mulong wa manangu mend. Antu ezang kudi Salomon mulong wa kuyikwash kupwish milong yau. Ap mwant mband wa ku Seba weza kumupak ni yipul yikash. Pateshay yakul ku yipul yend, mwant winou walonda anch: ‘Kinadiap nitiyijina yom yawonsu yinatesha kudi antu mulong weyey, pakwez katat najingunin kal kamu anch ey ukwet manangu kusutamu yom yinatesha. Yehova Nzamb wey wakuyukisha kal.’ Mashakamin ma muchid wa in Isarel mading masangareshina. Pakwez, yom yaswipa.

‘Chakin kamu! Pinap padi chom chijim chimupandakenamu Mwant Salomon.’—Mateu 12:42